2 Bita 1 - Ŋwaale Feyin; Kelek Kefɛɛ

¹ Lu mɛ Simon Bita, mɛ fɛle se Jesus Christ, gese lu wele ntum nə wen. Mɛ nyake ŋwaale yin se ghɛn ghɛ ɛ́ foon ɛytem se Feyine kɛn ɛ jii yɛ ghɛs ghɛ ghɛ́ ntume foon ɛ ten, bek ka Feyin ə Fɛsen fɛ luun mboyse ə yɛsen Jesus Christ sɛɛ nɛɛy kɛn əbnəə wɛ əb luun ɛ titiy.

² Feyine ko loote cham ɛysen ə yɛn, è gese nɛɛy é ghɛn yɛ loote ki əmnyiaŋ bek ka ghɛn keen kenəə kɛ kum Feyin ghene Báàba ə wɛsen Jesus Christ.

Nè chok Feyin ghel ɛbeemene

³ Bek kediak ə wen ka Feyin, əb lu nɛ əb fomen əbfua əbjim wɛ ghɛsen shiin se yɛ chii ka ghel ə Feyin. Əbfua nɛ̂ vin əbjim lu wɛsene bek ka ghɛsen looten keen Christ. Əb nè chok ghɛsen ka ghel ə wen ɛ jii yɛ əb nè nɛɛyen ge ghɛsen yɛ yio əbjuŋ əbghaake nə wen gese ki ndee ɛyjuŋ.

⁴ Lu ɛ jii nɛ̂ ghan yɛ əb foonmen əbfua əbtaa se ghɛsen wɛ lòó ɛ́ jia yun nɛ̀ əbkaa, nɛ lu əbfua wɛ əb nè kaken ghɛsen so. Ghɛsen me se lu nɛ ɛ́ boymen se əbnəə wɛ əb besen ghel ɛ mbi fɛn wɛ əbghune yusen ghel ge ɛ́ yɛ momle, è me se ki ndee nɛ lu yɛ Feyin.

⁵ Ke me se lu ge ka ghɛn foonmen ɛytem se Feyine, ghɛn yɛ mom se yɛ lu ghel ɛjuŋe, se gise se kii nɛ̂ kine gese mome se yɛ loote ke Feyin;

⁶ gese mome se yɛ ghale ngeŋ ə sɛn, gese mome se yɛ kul ɛytem, gese mome se yɛ chii ka ghel ə Feyin;

⁷ gese mome se yɛ giɛknen, gese mome se yɛ koŋe wel əbjim.

⁸ Ghɛn lòò è yɛ nɛɛye əbnəə vin nduu kɛn ɛ mbiy, é əb nɛɛy é ghɛn jia yɛ lu ka ghele lólò, è jia lɛy se lólò ɛykeele yɛ ghɛn keen Báàba ə wɛsen Jesus Christ.

⁹ Dî nɛ ghɛn yɛ ke ge wel lòò è jia yɛ nɛɛye əbnəə vin, fene əb lu ka wel wɛ əb báà se loote yɛne əblik, kene kenfef gese lu nɛ əb lɛysenmen ge Feyine nè suumen mbee sɛ əb nè nɛɛyen.

¹⁰ Ke me se lu ghone-nyii ge, ghɛn yɛ mom ketaan nduu kɛn ɛ mbiy ɛ jii nɛ̂ ghan se din ge Feyine nè nɛɛy fo se choke ghɛn ka ghel ə ghi. Ghɛn lòò è yɛ nɛɛy dì, é ghɛn jia bo yî jas jii.

¹¹ Lu bek kii nɛ̂ kine kɛ Feyine náà mɛyse fo jii se ghɛn ge ghɛn lii se məme ɛysak yɛ ɛy jia yî mɛy yɛ luun yɛ Báàba ə wɛsen wɛ luun mboyse yɛsen Jesus Christ.

¹² Me se lu nɛ mɛ nɛ̂y yɛ tamte əbnəə vin se ghɛn əbliy əbjim chèmè lu ka ghɛn se keen əbghene, nɛ ghɛne teem ketaan ɛ əbluuy wɛ ghɛn kiin.

¹³ Mɛ yɛne ge ka mɛ bo chiin, ke lu ɛ titiy ge mɛ yɛ tamte əbnəə nɛ̂ vin se ghɛn, fɛ ghɛn lɛysen,

¹⁴ ka mɛ keen ge se moote lɛ, é mɛ vəse ketuu ntiɛ kin ka Báàba ə wɛsen Jesus Christ nè suuyen san.

¹⁵ Mɛ me se mome ketaan ge ɛ nɛ̂y loo lu nɛ mɛ vəsemen ketuu ntiɛ kin, é ghɛn yese è yɛ kuume əbnəə nɛ̂ vin əbliy əbjim.

Ghel ghɛ ɛ́ nè yɛnen əbghaake Jesus

¹⁶ Əbnəə wɛ ghɛs nè dinten se ghɛn kum ɛygwiy yɛ Báàba ə wɛsen Jesus Christe yî gwiy ɛ wen əbghaake lu nɛ ghɛs nè báà se suuye nɛ lu əbnəə wɛ ghele bomten nɛ̀ ɛytofe, ghɛs nè suuy əbnəə wɛ ghɛs nè yɛnen nɛ̀ ɛshiɛ ə ghɛse.

¹⁷ Bay Feyin wɛ əbfon əbghaken nè lô fo ɛykokse se wen ɛ əbliy wɛ əb nè suuyen ge: Vin lu wán ə wom wɛ mɛ koŋen, mɛ saŋle bek wen naa se ŋaŋ.

¹⁸ Ghɛs se ghɛse ngeŋse nè lô yio ka giɛ ə Feyine səəken se wen ɛ ɛyyio əbliy wɛ ghɛse ghene nè luun ɛ ketuu kfən nə Feyine.

¹⁹ Kii nɛ̂ kine nɛɛy ghɛs loote beeme əbnəə wɛ ghɛ ntum nə Feyine nè fekten. Ghɛn yɛn ge ghɛn lu nɛ ɛ́ loote fo shii ə wɛn se əbnəə nɛ̂ ghan bek ge əb lu ka kekaaken kɛ ke banen ɛ kelike nfiine se chin se ka əbtəke yio, é fenjese fɛ bvəse bvəse ban ɛ ghɛne tetem.

²⁰ Kenəə ketaa kɛ mɛ kɛŋen ge ghɛn keele lu ge kenəə wiy ɛ ŋwaale-Feyin kɛ ghɛ ntum nə Feyine nè suuyen nɛ lu ɛykwaate ə wel.

²¹ Ke lu dî bek ge ghɛ́ ntume nè báà se fekte əbnəə wɛ wɛ́ ghene, ghene nè fekte əbtaawe nə Keyioy Kelanene, fekte əbnəə wɛ əb lòòn se Feyine.