Luk 1 - Nkome LP NT Portions

Kɛbɨnɛ kɛtɨbi

¹ Ayi Tiɔfilus: Bani ecii babum kɔrɛ kɔsɛ birɛ mbi bɛjaga na rɛkaba reyua.

² Barɛ birɛ mbi bani mbɛ barakafa bɨnɛ na kɛbɨnɛ kɛtɨbi bafɛ mɨnɛ bakanɛ mbu bɔjaga.

³ Ita Tiɔfilus, nŋua ɛkpaju, nkpɛbɛnɛ birɛ mbi oyiyioyiyi, nayɛ nsi etima emia kɔrɛ nkanɛ wu cɛrɛrɛ mbu bɔjaga, na rejubi rɛyɛ, Tiɔfilus.

⁴ Nsi mbu nsi na esikafa agbɨra kpikpɛ abaŋa mbu awufugɛ.

Onyiɛ-rotuma Ɛbrɔkpabi ɔkanɛ bɔma Jɔn oru-raku

⁵ Kegbu nci Hɛrɔd ɔra ɔkɨm rɔrɛ Judia, ɛfɔnɔ ɔjɔmɔ-kɔya ŋɔ oyinɛ ya Sɛkaria ŋɔ ɔra na ogbigbɛ bajɔmɔ-kɔya ŋɔ osi na kɛtɨbi Abija. Ɔwa ɔmɔ Elisabɛd osi na kɛtɨbi Ɛrɔn.

⁶ Abɛ iti ifa bara brika bani, mɨnɛ bayɔgɛ Ibina Ɛbrɔkpabi.

⁷ Bakifɔnɔ bɔ ndi Elisabɛd okuma, abɛ iti ifa batɨm kuguru.

⁸ Reyi dinɛ Sɛkaria na bajɔmɔ-kɔya mbɛ kɛbari kɛmɔ barabasiŋɛ rɛsɛ rika ɛtɔ-Ɛbrɔkpabi, ndi ɛra reyi rɛmɔ kɔjɔm-kɔya.

⁹ Kɛmanci rɛmaɛ bajɔmɔ-kɔya rɛyɔmɛ rɛjɛ, bara mɔ basɛ ndi batuba bomu agɨri ya ɔnɔ rika eku ɛtɔ- Ɛbrɔkpabi reyi kandi ɔkakɨm mamba. Kafaɛ ɔnɔ rika ɛtɔ-Ɛbrɔkpabi,

¹⁰ ndi kegbu kebigɛ nci bakɔkɨm mamba, bani mbɛ bawu njɔm kɔrɔbi babɨbi na rofia barɔbɔ njɔm.

¹¹ Onyiɛ-rotuma Ɛbrɔkpabi ɔmɨlɛnɛ ɔkɨmanɛ Sɛkaria, ɔbari mbari koruma kerigɛ, kwa ɔkɨma mamba.

¹² Ndi Sɛkaria ɔfɛ onyiɛ-rotuma Ɛbrɔkpabi, ɔtɨmɛrɛ mɨnɛ bofu bosi mɔ.

¹³ Nsu onyiɛ-rotuma Ɛbrɔkpabi ɔkanɛ mɔ ya, “Kafɔnɔ bofu, Sɛkaria! Ɛbrɔkpabi efugɛ njɔm ɔyɛ. Ɔwa ɔyɛ Elisabɛd kuɔma wu wɔ orumanɛ, mɨnɛ akɔkotu mɔ rirɨna ya Jɔn.

¹⁴ Bɔma bɔmɔ kubɔjɛ wu na bani ecii kɔrɔmetima.

¹⁵ Wɔ ɔyɛ ŋɔ kuotumɛ brika oni na jɛnɛ Ɛbrɔkpabi. Bɨnɛ reyi ndi bakɔma mɔ, ɔkaŋɔ kɛlɨŋa mantugi tumcinɛ, tum mmɛ mantigiritigiri, ndi nsɨm Keriragi-kɛkɔ kuotumɛ na amɔ bɨnɛ na kegbu nci bakɔma mɔ.

¹⁶ Amɔ kuosi bani ecii na Isɨrɛl baŋbɨnɛnɛ bakpɔgɛ Ɔkɨm-kaju Ɛbrɔkpabi ɛbɛ.

¹⁷ Kuɔbɛ Jisɔs rɔsɔ, mɨnɛ kuɔbɨnɛ Ɛlaija na kɛkɔ mɨnɛ na nsɨm. Kuocimɛ botima britɛ baŋbɨnɛnɛ bakɔnanɛ na bɔbabɛ. Mɨnɛ bani mbɛ babɔbajigɛ Ɛbrɔkpabi babɨnɛ kɔfɔdkanɛ rokpin rɔbɛ. Nanyɛnɛ Jɔn okotubɛrɛ bani ɔyɔgɛ Jisɔs.

¹⁸ Sɛkaria ɔsɨna onyiɛ-rotuma Ɛbrɔkpabi ya, “Nkosi nyan ŋbɨra mɔ gbambu kubɔjaga? Ntɨm, ɔwa omia mɨnɛ ɔtɨm.”

¹⁹ Onyiɛ-rotuma Ɛbrɔkpabi ɔfɛlɛ mɔ ramu ya, “Ami Gebɨrɛl, ŋɔ mbara na rɔsɔ Ɛbrɔkpabi, etigɛ mi ya nwukanɛ wu brika rotuma ndu.

²⁰ Nsu ndi abɔakinyiɛ na rotuma ndu, akocimɛnɛ nsɨl ta birɛmbi fɛb bɛjaga na kegbunci ɛyɔmɛ ɛjɛ.”

²¹ Bani mbɛ babɨbi na rofia bafumanɛ Sɛkaria babɨnɛ kodinɛ botima mbubosi ɔgarɛ osu rika eku ɛtɔ-Ɛbrɔkpabi.

²² Ndi ɔjaga, ɔra nsɨl, bagbɨra mɨnɛ ya ɔfɛ gba mbubocia mɔ rika eku ɛtɔ-Ɛbrɔkpabi. Okiyɛ ɔsɛremu, ekicia ɔwaga bɛ ibɔibɔ.

²³ Ndi kegbu Sɛkaria nci kɔya kojijɔmɔ na ɛtɔ-Ɛbrɔkpabi kɛyɛ, oruŋɛ ɔgbaŋɛ.

²⁴ Kegbu kekifɨranɛ ɔwa ɔmɔ Elisabɛd ɔsɔgɛ esukpa mɨnɛ okijaga osugɛ ɛtɔ rafɛ ratan.

²⁵ Ɔkanɛ ɛkpaju ɛmɔ ya, “Kunku na kekurɛ-kɛtɨbi Ɛbrɔkpabi ɛnyaŋɛ mi,” “Ɛsɛ mi na rɛsɛgɛlɛ bani.”

Bakanɛ bɔma Jisɔs

²⁶ Ndi esukpa Elisabɛd ɛra rafɛ ratabarataa, Ɛbrɔkpabi etigɛ onyiɛ-rotuma ɔmɔ Gebɨrɛl oruŋɛ Nasarɛd, rɔrɛ ndu rɔra na Galili.

²⁷ Etigɛ mɔ rotuma ɛyɛ wɔ owura ŋɔ ɔbɔokigigbɨra orumanɛ ŋɔ oyinɛ ya Meri, ŋɔ Josɛb ŋɔ osi na kɛtɨbi Ɔkɨm Debid otimanɛ kɔsa.

²⁸ Onyiɛ-rotuma Ɛbrɔkpabi oruŋɛ ɔkakɨmanɛ Meri, ɔyɛ mɔ, mɨnɛ ɔkanɛ mɔ ya, “Reŋunɛ retumɛ na awu! Ɛbrɔkpabi ɛra na awu mɨnɛ ɛjɛ wu ɔkɨmkɨm reŋunɛ!”

²⁹ Meri ɔtɨmɛrɛ na ramu ndɛ onyiɛ-rotuma Ɛbrɔkpabi ɔkanɛ mɔ mɨnɛ odinɛ etima na mbu ramu ndɛ rajaga.

³⁰ Onyiɛ-rotuma Ɛbrɔkpabi ɔkanɛ yɛ Meri ya, “Kafɔnɔ bofu, fɛŋɛ ajugi Ɛbrɔkpabi na kɛrɔ.

³¹ Kuasɔgɛ esukpa ama wɔ orumanɛ, mɨnɛ kuatu mɔ rirɨna ya Jisɔs.

³² Kuɔjaga robin mɨnɛ kubajia mɔ ya Wɔ Ɛbrɔkpabi nji ɛfa eciacia. Ɔkɨm-kaju Ɛbrɔkpabi kuesi mɔ ɔkɨm, aya oni kɛtɨbi kɛmɔ Debid ɔra;

³³ Mɨnɛ kuɔjaga robin na bani bamɔ Jekɔb najunaju, rɛkɨm rɛmɔ rɛfɔnɔ itɨm.”

³⁴ Meri ɔsɨna onyiɛ-rotuma Ɛbrɔkpabi ya, “Mbu bokosi nyan bɔjaga bɔjɛ mi? Ndi nkigigbɨra orumanɛ?”

³⁵ Onyiɛ-rotuma Ɛbrɔkpabi ɔfɛlɛ mɔ ramu ya, “Keriragi-kɛkɔ kukeriɛ kɛkɨmanɛ wu, mɨnɛ nsɨm Ɛbrɔkpabi kuotumɛ na awu. Wɔ ŋɔ akɔma kuotumɛ keriragi wɔ mɨnɛ kubajia mɔ ya Wɔ Ɛbrɔkpabi.

