Mark 1 - Luaniua New Testament

John Baptist ekaukaꞌu

¹ Kenei o keꞌamaka iho kelono kaualeꞌa Jesus Christ, Kekama Keakua.

² Isaiah, kekama hakae nakakala Keakua la, ekakaa nakakala nei, “Anau ehaunalia iho kama hakae nakakala anau la imua aꞌoe, nokanakana keala aꞌoe.

³ Kela hekama ekaukaꞌu i keꞌina kukuaha ma, ‘Kanakana keala Kealiꞌi ihamai valuna. Ia velevele keala aia la ikonu.’ ”

⁴ John Baptist ehasula iho i keꞌina kukuaha, nokaukaꞌu aꞌe keonohenua la penei, “Kiꞌe ikaha ma nahaisala okou, kena anau mehaauꞌau kapu okou. Kena Keakua mesolo nahaisala okou la ikaha.”

⁵ Hakoa nakama i Judea, ia ma nakama i Jerusalem uo nohalono John. Komaꞌi nakama ehaꞌali aꞌe nahaisala lakou, kena John ehaauꞌau kapu nakama la iloko kevai ke{liva} Jordan.

⁶ Napamalo John ehili nahuluhulu na{kamelo}. Kana kaukuu keꞌili kemanu. Naꞌai aia la nakama kelauniu ia ma na{hani}.

⁷ John ekaukaꞌu aꞌe keonohenua la ma, “Kekama meihamai imuli anau la, ehananiu iluna anau. Anau sekau kesulu ilalo nohana nakapuae aia ehahao la ikaha.

⁸ Anau ehaauꞌau kapu okou i kevai oia, ia kama la meihaauꞌau kapu okou i Keanana Kapu.”

John ehaauꞌau kapu Jesus

⁹ Keualoko la, Jesus uhaele ikaha ma Nazareth, kemakaꞌina iloko Galilee. Kena iko John iapaꞌe nohaauꞌau kapu Jesus iloko ke{liva} Jordan.

¹⁰ Saika la oia, Jesus emasiꞌe iluna ikaha ma kevai la, kena uꞌike kevaelani ukalaꞌi. Kena Keanana Kapu la ulee iho iluna kama la poi helupe.

¹¹ Kena Keakua ekakala iho ikaha ma kevaelani ma, “Aꞌoe o kaukama. Anau ehaikama laoi aꞌoe. Ia anau hihai nakipukipu aꞌoe la hakoa.”

¹² Vahola oia, Keanana Kapu la uhakaꞌi Jesus iloko keꞌina kukuaha.

¹³ Kena kama la enoho i keꞌina la kipuhaa naaho, ikaoleole hia Satan. Namanu kakaloko enoho ilaa hoi, ia na{enselo} la eo aꞌe nokonaꞌi Jesus.

Jesus eanaa koahaa nakama memeiꞌa ikaukali aia

¹⁴ Kulana John Baptist nipono kia iloko kelokapu la, Jesus uhaele i Galilee nokaukaꞌu aꞌe kelono kaualeꞌa Keakua.

¹⁵ Jesus eme aꞌe, “Vahonei, Keakua mehamakua kenoholana aia. Kiꞌe ikaha ma nahaisala okou, kena hakina kelono kaualeꞌa Keakua.”

¹⁶ Keualoko Jesus nihaele vakai i Galilee, kama la eꞌike haihanau Simon laua ma Andrew epupui keupena. Koꞌolua la nikama memeiꞌa.

¹⁷ Kena Jesus eme aꞌe koꞌolua la, “Kaukali mai anau. Anau meaoaꞌo olua i kemamakau nakama.”

¹⁸ Vahola oia, koꞌolua la ukiaꞌi naupena laua la, kena ikaukali Jesus.

¹⁹ Kena Jesus ehanu aku noꞌike haihanau James laua ma John, nakama Zebedee. Nakama la onono naupena lakou la iloko kemonoui.

²⁰ Saika la oia, Jesus uanaa aꞌe hanau la. Kena iko James laua ma John ikiaꞌi kamana laua Zebedee iloko kemonoui la ma nakama heheaꞌu lakou la, kena ikaꞌa ma Jesus.

Jesus ehaise nakipua

²¹ Jesus ia ma nakama kaukali aia la uo i Capernaum. Kena keualoko keaho kapu, Jesus ehaele i hale loku noaoaꞌo keonohenua la.

²² Ia nakama la emasalo i keaoaꞌo aia la. Maikinimea Jesus seaoaꞌo poi nakama epolopolo nakuaa la. Kama la eaoaꞌo i namahi aia avale.

