Online Bible

Galashia 1 - Ŋwaale Feyin; Kelek Kefɛɛ

¹ Ŋwaale yin lòò se mɛ Bool wɛ wele ntum nə Jesus Christ. Báà tum wel mɛ, nè báà chok wel mɛ se wele ntum. Dî nɛ nè chok Jesus Christ mɛ ghene Bay Feyin wɛ əb nè losen wen se ɛykuo.

² Ghɛse ghone-nyii ghɛ ɛ́ luun fɛn naa ghel ɛjime tinse ɛychakte se əbnon ə ghel ɛbeemene wɛ əb luun ɛ Galashia.

³ Feyin wɛ Ba ə wɛsen ghene Báàba Jesus Christ ko cham ɛysen ə yɛn, è nɛɛy é ghɛn yɛ ki ɛytem ɛyzəətene.

⁴ Lu Christ wɛ əb nè foon ngeŋ ə wen se kuo bek əbnəə əbbee wɛ ghɛsen nè nɛɛyen è boyse ghɛsen fɛ ɛ́ yɛ nɛɛy əbnəə əbbee wɛ ghele nɛɛyen ɛ mbi lan. Əb nè nɛɛy nɛ lu kenəə kɛ Feyin wɛ Ba ə wɛsen nè kɛŋen.

⁵ Ghɛsen yɛ foo ɛykokse se Feyin əbliy əbjim. Amen.

Sakghɛ Əbjuŋ dì lu kɛn Əbmok

⁶ Mɛ lu nɛ̀ əbchíò əbyúméné se yɛn ge ghɛn lòó ɛ́ me yaŋse è yɛ vəse vi di wɛ əb nè choken ghɛn bek ɛysen yɛ Christ chammen se ghɛn, ghɛne sɛy benle è se jumte ɛybame sakghɛ əbchin,

⁷ báà se lu ge sakghɛ əbjuŋ əblee bo bɛɛy. Mɛ suuy lɛ bek ge ghel ɛlee lu ghɛ ɛ́ jefsen ghɛn, momse se yɛ bese sakghɛ əbjuŋ wɛ kum Christ.

⁸ Chèmè gwiy wel se ghɛs, kene nchiy-ndaa ə Feyin è yɛ fekte sakghɛ əblee se ghɛn wɛ əb yɛ lu ndun se wɛ ghɛs nè fekten se ghɛn, Feyine liŋ wen.

⁹ Ka ghɛs nè suuyen se mbiy, mɛ ko gese suuy. Lòò naa ndɛ, è yɛ fekte sakghɛ wɛ əb yɛ lu ndun se wɛ ghɛn nè kiilen, Feyine liŋ wen.

¹⁰ Ghɛne kwaate ge mɛ suuy lɛ bek ka mɛ kɛŋen ge ghele yɛ yɛn ge mɛ lu wel əbjuŋ-a? Ɛngaŋ, mɛ dì kɛŋe ge yɛ yɛne Feyin mɛ ge wel əbjuŋ. Moo mɛ suuy lɛ bek ka mɛ kɛŋen ge ghele yɛ yio əbjuŋ-a? Di kè lòò yɛ lu ge mɛ bo nɛɛy kenəə ge yi ka ghele yɛ yio əbjuŋ fene mɛ báà se lu wel ɛyfɛl nə Christ.

Nè chok Feyin Bool

¹¹ Ghone-nyii, mɛ kɛŋe ge ghɛn keele ge sakghɛ əbjuŋ wɛ mɛ fekten nè báà lòò nɛ lu se wel.

¹² Mɛ nè báà kiile se wel, nɛ nè báà dinte wel se mɛ. Mɛ dì nè keele əbnəə ten ka Jesus Christ nè dinen se mɛ.

¹³ Ghɛn nè lô se yio əbnəə wɛ mɛ nè momlen ɛ əbliy wɛ mɛ nè bo kiin ɛytem ɛ əbnəə ɛylak nə ghele Juuse. Mɛ nè nəkse kenone ghel ə Feyin ɛ jii ɛybee, mome se mɛyse ghene mɛysen.

¹⁴ Mɛ nè lô loole ɛ ndee ɛylak nə ghele Juus, fekɛɛy ə fome yakte fɛ wake wome. Mɛ nè lumè əbnəə ɛylak nə ɛbaa ə ghɛse naa se ŋaŋ.

¹⁵ Əbliye kwɛn, vi wɛ əb nè chamen ɛysen ə yom, è chok mɛ nɛ ɛ́ geese naa se bii mɛ,

¹⁶ me yɛn ge jofe ge yi din wán ə vi san ka mɛ yɛ fekte kenəə wan nɛ̂ ghan se əbtume. Ke nè kooy dî mɛ chèmè jia ndu se kiile ntef nɛ lu se wele-mesoŋ,

¹⁷ è chèmè jia se lu ge mɛ kok ɛ Jolesalem ge mɛ yɛn ghel ghɛ nè shiin ghɛ́ ntume se mbiy, mɛ nè lòò è ndu nɛ lu Alabia, è nɛy kase fiile gwiy se Damaskus.

¹⁸ Se lu ɛybame nguk setal, mɛ kok ɛ Jolesalem se ghane Bita, è chii ghɛse wen kɛn se ɛywɛy ɛybaa.

¹⁹ Mɛ nè báà yɛn wele ntum nə Jesus əblee ghɛy, buu kɛn Jɛms wɛ wán-no ə Báàba Jesus.

²⁰ Kenəə nɛ̂ kin kɛ mɛ nyaken se ghɛn lu nɛ mɛ báà se yia yian, Feyine ke.

²¹ Mɛ loo se fo, è ndu se əbtume Silia ghene Silisia.

²² Nè lu əbliy fo nɛ əbnone ghel ə Jesus Christ wɛ́ Judea chèmè nè bɛɛy ghàà tese yɛn mɛ.

²³ Ghene nè yio nɛ lu kɛn ge: Wel vi wɛ əb nè nəksen ghɛsen sɛ́y se ghane fekte ge ghele bééme kenəə kɛ əb nè kɛŋen se mɛyse mɛysen.

²⁴ Kii nɛ̂ kine nɛɛy ghene se foo ɛykokse se Feyine bek mɛ.

©CABTAL, 2012

Následuj nás:

Sponzorované odkazy

Reklamy