John 11 - Luaniua New Testament

Kemake Lazarus

¹ Kela hekama elavea enoho i kemakaꞌina Bethany iloko Judea, kanamale Lazarus. Mary laua ma kaina aia la Martha enoho ilaa hoi.

² (Mary nei o kehine kela ninini kelo manoni iluna nakapuae Kealiꞌi, kena ihapaupaꞌu nakapuae kama la ma keloulu aia. Kela keꞌave aia Lazarus elavea la.)

³ Hanau la eꞌave kakala laua ia Jesus pela, “Kealiꞌi, kesoa laoi aꞌoe nei ulavea.”

⁴ Keualoko Jesus nilono nakakala nei, ko kama la ime aꞌe, “Kama na selavea kemahana la pela imake. Kemea na mehuli aku pela Keakua elavaa kekonaꞌi kama na. Ia kena okou meihamaha kekama Keakua.”

⁵ (Jesus elaoi haikaina Martha laua ma Mary, ia ma keꞌave laua Lazarus.)

⁶ Niaina Jesus elono nakakala pela ma Lazarus elavea, kama la enoho oia, nokae saaho.

⁷ Kena iko Jesus ime aꞌe nakama kaukali aia la, “Kakou ivaꞌai muli i Judea.”

⁸ Ia nakama la eme aꞌe, “Rabai. Na{Jiu} iloko Judea la ehihai imaꞌa aꞌoe nahaku ikaa aꞌoe imake, ia aꞌoe ehakaꞌoko ma ivaꞌai muli keꞌina la?”

⁹ Ko Jesus ikakala haiauna aꞌe, “Kelaa la esopo aꞌe kahaka, kena ihaele nosulu keiahi. Kena oai kekama ehaele keao la*f10* mesepoꞌu. Mai kelaa la ehamasina iꞌike kama la.

¹⁰ Ia oai kekama ehaele kepo mepoꞌu oia. Mai kelaa la sehamasina keꞌina aia ehaele la.”

¹¹ Jesus ekakala penei, kena iko ihapaa aꞌe, “Kesoa laoi kakou la Lazarus usili kana kumoe. Ia anau meihaele nohano kama la imahulu.”

¹² Ko nakama kaukali la ime aꞌe, “Kealiꞌi. Poi kama na esili kana kumoe, kama na memaakala keualoko aia memahulu.”

¹³ Ia Jesus emea pela Lazarus emake. Ia nakama la ehakaꞌoko ma kama la ekakala aꞌe pela Lazarus emoe oia.

¹⁴ Kena iko Jesus ikakala hamakahua aꞌe nakama la, “Lazarus umake.

¹⁵ Niaina anau senoho nokonaꞌi kama la, anau ehihia oia. Maikinimea okou meꞌike kehaꞌaku imea okou ihakina hamaoni. Kakou ikaꞌa i Judea nomaka kama la.”

¹⁶ Kena iko Thomas Keoꞌoa ime aꞌe nakama kaukali Jesus la, “Niaina kakou memake ma kama na, kakou io hoi.”*f11*

Jesus o keola kehamasiꞌe ikaha ma kemake

¹⁷ Keualoko Jesus nisasaika aꞌe kemakaꞌina Bethany, kama la ulono pela ma Lazarus namake mai avale keluaoa naaho ulaꞌa.

¹⁸ Bethany ekuu semao*f12* ikaha ma Jerusalem.

¹⁹ Ia kena komaꞌi nakama i Jerusalem eo aꞌe nomaka haikaina Martha laua ma Mary, nohapoꞌi aꞌe koꞌolua la kela kemake keꞌave laua la.

²⁰ Keualoko Martha nilono pela ma Jesus ukae aꞌe, ko kama la ihaele nokili laua. Ia Mary oinoho iloko hale.

²¹ Martha ekakala aꞌe Jesus, “Kealiꞌi. Koaꞌe aꞌoe inoho inei, keꞌave anau la amesemake.*f13*

²² Ia anau emakino pela Keakua meiau aku hea aꞌoe eainoa aꞌe i aia.”

²³ Ko Jesus ime aꞌe kama la, “Keꞌave olua la meiola muli.”

²⁴ Kena Martha eme aꞌe, “Anau makino pela kama la meiola muli keualoko Keakua meihamasiꞌe naonohenua ikaha ma kemake i keaho haoki la.”

²⁵ Ko Jesus ime aꞌe kama la, “Anau sonau mehamasiꞌe nakama la ikaha ma kemake noola. Oai kekama ehakina i anau meiola, niaina kama la emake.

²⁶ Ia nakama eola vahonei kela ehakina i anau meiselavaa kemake. Aꞌoe ehakina nakakala nei?”

²⁷ Ko Martha ime aꞌe, “Ei, Kealiꞌi! Anau hakina pela aꞌoe keMesaea, kekama Keakua kela ehaele iho i kemaalama nei.”

Jesus ekani

²⁸ Martha ekakala penei, kena ivaꞌai muli nome aꞌe kaina aia la Mary, “KeRabai ukae mai inei, kena evasili i aꞌoe.”

²⁹ Keualoko Mary nilono nakakala nei, kama la ehaialualu nohaele nokili laua.

³⁰ Keualoko la, Jesus seikae aꞌe iloko kemakaꞌina la, ia oinoho i keꞌina Martha nikili aia la.