³⁶ Gbɨra mɨnɛ ya oni kɛtɨbi kɛyɛ, Elisabɛd, ŋɔ batuŋɛ bokuma, na bɔtɨma bɔmɔ ɔra kunku na esukpa rafɛ ratabarataa.

³⁷ Ndi gbabɔra mbu Ɛbrɔkpabi ɛbɔ ɛyɛŋɛ kosi.”

³⁸ Meri ya, “Ami ori Ɛbrɔkpabi, yɔgɛ mbu atanɛ abaŋa mi botumɛ kanya.” Mɨnɛ onyiɛ-rotuma Ɛbrɔkpabi osugɛ mɔ oruŋɛ.

Meri orua iriba ɛyɛ Elisabɛd

³⁹ Egbigbɨra kegbu Meri otubɛrɛnɛ ɛkpaju oruŋɛ fɨrifɨri na rɔrɛ ndu rɔra na rokuku na rɔrɛ Judia.

⁴⁰ Ɔkanɔ na ɛtɔ Sɛkaria ɔyɛ Elisabɛd.

⁴¹ Ndi Elisabɛd ofugɛ rɛyɛ Meri, wɔ ŋɔ ɔra mɔ na rejua ɔnyɨŋanɛ, mɨnɛ Keriragi-kɛkɔ kɛnɔ mɔ na ɛkpaju.

⁴² Elisabɛd ɔtanɛ na remu ndi retigiritigiri ɔjɛ Meri: “Reŋunɛ ndi Ɛbrɔkpabi ɛjɛ wu rɛfa reci ndi babanɛ fɛb! Mɨnɛ eŋunɛ wɔ ŋɔ akɔma.

⁴³ Bu na ɔkɨmkɨm gbambu bɔjaga bɔjɛ mi, ya minka Ɔkɔ-rokuku omia owu iriba ɛyɛ emia?

⁴⁴ Ɔmɛ ndi nfugɛ rɛyɛ rɛyɛ, wɔ ŋɔ ɔra mi rika rejua ɔnyɨŋanɛ na kɔrɔmetima.

⁴⁵ Ɛbrɔkpabi ɛjɛ wu reŋunɛ ndi afɔnɔ renyiɛ ya aji kuesi nansɛrɛ ɛkanɛ.

Ibɨna Meri nji rɛka

⁴⁶ Meri ya: “Na etima emia fɛb nka Ɛbrɔkpabi,

⁴⁷ mɨnɛ kɛkɔ kemia kɛfɔn kɔrɔmetima na Ɛbrɔkpabi ɔnyaŋɛ mi;

⁴⁸ Ekijiɛ mi, ori ɔmɔ ŋɔ rejubi. Bɨnɛ kunku aruŋɛ rɔsɔ bani kubajia mi ya reŋunɛ,

⁴⁹ ndi Ɛbrɔkpabi nji eciacia esi brika birɛ ɛjɛ mi, mɨnɛ rirɨna rimɔ riragaraga.

⁵⁰ Na kɛsɛ nancinɛ, ɛkɔgɛ bani mbɛ bajigɛ ji erun.

⁵¹ Ɛbrɔkpabi ɛbɛ nsɨm ɔmɔ ɛnyan bani ɛnyaŋɛ na retimanɛ rɛbɛ.

⁵² Ɛjam bakɨm mbɛ bafɔnɔ nsɨm na mankɔbi babɛ, mɨnɛ ebirɛ bani mbɛ batuɛnɛ botu.

⁵³ Ɛjɛ bani mbɛ bara na ŋbɔ brika birɛ, mɨnɛ ekpu ɔkɔogbuga ibɔibin.

⁵⁴ Ɛyɔgɛ ɔŋɔŋɔ ŋɔ ɛsa na britɛ bayua, mɨnɛ ewu kɔnyaŋɛ ori ɔmɔ Isɨrɛl.

⁵⁵ Ejinɛnɛ kɔkɔgɛ Abraham erun mɨnɛ na bani kɛtɨbi bamɔ fɛb najunaju!”

⁵⁶ Meri otumɛ na Elisabɛd rafɛ rataa nayɛ ɔŋbɨnɛnɛ ɔgbaŋɛ.

Bɔma Jɔn oru-raku

⁵⁷ Ndi kegbu bɔma kebigɛ, Elisabɛd ɔma wɔ orumanɛ.

⁵⁸ Bani mbɛ batumɛ bakunɛ mɔ na bani kɛtɨbi bamɔ bafugɛ kɛmanci Ɔkɨm-kaju ɔkɔgɛ mɔ boyi, abɛ mɨnɛ bafɔnɔ kɔrɔmetima na amɔ.

