Taytus 1 - Ŋwaale Feyin; Kelek Kefɛɛ

¹ Ŋwaale yin lòò se mɛ Bool. Mɛ lu wel ɛyfɛl nə Feyine gese lu wele ntum nə Jesus Christ, giamten ghel ghɛ Feyine nè choken ka ghene yɛ taa ɛytem yɛ ghene foon se Feyine, è gese keele əbluuy wɛ kum wen, è me yɛ chii ka ghel ə wen.

² Kii nɛ̂ kine nɛɛy ge ghene yɛ chiyte, ke se əbluuy ge ghene náà kiile ɛychii yɛ ɛy jia yî mɛy, yɛ Feyin wɛ lòó əb jia yia əbbuam nè yimen kak ghɛsen so se geese bome mbi.

³ Əbliy wɛ əb nè lɛmen kwɛn, əb nɛɛy ɛ́ se fekte sakghɛ əbjuŋ, ghele me keele kum ɛychii nɛ̂ yi. Lu ɛyfɛl nɛ̂ yin yɛ Feyin wɛ mboyse ə yɛsen viin ɛ mɛ keghoo, mɛ me se fɛle ka əb làmen.

⁴ Mɛ nyake se wɛ̀ Taytus, wɛ̀ lu wán ə wom se nkan bek ka ghɛsoo kiin ɛybeeme ɛymok. Bay Feyin ghene Christ Jesus wɛ mboyse ə yɛsen kó cham ɛysen ə yiɛ, fo əmnyiaŋ se wɛ̀.

Ɛyfɛl ə Taytus ɛ Klet

⁵ Mɛ nè lòò è vəse wɛ̀ ɛ Klet ge wɛ̀ mɛyse siyse əbnəə wɛ əb nè bɛɛsen fo, è gese chokte chɛɛ sɛ ndaa-Feyin ɛ ntɛk sejim kɛn ka mɛ nè dinen se wɛ̀ ge:

⁶ Chɛɛ ndaa-Feyin báà se lu se yɛ ki kenəə kɛ lòó ɛ́ gham wen se ten. Əb lu se yɛ ki kɛn əbvii əbmok, nɛ ghon ə wene lu ghel ɛbeemene, chɛfke wiy, kene yionen wiy.

⁷ Wele mbiy ɛ kenchintene ghel ɛbeemene fɛle nɛ lu se Feyine, nɛ əb báà se lu se yɛ ki kenəə kɛ lòó ɛ́ gham wen se ten. Əb báà se lu se yɛ ghaŋse əbghun, yaŋse yafse wiy ɛytem, kene nəə əmnduk nɛ əm koo, shike wiy ɛyshik, gese baŋe wiy ɛshiɛ əbfua.

⁸ Əb lu se yɛ fiisene ghel kejuŋ, gese koŋe kii dii kɛ luun kejuŋe. Əb lu se yɛ lu wel ghale ngeŋ ə wen, nɛɛye əbnəə wɛ́ titiye, chii ɛychii ɛylanene, gese tome kevəə yiote.

⁹ Əb lu se yɛ lu wel wɛ loote ghal kenəə kɛ́ əbluuye kɛ ɛ́ dinten se wen se me se yɛ lumse tetem ə ghel ɛlee nɛ̀ jii ɛyjuŋ nɛ̂ yin, gese dine jase ghel ghɛ ɛ́ tunsen keghene.

¹⁰ Mɛ suuy lɛ bek ge ghele lu se ɛydio ghɛ ɛ́ tunsenmen kenəə kɛ́ titiye, è se suuy nɛ lu əbnəə lólò, lɛɛse ghel, ɛ ŋaŋ ɛ ŋaŋ ghele Juus ghɛ ɛ́ benlen è se jumte Christ.

¹¹ Ke lu ɛ shii se chìle ghel ghin bek ge ghene bese tesaa ndaa nɛ̀ əbnəə wɛ ghene dinten nɛ wiy əbnəə wɛ́ titiye, dinte dì ka ɛ́ kiile əbkaa.

¹² Wele ntum əblee ɛ ghene məm nè lô suuy ge: Ghele Klet lu ghel əbbuam, lu ka nyamse əbkwak, kwene gese yiɛ se ŋaŋ.

¹³ Kenəə kɛ əb nè suuyen lu əbluuy. Lu bek kii nɛ̂ kine kɛ wɛ̀ luun se yɛ kwantene ghene ka ghene loote fo ɛytem se Feyine,

¹⁴ è jia yɛ yɛkte əbghun əmngaanme lólò mɛ máàn ghele Juus gese nɛ̀ tesak tɛ foon ghel ghɛ ɛ́ tunsen əbluuy.

¹⁵ Lu se ghel ghɛ ɛ́ luun ɛlanen nɛ əbnəə əbjime lu se ghene əblanen, dî nɛ lu se ghel ghɛ ɛ́ laanen wiy nɛ ɛ́ báà beeme, nɛ əbnəə əbjime befe befen se ghene bek ka ɛytof ə ghene nɛ̀ ɛytem ə ghene tiy nɛ lu əbnəə əbbee.

¹⁶ Ghene lóó ɛ́ yɛ bee ge ɛ́ ke Feyin, dî tunse Feyin ɛ ghene nchiine. Nchiine ə ghen nyiile, nɛ ghene yionen wiy, gese wiy kekwɛnten se nɛɛye kenəə kejuŋe.