Hebrews 11 - Luaniua New Testament

Kipukipu kehakina

¹ Kipukipu kehakina eme penei. Kakou enoho kali namea kela meiapihi mai imuli. Niaina ma kakou seꞌike namela, kakou ehakina pela namela ehamaoni.

² Nakipuna kakou imua la ehakina pela hoi, ia kipukipu lakou la ekonu.

³ Kakou ehakina pela Keakua upena iho namea hakoa. Imua lo sehimea. Ia kena kama la ekakala oia nopenapena namea kakou eꞌike la.

⁴ Abel ehakina hamaoni Keakua, kena iau aꞌe Keakua kehoꞌi ekonu, elaꞌa iluna ma kehoꞌi Cain. Kena Keakua emea ma kehoꞌi Abel la ekaualeꞌa, ma Abel ekonu kahi i namaisu aia. Ia niaina ma Abel umake, kama la oihuli mai kakou nakipukipu kehakina.

⁵ Enoch ehakina hamaoni Keakua. Ia kena Keakua emea maia ehihai nakipukipu kama la. Kena Keakua eko Enoch noave i kevaelani isemake. Sehikama elave kinokama kama la, maikinimea Keakua eko kama la noꞌave ialuna.

⁶ Poi hekama sehakina Keakua, kena Keakua mesehihai nakipukipu kama na. Ia poi hekama ehihai ihaele nohakapili aꞌe Keakua, kena kama na ekau kehakina pela Keakua eola, ia ehakina hoi pela Keakua meau aꞌe nakuhana i nakama kela esee i aia la.

⁷ Noah ehakina hamaoni Keakua. Kena Keakua ekakala hamakaꞌu aꞌe Noah i namea kela meapihi mai imuli. Ia kena Noah ehalono nakakala Keakua nopenapena kevaꞌa elahi isao lakou haimakua. Ia keualoko Noah ehalono i Keakua, Noah ehuli aꞌe pela nakama kemaalama nei la esaꞌino. Ia kama la ehuli aꞌe hoi pela aia ekonu kahi i namaisu Keakua.

⁸ Abraham ehakina hamaoni Keakua. Kena Keakua eanaa aꞌe Abraham ihaele i henua kela aia meau aꞌe ma kama la. Abraham ehalono Keakua, kena ikiaꞌi henua aia enoho la. Semakino keꞌina hee aia ehaele.

⁹ Kama la ehakina Keakua. Ia Keakua eme aꞌe Abraham pela aia meau aꞌe henua ma kama la. Ia Abraham enoho iloko henua la poi hemanu sili oia. Abraham enoho iloko hale kapolo. Kena Isaac laua ma Jacob enoho pela hoi. Ia Keakua ekakala hamaoni pela iau aꞌe henua ma lakou hakoa.

¹⁰ Ia kena Abraham enoho kali kemakaꞌina hamaoni kela Keakua mehakuu aꞌe la nomau kahi.

¹¹ Abraham ehakina hamaoni pela Keakua mehuli aꞌe hea aia ekakala la. Niaina ma kama la umakua lo, ia keꞌavana aia la Sarah epoꞌa, kama la oihakina pela Keakua mekaohi mau nakakala hamaoni aia la. Kela hea kanaka la elavaa kememo kamana Isaac.

¹² Niaina ma Abraham umakua, ukapili imake, komaꞌi kekama ehanau iloko kemanava aia. Namopuna aia la ekomaꞌi lo, Ehau poi nahekuu i kevaelani, Ia komaꞌi hoi poi nakaꞌele ikai. Kela sehikama elavaa kepau.

¹³ Niaina ma nakama imua la enoho hakina i Keakua, nakama la umake oia, ia seko namea kaualeꞌa kela Keakua nime aꞌe lakou la. Nakama la ehau ma nakama kela enoho imao noꞌilaꞌila, kena ehihia i namea kaualeꞌa kela meikae aꞌe alakama. Kela hea nakama la emea ma, “Makou enoho kemaalama nei ehau ma nimanu sili kela enoho nomakamaka oia.”

¹⁴ Ia nakama kela ekakala la ehuli aꞌe pela lakou esesee henua ma lakou.

¹⁵ Ia poi nakama la ehakekele henua lakou ninoho imua la, kena hainahie nakama la kevaꞌai muli.

¹⁶ Emeia nakama la ehihai ma lakou inoho henua kaualeꞌa kevaelani. Kela hea Keakua senapa kulana nakama la ekapa aia ma, “Keakua makou.” Maikinimea Keakua uoki kekanakana kemakaꞌina ma nakama la.

^17-18 Abraham ehakina hamaoni Keakua. Kena Keakua ehaꞌikeꞌike Abraham, eme aꞌe kama la ihoꞌi aꞌe kelipou aia la Isaac. Ia niaina ma Keakua eme aꞌe Abraham pela “Namopuna aꞌoe la meo iho kemanava Isaac,” Abraham eaunahie kekaa Isaac nomake ihoꞌi aꞌe ma Keakua.

¹⁹ Maikinimea Abraham emakino laoi pela Keakua elavaa kehaola muli nakama umake la. Emea pela Abraham eko muli Isaac la ikaha ma kemake.

²⁰ Isaac ehakina hamaoni Keakua, kena ihakapu Jacob laua ma Esau i namea meapihi mai imuli.

²¹ Jacob ehakina hamaoni Keakua. Kela hea kulana aia nikapili imake, kama la ehakapu sakamaliꞌi Joseph la. Keualoko la, Jacob ehapale kelaꞌau hahaele aia la, kena ihamalumalu Keakua.