³¹ Na{Jiu} kela enoho iloko hale nohapoꞌi koꞌolua la eꞌike Mary umasiꞌe iluna nohaele vave ikaha, kena ikaukali aꞌe vamuli kama la. Nakama la ehakaꞌoko ma Mary ehaele i keꞌava nokani kani valaa.

³² Ia Mary ehaele i keꞌina Jesus enoho la. Mary eꞌike Jesus, kena ikoukuli imua kama la nome aꞌe, “Kealiꞌi, koaꞌe aꞌoe inoho inei, keꞌave anau la amesemake.”

³³ Jesus uꞌike pela Mary ekani, kena na{Jiu} kela eo aꞌe ma kama la ekani hoi. Kena Jesus ualoha haeꞌo,

³⁴ kena ivasili aꞌe nakama la, “Okou ehamoe kama la ihee?” Ko nakama la ime aꞌe “Hamai nomaka, Kealiꞌi.”

³⁵ Kena Jesus ekani.

³⁶ Ko na{Jiu} la ime aꞌe, “Ila aꞌe. Jesus ualoha kama la.”

³⁷ Ia alakama na{Jiu} la ume aꞌe, “Jesus ekonaꞌi kama alemaka seni noꞌike, ia sekonaꞌi Lazarus pela isemake.”

Jesus ehaola Lazarus

³⁸ Jesus ualoha haeꞌo, kena ihaele i keꞌava. Ia kehaku elahi epui kaluma la.

³⁹ Kena iko Jesus ime aꞌe, “Hakaꞌape kehaku la ikaha.” Ia Martha keꞌave kama umake la eme aꞌe, “Kealiꞌi. Kama la namake mai avale keluaoa naaho ulaꞌa. Kinokama la mesauna pulau.”

⁴⁰ Kena iko Jesus ime aꞌe kama la, “Anau name aku aꞌoe avale. Poi aꞌoe ehakina, kena aꞌoe meꞌike namahi Keakua.”

⁴¹ Ko nakama la ihakaꞌape kehaku la ikaha ma kaluma la. Kena iko Jesus iꞌila iluna noloku, kena ime aꞌe, “Kamana. Anau ehihia pela aꞌoe ehalono keloku anau.

⁴² Anau makino pela aꞌoe elono kahi mai anau. Ia anau ekakala penei, pela nakama kela ekuu makou inei la mehakina pela aꞌoe soꞌoe ehaunalia mai anau.”

⁴³ Jesus eloku penei, kena ianaa aꞌe hamaloa keleo aia, “Lazarus. Hamai i makahale.”

⁴⁴ Ko kama emake la ihaele iho i makahale. Nalima ma navae kama la eminimini napamalo. Ia namaisu aia la emini kama pamalo hoi. Ko Jesus ime aꞌe nakama la, “Hana napamalo la ikaha ma kama la, ikana kama la kehaele.”

Nakama hamakua na{Jiu} la ehakaꞌoko ma ikaa Jesus imake

⁴⁵ Komaꞌi na{Jiu} kela nio aꞌe nohapoꞌi aꞌe kevahi Mary uꞌike hea Jesus epena la, kena ihakina kama la.

⁴⁶ Ia alakama na{Jiu} la ukaꞌa nomaka naFarasi, nokakala aꞌe nakama la hea Jesus epena.

⁴⁷ Kena iko nakama hamakua na{Jiu} la iꞌuku ma naFarasi la.*f14* Kena ikakala solakou, “Kakou emea pehe? Kama la ehuli aꞌe komaꞌi nahaꞌaku.

⁴⁸ Poi kakou ekiaꞌi kama la ikauhano pela, keonohenua la hakoa meihakina kama la. Kena nakama haRome la meo mai nosui kesao kakou, kena iau aꞌe keonohenua kakou nei ilolosi alakama.”*f15*

⁴⁹ Kela hekama enoho ilaa, kanamale Caiaphas. Kama la pohoulu hamakua namaakua hekau la. Kama la eme aꞌe, “Okou sehimea ailoa!

⁵⁰ Okou makino. Ame kaualeꞌa pela kama hokahi la memake ma ikonaꞌi keonohenua la, aoki nakama la memaseu hakoa.”

⁵¹ Ia Caiaphas seme aꞌe kehakaꞌoko aia soia. Kama la ehakae nakakala Keakua pela ma Jesus meimake ikonaꞌi keonohenua la.

⁵² Ia seai ma nakama la solakou. Kela nakama Keakua nimaseu mai imua, isuꞌui poi heonohenua hokahi.

⁵³ Nakama hamakua na{Jiu} la eꞌamaka keaho la nopenapena hakaꞌoko ma ikaa Jesus imake.

⁵⁴ Kena Jesus sehahaele hua valoko namakaꞌina na{Jiu} la. Kama la ehaele kemakaꞌina Ephraim, kapili aꞌe keꞌina kukuaha la, nonoho lakou ma nakama kaukali aia la.

⁵⁵ Keualoko keꞌai kePasova na{Jiu} la ukapili, kena komaꞌi naonohenua namakaꞌina valaa eo i Jerusalem, nohakea naola lakou i kevahi nakuaa.

⁵⁶ Keonohenua la esesee Jesus, kena ikuu iloko hale kapu la novasisili solakou, “Okou ehakaꞌoko pehe? Kama la mehamai iloko keꞌai nei?”

⁵⁷ Ia namakua hamakua lakou ma naFarasi eꞌave nakakala pela, poi hekama emakino keꞌina hee Jesus enoho, kama na ihaꞌali aꞌe lakou, ilavaa lakou kekaohi Jesus.