Hebrews 7 - Luaniua New Testament

Kemaakua hamakua Melchizedek

¹ Kela hekuꞌu elolosi kemakaꞌina Salem. Kama la hemaakua kela Keakua ialuna, kanamale Melchizedek. Vahola, Abraham nihaele novuhu kaua, kena ikaa koahaa nakuꞌu la nomake. Ia keualoko Abraham nivaꞌai mai, Melchizedek ekili nohakapu kama la.

² Kena iko Abraham ihanaopo naheaꞌu nakuꞌu la hakoa, kena ivavae hanakahi namela i sehui nakuhana. Kena kama la euhu kuhana hokahi iau aꞌe ma Melchizedek. Kehakaꞌoko mua kela keinoa Melchizedek eme penei, “Kekuꞌu Ekonu kahi.” Ia kama la kekuꞌu i Salem*f2* hoi, ia kena kela hakaꞌoko keinoa aia la, “Kekuꞌu Enoho laoi.”

³ Sehikama emakino kamana ma kina aia la. Ia sehikama emakino nakama iloko kemanava aia la hoi. Ia sehikama eailoa keualoko aia nihanau la, ia sehikama eailoa hoi keualoko aia nimake la. Kama la ehau poi kekama Keakua, hemaakua naualoko hamau.

⁴ Kena okou eꞌike pela Melchizedek ehananiu lo. Keualoko kipuna kakou la Abraham eko naheaꞌu nakuꞌu la, kama la evavae hanakahi namela sehui nakuhana. Kena kama la euhu kuhana hokahi iau aꞌe ma Melchizedek.

⁵ Nakuaa Moses eme aꞌe namaakua iloko kemanava Levi iko nakuhana lakou hoi. Kela hea keonohenua kakou la evavae hanakahi naheaꞌu lakou sehui nakuhana. Kena iuhu kuhana hokahi iau aꞌe ma namakua lakou la. Niaina ma keonohenua la emamaoha iho iloko kemanava Abraham hoi, nakama la ikau keau aꞌe naheaꞌu lakou la oia.

⁶ Ia niaina ma Melchizedek sehikama iloko kemanava naLevi la, kama la eko kuhana aia la iloko namea Abraham evavae la. Ia kena Melchizedek ehakapu Abraham, kama kela Keakua ekakala hamaoni la.

⁷ Ia kakou hakoa eailoa pela kama hananiu la ekau kehakapu kekama ilalo aia la.

⁸ Namaakua kakou eko kuhana lakou la, ia memake oia. Melchizedek eko kuhana aia la hoi, ia kelauniu kapu eme mai pela kama la oiola.

^9-10 Ia keualoko Melchizedek nikili Abraham, Levi seihanau. Imuli, Levi uhanau iho iloko kemanava kela Abraham. Ia namaakua iloko kemanava Levi la eko nakuhana lakou la. Kena keualoko Abraham eau aꞌe Melchizedek kuhana la, eme pela kemopuna aia Levi eau aꞌe namea la hoi.

¹¹ Keakua eau aꞌe nakuaa i nakama Israel. Kena namaakua iloko keꞌaha Levi ekonaꞌi keonohenua la ikonu i kevahi nakuaa la. Ia nakama la sekonu kahi. Ia kena kelaa maakua ehamai. Kemaakua la ehau poi Melchizedek, seai Aaron.

¹² Pena Keakua esui kehanonoho kela namaakua, kena nakuaa kela Keakua niau aꞌe Moses la amesui hoi.

¹³ Ia keualoko kakou ekakala aꞌe nakipukipu Melchizedek, kakou ehaꞌali aꞌe nakipukipu Kealiꞌi hoi. Kama la hekama keaha Judah. Ia sehikama iloko keꞌaha la eheheaꞌu poi hemaakua imua.

¹⁴ Kakou emakino laoi pela Kealiꞌi ehanau iho i keꞌaha Judah. Ia Moses seme mai pela keaha la, kulana aia nikakala mai nakipukipu namaakua la.

Jesus ehau ma Melchizedek

¹⁵ Vahonei kakou emakino laoi nakipukipu namaakua la. Maikinimea kelaa maakua nakae mai avale. Kama la ehau pela poi Melchizedek.

¹⁶ Ia seme pela kama la emamaoha iho iloko keꞌaha namaakua la. Seai. Emeia kama la ememo maakua i namahi keola aia kela selavaa keoki.

¹⁷ Kelauniu kapu emea ma, “Aꞌoe hemaakua naualoko kahi. Ehau poi Melchizedek.”

¹⁸ Kena nakuaa imua la mehaluu i kevahi. Maikinimea namea la seisi namahi kekonaꞌi kakou.

¹⁹ Nakuaa la sekonaꞌi kakou ikonu i namaisu Keakua. Kena vahonei kakou ehakina i kekama kela ehananiu iluna nakuaa la. Kama la soia elavaa kekonaꞌi kakou io nokapili aꞌe Keakua.

²⁰ Kelaa mea hoi. Keakua emea kakala eivi pela Jesus mememo maakua hamaoni. Keualoko nakama kemanava Levi la umemo maakua imua, Keakua sehikakala eivi emea.

²¹ Ia keualoko Jesus umemo maakua, Keakua eme aꞌe nakakala eivi. Ia kena aia selavaa kesui kehakaꞌoko aia. Keakua emea ma, “Aꞌoe mememo maakua naualoko kahi.”

²² Ia Jesus soia ehuli aꞌe pela nakakala eivi Keakua la ehamaoni. Ia nakakala la elaꞌa iluna ma nakuaa imua la.

²³ Ia kelaa mea hoi. Namaakua imua la ekomaꞌi. Ia nakama la umake hakoa, kena alakama esui kesao lakou.

²⁴ Ia Jesus eola kahi. Ia kena sehikama mesui kesao aia la.

²⁵ Ia kena nakama kela ehakina Jesus la meio i Keakua. Ia Jesus elavaa kekonaꞌi hamaoni nakama la, maikinimea aia eola kahi, kena mekuu imua Keakua nokonaꞌi nahakina ana la.

²⁶ Jesus o kemaakua hamakua kela ekau ma kakou. Kama la ekapu, ia sehaisala. Keola kama la emakahua lo. Ia kena Keakua ehavaꞌee kama la ikaha ma nakama haisala, kena isau kama la iluna kevaelani.

²⁷ Jesus sehau pela poi alamaakua hamakua. Nakama la ekaakaa kahi namanu ihoꞌi aꞌe Keakua, pela isolo nahaisala lakou la ikaha, ia isolo nahaisala keonohenua la ikaha hoi. Ia Jesus ehoꞌi aꞌe aia soia heualoko hokahi oia, pela isolo nahaisala keonohenua la ikaha.

²⁸ Keakua eau iho nakuaa la ikini namaakua hamakua la. Ia ala nikama oia. Kena imuli Keakua emea kakala eivi pela kama hokahi aia la mememo maakua hamaoni. Ia kama la ekonu kahi i namaisu Keakua naualoko hamau.