Taitahs 3 - ᐅᒋᐺ ᑭᒋᒪᓯᓇᐃᑲᓐᐋᓃᓐ ᑫᔑᐱᒫᑎᓯᐸᓐ ᐅᑕᓇᒥᐋ 1 ᐐᑕᒪᐎᑾᒃ ᐃᑕᔥ ᒋᐸᑕᐲᑕᐙᐙᒡ ᑳᑎᐯᓂᒥᐌᓂᒡ, ᐃᐃ ᑲᔦ ᑳᐅᑭᒫᐌᑖᑯᓯᓂᒡ, ᒋᓇᓇᐃᑕᐙᐙᒡ ᒨᔕᒃ ᐃᑯ ᒋᐗᐌᐯᒦᐙᒡ ᒋᑑᑕᒧᐙᒡ ᑳᐅᓂᔑᔑᓂᓂᒃ᙮ 2 ᐐᑕᒪᐤ ᑲᔦ ᒋᒪᒋ ᐃᓈᓯᒀ ᐊᐎᔭᓐ, ᒨᔕᒃ ᐃᑕᔥ ᐃᑯ ᒋᐙᐸᑕᐋᐙᒡ ᑲᑭᓇ ᐊᐎᔭᐞ ᐁᓅᑫᓂᒫᐙᒡ, ᐱᓵᓂᑯ ᑲᔦ ᐊᐎᔭᐞ ᐁᒥᓄᐐᒌᐙᐙᒡ᙮ 3 ᐋᓃᔥ ᑫᑮᓇᐎᓐᑦ ᐋᐱᑎᕽ ᑭᑮᑲᑮᐹᑎᓯᒥᓐ, ᐁᑮᔕᔒᐱᑕᒪᕽ, ᐁᑮᐗᓂᔑᒥᑰᔭᕽ ᑲᔦ, ᐁᑮᑎᐯᓂᒥᑯᔭᕽ ᐌᑯᓀᓐ ᐃᑯ ᒥᓴᐌᒋᑲᓇᓐ, ᐁᑮᐊᑕᐌᑕᒪᕽ ᒨᔕᒃ ᒋᒥᓄᒪᒋᐅᔭᕽ᙮ ᑫᑮᓇᐎᓐᑦ ᐄᑐᒃ ᑭᑮᒪᒋᑕᔑᑫᒥᓐ, ᑭᑮᒥᓴᐌᑕᒫᑫᒥᓐ ᑲᔦ, ᐁᑮᔒᑫᓂᒥᑰᔭᕽ, ᐁᑮᓂᔥᑫᓂᑎᔭᕽ ᑲᔦ ᑲᑭᓇ᙮ 4 ᐊᐲ ᑕᔥ ᑭᔐᒪᓂᑑ ᑭᑑᐱᒫᒋᐃᐌᒥᓈᓐ ᐅᑭᔐᐙᑎᓯᐎᓐ ᑮᓈᑯᑑᒡ, ᐃᐌ ᓇᑫ ᑲᔦ ᑳᐃᔑᔕᐌᓂᒫᒡ ᐃᐃ ᐯᒫᑎᓯᓂᒡ, 5 ᑭᑮᐱᒫᒋᐃᑯᓈᓐ᙮ ᑳᐐᓐ ᑕᔥ ᐐᓐ ᑭᒥᓄᐊᓄᑮᐎᓂᓈᓂᕽ ᑳᑮᐃᔑᒋᑫᔭᕽ, ᐃᐃᒫ ᓴ ᐐᓐ ᐃᑯ ᐅᑰᐹᓯᓈᑫᐎᓐ ᑭᑮᐅᒋᐱᒫᒋᐃᑯᓈᓐ᙮ ᐊᐊ ᓴ ᑭᔐᒪᓂᑑ ᐅᑕᒑᑾᓐ ᑭᑮᐃᔑᒋᑫᐃᑯᓈᓐ, ᑭᑮᑭᓰᔮᐹᐗᓂᑯᓈᓐ ᐁᑮᐅᔥᑭᓂᑖᐎᑭᐃᓇᕽ, ᐅᔥᑭᐱᒫᑎᓯᐎᓐ ᑲᔦ ᐁᑮᒦᓂᓇᕽ᙮ 6 ᒦᔥ ᐅᓄ ᐅᑕᒑᑾᓐ ᑭᔐᒪᓂᑑ ᑳᑮᐌᓅᒋᓰᑭᓇᒪᐎᓇᕽ ᒋᓴᔅ X ᑳᐱᒫᒋᐃᓇᕽ ᐅᒋ᙮ 7 ᒦ ᓴ ᑕᔥ ᐅᑭᔐᐙᑎᓯᐎᓂᕽ ᒋᐅᒋ ᐃᓇᑭᒥᓇᕽ ᑾᔭᒃ ᒋᒥᓄᐐᒌᐗᕽ, ᑲᔦ ᒋᑌᐱᓇᒪᕽ ᐃᐃ ᐱᒫᑎᓯᐎᓐ ᐐᑳ ᑫᐃᔥᒀᓭᓯᓄᒃ ᑳᐊᐯᓂᒧᓄᑕᒪᕽ᙮ 8 ᑌᐺᔦᑖᑾᓐ ᐃᑕᔥ ᐅᐅ ᐃᑭᑐᐎᓐ᙮ ᑭᓇᑕᐌᓂᒥᓐ ᐃᑕᔥ ᐌᐌᓂ ᒋᐐᑕᒫᑫᔭᓐ ᐅᓄ ᑭᒋᑫᑰᓇᓐ, ᐃᑭ ᓴ ᑳᑌᐺᑕᐙᐙᒡ ᑭᔐᒪᓂᑑᓐ ᒋᐊᔮᒀᒥᓯᐙᒡ ᐋᐱᒋ ᒋᒥᓄᑑᑕᒧᐙᒡ ᒨᔕᒃ᙮ ᐋᐱᒋ ᐋᓃᔥ ᒥᓄᓈᑾᓐ ᐃᐃ ᒋᑮᐃᔑᒋᑫᓈᓂᐗᑭᐸᓐ, ᑲᑭᓇ ᑲᔦ ᐊᐎᔭ ᑕᐅᒋᒥᓄᓭ᙮ 9 ᑫᑯ ᑕᔥ ᐐᓐ ᐐᒋᐋᑫᓐ ᐊᐎᔭᒃ ᐊᓂᔖ ᐱᑯ ᑳᑮᑳᑎᐙᒡ ᑲᔦ ᑳᒥᑰᑕᒧᐙᒡ ᐋᑎ ᑳᐱᐅᑕᑳᓀᓯᐙᒡ, ᑲᔦ ᒫᔑᑲᓅᓂᑎᐙᒡ᙮ ᑫᑯ ᑲᔦ ᐐᒋᑑᑫᓐ ᐁᑲᑴᔖᑰᓱᑎᕽ ᐃᐃ ᐅᓇᔓᐌᐎᓐ ᑳᐃᑭᑑᒪᑲᒃ, ᐋᓃᔥ ᑳᐐᓐ ᑫᑰᓐ ᑕᐃᓈᐸᑕᓯᓅᓐ ᐃᐃ ᐃᔑᒋᑫᕽ᙮ ᑳᐐᓐ ᑲᔦ ᑫᑰᓐ ᐊᐲᑌᑖᑾᓯᓅᓇᓐ᙮ 10 ᑮᔥᐱᓐ ᐃᑕᔥ ᐊᐎᔭ ᑳᐗᓂᔥᑴᐃᐌᒡ, ᐊᔮᒀᒥᒻ ᐋᐱᑎᕽ, ᐲᓂᔥ ᐃᑕᔥ ᓃᔣ 2, ᒦ ᓴ ᐃᔑᐋᓇᐌᓂᒻ ᐱᓯᑕᐎᓯᓄᒃ᙮ 11 ᑭᑭᑫᑖᓐ ᐋᓃᔥ ᐊᐊ ᐃᓂᓂ ᐁᒪᒋ ᐃᔑᐌᐱᓯᒡ, ᐃᐃᒫ ᓴ ᐅᑎᔑᒋᑫᐎᓂᕽ ᐅᒋᓈᑾᓂᓂ ᐁᐗᓂᑑᑕᕽ᙮ ᐃᔥᒀᒡ ᑳᑮᐃᔑᐊᓅᓈᒡ ᑕᐃᑕᓴᓐ 12 ᐊᐲ ᑕᔥ ᐲᒋᓂᔕᐗᒃ ᐋᕒᑎᒪᔅ Artemas ᑯᒫ ᑲᔦ ᑎᑭᑲᔅ Tychicus ᐌᑎ ᑳᐃᔑᐊᔮᔭᓐ ᒋᓈᐱᔥᑲᐎᒃ, ᐐᑫ ᑲᑴᑲᔥᑭᑑᑲᓐ ᒋᐱᐊᑕᐙᐸᒥᔭᓐ ᐌᑎ ᓂᑳᐸᓬᐃᔅ Nicopolis ᐆᑌᓈᕽ, ᐋᓃᔥ ᐋᔕ ᓂᑮᐃᓀᑕᒻ ᐁᐐᑕᔑᐱᐴᓂᔑᔮᓐ ᐌᑎ᙮ 13 ᐐᑫ ᑕᔥ ᑲᑴᐐᒋᐞ ᐊᐌ ᓰᓇᔅ Zenas ᐅᓈᑕᒫᑫ, ᐊᑆᓬᐊᔅ Apollos ᑲᔦ, ᒋᒫᒑᐙᒡ ᐃᐃ ᑳᐐᐸᐹᒥᔭᔮᐙᒡ, ᑫᒋᓈᒡ ᑲᔦ ᒋᐐᒋᐊᑣ ᑫᑰᓂᓂ ᒋᓅᑌᓭᓯᒀ᙮ 14 ᒦ ᓴ ᐁᔑᓈᑾᓂᓂᒃ ᑭᐐᒋᑌᐺᑕᒨᒥᓈᓂᒃ ᒋᑭᑫᑕᒧᐙᐸᓐ ᒨᔕᒃ ᐃᑯ ᒋᑲᑴᒥᓄᑑᑕᒧᐙᒡ, ᒋᑲᔥᑭᑕᒫᓱᐙᒡ ᑫᑰᓂᓂ ᒋᓅᑌᓭᓯᒀ᙮ ᑳᐐᓐ ᐐᓐ ᐊᓂᔖ ᐱᑯ ᒋᒥᒋᐱᒫᑎᓯᐙᐸᓐ᙮ 15 ᐅᑯ ᑕᔥ ᑲᑭᓇ ᑳᐐᒌᐎᐙᒡ ᑭᐴᔔᐃᑯᐙᒃ᙮ ᐴᔔᑕᒪᐎᔑᓈᒻ ᐃᑕᔥ ᒋᐴᔔᐊᑣ ᑲᔦ ᐅᑯ ᑳᓵᑭᐃᔭᒥᑣ ᐅᒋ ᐃᐌ ᑭᑌᐺᑕᒧᐎᓂᓈᓂᕽ᙮ ᑭᔐᒪᓂᑑ ᐅᑭᔐᐙᑎᓯᐎᓐ ᑭᑲᐐᒌᐎᑯᒻ ᑲᑭᓇ ᑳᑕᔑᔦᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society