John 1 - Luaniua New Testament

Kealiꞌi uhaele iho kemaalama nei

¹ Imua keꞌamaka iho namea hakoa, kela hekama nanoho mai avale, kemale aia o Kakala. Kama la esuꞌui laua ma Keakua, kena kama la o Keakua hoi.

² I keꞌamaka iho la, kama la esuꞌui laua ma Keakua.

³ Sehimea kemaalama nei ekipu iho soia, ia Kakala la epena namea hakoa.

⁴ Kama la ehaola namea hakoa, kena ihamasina iho nakama kemaalama nei.

⁵ Kama la ehamasina iho iloko naꞌina pouli, iselavaa kepouli iꞌuhi kemasina la.

⁶ Ia kena Keakua ehaunalia iho kekama emale ma John Baptist.

⁷ John ehaele iho nokakala aꞌe naonohenua nakipukipu kemasina la, pela hakoa kela ehalono nakakala aia la meihakina.

⁸ Ia John seai o kemasina, kama la ehaele iho nokakala aꞌe naonohenua nakipukipu kemasina la.

⁹ Kemasina hamaoni la ehaele iho kemaalama nei nohamasina naonohenua hakoa.

¹⁰ Kama la epena iho kemaalama nei i namahi aia la. Kena kama la enoho inei hoi. Ia nakama kemaalama nei oisemakino kama la.

¹¹ Kama la ehaele iho i keonohenua aia, ia nakama la seko aia.

¹² Ia alakama eko kama la, kena ihakina i kemale aia. Kena kama la eau aꞌe nakama la kekonu imemo kamaliꞌi Keakua.

¹³ Kena nakama la semepela nikamaliꞌi namakua lakou oia. Nakama la ehanau hamaoni ikaukali kehakaꞌoko Keakua.

¹⁴ Kakala la ukipu mai poi hekama hamaoni, nonoho ma kakou. Kena kakou eꞌike nakipukipu namahi aia. Pela kama la elolosi hamaoni kakou. Ala nikipukipu kaukahi kama kela Kamana.

¹⁵ John ehaꞌali mai nakipukipu kama la ma, “Anau name aku okou avale nakipukipu kama la. Kama la mehamai imuli anau. Ia kama la ehananiu iluna anau. Maikinimea kama la nakipu mai avale imua anau nihanau mai la.”

¹⁶ Kama la elolosi hakaualeꞌa kakou imea naola kakou iꞌakoa.

¹⁷ Moses ehuli mai kakou nakuaa Keakua. Ia Jesus Christ soia elolosi hamaoni kakou.

¹⁸ Sehikama eꞌike Keakua. Ia kama Keakua la soia enoho ma Kamana aia la, kena ihuli mai kakou nakipukipu kama la.

John Baptist ekakala aꞌe keonohenua la nakipukipu Jesus.

¹⁹ Nakama hamakua na{Jiu} kela enoho iloko kemakaꞌina Jerusalem ehaunalia namaakua ia ma nakama eheheaꞌu hale kapu la io novasili aꞌe John Baptist, “Oai aꞌoe?”

²⁰ Kena John ehaꞌali hamakahua aꞌe nakama la ma, “Anau seai o keMesaea.”

²¹ Kena iko nakama la ime aꞌe, “Ia oai aꞌoe? Aꞌoe Elijah?” Ia John eme aꞌe, “Seai.” Nakama la eme aꞌe, “Ea? Aꞌoe o kekama hakae nakakala Keakua?” Ia kama la eme aꞌe, “Seai hoi.”

²² Kena nakama la eme aꞌe John, “Oai aꞌoe? Makou hihai iko nakakala aꞌoe iꞌave i nakama kela ehaunalia mai makou la, ia aꞌoe kakala ma oai aꞌoe.”

²³ Kena John ume aꞌe nakakala Isaiah, kekama hakae nakakala Keakua la, “Anau o kekama, Kela ekaukaꞌu aꞌe keonohenua i keꞌina ekukuaha ma, ‘Kanakana keala Kealiꞌi ihamai valuna.’ ”

²⁴ Kena nakama hamakua na{Jiu} la ehaunalia naFarasi hoi.

²⁵ Kena naFarasi la uvasili aꞌe John, “Aꞌoe seai o keMesaea. Aꞌoe seai Elijah. Ia aꞌoe seai hekama hakae nakakala Keakua. Okea aꞌoe ehaauꞌau kapu keonohenua la?”

²⁶ Kena John eme aꞌe, “Anau ehaauꞌau kapu nakama la i kevai oia. Ia kelaa kama enoho ma okou, ia okou semakino kama la.

²⁷ Kama la mehamai imuli anau, ia anau sekau kehana nakapuae aia hahao la.”

²⁸ Namenei hakoa uapihi mai iloko kemakaꞌina Bethany i kelaa vahi ke{liva} Jordan, keꞌina kela John ehaauꞌau kapu keonohenua la.

Kenei kekama Keakua

²⁹ Kela aho John eꞌike Jesus ehaele aꞌe i aia la, kena ime aꞌe, “Ila aꞌe. Kela punua {sipisipi} Keakua. Kama la meui nahaisala nakama kemaalama nei ikaha.

