Acts 7 - Luaniua New Testament

Nakakala Stephen

¹ Pohoulu hamakua namaakua la evasili aꞌe Stephen, “Nakakala nakama la ehai aku i aꞌoe la ehamaoni?”

² Kena Stephen eme aꞌe, “Aukaina ia ma aukamana. Halono mai. Keualoko kipuna kakou imua la Abraham oinoho i Mesopotamia, ia imua kama la ehaele nonoho i Haran, Keakua hananiu la ehakumaka aꞌe kama la,

³ kena ime aꞌe, Kiaꞌi henua aꞌoe na ma haleaina aꞌoe na, kena uhaele i henua anau meihuli aku i aꞌoe.

⁴ “Abraham ukiaꞌi Chaldea ihaele nonoho i Haran. Ia kena vahola, kamana aia la umake. Kena Keakua ehaunalia Abraham nonoho i keꞌina kakou enoho nei.

⁵ Ia Keakua seau aꞌe heꞌina i henua nei moꞌina Abraham, niaina heeleꞌele soliꞌi. Ia Keakua ekakala kehamaoni pela aia meau aꞌe henua nei hakoa i nahaimopuna Abraham la. Ia keualoko Keakua ekakala penei, Abraham sehikamaliꞌi.

⁶ Kena Keakua eme aꞌe Abraham, ‘Nahaimopuna aꞌoe la menoho i henua alakama. Kena iloko haa huikalau nahekau, nakama henua la meikaohi nahaimopuna aꞌoe la mo kama heheaꞌu lakou, ia meihai haeꞌo kia nakama la.

⁷ Ia anau meihakonu konu nakama henua la. Kena nahaimopuna aꞌoe la meio mai nohamalu mai anau i keꞌina nei.’

⁸ Keakua eme aꞌe Abraham ihamakino nakapukapu nakamaliꞌi kanaka aia, ihuli aꞌe pela Keakua elolosi lakou. Abraham o kamana Isaac. Keualoko Isaac nikae evalu naaho i kanamakua, Abraham uhamakino Isaac. Kena Isaac o kamana Jacob. Ia kena Jacob o kamana kela sanahulu ma lua nakipuna hamakua kakou imua la.

⁹ “Nakipuna kakou imua la esano Joseph, kaina lakou la, kena iau aꞌe kama la nosui alakama, ime mo manu sili iloko Egypt. Ia Keakua sekiaꞌi Joseph.

¹⁰ Keakua ekonaꞌi kama la ikaha ma naluꞌuna aia la hakoa. Keakua ekonaꞌi Joseph noakamai imua Pharaoh kekuꞌu i Egypt, kena iko Pharaoh ihihai Joseph, kena ikini kama la ilolosi kehale aia la, ia ma henua Egypt la hakoa.

¹¹ “Keualoko la, keone la ukae aꞌe Egypt ia ma Canaan. Kena naonohenua la ehalono lihu kehiꞌai. Ia nakipuna kakou la usehiꞌai elave keꞌai.

¹² Ia Jacob ulono pela Egypt eisi naꞌai, kena ihaunalia nakipuna kakou la nosee naꞌai. Kela keualoko amaka kela nakama la uo nokae keꞌina la.

¹³ Keualoko hasiaoa nakaina Joseph la evaꞌai i Egypt, Joseph ehaꞌali aꞌe soia i nakama la nomakino i aia. Ia kena Pharaoh umakino hoi haleaina Joseph la.

¹⁴ Kena iko Joseph ihaunalia nakaina aia la nome aꞌe kamana aia la ma kemanava lakou la hakoa io aꞌe i Egypt. Kela kipuhiku ma lima nakama hakoa.

¹⁵ Kena Jacob uhaele i Egypt. Kama la ma nakipuna kakou la umake hakoa i keꞌina la.

¹⁶ Ia nakinokama nakama la uꞌave nokanu i Shechem, iloko naꞌava lakou la. Abraham niau aꞌe namoni pahaku eꞌiva isui keeleꞌele la ikaha ma keꞌaha Hamor.

¹⁷ “Kekipu nakama kakou la uo mai nokomaꞌi iloko Egypt. Keualoko la, Keakua ukapili au aꞌe henua kela aia nime aꞌe Abraham iau aꞌe nahaimopuna aia la.

¹⁸ Kena kelaa kuꞌu hoi ulolosi Egypt, ia kama la semakino ia Joseph.

¹⁹ Kama la ehailavaꞌa nakipuna kakou la, kena ihai haeꞌo kia nakama la ikiaꞌi nakamaliꞌi lakou la imaka hale nomake.