²³ Saika la, hekama ekau lia kipua saꞌino la eanaa aꞌe,

²⁴ “Jesus kekama Nazareth. Hea ilakonu kakou? Aꞌoe ehamai noseu makou? Anau makino i aꞌoe. Aꞌoe o kaukahi ekapu Keakua.”

²⁵ Kena iko Jesus ihamakaꞌu aꞌe nakipua la, “Sevaa. O ikaha ma kama na.”

²⁶ Kena kipua la usuꞌe mahi lo, kena iapihi kevalo aia nokele ikaha ma kaupeala la.

²⁷ Nakama la hakoa umasalo haeꞌo, kena ivasisili solakou, “Kenei hemea pehe? Keaoaꞌo vahonei la ehuli aꞌe namahi elahi. Kama la ekakala aꞌe nakipua saꞌino la, ia kena nakipua la ehalono i aia.”

²⁸ Kena kelono Jesus la upalalaha vave valoko Galilee.

Jesus ekonaꞌi komaꞌi nakama

²⁹ Vahola oia, Jesus uhaele ikaha ma hale loku la, ia James laua ma John ekaꞌa lakou. Kena nakama la uo nokae kehale Simon laua ma Andrew.

³⁰ Hinaona hine Simon la emoe i hale iluna kelomoena aia. Kena nakama la ekakala aꞌe Jesus ma, “Kehine na elavea kinoꞌo.”

³¹ Kena Jesus ehaele aꞌe nopiꞌi kelima kehine la ihamasiꞌe iluna. Vahola kehine la ukaualeꞌa muli, kena iau aꞌe naꞌai nakama la noꞌai.

³² Kulana kelaa la nisulu, keonohenua la ehakaꞌi aꞌe nakama lavea la, ia ma nakama eisi nakipua saꞌino la, io nomaka Jesus.

³³ Nakama kemakaꞌina la hakoa eo aꞌe nohaꞌuku imaka hale kehale Simon la.

³⁴ Kena iko Jesus iui namahana nakama lavea la, ia ihakui nakipua saꞌino la ikaha. Ia nakipua la namakino avale oai Jesus, ia kena Jesus epui nakipua la isekakala.

Jesus ekaukaꞌu i Galilee

³⁵ Jesus emahulu kahaka po nohaele i keꞌina sevaa noloku.

³⁶ Kena Simon lakou ma nakama iloko hale aia la uo nosee Jesus.

³⁷ Ia kulana nakama la elave Jesus, nakama la eme aꞌe, “Nakama hakoa esesee aꞌoe.”

³⁸ Kena iko Jesus ime aꞌe nakama la, “Kakou io i namakaꞌina kapili mai nokaukaꞌu ilaa hoi. Kenei hea anau ehamai.”

³⁹ Kena Jesus uhaele valoko Galilee nokaukaꞌu iloko nahale loku namakaꞌina la, kena ihakui nakipua saꞌino la ikaha.

Jesus ekonaꞌi kekama elavea kemahana ke{leprosi}

⁴⁰ Hekama elavea kemahana ke{leprosi} ehaele aꞌe nokoukuli imua Jesus, kena iainoa aꞌe, “Poi aꞌoe eaunahie, aꞌoe ukonaꞌi mai anau ikaualeꞌa.”

⁴¹ Kena iko Jesus ialoha kama la, kena iapaꞌe kelima aia nokaohi kama la, kena ime aꞌe, “Anau eaunahie kekonaꞌi aꞌoe ikaualeꞌa.”

⁴² Vahola oia, kemahana ke{leprosi} la uoki, kena kama la ukaualeꞌa.

⁴³ Jesus ehaunalia kama la, kena ikakala hamakaꞌu ma,

⁴⁴ “Aꞌoe isekakala aꞌe alakama hea anau epena. Haele nohuli aꞌe kinokama aꞌoe iꞌike kemaakua la, kena au aꞌe kehamalu aꞌoe la, ikau ma nakama umaakala muli, poi hea Moses nikakala mai, ihuli aꞌe keonohenua la pela aꞌoe ukaualeꞌa.”

⁴⁵ Ia kama la ehaele kakala oia, ihaꞌali aꞌe hea Jesus epena la. Ia kena Jesus uselavaa kenoho iloko namakaꞌina la. Ia niaina ma Jesus enoho i keꞌina sevaa soia, nakama i namakaꞌina la hakoa eo aꞌe nomaka aia.