⁵⁹ Ndi wɔ ɔyɔmɛ rɛfɨn dinɛ, bawukosi mɔ bɔyɛmɛ aya Ibina Mosis ikanɛ. Batimanɛ kotumɔ rirɨna Sɛkaria, rirɨna mintɛ ɔmɔ.

⁶⁰ Nsu minka ya, kanyanɛ, ya, “Rirɨna rimɔ riyinɛ ya Jɔn.”

⁶¹ Bani mbɛ barakafa banyara, “Oni ɔra na kɛtɨbi kenua ŋɔ owunɔŋɔ yinɛ rirɨna kandi!”

⁶² Batuba yɛ nsɨbiri bajɛ mintɛ, basɨna mɔ rirɨna ndi oduga ya wɔ oyinɛ.

⁶³ Sɛkaria ɔsɨna ya bajɛ mɔ kɛkpa manrɛ mɨnɛ ɔrɛ ya, “Rirɨna rimɔ riyinɛ ya Jɔn. “Ɛkpaju ɛyɛbɛ fɛb!

⁶⁴ Kafa ɔmɛ Sɛkaria ɔbɨnɛ kɔtanɛ mɨnɛ ɔkaŋɛ Ɛbrɔkpabi.

⁶⁵ Bofu bosi bani fɛb mbɛ batumɛ bakunɛ mɔ na mbubɔjaga, mɨnɛ kɔtanɛ nku kɔbaŋa birɛmbi kokudkanɛ rɔrɛ Judia ndu rɔra birebirɛ rokuku.

⁶⁶ Oni naŋɔnɛ ŋɔ ofugɛ kɔtanɛ nku ɛkpaju ɛbamɔ, botima bɔbɨnɛ kɔcɛŋɛ bɛ ɛdɔ oni ŋɔ wɔ ŋɔ okotumɛ ara ɔtɨm, ndi ɛra jaɛ ya nsɨm Ɛbrɔkpabi ɔra na amɔ.

Sɛkaria ɔkanɛ mbu bɔkɔjagi

⁶⁷ Keriragi-Kɛkɔ keriɛ kɛnɔ Sɛkaria, mɨnɛ ɔbɨnɛ kɔkanɛ rotuma Ɛbrɔkpabi:

⁶⁸ “Yɔgɛ yu rɛka Ɔkɨm-kaju, Ɛbrɔkpabi Isɨrɛl! Ewu kɔnyaŋɛ banibamɔ mɨnɛ ɛsɛbɛ na botiga.

⁶⁹ Ɛjɛ yu ɔkɨmkɨm ɔnyaŋɛ yu, osi na kɛtɨbi ori ɔmɔ Debid,

⁷⁰ nansɛrɛ ɔsa ɔŋɔŋɔ na keriragi bakanɛ-rotuma bamɔ reyikandi

⁷¹ ya aji kuɛnyaŋɛ yu na ibɔ bani mbɛ rekpugabɛ, mɨnɛ na ibɔ oni naŋɔnɛ ŋɔ ɔbɔokiduga yu.

⁷² Ya aji kuɛkɔgɛ britɛ bayua erun mɨnɛ ɛyɔgɛ renyiɛ ndi aji ɛfɔnɔ na abɛ na rɛŋɨba.

⁷³ Renyiɛ ndi ɛsa ɔŋɔŋɔ na mintɛ oyua Abraham:

⁷⁴ ya aji kuɛsɛ yu na ibɔ bani ɛban bayua mɨnɛ esugɛ yu retuga ji rɛkafɔnɔ bofu,

⁷⁵ na esikafa retumɛ brika bani minɛ rɛbara kɔŋ na rɔsɔrɔmɔ na rayi rokpin rayua sɛnsɛn.

⁷⁶ Awu, wɔ omia, kubajia wu ya ɔkanɛ-rotuma Ɛbrɔkpabi nji eciacia. Kuabɛ Ɔkɔ-rokuku rɔsɔ, akayuɛ ɛyɔ ɛmɔ ayɔgɛ mɔ.

⁷⁷ Kuakanɛ bani bamɔ ya, kubasɔrɔ ara bagbɛ basugɛ bɛ na bobi bɔbɛ.

⁷⁸ Rɔraganɛ na koyibi etima Ɛbrɔkpabi kuroyuma rɔjɛ yu aya royi ndu rɔjaga na kaju.

⁷⁹ Mɨnɛ na ayu mbɛ rɛra na kerurɔbɔ, rɛjaɛ ndi kureyuma, kɔbabɛrɛ bɔkpaga boyua na ɛyɔreŋunɛ.”

⁸⁰ Jɔn ɔtɨma na ɛkpaju mɨnɛ na kɛkɔ. Otumɛ na kwancɛ bani ecii babɔbatumɛ ta reyindi ɔmɨlɛnɛ na eruma rofia na jɛnɛ bani Isɨrɛl.