²² Joseph ehakina hamaoni Keakua. Kulana aia nikapili imake, kama la ekakala aꞌe keonohenua Israel pela nakama la meo ikaha ma Egypt. Kena kama la eme aꞌe nakama la hoi iko naivi kinokama aia la uo ma lakou, iꞌave ikanu henua lakou la.

²³ Namakua Moses la ehakina hamaoni Keakua. Kena koꞌolua la semakaꞌu nakakala kekuꞌu Egypt ekuꞌu la. Kulana laua niꞌike pela kamaliꞌi la ekipukipu laoi, kena iko koꞌolua la ihuu kamaliꞌi la koukolu namaalama imuli aia nihanau.

²⁴ Moses ehakina hamaoni Keakua. Kena kulana aia nikipu aꞌe la, kama la sehihai kaupu kekuꞌu Egypt la ipulu aia.

²⁵ Ia kama la sehihai ikahao i nakipukipu nakama haisala la, maikinimea Keakua ukapili ihakonukonu nakama la. Emeia kama la ehihai ihalono lihu, ehau poi keonohenua Keakua ehalono lihu la.

²⁶ Ia niaina ma aia enapa, kama la ehihai ikaukali Christ. Maikinimea aia sehakaꞌoko maha namea kaualeꞌa Egypt la. Emeia kama la ehakaꞌoko maha kuhana aia meiko la.

²⁷ Moses ehakina hamaoni Keakua. Kela hea kama la ehaele ikaha ma Egypt, ia semakaꞌu pela kekuꞌu la eloko. Kama la ekuu mau, maikinimea aia soia eꞌike Keakua, kela sehikama hoi eꞌike.

²⁸ Kama la ehakina Keakua, kena ikanakana keꞌai kePasova. Vahola, nakama Israel la epalai aꞌe kekoko iluna nakokoꞌa nahale lakou. Ia kena ke{enselo} hamakaꞌu la elee valuna kemakaꞌina la nokaa naalipou keonohenua la nomake. Ia keualoko ke{enselo} la eꞌike kekoko la, kena kama la sekaa naalipou nahale la.

²⁹ Keonohenua Israel la ehakina hamaoni Keakua, kena io valoko kemoana emea, nokae kela vahi kemoana la. Vahola, keala lakou eo la epaupaꞌu, ia savahi keala la epii kelokai. Ia kulana nakama Egypt la nihulo aku vamuli nakama la, kena kelokai la uvaꞌai imuli. Nakama Egypt la hakoa umalemo nomake.

³⁰ Keonohenua Israel ehakina Keakua, kena io hakiꞌe kemakaꞌina Jericho kauhiku naaho,*f4* pela imea nakuehale kemakaꞌina la nosina nomaoki.

³¹ Niaina ma Rehab hehine epaa huli, kama la ehakina hamaoni Keakua. Keualoko koꞌolua nakama Israel eo i Jericho nohaakiaki, kehine la elolosi hakaualeꞌa koꞌolua la iloko hale kehale aia la. Ia nakama kemakaꞌina la ehakapanaka haeꞌo. Ia kena Keakua ekaa nakama la nomake, ia hasao kehine la noola.

³² Ea? Anau meme aku okou alamea hoi? Anau sehiualoko ekana keme aku okou nakipukipu kela Gideon, Barak, Samson, Jephthah, David, Samuel, ia ma alakama hakae nakakala Keakua.

³³ Nakama la ehakina hamaoni Keakua, kena elaꞌa kevuhu ma alahenua, kena ilolosi laoi nahenua la i nakipukipu ekonu. Ia kena nakama la eko namea kela Keakua eme aꞌe lakou la. Nakama la hoi epui napuꞌua nasalau leikama elahi la.

³⁴ Nakama la ekinai naahi elahi, ia sekaloa lia napenisi eꞌaa. Niaina ma nakama la seivi, Keakua emea lakou iivi. Kena nakama la elavaa kevuhu kaua, kena ehaise nakama nahenua elano la io ikaha.

³⁵ Nahine imua la ehakina Keakua, kena nalave ana lakou la emasiꞌe muli ikaha ma kemake. Nahakina ana imua la elili kia lia nokapili imake. Ia nakama la sehihai ihasao ikaha ma kehalono lihu la. Maikinimea nakama la ehihai imasiꞌe muli ikaha ma kemake noola hamaoni.

³⁶ Keonohenua imua la ekakala hamemea nahakina ana, kena ilili haeꞌo kia nakama la. Ia keonohenua la hoi esaisai nahakina ana la na{seni} nopono kelokapu.

³⁷ Ia keonohenua la ekaua nahakina ana la nahaku nomake, ia ehaa alakama ilakonu, ia ekalo alakama napenisi. Nahakina ana la sehiꞌina ekino, ia ekuku haeꞌo. Kela hea naauꞌahu lakou la epenapena lia naꞌili na{sipisipi} ia ma na{nanikoti} la oia. Ia naonohenua hakoa ehai haeꞌo kia nakama la.

³⁸ Nakama la hahaele valoko namouna, ia ma naꞌina kukuaha. Kena inoho iloko nalua iloko kevahi namouna, ia enoho hoi iloko nalua iloko kaꞌele. Ia niaina ma nakama la enoho pela, nakama la ehananiu lo. Kemaalama ilalo nei sekau ma lakou.

³⁹ Keakua ehihai nakama la hakoa, maikinimea nakama la ehakina hamaoni i aia. Kama la ekakala hamaoni ma ikonaꞌi lakou. Ia nakama la sehimea eko.

⁴⁰ Keakua ehakaꞌoko kekonaꞌi hamaoni kakou imua, kena isuꞌui nakama la ma kakou, pela imea naola kakou hakoa iꞌakoa.