²⁰ “Keualoko la, Moses uhanau. Ia kamaliꞌi la ekipukipu laoi i namaisu Keakua. Haleaina kamaliꞌi la ehamuni kama la iloko kehale kamana aia la, nololosi kama la koukolu namalama.

²¹ Ia kulana namakua kamaliꞌi la eꞌave kama la nohamoe ikaha ma kehale lakou la, kaupu Pharaoh upulu kamaliꞌi la imea mo kama aia.

²² Nakama haEgypt epolopolo Moses imakino keakamai lakou la. Ia kena kama la eailoa laoi kekakala, kena ihuli aꞌe namahi aia.

²³ “Keualoko Moses ukae kipuhaa nahekau i kanamakua, kama la uhakaꞌoko pela aia ihaele nomaka nakaina aia i nakama Israel la.

²⁴ Vahola, Moses eꞌike kekama haEgypt ememe haeꞌo kia kama kakou la. Kena Moses uhaele nokonaꞌi kama la, kena ikaa kama haEgypt la nomake.

²⁵ Moses ehakaꞌoko pela nakaina aia la umakino pela Keakua ehaunalia aia ikonaꞌi lakou. Ia nakama Israel la seailoa.

²⁶ Kela aho, Moses eꞌike sakoꞌolua nakama haIsrael evuhu, kena ihaele aꞌe nohamau koꞌolua la isevuhu, kena ime aꞌe, ‘Aukaina, olua hanau oia. Aiea olua evuhu naea?’

²⁷ “Ia kekama kela ekaa kelaa kama eusu Moses i kevahi, kena ime aꞌe, ‘Oai kekama ekini aꞌoe ihamakua, ihakonu maua?

²⁸ Aꞌoe mekaa anau imake poi aꞌoe nikaa kama haEgypt nomake keaho la?’

²⁹ Kulana Moses nilono nakakala nei, kama la usopo nokele ikaha ma Egypt nonoho iloko Midian. Kama la uꞌavana ilaa, noisi sakamaliꞌi kanaka aia.

³⁰ “Imuli kipuhaa nahekau, Moses enoho i keꞌina kukuaha kapili kemouna i Sinai. Kena ke{enselo} Keakua ekuu aꞌe iloko keahi kela eula iloko napupu.

³¹ Moses emasalo hea aia eꞌike la, ia keualoko kama la nihaele nokapili aꞌe ma iꞌike laoi aia, kama la ulono keleo Kealiꞌi,

³² ‘Anau o Keakua nakipuna aꞌoe la, Keakua kela Abraham, Keakua kela Isaac ia ma Keakua kela Jacob’. Moses upole, kena umakaꞌu keꞌila aꞌe napupu la.

³³ “Kealiꞌi eme aꞌe Moses, ‘Ui nakapuae aꞌoe na ikaha. Mai keꞌina aꞌoe ekuu na ekapu.

³⁴ Anau eꞌike keonohenua anau la ehalono lihu iloko Egypt. Anau elono nakani lakou, kena anau uhaele iho ikonaꞌi nakama la. Hamai. Anau meihaunalia aꞌoe ivaꞌai muli Egypt.’

³⁵ “Moses o kekama kela keonohenua Israel esehihai. Nakama la eme aꞌe ma, ‘Oai kekama ekini aꞌoe ihamakua ihakonu makou.’ Ia Keakua ehaunalia ke{enselo} aia la nohuli aꞌe Moses iloko napupu la, kena ime aꞌe Moses ilolosi keonohenua Israel, kena ihakaꞌi nakama la ikaha ma Egypt.

³⁶ Moses ehuli aꞌe namea kaualeꞌa ma nahaꞌaku iloko Egypt ia ma Kemoana Emea. Kena kama la uhakaꞌi keonohenua la ikaha ma Egypt. Iloko kipuhaa nahekau, Moses ehuli aꞌe namahi aia hoi iloko keꞌina kukuaha la.

³⁷ Moses o kekama nime aꞌe keonohenua Israel, ‘Keakua meihaunalia aku hekama hakae nakakala aia i okou ehau poi anau. Hekama i keonohenua okou na.’

³⁸ Moses ekaꞌa ma nahakina ana nakipuna kakou la iloko keꞌina kukuaha. Kena ihaꞌali aꞌe nakama la nakakala kela ke{enselo} eme aꞌe aia iluna kemouna Sinai. Moses elono nakakala keola la, kena ime mai kakou hoi.

³⁹ “Ia nakipuna kakou esehihai ihalono Moses. Kena nakama la ehakosi kama la i kevahi, ia hihai ma lakou ivaꞌai muli i Egypt.

