Luke 1 - Luaniua New Testament

Luke ekakaa kelauniu keola Jesus

¹ Kama hamakua Theophilus. Komaꞌi nakama nikakaa nalauniu ihaꞌali aꞌe namea kela Jesus nihuli mai kakou.

² Ia nakama kela uꞌike hea Jesus nipena la uhaele kakala namea lakou uꞌike la. Ia nakama la ume mai kakou namea la hoi.

³ Anau hoi eaꞌo hapulu nakipukipu keola Jesus la hakoa. Ia kena anau ehakaꞌoko ikuꞌu konu nakakala keola kama la, ikakaa aku i aꞌoe namea kela kama la epena la,

⁴ imakino aꞌoe pela keaoaꞌo aꞌoe nilono la ehamaoni.

Ke{enselo} ekakala kehanau iho John

⁵ Keualoko Herod nikuꞌu iloko Judea, kela hekama emale ma Zechariah hemaakua iloko keukulana Abijah. Keꞌavana aia emale ma Elizabeth, hehine iloko kemanava Aaron.

⁶ Zechariah laua ma Elizabeth ukaukali kahi nakuaa Keakua, kena nikama ekonu kahi i namaisu Keakua.

⁷ Koꞌolua la umakua hakoa, ia sehikamaliꞌi, maikinimea Elizabeth epoꞌa.

⁸ Keualoko keukulana Abaijah la eko keloku iloko hale kapu la, Zechariah eheheaꞌu ma Keakua poi hemaakua.

⁹ Kenei kipukipu namaakua la. Nakama la ekahao nahaku ihilihili hemaakua ihaele iloko hale kapu nohaꞌaa ke{incense} iluna ke{olta}. Vahola oia namaakua la ukini Zechariah.

¹⁰ Ia keualoko kama la uhaele iloko hale kapu la nohaꞌaa ke{incense} la, keonohenua la eloku imaka hale.

¹¹ Zechariah ehaꞌa ke{incense} la, ia kena ke{enselo} Kealiꞌi ukuu aꞌe kevahi laua ke{olta} la.

¹² Ia keualoko Zechariah uꞌike ke{enselo} la, kama la eoho nomakaꞌu.

¹³ Kena iko ke{enselo} la ime aꞌe, “Zechariah. Aꞌoe isemakaꞌu. Keakua ulono naloku aꞌoe la. Ia kena keꞌavana aꞌoe la mehanau kamaliꞌi kanaka, kena uanaa kemale kama na John.

¹⁴ Keualoko la, aꞌoe mehihia lo, ia komaꞌi nakama mehihia hoi.

¹⁵ Maikinimea kama la mehananiu i namaisu Kealiꞌi. Keualoko kama la meihanau iho, Keanana Kapu meinoho ma kama la, ia kena kama la sekau keunu kealeve ma kevai emala.

¹⁶ Kama la mehakaꞌi komaꞌi nakama Israel Ivaꞌai muli Keakua, Kealiꞌi lakou.

¹⁷ Kama la meihamai imua Kealiꞌi, Ihuli aꞌe namahi Keanana Kapu, ehau poi Elijah. Iaoaꞌo nakamana ihaikama laoi nakamaliꞌi lakou la. Ia ipolopolo nakama ehakapanaka Ihalono nakakala makonu kela nakama ekonu kahi. Ia kena kama la mepolopolo keonohenua la ikanakana kehamai Kealiꞌi.”

¹⁸ Kena iko Zechariah ime aꞌe ke{enselo} la, “Anau amemakino pela nakakala aꞌoe na ehamaoni pehe? Anau umakua, ia keꞌavana anau la umakua hoi.”

¹⁹ Ko ke{enselo} la ime aꞌe, “Anau Gabriel. Anau ekuu imua Keakua. Kama la ehaunalia iho anau, nome aku aꞌoe nakakala kaualeꞌa nei.

²⁰ Halono mai. Aꞌoe sehakina hea anau ekakala aku aꞌoe. Ia kena aꞌoe meselavaa kekakala, haele nokae keaho kamaliꞌi na meihanau iho. Ia Keakua meikuꞌu saika aia meihuli aku pela nakakala anau nei ehamaoni.”

²¹ Vahola, keonohenua kela ehakali imaka hale la umasalo kenase Zechariah iloko kehale kapu la.

²² Ia keualoko kama la nihaele iho ikaha ma kehale kapu la, kama la uselavaa kekakala. Ia kena nakama la umakino pela kama la uisi keꞌike hakaꞌoko aia iloko hale kapu la. Kena Zechariah uhaiauna aꞌe nakama la, ia selavaa kekakala.

²³ Keualoko keloku la nimaseu, Zechariah uvaꞌai muli i kehale aia la.