³⁰ Anau ukakala kahi aku pela kama la ehananiu iluna anau, maikinimea kama la nakipu mai avale imua anau nihanau la.

³¹ Ia imua, anau semakino oai kama la. Ia anau ehamai nohaauꞌau kapu keonohenua Israel i kevai pela nakama la imakino kama la.”

³² Kenei nakakala hamaoni John, “Anau uꞌike Keanana Kapu uhaele iho ikaha ma kevaelani poi helupe, nonoho ma kama la.

³³ Vahola anau emakino laoi kama la, maikinimea Keakua ehaunalia mai anau ihaauꞌau kapu keonohenua la, kena ime mai anau, ‘Aꞌoe meꞌike Keanana Kapu ehaele iho iluna kekama nonoho ma kama la. Kela kekama mehaauꞌau kapu okou i Keanana Kapu.’

³⁴ Anau uꞌike kama la, kena ime aku okou pela kama la o kekama Keakua.”

³⁵ Kela aho John enoho ma sakoꞌolua nakama ekakaꞌa maia.

³⁶ Keualoko kama la niꞌike Jesus ehaele aꞌe i aia la, kena iko kama la ime aꞌe, “Ila aꞌe. Kela punua {sipisipi} Keakua la.”

³⁷ Keualoko sakoꞌolua la elono nakakala kela John nime aꞌe laua, kena koꞌolua la ukaꞌa nokaukali vamuli Jesus.

³⁸ Kena Jesus uhakiꞌe aꞌe noꞌike sakoꞌolua la ekaukali vamuli aia, kena ime aꞌe “Hea olua hihai na?” Kena sakoꞌolua la ume aꞌe “Rabai. (Eme ma kama aoaꞌo.) Aꞌoe enoho ihee?”

³⁹ Kena Jesus eme aꞌe laua, “Omai iꞌike olua.” Kena sakoꞌolua la uo ma Jesus, nokae keꞌina Jesus enoho la, kena inoho lakou keaho la hakoa nokae kehaa keiahi.

⁴⁰ Kelaa kama koꞌolua la emale ma Andrew, kaina kela Simon Peter. Kama la elono nakakala John, kena ikaukali Jesus hoi.

⁴¹ Kena Andrew ukili laua ma Simon Peter, kena ime aꞌe, “Maua ulave keMesaea.” (Eme ma Christ)

⁴² Kena iko Andrew ihakaꞌi Simon io laua nomaka Jesus. Jesus uꞌila aꞌe Simon la, kena ime aꞌe, “Kemale aꞌoe Simon, kama kela John. Ia anau meikapa kemale aꞌoe Cephas.” (Eme ma Peter, kehakupaa.)

Jesus eanaa aꞌe Philip laua ma Nathanael

⁴³ Kena kelaa aho Jesus uhakaꞌoko ma ihaele i Galilee. Vahola, kama la ekili Philip. Kena iko Jesus ime aꞌe, “Kaukali mai anau.”

⁴⁴ Philip hekama i Bethsaida, kemakaꞌina kela Andrew laua ma Peter enoho la.

⁴⁵ Kena Philip ukili laua ma Nathanael, kena ime aꞌe, “Maua elave Jesus kekama Joseph, kama kemakaꞌina Nazareth. Moses nikakaa iho nakipukipu kama la iloko kelauniu nakuaa. Ia nakama hakae nakakala Keakua la nikakaa iho nakipukipu kama la hoi.”

⁴⁶ Ia Nathanael eme aꞌe Philip, “Nakama Nazareth la sehikama kaualeꞌa.” Ia Philip eme aꞌe, “Hamai nomaka.”

⁴⁷ Keualoko Jesus niꞌike Nathanael ehaele aꞌe la, kena iko kama la ime aꞌe, “Kenei hekama hamaoni Israel, kama nei selavaa kehailavaꞌa.”

⁴⁸ Kena Nathanael ume aꞌe Jesus, “Aꞌoe emakino anau pehe?” Iko Jesus ime aꞌe, “Imua Philip nianaa aku aꞌoe, anau uꞌike aꞌoe oinoho ilalo kemalu kelaꞌau ke{fig} la.”*f1*

⁴⁹ Kena Nathanael eme aꞌe, “Rabai. Aꞌoe o kekama Keakua. Ia aꞌoe o kekuꞌu Israel hoi.”

⁵⁰ Kena iko Jesus ime aꞌe Nathanael, “Aꞌoe hakina anau, maikinimea anau eme aku ma anau eꞌike aꞌoe, keualoko aꞌoe enoho i kemalu kelaꞌau la. Aꞌoe meꞌike anau ehuli aku namahi elaꞌa iluna kemenei.

⁵¹ Anau eme aku okou kehamaoni. Okou meꞌike kevaelani la ukalaꞌi, kena na{enselo} Keakua meio iho iluna ke{kama ekipu kama}, kena uvaꞌai muli iluna kevaelani.”