NUMERI 17 - Ombiimbeli Ondjapuki

Ondhimbo yaAaron

¹ Omuwa okwa lombwele Moses a ti:

² “Lombwela Aaisraeli ye ku pe oondhimbo omulongo nambali, ondhimbo yimwe oyomuwiliki mezimo kehe. Kondhimbo kehe nyola ko edhina lyamwene gwayo,

³ nedhina lyaAaron li nyola kondhimbo ndjoka yi lile po Aalevi. Otaku ka kala ondhimbo yimwe yomuwiliki mezimo kehe.

⁴ Dhi fala metsalihangano e to dhi tula komeho goshikethahangano, nkoka tandi ku tsakaneke.

⁵ Ondhimbo yomuntu ngoka nda hogolola, otayi tutuma. Pahedhi ndjika otandi mweneke omangungutulo gAaisraeli, sho haye ku tamanekele ndje.”

⁶ Moses okwe shi lombwele Aaisraeli, nomuwiliki gwezimo kehe mokati kawo okwe mu pe ondhimbo yimwe, adhihe kumwe omulongo nambali pamwe nondhimbo yaAaron.

⁷ Moses okwa tula oondhimbo adhihe metsalihangano komeho goshikethahangano shOmuwa.

⁸ Esiku lyanofu Moses sho a yi mo metsalihangano, okwa mono ondhimbo yaAaron, ndjoka ya kalele po ezimo lyaLevi, ya tutuma. Oya tsapuka noya sheneka oongala noyi ima oomandeli dho oloya.

⁹ Moses okwa kutha ko oondhimbo adhihe e te dhi ulukile Aaisraeli. Oya mono shoka sha ningwa po, nomuwiliki kehe okwa taamba ondhimbo ye.

¹⁰ Omuwa okwa lombwele Moses a ti: “Shuna ondhimbo yaAaron komeho goshikethahangano. Oyi na okupungulwa, yi kale elondodho kAaisraeli mboka ye na omangungutulo, opo yaa se.”

¹¹ Moses okwa ningi, ngaashi Omuwa e mu lombwele.

¹² Aaisraeli oya lombwele Moses ya ti: “Tala, otatu hulu po, tse atuhe tatu ka kana!

¹³ Shaa ngoka ta hedha ketsalihangano, ota si. Otwa uthilwa ano, tu se po atuhetuhe?”