²⁴ Kena imuli, keꞌavana aia la Elizabeth uhaikama. Kena kehine la emuni iloko kehale aia la kaulima namalama, sehaele imaka hale. Kehine la ekakala soia pela,

²⁵ “Imua, anau epoꞌa. Vahola, anau enapa imua namaisu keonohenua la. Ia vahonei Kealiꞌi ekonaꞌi anau.”

Ke{enselo} ekakala aꞌe Mary kela kehanau iho Jesus

^26-27 Elizabeth ukae kehakalunaoa namalama, kena Keakua ehaunalia iho ke{enselo} Gabriel nokakala aꞌe Mary, kaupu akea kela enoho i Nazareth, kemakaꞌina iloko Galilee. Kaupu la ehanoa ma kaupeala emale ma Joseph, hekama iloko keꞌaha kekuꞌu David.

²⁸ Ke{enselo} la uhaele iho nome aꞌe kaupu la, “Kealiꞌi elolosi laoi aꞌoe, kena inoho maꞌoe.”

²⁹ Ia Mary ukipuaina haeꞌo i nakakala ke{enselo} la, ia kena ihakekele kehakaꞌoko nakakala kama la emea pehe.

³⁰ Kena iko ke{enselo} la ime aꞌe, “Mary. Aꞌoe isemakaꞌu. Keakua melolosi laoi aꞌoe.

³¹ Halono. Aꞌoe meihaikama, kena mehanau kamaliꞌi kanaka, kena aꞌoe uanaa kemale kamaliꞌi na Jesus.

³² Kama na meihananiu, kena nakama hakoa meikapa kama na ma Kamaliꞌi Keakua ialuna. Keakua mekini kama na ime mo kuꞌu, ihau poi David, kipuna kama na imua.

³³ Kama na meihamakua iluna keꞌaha Jacob naualoko hamau, kena kenoholana aia la meiselavaa keoki.”

³⁴ Kena iko Mary ime aꞌe ke{enselo} la, “Anau kaupu akea, sehikama emomoe manau. Anau mehaikama pehe?”

³⁵ Ko ke{enselo} la ime aꞌe Mary, “Keanana Kapu meihaele iho nonoho maꞌoe, noau aku namahi Keakua. Ia kena kememea na ekapu, ia kena mekapa ma Kamaliꞌi Keakua.

³⁶ Halono. Kina makua aꞌoe la Elizabeth epoꞌa. Ia vahonei kama la uhaikama kamaliꞌi kanaka. Kenei kana hakalunaoa namalama kama la.

³⁷ Namea hakoa ehainahie Keakua.”

³⁸ Kena iko Mary ime aꞌe, “Anau o kaupu heheaꞌu Kealiꞌi. Keakua ihuli mai hea aꞌoe eme mai.” Kena iko ke{enselo} la uvaꞌai muli.

Mary ehaele nomaka Elizabeth.

³⁹ Keualoko la, Mary ehaele vave i kemakaꞌina kela ekuu iluna namouna i Judea,

⁴⁰ keꞌina kehale Zechariah. Mary ukae kehale la, kena ianaa Elizabeth, keꞌavana Zechariah la.

⁴¹ Keualoko Elizabeth nilono kenana Mary, kamaliꞌi iloko Elizabeth la ekasuꞌi. Kena Keanana Kapu enoho iloko Elizabeth.

⁴² Kena kehine la ukakala hamaloa aꞌe, “Aꞌoe ehakapu lia Keakua, elaꞌa iluna ma alakaupu. Ia Keakua mehakapu kememea kela aꞌoe mehanau la hoi.

⁴³ Aꞌoe o kina kauAliꞌi, kena anau emasalo pela aꞌoe ehamai nokakala kaua.

⁴⁴ Keualoko anau nilono kenana aꞌoe la, kememea iloko kemanava anau nei ekasuꞌi nohihia.

⁴⁵ Aꞌoe meihakapu lia Keakua, maikinimea aꞌoe ehakina pela Keakua meihuli aku hea aia nime aku aꞌoe la.” Magnificat

Mary ehamaha Keakua

Magnificat

⁴⁶ Kena iko Mary ihuhua, “Anau ehamaha Keakua.

⁴⁷ Ia anau ehihia, mai kama la ekonaꞌi anau.

⁴⁸ Kama la ealoha ia anau, mai anau kaupu heheaꞌu aia. Kena nakaukama hakoa meikakala pela kama la ehakapu anau.

⁴⁹ Kama la ehamakua, Kama la ehuli mai namahi aia. Kemale aia ekapu.

⁵⁰ Keakua ekonaꞌi nakaukama hakoa kela ehamaha i aia.

