Mark 15 - Luaniua New Testament

Jesus imua Pilate

¹ Keualoko kahaka, namaakua hamakua, nakama polopolo nakuaa, nakama hakonukonu, ia ma alakama hamakua na{Jiu} la uoki keꞌuku. Kena nakama la esaisai nalima Jesus, ihakaꞌi kama la ikaha, noau aꞌe kama la ia Pilate.

² Kena Pilate uvasili aꞌe Jesus, “Aꞌoe o kekuꞌu na{Jiu}?” Ko Jesus ime aꞌe “Kena aꞌoe me mai na.”

³ Namaakua hamakua la enuku aꞌe Jesus.

⁴ Kena Pilate uvasili aꞌe kama la, “Aꞌoe elono nakama la ehai aku aꞌoe. Ia aꞌoe mesesui aꞌe nakakala nakama la?”

⁵ Ia Jesus sehikakala eme aꞌe, kena Pilate umasalo haeꞌo.

Keonohenua ehai aꞌe Jesus

⁶ Keualoko keꞌai kePasova, Pilate euhu hekama iloko kelokapu, kekama kela keonohenua la hihai aia ihaakana la.

⁷ Saika la, kela hekama emale ma Barabbas enoho iloko kelokapu. Kama la hekama kahao sala, ia kaa kama, ehau poi alakama i kelokapu la hoi. Nakama la nihapaa imua novuhu ma {kaumani} la.

⁸ Keonohenua la hakoa uo aꞌe ia Pilate, noainoa aꞌe kama la iuhu hekama iloko kelokapu la, ikaukali kipukipu aia imua.

⁹ Ko Pilate ime aꞌe nakama la, “Okou hihai anau ihaakana kekuꞌu na{Jiu}?”

¹⁰ Ia Pilate emakino pela namaakua hamakua eau aꞌe Jesus i aia, maikinimea nakama la esano haeꞌo.

¹¹ Kena namaakua hamakua la ehako aꞌe keonohenua la iainoa aꞌe Pilate ihaakana Barabbas ma lakou, seai Jesus.

¹² Kena Pilate evasili aꞌe keonohenua la, “Poi anau ehaakana Barabbas, anau meimea pehe kekama kela okou emale ma kekuꞌu na{Jiu}?”

¹³ Ko nakama la ihaio aꞌe, “Kii kama na iluna {kolosi}.”

¹⁴ Ia Pilate uvaꞌai aꞌe, “Hesala pehe kama nei epena?” Ia keonohenua la hakoa ehaio hamaloa, “Kii kama na iluna {kolosi}!”

¹⁵ Pilate ehihai keonohenua la ihihia hakoa, ia kena kama la uhaakana Barabbas, kena ime aꞌe napulepule aia la ilili kia Jesus. Kena Pilate eau aꞌe Jesus i napulepule la io nokii kama la iluna {kolosi}.

Napulepule la kousua Jesus

¹⁶ Napulepule la eko Jesus ihakaꞌi iloko kehale Pilate (emale ma Praetorium), kena ianaa aꞌe napulepule la iꞌuku hakoa.

¹⁷ Kena nakama la eꞌahu aꞌe pamalo ekea malama iluna Jesus,*f27* kena ipenapena kehau manamana nohakau aꞌe iluna pohoulu kama la.

¹⁸ Kena ikakala kokousua aꞌe, “Hamaha kekuꞌu na{Jiu}.”

¹⁹ Ia kena nakama la eko kelaꞌau ilili kia pohoulu Jesus, kena ikokousua aꞌe, ia sasavale aꞌe kama la, kena ikoukuli ilalo nohamaha aꞌe kama la.

²⁰ Kulana nakama la nioki kekokousua aꞌe Jesus, nakama la eui keauꞌahu ekea la ikaha, kena iꞌahu muli aꞌe naheaꞌu aia la, ia kena ihakaꞌi kama la nokii iluna {kolosi}.

Jesus ukii iluna {kolosi}

²¹ Keualoko la, hekama emale ma Simon ehaele iloko Jerusalem. Kama la hekama kemakaꞌina Cyrene, kamana Alexander laua ma Rufus. Napulepule la ekaohi kama la, kena ime aꞌe kama la iamo {kolosi} Jesus.

²² Nakama la ehakaꞌi Jesus i keꞌina emale ma Golgotha. (emale ma, keꞌina naivi napohoulu.)

²³ Kena nakama la eau aꞌe Jesus ke{uaen} ehilo ma kelo manoni*f28* iunu, ia kama la sehiunu.

²⁴ Kena napulepule la ukii Jesus iluna {kolosi}, ia kena ikahao huhu kehaku imakino lakou oai kekama meiko naauꞌahu aia la.

