Romans 2 - Luaniua New Testament

Keakua mehakonukonu nakama hakoa

¹ Okou sekau kehakonukonu alakama. Keualoko okou ehakonukonu alakama, okou ehakonukonu okou soꞌokou. Maikinimea okou epena namea esala hoi. Ia kena okou mesehiala elave kehasao.

² Kakou emakino pela Keakua mehakonukonu hamaoni nakama kela epena namea esala.

³ Okou nikama oia. Okou ehakonukonu alakama, kena ikauhano kepena namea esala. Ea? Okou ehakaꞌoko pela Keakua mesehakonukonu okou?

⁴ Keakua emanava aloha okou, ia kena ememe halaoi okou. Ia okou esehihai nakipukipu kaualeꞌa aia la. Okou ikau kemakino pela Keakua ealoha okou, pela imea okou ikiaꞌi nakipukipu saꞌino okou na.

⁵ Ia okou ehakapanaka haeꞌo, kena sehihai iui ikaha ma nahaisala okou. Ia kena okou mehalono lihu haeꞌo i keaho kela Keakua meihuli aꞌe keloko aia la. Vahola, okou meꞌike Keakua ehakonukonu hamaoni naonohenua hakoa.

⁶ Kama la meau aꞌe nakama la hakoa nakuhana lakou, ikau ma hea lakou epena.

⁷ Alakama ekauhano kepena namea kaualeꞌa. Maikinimea nakama la hihai Keakua ihamaha lakou, kena isau lakou ialuna, pela lakou meola naualoko hamau. Kena Keakua meau aꞌe nakama la keola kela selavaa keoki.

⁸ Ia alakama emamaeꞌaa oia, kena sehihai ihalono nakakala hamaoni. Nakama la oikaukali namea saꞌino. Kena Keakua meloko haeꞌo i nakama la.

⁹ Naluꞌuna mekae aꞌe nakama hakoa kela epena namea saꞌino la, kena nakama la mehalono lihu haeꞌo. Namea la mekae aꞌe na{Jiu} imua, kena amekae aꞌe nakama enoho pouli hoi.

¹⁰ Emeia Keakua mehamaha nakama kela epena namea kaualeꞌa, pela nakama la menoho laoi. Namea la ekae aꞌe na{Jiu} imua, ia mekae aꞌe nakama enoho pouli hoi.

¹¹ Semea pela Keakua amesapai keonohenua aia la oia.

¹² Alakama semakino nakuaa Moses. Nakama la epena name sala, kena memake i nahaisala lakou. Ia alakama emakino nakuaa Moses. Nakama la epena name sala hoi, kena Keakua mehakonukonu nakama la i kevahi nakuaa la.

¹³ Nakama kela epena kaukali nakuaa la mekonu i namaisu Keakua. Ia nakama kela elono nakuaa la oia, ia sehimea ipena, nakama la esekonu.

¹⁴ Niaina ma nakama enoho pouli semakino nakuaa Moses, nakama la eailoa kepena kaukali nakuaa la. Niaina ma nakama la sepau nakuaa la, nakama la eailoa nakuaa lakou solakou.

¹⁵ Nakama la namakino avale hea ekonu, ia ma hea esala, maikinimea nakuaa la emoe iloko nahakumanava lakou. Ia kena nakama la emakino oia. Alaualoko nahakaꞌoko nakama la emea pela lakou epena namea ekonu. Ia alaualoko nahakaꞌoko nakama la emea pela lakou epena namea esala.

¹⁶ Namea la mehuli aꞌe i keaho kela Keakua mehakonukonu naonohenua hakoa. Vahola, Jesus Christ mehaꞌali aꞌe namea kela ehunaa lia iloko nahakumanava nakama hakoa. Ia anau ekaukaꞌu aꞌe nakama la hakoa nakakala nei.

Nakuaa na{Jiu}

¹⁷ Ia okou na{Jiu}, okou ekunaꞌi nakuaa Moses. Ia okou eahu maꞌokou keonohenua Keakua.

¹⁸ Okou emea ma okou emakino namea Keakua ehihai, maikinimea nakuaa na eaoaꞌo aku okou. Kena okou emea ma okou ehihai namea kaualeꞌa hoi.

¹⁹ Okou ehakaꞌoko pela maꞌokou elavaa kehakaꞌi nakama alemaka seni, ia ehakaꞌoko hoi pela okou ehau ma keahi kela ehamalama nakama enoho pouli.

²⁰ Ia okou ehakaꞌoko maꞌokou elavaa kepolopolo nakama evale, ia ma nakama kela sehimea ailoa. Maikinimea okou emakino nakuaa kela ehuli aꞌe keailoa hamaoni.

²¹ Okou eaoaꞌo alakama. Ia okea okou seaoaꞌo soꞌokou? Okou epolopolo alakama iseailalao. Ia okou soꞌokou eailalao oia.

²² Okou eme aꞌe alakama ikino naꞌavana lakou, ia okou soꞌokou sekino naꞌavana okou la. Okou ehanaꞌino nahakipua la. Ia okou eailalao namea iloko nahale aiku.

²³ Okou ekakala ahu pela nakuaa Keakua ekaualeꞌa. Ia keualoko okou esekaukali nakuaa la, okou emea keonohenua nosehamaha Keakua.

²⁴ Nakakala nei emau iho iloko kelauniu kapu, “Nakama enoho pouli esalu haeꞌo kemale Keakua, maikinimea naola okou esaꞌino.”

²⁵ Poi okou na{Jiu} ekaukali nakuaa, ame kaualeꞌa pela okou ehamakino nakapukapu nakamaliꞌi kanaka okou la. Ia poi okou sekaukali nakuaa la, okou ehau poi nakama enoho pouli kela sehamakino nakinokama lakou.

²⁶ Ia poi nakama enoho pouli la ehalono nakuaa, Keakua mehakaꞌoko pela ala nikama aia, ehau poi okou na{Jiu}.

²⁷ Okou emakino kelauniu nakuaa, kena ihamakino nakinokama okou la. Ia okou sekaukali nakuaa la hakoa. Nakama enoho pouli la sehamakino nakinokama lakou. Ia nakama la ekaukali nakuaa la, kena ehuli aꞌe pela okou esala.

²⁸ Niaina hekama ehamakino kinokama aia, kama na ame sehikama hamaoni Keakua. Maikinimea kama na ehamakino kinokama aia la oia.

²⁹ Ame kama na hekama hamaoni Keakua, kena keola aia mekonu. Keanana Kapu mehamakino kehakumanava aia. Ia semea pela kama na ekaukali nakuaa kelauniu oia. Niaina ma alakama sehamaha kama na, Keakua soia mehamaha kama na.