James 1 - Luaniua New Testament

¹ Kemale anau James. Anau eheheaꞌu ma Keakua, ia ma Kealiꞌi Jesus Christ. Anau ekakaa aku kelauniu nei i okou keonohenua*f1* Keakua kela ekaꞌa i nahenua emao, kena ikakala aku okou kehihia anau.

Kipukipu kehakina

² Aukaina. Keualoko nakapahala la mekae aku i okou, okou ekau kehihia oia.

³ Maikinimea okou emakino pela namela ehaꞌikeꞌike nahakina okou, pela okou inoho havalekoa.

⁴ Kena okou ikauhano kenoho havalekoa, imea okou ikonu kahi. Kena naola okou meꞌakoa, ia okou mehuli aꞌe nakipukipu kaualeꞌa hakoa.

⁵ Ia ame hekama okou eseakamai, kama na ekau keloku noainoa aꞌe Keakua, kena Keakua meau aꞌe keakamai kama na. Maikinimea Keakua eaumalie lo kehoꞌi aꞌe nakama hakoa, ia mesehai aꞌe nakama la.

⁶ Ia keualoko kama la eainoa aꞌe Keakua, kama la ikau kehakina pela aia meiko namea la, ia selavaa ilaꞌa. Ia poi kama la esehakina pela Keakua meau aꞌe namea la, kena kama la amenanaue, ehau poi napeau kela eusausa keualoko kemakani la emaili mai.

^7-8 Hakaꞌoko kama la esehanakahi, kela hea keola aia esekuu konu. Ia kena kama la isehakaꞌoko pela Kealiꞌi meau aꞌe nimea maia.

Nakama moulalo ia ma nakama haimoni

⁹ Poi hekama keloku emoulalo, kama na ekau kehihia. Maikinimea kama na hekama hananiu hamaoni.

¹⁰ Ia poi hekama ehaimoni, kama na ekau kehihia hoi. Maikinimea kama na hekama moulalo hamaoni. Niaina kama la ehaimoni, kama la memake oia, ehau poi naꞌauke naveve la.

¹¹ Kulana kelaa la esopo aꞌe novela sia naveve la, kena naꞌauke la umaoha nomake, ia kehamanaꞌo namea la useai. Nakama haimoni eme pela hoi. Kulana nakama la eapikia naheheaꞌu lakou la, nakama la meimake oia. Ia kena naheheaꞌu la meo noseai.

Keakua sekaoleole kekama nosala

¹² Poi hekama ekili namea hainakaa, kena ikuu mau, kama na meihakapu lia Keakua. Keakua mehihai nakipukipu kama na, kena meau aꞌe kama na keola eola kahi. Keakua ekakala hamaoni pela iau aꞌe keola la i nakama kela elaoi i aia.

¹³ Keualoko kekama mekaoleole hia, kama na isehakaꞌoko pela Keakua ekaoleole aia nosala. Seai. Maikinimea Keakua selavaa kehaꞌikeꞌike kekama nosala. Ia sehimea esaꞌino hoi elavaa kehaꞌikeꞌike Keakua nosala.

¹⁴ Ia kama ma kekama emanaꞌo namea saꞌino kela aia hihai, kena namea la mekaoleole aia.

¹⁵ Nakama la emanaꞌo kahi, kena ipena namea saꞌino la. Ia keualoko nakama la ekauhano kepena namea saꞌino la, kena nakama la memake oia.

¹⁶ Aukaina. Anau elaoi okou, kena hihai okou ilolosi hapulu pela sehikama ameusuusu aku okou.

¹⁷ Okou emakino pela nakipukipu Kamana ialuna eselavaa kehuli. Kama la soia eau iho nahoꞌi kaualeꞌa hakoa. Ia kama la epena namea i kevaelani nomasina. Ia kena nakipukipu aia la eselavaa kehuli poi nimalu namea la.

¹⁸ Keakua ehakaꞌoko ihaola kakou i nakakala hamaoni aia. Pela kakou mememo nikama mua i namea hakoa kela aia nipena la.

Halono nakakala Keakua

¹⁹ Aukaina. Anau elaoi okou, kena hihai okou imakino namea nei. Okou hakoa iaunahie kehalono alakama, ia sevave kekakala, ia selokoloko nahie.

²⁰ Poi hekama eloko, kipukipu aia la sehapulupulu alakama ikaukali nakipukipu ekonu kahi Keakua.

²¹ Kena okou ikuu ikaha ma nakipukipu saꞌino la hakoa, kena noho pasemuu, noko nakakala kela Keakua eaoaꞌo aku okou la. Nakakala la elavaa kekonaꞌi hamaoni okou.

²² Ia okou ipena kaukali nakakala Keakua. Ia poi okou elono oia, ia sehimea epena, kena nahakaꞌoko okou la evale haeꞌo.

²³ Poi hekama elono nakakala Keakua ia sehimea epena, kama na ehau poi kekama kela eꞌila iloko {kalasi} noꞌike soia anakipu.

²⁴ Kama na eꞌike namaisu aia. Ia keualoko aia uhaele ikaha, kena kama na usili pela namaisu aia la ekipu pehe.

²⁵ Ia poi hekama ehakaꞌoko kahi kuaa Christ, kama na amehakana ikaha ma namea saꞌino. Poi aia esesili kuaa la, ia ekauhano kepena kaukali namea aia nilono la, kena keola aia la hakoa amehakapu lia Keakua.

²⁶ Ia poi hekama ehaiꞌahi pela aia hekama keloku, ia selavaa kehaniki puꞌua aia, hea kama na ehakaꞌoko la esala, ia kama na ehakina vale oia.

²⁷ Ia kipukipu keloku kela ekonu i namaisu Keakua Kamana eme penei. Okou ilolosi hakaualeꞌa nakaukuaha ia ma nakamaliꞌi haaloha. Ia lolosi soꞌokou ikaha ma namea saꞌino kemaalama nei.