²⁵ Keualoko kesivo kahaka, napulepule la ukii Jesus iluna {kolosi},

²⁶ kena ikakaa nakakala nei, KEKUꞌU NA{JIU}, ihuli aꞌe keonohenua la hea kama la esala.

²⁷ Napulepule ukii koꞌolua nakama ailalao iluna na{kolosi} hoi, nokuu kapili aꞌe Jesus; kama i kevahi laua, kena kelaa kama i kevahi selaua.

²⁸ Ia kena alakama uhakaꞌoko pela Jesus hekama kahao sala hoi. Ehau poi kelauniu kapu nikakaa mai.

²⁹ Vahola, keonohenua la uo halaꞌa kapili keꞌina Jesus ekii la, kena ihaloko aꞌe naꞌalemaka lakou, kena ikakala hamemea aꞌe Jesus ma, “Aꞌoe emea maꞌoe elavaa keseu hale kapu la, kena iloko koukolu naaho, aꞌoe elavaa kehakuu muli.

³⁰ Kena konaꞌi soꞌoe. Kuu iho ikaha ma {kolosi} na.”

³¹ Namaakua hamakua, ia ma nakama epolopolo nakuaa la eveuveꞌu solakou, “Kama la elavaa kekonaꞌi alakama, ia selavaa kekonaꞌi soia.

³² Amea kama la keMesaea hamaoni, kekuꞌu kela Israel, kama la elavaa kekuu iho ikaha ma {kolosi} la, kena makou mehakina i aia.” Kena koꞌolua nakama kela ekii iluna na{kolosi} kapili Jesus la ekakala lihu aꞌe ia Jesus hoi.

Jesus umake

³³ Kulana kelaa la kea, kelaa la upouli nokae kekolu keiahi.

³⁴ Keualoko la, Jesus uanaa hamaloa ma, “Eloi Eloi lama sabatani?” Eme pela, “KauAkua, KauAkua. Okea aꞌoe ekiaꞌi anau?”

³⁵ Alakama keonohenua la elono kama la nianaa, kena ime aꞌe, “Halono, kama la eanaa aꞌe Elijah.”

³⁶ Kena hekama keonohenua la ukele nohasuu halevaꞌa iloko ke{uaen} emala, kena isai kemaka kelaꞌau, kena ihakuu aꞌe ma imiki Jesus ke{uaen} la. Alakama eme aꞌe, “Hakali imaka. Elijah amehamai nokuli kama la ikaha ma {kolosi} la.”

³⁷ Jesus eanaa hamaloa, kena imake.

³⁸ Kena pamalo ekookoo iloko hale kapu la umasae ilakonu, eꞌamaka iluna, haele nosopo ilalo.

³⁹ Kama hamakua napulepule la ekuu imua {kolosi} la. Kama la eꞌike konu kemake Jesus, kena ime aꞌe, “Kama nei o kekama hamaoni Keakua.”

^40-41 Komaꞌi nahine ekuu hamao nomaka. Ala nahine kela nikonaꞌi Jesus, kena ikakaꞌa maia i Galilee, nokae Jerusalem. Kela Mary Magdalene, Mary kina James holiliꞌi laua ma Joses, Salome ia ma alahine hoi.

Joseph uko kinokama Jesus

⁴² Kulana keiahi keaho lima, keonohenua la ukanakana keꞌamaka keaho kapu.

⁴³ Vahola, kela hekama ekonu kahi iloko keukulana nakama hamakua na{Jiu} la ehaele nomaka Pilate. Kemale aia la Joseph, hekama kemakaꞌina Arimathea. Kama la enoho kali Keakua ihamai nohamakua kenoholana aia. Ia kama la esemakaꞌu keainoa aꞌe kinokama Jesus.

⁴⁴ Ia Pilate emasalo pela Jesus unamake avale. Ia kena kama la eanaa aꞌe pulepule hamakua la novasili aꞌe kama la keualoko hee Jesus umake.

⁴⁵ Ia keualoko Pilate ulono nakakala pulepule la, kena Pilate ume aꞌe Joseph iko kinokama Jesus la.

⁴⁶ Ia kena Joseph uhaele nosui pamalo vahonei, kena ikuli kinokama Jesus imini kama la ma pamalo la. Kena Joseph ehamoe kinokama Jesus iloko kelua haku kela nihaa i kevahi kuku la. Kena kama la ehakaꞌape aꞌe kehaku elahi nopui kokoꞌa kaluma la.

⁴⁷ Ia Mary Magdalene ia ma Mary kina Joses uꞌike keꞌina kela Joseph ehamoe kinokama Jesus la.