John 20 - Luaniua New Testament

Jesus uola muli

¹ Kahaka po keaho kela kapu, Mary, kehine kemakaꞌina Magdala, ehaele keꞌava noꞌike kehaku epui kokoꞌa kaluma la uhakaꞌape lia i kevahi.

² Ko kama la uhaikaalualu nokele nomaka sakoꞌolua nakama kaukali Jesus, Simon Peter laua ma kama Jesus elaoi la, kena ime aꞌe koꞌolua la, “Nikama eko kinokama Kealiꞌi ikaha ma kaluma haku. Ia makou seailoa keꞌina hee nakama la ekuꞌu kinokama kama la.”

³ Kena iko Peter ihaele ma kelaa kama nokaꞌa keꞌina keꞌava haku.

⁴ Koꞌolua la ehulo, ia kela kama elipo iluna Peter, kena ikele nokae kaluma haku imua Peter.

⁵ Kama la ehakiu imua kokoꞌa kaluma la noꞌike napamalo kela nimini kinokama Jesus la, ia seulu iloko.

⁶ Kena Peter ekele mai imuli noulu iloko kaluma haku la, noꞌike napamalo kela nimini kinokama Jesus la oimoe mahola oia.

⁷ Ia kamapamalo nilili pohoulu aia la semoe ma ala pamalo. Kamapamalo la emoe eminimini havaꞌee.

⁸ Kena iko kama nikae imua keꞌava haku la iulu iloko hoi noꞌike, kena ihakina pela Jesus uola muli.

⁹ (Ia koꞌolua la oisemakino pela kelauniu kapu nimea ma Jesus memasiꞌe muli ikaha ma kemake.)

¹⁰ Kena iko koꞌolua la ivaꞌai muli nahale laua.

Mary eꞌike Jesus

¹¹ Mary evaꞌai muli nokuu kanikani imaka hale kaluma haku la, kena ihakiu aꞌe iloko kokoꞌa kaluma la,

¹² noꞌike sa{enselo} eꞌahu naauꞌahu maꞌini enoho keꞌina kinokama Jesus nimoe la. Kekama enoho keꞌina pohoulu, kela kama enoho keꞌina navae.

¹³ Ko koꞌolua la ivasili aꞌe kehine la, “Aꞌoe na ekani naea?” Ko kehine la ime aꞌe, “Nakama la eko kinokama Kealiꞌi anau la ikaha. Ia anau semakino keꞌina hee nakama la ekuꞌu kinokama kama la.”

¹⁴ Kena iko kehine la ihakiꞌe noꞌike Jesus ekuu ilaa. Ia kehine la semakino ma kela Jesus.

¹⁵ Ko Jesus ivasili aꞌe kama la, “Aꞌoe na ekani naea? Aꞌoe sesee ai?” Kehine la ehakaꞌoko ma kela kekama lolosi paupaꞌu la, kena iko ime aꞌe kama la, “Poi aꞌoe eko kinokama kama la ikaha, haꞌali mai anau keꞌina hee aꞌoe ekuꞌu kinokama kama na, ihaele anau noko kinokama kama na.”

¹⁶ Ko Jesus ikapa kemale kehine la, “Mary.” Kena iko kehine la iꞌila aꞌe nomake Jesus, kena ime aꞌe, “Rabboni.” (Emea ma kama aoaꞌo.)

¹⁷ Kena Jesus eme aꞌe kehine la, “Aꞌoe sekaohi mai anau, maikinimea anau seivaꞌai muli Kamana anau la. Aꞌoe ihaele nome aꞌe nakama ehakina i anau la, pela anau amevaꞌai muli Keakua Kamana kakou la.”

¹⁸ Kena iko Mary ihaele nome aꞌe nakama kaukali la pela aia eꞌike Kealiꞌi uola muli, kena ikakala aꞌe nakama la hea Jesus nime aꞌe aia la.

Nakama kaukali la eꞌike Jesus

¹⁹ Keiahi keaho kela kapu, nakama kaukali la eꞌuku hakoa. Ia nakama la epupui nakokoꞌa kehale la, maikinimea nakama la emakaꞌu nakama hamakua na{Jiu}. Kena iko Jesus ihaele iho nokuu i lakonu nakama la, kena ime aꞌe, “Okou inoho laoi.”

²⁰ Jesus ekakala penei, kena ihuli aꞌe nalima aia ma kevahi manava aia la, pela nakama kaukali aia la iꞌike nohihia lo.

²¹ Ko Jesus ime aꞌe hoi, “Okou inoho laoi. Kamana anau la ehaunalia mai anau, kena anau mehaunalia okou pela hoi.”

²² Kena iko kama la ihapu aꞌe keloumakani aia iluna nakama la, kena ime aꞌe, “Ko Keanana Kapu.

²³ Poi okou ehaialoha nakama haisala, Keakua mehaialoha nakama la hoi. Ia poi okou sesili hia nahaisala nakama la, Keakua memanaku nahaisala nakama la hoi.”

Thomas eꞌike Jesus

²⁴ Kelaa kama kaukali Jesus senoho ma nakama la keualoko Jesus nihaele iho la, kemale aia Thomas, esui ma Keoꞌoa.

²⁵ Ko nakama kaukali la ime aꞌe Thomas, “Makou eꞌike Kealiꞌi!” Ia Thomas eme aꞌe nakama la, “Poi anau eꞌike napona nalima kama la, kena ikaohi kemakalima anau iluna napona nalima kama na, ia ekaohi hoi kevahi manava kama na, kena anau amehakina pela kama na eola muli.”

²⁶ Keaho kela kapu imuli la, nakama kaukali la uꞌuku hakoa i hale, ia Thomas eꞌuku lakou hoi. Niaina ma nakokoꞌa la epui, Jesus ehaele iho nokuu i lakonu nakama la nome aꞌe, “Okou inoho laoi.”

²⁷ Kena iko Jesus ime aꞌe Thomas, “Kaohi kemakalima aꞌoe inei, kena ila mai nalima anau; ia halo mai kolima nokaohi kevahi manava anau. Aꞌoe sehakapanaka. Aꞌoe ihakina oia!”

²⁸ Ko Thomas ime aꞌe kama la, “Aꞌoe o kauAliꞌi ma kauAkua!”

²⁹ Ko Jesus ime aꞌe kama la, “Aꞌoe uꞌike anau, kena aꞌoe uhakina. Ia alakama seꞌike anau, ia ehakina oia. Nakama la mehakapu lia Keakua.”

John ekakaa kelauniu nei laea

³⁰ Jesus ehuli aꞌe komaꞌi nahaꞌaku hoi noꞌike nakama kaukali aia la, ia namela semau iloko kelauniu nei.

³¹ Anau ekakaa nakakala kelauniu nei imea okou ihakina pela Jesus o keMesaea, kekama Keakua, kena ihakina hoi i kama la pela okou meola kahi i namahi kemale aia.