⁵¹ Kama la ehuli aꞌe namahi aia ihakui nakama eahu la ikaha.

⁵² Kama la ekuu iho nakama hananiu la, ia isau nakama moulalo la ialuna.

⁵³ Kama la ehanai hakaualeꞌa nakama haaloha, ia ihaise nakama haimoni la, sehimea au aꞌe.

⁵⁴ Kama la ealoha mai kakou keonohenua aia Israel, ikonaꞌi mai kakou, nakama heheaꞌu aia, naualoko hamau.

⁵⁵ Poi aia nikakala mai hamaoni nakipuna kakou imua, Abraham ia ma nahaimopuna aia la.”

⁵⁶ Kena Mary unoho ma Elizabeth nokae koukolu namalama, kena ivaꞌai muli kemakaꞌina aia la.

Kehanau John Baptist

⁵⁷ Keualoko Elizabeth nimamaoha, kama la ehanau kamaliꞌi kanaka.

⁵⁸ Nakama keuhale la ma nahaleaina aia la ulono pela Keakua ualoha kehine la, kena nakama la ehihia hakoa ma kama la.

⁵⁹ Keualoko kememea la ukae evalu naaho kemakua aia, nakama hamakua la eo aꞌe nohamakino kapukapu kememea la. Kena nakama la hihai isui kemale kamaliꞌi la Zechariah, kemale kamana aia la.

⁶⁰ Ia kina kamaliꞌi la Elizabeth eme aꞌe, “Seai. Kemale kama na John.”

⁶¹ Ia nakama la umasalo, kena ime aꞌe kehine la, “Sehikama iloko haleaina aꞌoe na esui kemale na.”

⁶² Kena iko nakama la ihaiauna aꞌe kamana kamaliꞌi la pela, “Kememea la meanaa ai?”

⁶³ Kena Zechariah uhaiauna aꞌe iau aꞌe hemea ikakaa, kena ikakaa nakakala nei, “Kemale kememea nei esui John.” Kena hakoa umasalo.

⁶⁴ Keualoko la, Zechariah ulavaa kekakala muli, kena iko kama la ihamaha Keakua.

⁶⁵ Ia nakama kemakaꞌina la umakaꞌu, kena kelono la upalalaha nokae alamakaꞌina iluna namouna i Judea hakoa.

⁶⁶ Nakama kela elono kelono la umasalo haeꞌo, kena ikakala ma, “Kamaliꞌi na mekipu pehe?” Maikinimea Keakua eau aꞌe kamaliꞌi la namahi aia.

Zechariah ehamaha Keakua

⁶⁷ Kena Keanana Kapu unoho ma Zechariah, kamana kela John, kena Zechariah ehakae nakakala Keakua nei,

⁶⁸ “Kakou ihamaha Keakua, Kealiꞌi nakama Israel. Maikinimea kama la uhamai nohakana keonohenua aia ikaha ma nahaisala lakou.

⁶⁹ Keakua ehaunalia mai kekama haimahi kekonaꞌi kakou. Hekama keꞌaha kela David, kekama heheaꞌu Keakua imua la.

⁷⁰ Keakua nime aꞌe nakama ekapu imua ihakae nakakala aia la pela

⁷¹ Aia mekonaꞌi kakou ikaha ma nakama haihai manava kakou, ikaha ma namahi nakama eliloko kakou la.

⁷² Keakua ealoha kakou, ehau poi aia nikakala aꞌe nakipuna kakou imua, ikaohi mau nakakala hamaoni aia ekapu la.

^73-74 Poi aia nime aꞌe Abraham, kipuna kakou la Pela aia meiko kakou ikaha ma namahi nakama haihai manava kakou, Isemakaꞌu kakou keheheaꞌu kahi maia.

⁷⁵ Ia kena naola kakou meikonu kahi, ikapu imua namaisu Keakua.” Kena Zechariah eme aꞌe kamaliꞌi aia la,

⁷⁶ “Kaukama, nakama hakoa meikakala pela aꞌoe ehakae nakakala Keakua ialuna. Aꞌoe mehaele imua Kealiꞌi, nopolopolo keonohenua la ikanakana kehamai aia,

⁷⁷ Imakino naonohenua pela aia meisolo nahaisala lakou ikaha, ikonaꞌi lakou iola.

⁷⁸ Keakua ealoha kakou, kena mehaunalia mai kelaa la nosopo aꞌe,

⁷⁹ Nohamasina nakama kela enoho ilalo kemalu kemake, Ihakaꞌi kakou i nakipukipu kenoho laoi.”

⁸⁰ Kena John esomo nomakua, kena ihanoakamai. Ia kama la enoho iloko keꞌina kukuaha, nokae keualoko aia mehakae nakakala Keakua i keonohenua Israel.