⁴⁰ Kena nakama la ume aꞌe Aaron, ‘Pena pena nihakipua ma makou ihakaꞌi makou. Makou seailoa hea esala ia Moses, kekama kela ehakaꞌi mai makou ikaha ma Egypt.’

⁴¹ Keualoko la, nakama la upena hakipua ikipu poi punua {bulumakau}. Kena nakama la ehoꞌi aꞌe napunua ihamalumalu hakipua la, ia imea nakahao nohamaha hakipua kela lakou epena solakou.

⁴² Kena Keakua ukiaꞌi nakama la ihamalumalu nahekuu i kevaelani, poi hea nakama hakae nakakala Keakua nikakaa iloko kelauniu lakou la ma, ‘Okou nakama Israel. Kipuhaa nahekau okou enoho iloko keꞌina kukuaha la. Saika la, okou sehoꞌi mai napunua nohamalu mai anau,

⁴³ Okou ehakuu kamahale ihamalumalu hakipua Moloch, Okou ehamalumalu hoi Rephan, hakipua nahekuu la. Anei nahakipua okou nipena nohamalumalu. Ia kena anau meihaise okou ikaha, nonoho i kelaa vahi Babylon.’

⁴⁴ “Nakipuna kakou la ehakuu kamahale kapolo ihamalumalu Keakua i keꞌina kukuaha. Ehau poi kekipu Keakua nihuli aꞌe ia Moses.

⁴⁵ Nakipuna kakou la niko kamahale la keualoko lakou ekaukali Joshua. Saika la, nakama la uko naeleꞌele naonohenua kela Keakua ehakui ikaha imua lakou la. Kamahale kapolo la ekaꞌoko ilaa nokae keualoko David nikuꞌu.

⁴⁶ Keakua ehihai David, kena David eainoa aꞌe Keakua, pela aia meihakuu hale kapu Keakua. Kela o Keakua kela Jacob.

⁴⁷ Ia kela Solomon avale ehakuu kehale kapu Keakua la.

⁴⁸ “Ia Keakua ialuna senoho iloko nahale nakama ehakuu, ehau poi hea kama hakae nakakala aia la nime aꞌe,

⁴⁹ ‘Kevaelani o keꞌina ekapu anau nonoho, ia kemaalama nei o keꞌina nakapuae anau ekuꞌu. Kealiꞌi eme aꞌe, Okou sekau kehakuu kehale anau, keꞌina anau meinoho la.

⁵⁰ Anau sonau epena namea hakoa.’

⁵¹ “Okou na{Jiu} ehakapanaka, ehau poi nakama enoho pouli. Okou sehalono kehamaoni, ia ihakauoki ma Keanana Kapu, ehau ma nakipuna okou la.

⁵² Nakama la ememe haeꞌo kia nakama hakae nakakala Keakua la hakoa, ia ikaa nakama la nomake. Anei nikama kela ekakala mai imua pela kekama ekonu kahi meihamai. Ia okou eau aꞌe kama la i nakama eliloko aia, ikaa kama la nomake.

⁵³ Na{enselo} la niau aku nakuaa, ia okou sekaukali nakuaa la.”

Na{Jiu} la ekaua Stephen nahaku

⁵⁴ Keualoko nakama hamakua la nilono nakakala nei, nakama la uloko haimahi ia Stephen.

⁵⁵ Ia Keanana Kapu unoho iloko Stephen, kena kama la eꞌila iluna noꞌike kemasina Keakua i kevaelani. Ia Jesus ekuu i kevahi laua Keakua.

⁵⁶ Kena Stephen ume aꞌe, “Ila aꞌe. Anau eꞌike kevaelani ukalaꞌi, ia {kama ekipu kama} ukuu i kevahi laua Keakua.”

⁵⁷ Kena nakama hamakua la upui naakalina lakou, kena ivaa hamaloa. Kena isopo nohulo aꞌe hakoa ia Stephen la,

⁵⁸ nosolo kama la ikaha ma kemakaꞌina Jerusalem, nomaꞌa kama la nahaku. Nakama la eui naauꞌahu lakou la iau aꞌe nololosi kaupeala, kanamale Saul.

⁵⁹ Keualoko nakama la nimaꞌa Stephen nahaku, kama la uloku aꞌe Keakua, “Kealiꞌi Jesus, ko lia halaoi kauanana.”

⁶⁰ Kena kama la ukoukuli ilalo, noanaa hamaloa, “Keakua, sili hia nahaisala nakama nei.” Kama la ekakala penei, kena imake. Ia Saul ehihai nakama la ikaa Stephen imake.