Hebrews 13 - Luaniua New Testament

¹ Okou ikauhano kehaikaina laoi alakama.

² Ia okou isesili keko mai namanu sili iloko hale nahale okou la. Alakama ehakekele pela ma lakou elolosi namanu sili, ia semakino pela lakou elolosi na{enselo} oia.

³ Okou imanaku nakama kela epono kia iloko kelokapu la. Eme pela okou esaisai kia na{seni} la hoi. Ia okou imanaku nakama meme haeꞌo kia la. Eme pela okou ehalono lihu pela hoi.

⁴ Okou ihakaꞌoko maha kipukipu keꞌavana. Keloꞌi nalukanaka emoe, heꞌina koꞌolua la solaua. Ekapu kelaa kama kehaele aꞌe. Maikinimea Keakua mehakonukonu nakama kela ehai huli, ia ma nakama kela eꞌalemaka ailalao.

⁵ Okou isemanaꞌo namoni. Nia okou eisi, ukau oia. Maikinimea Keakua emea ma, “Anau mesekiaꞌi okou. Ia anau mesesili okou.”

⁶ Ia kena kakou ekakala hapulupulu ma, “Kealiꞌi ekonaꞌi anau, Ia kena anau mesemakaꞌu. Selavaa hekama kehaisaꞌino mai anau.”

⁷ Okou imanaku nakama hamakua okou imua la. Ala nikama kela ekakala aku okou nakakala Keakua. Hakaꞌoko muli naola lakou. Kena kaukali nakipukipu nahakina lakou la.

⁸ Niaina ma naaho ulaꞌa la, nakipukipu Jesus Christ oihanakahi i keaho nei ia ma naualoko hamau.

⁹ Keakua elolosi laoi okou, ikonaꞌi okou ikuu mau nahakina okou. Ia kena okou isekaukali naaoaꞌo eꞌee. Ia sehakekele naꞌai okou meꞌai. Maikinimea naꞌai la eselavaa kekonaꞌi okou.

¹⁰ Kakou nahakina ana eꞌai keꞌai ekapu. Ia namaakua na{Jiu} kela eheaꞌu iloko kehale kapu lakou la sekau keꞌai keꞌai la.

¹¹ Kemaakua hamakua na{Jiu} la eko kekoko namanu, iꞌave i keꞌina ekapu la. Kena ihoꞌi aꞌe Keakua kekoko la, pela isolo nahaisala keonohenua la ikaha. Ia kama la ekuni nakinokama namanu la ikaha ma kemakaꞌina la.

¹² Ia kena Jesus ehalono lihu nomake ikaha ma kemakaꞌina la hoi. Pela kana koko la amehakea naola keonohenua aia la.

¹³ Kena kakou io aꞌe ia Jesus ikaha ma kemakaꞌina la, inapa maia.

¹⁴ Maikinimea kakou sehimakaꞌina hamaoni ekino i kemaalama nei. Emeia kakou esee kemakaꞌina kela oihamai imuli.

¹⁵ Kakou ekaukali Jesus, kena ihamaha kahi aꞌe Keakua i kemale Jesus la.

¹⁶ Ia okou isesili kememe halaoi alakama, kena ivavae namea kaualeꞌa ikonaꞌi nakama la. Maikinimea ala nihoꞌi kela Keakua ehihai la.

¹⁷ Okou ihalono nokaukali nakama hamakua okou la. Maikinimea nakama la elolosi naola okou imua namaisu Keakua. Okou ihalono nakama la, imea nakama la ihihia i namea lakou epena la. Ame seai, naola nakama la meo mai nohainakaa haeꞌo. Ia kena nakama la ameselavaa kekonaꞌi okou.

¹⁸ Ia okou iloku aꞌe Keakua ikonaꞌi makou hoi. Makou emakino pela nahakaꞌoko makou ekaualeꞌa, ia makou hihai ipena kahi namea ekonu.

¹⁹ Ia anau ehihai okou iloku aꞌe Keakua hoi, imea anau ivave kevaꞌai muli aku i okou.

²⁰ Keakua ehamasiꞌe kakou Aliꞌi Jesus ikaha ma kemake. Ihuli aꞌe pela kekoko Jesus la emea nakakala ivi Keakua la imau kahi. Ia kena Kealiꞌi Jesus ehananiu, kena elolosi laoi kakou, poi ni{sipisipi} aia. Ia Keakua emea kakou inoho laoi.

²¹ Kama la emea naola okou iꞌakoa. Pela okou amelavaa kekaukali hea aia hihai. Ia kama la mekonaꞌi kakou hakoa ipena namea aia ehihai la i namahi Jesus Christ. Kena kakou ihamalumalu kama la naualoko hamau. Amen.

Nakakala haoki

²² Au kaina. Niaina anau epolopolo aku i okou, anau ehihai okou ihavalekoa kehalono nakakala nei. Maikinimea anau ekakaa aku okou kelauniu popoko oia.

²³ Anau hihai okou iailoa pela kaina kakou la Timothy uꞌuhu ikaha ma kelokapu. Ame kama la ekae mai vave, kena maua meo aku nomaka okou.

²⁴ Kakala kehihia makou i nakama hamakua okou la, ia kakala hihia hoi i keonohenua Keakua la hakoa. Nakama haItaly inei ekakala aku okou kehihia lakou la hoi.

²⁵ Keakua ilolosi laoi okou hakoa.