ᔂᓬᐊᒪᓐ ᐅᓂᑲᒧᓇᓐ 7 - ᐅᒋᐺ ᑭᒋᒪᓯᓇᐃᑲᓐᐃᓂᓂ ᐁᑭᑐᒡ 1 ᐁᑕᑕᐌ ᓴ ᑭᒥᓄᓈᑯᔅ ᐁᐃᑴᐎᔭᓐ, ᐁᑕᑕᐌ ᒥᓄᓈᑾᓅᓐ ᑭᓯᑕᓐ ᐁᑭᑲᑭᓯᓀᔭᓐ᙮ ᐃᐃ ᓴ ᑳᔑ ᒥᓍᑯᑆᒣᔭᓐ ᒦ ᓴ ᐃ ᐁᔑᓈᑾᒃ ᑖᐱᔥᑰ ᑎᓄ ᐊᓯᓐ ᑳᐊᑭᓱᒡ, ᐁᔑ ᒫᒌᒡ ᐊᐊ ᑳᓇᑲᒋᑑᒡ ᑫᑰᓐ ᐁᐅᔑᑑᒡ᙮ 2 ᒦ ᓴ ᐃ ᑭᑎᔅ ᐁᓀᑖᑾᒃ ᑖᐱᔥᑰ ᑳᐙᐎᔦᔮᒃ ᒥᓂᒀᑲᓐ, ᐐᑳ ᑳᔑ ᒑᑭᓭᓯᓄᒃ ᔔᒥᓈᐳ᙮ ᑭᒥᓴᑦ ᓴ ᒦ ᐃ ᐁᓀᑖᑾᒃ ᑖᐱᔥᑰ ᐸᑴᔑᑲᓂᒥᓇᓐ ᑳᐅᑯᓯᑭᓐ, ᐙᐱᑾᓃᓐ ᑳᐙᑳ ᐊᔮᑭᓐ ᐃᐃᒫ᙮ 3 ᑭᒎᒎᔑᒪᒃ ᓴ ᐃᓀᑖᑯᓯᐗᒃ ᑖᐱᔥᑰ ᑳᓃᔓᐅᑌᐎᐙᒡ ᐙᐙᔥᑫᔒᓴᒃ, ᑳᓃᔑᐙᒡ ᒪᔭᑭ ᐙᐙᔥᑫᔑᐗᒃ᙮ 4 ᑭᑴᑲᓐ ᓴ ᐁᐲᒋ ᒥᓄᓈᑾᒃ ᑖᐱᔥᑰ ᐅᓵᐱᐎᓐ ᑳᐅᒋ ᐅᔑᒋᑳᑌᒃ ᒥᓯᐌᑲᓐ ᐐᐱᑖᕽ᙮ ᒦᔥ ᑭᔥᑮᔑᑰᓐ ᐁᔑᓈᑾᑭᓐ ᑖᐱᔥᑰ ᓵᑲᐃᑲᓃᓯᑳᓇᓐ ᐁᔮᑭᓐ ᐃᐃᒫ ᐆᑌᓈᕽ ᐁᔥᐸᓐ Heshbon, ᒌᑲᔭᐄ ᑭᒋ ᐃᔥᒀᑌᒥᕽ ᐸᑦᕒᐋᐱᒻ Bath Rabbim ᐁᒋᑳᑌᒃ᙮ ᑭᔕᑾᓐ ᐁᓀᑖᑾᒃ ᑖᐱᔥᑰ ᓬᐁᐸᓇᓐ ᑳᐃᔥᐸᑭᑌᒃ ᐅᓵᐱᐎᓐ ᒋᐅᒋ ᑲᓇᐙᐸᒋᑳᑌᒃ ᑎᒫᔅᑲᔅ ᐆᑌᓇ᙮ 5 ᑭᑎᒀᓐ ᓴ ᐁᑕᑕᐌ ᑭᒥᓄᓈᑯᔥᑳᑯᓐ ᑖᐱᔥᑰ ᐗᒋᐤ ᑳᕒᒪᓬ ᐁᒋᑳᑌᒃ ᑳᔑ ᒥᓄᓈᑯᒋᑫᒪᑲᒃ᙮ ᑮᓂᓯᓴᓐ ᐁᐙᐙᓵᐲᑭᑌᑭᓐ ᒦ ᓴ ᐃ ᐁᔑᓈᑾᑭᓐ ᑖᐱᔥᑰ ᐌᓂᔑᔑᕽ ᓭᓂᐹᐌᑭᓐ, ᑭᒋᐅᑭᒫ ᓴ ᑳᐐᓐ ᐊᓂᓵᐅᓰ ᒋᑲᓇᐙᐸᑕᑭᐸᓐ᙮ 6 ᐁᑕᑕᐌ ᓴ ᑭᑑᓂᔑᔥ, ᐐᑫ ᐁᒥᓄᓈᑯᓯᔭᓐ, ᐁᑕᑕᐌ ᑌᐱ ᒥᓉᑖᑾᓐ ᑳᔑ ᒥᓉᓂᒥᐌᔭᓐ᙮ 7 ᐃᐃ ᓴ ᐁᔑ ᒥᓄᑭᔭᓐ ᑖᐱᔥᑰ ᐹᒻ ᑎᓄᐙᑎᒃ ᑭᑎᓀᑖᑯᔅ, ᑭᒎᒎᔑᒪᒃ ᐁᐃᓀᑖᑯᓯᐙᒡ ᑖᐱᔥᑰ ᑳᐅᑾᑰᑌᒃ ᔒᐎᒦᒋᒻ᙮ 8 ᓂᑲ ᐊᒀᑕᐌ ᓴ ᐊᐊ ᒥᑎᒃ ᒋᒪᐎᓐᔂᑕᒫᓐ ᐃᓂ ᓀᑖᐎᑭᑭᓐ ᐃᐃᒫ᙮ ᒦ ᓴ ᐃ ᐁᓀᓂᒪᒀ ᑭᒎᒎᔑᒪᒃ ᑖᐱᔥᑰ ᔔᒥᓇᒃ ᑳᐅᑾᐆᓱᐙᒡ, ᑖᐱᔥᑰ ᓴ ᐁᔑ ᒫᑯᓯᐙᒡ ᐱᔒᒥᓇᒃ, ᒦ ᐃ ᒪᔮ ᐁᔑ ᒫᑾᓈᒧᔭᓐ, 9 ᑭᑑᓐ ᑲᔦ ᔔᒥᓈᐴᕽ ᐁᐃᔑ ᒫᑾᒃ᙮ ᑕᑲ ᑕᐃᔑᒋᐗᓂᓂ ᐃᐃ ᔔᒥᓈᐴᓂ ᐁᔑᐊᔮᒡ ᑳᒥᓉᓂᒪᒃ, ᒋᐊᓂ ᐃᔑᒋᐗᓂᓂᒃ ᐅᑑᓂᕽ, ᐐᐱᑖᕽ ᑲᔦ᙮ ᐃᑴ ᐁᑭᑐᒡ 10 ᓂᑎᐯᓂᒥᒃ ᑳᒥᓉᓂᒥᒡ ᐁᐸᑯᓭᑕᕽ ᒋᐊᔮᐎᒡ᙮ 11 ᑕᑲ ᐊᐯ ᑳᒥᓉᓂᒥᓈᓐ, ᑕᑲ ᐃᔖᑖ ᐌᑎ ᒥᔕᐗᑲᒥᒃ, ᒋᐊᐎ ᑲᑎᑯᓂᔭᕽ ᐌᑎ ᐁᔑᑖᓂᐗᕽ᙮ 12 ᑕᑲ ᓴ ᐐᐸ ᐃᔖᑖ ᐌᑎ ᑳᔑ ᑭᑎᑳᓱᐙᒡ ᔔᒥᓇᒃ, ᑕᑲ ᐋᔕ ᒋᓵᑭᐸᑮᐙᑴᓐ, ᑕᑲ ᐋᔕ ᒋᒫᒌᑭᐙᑴᓐ, ᑕᑲ ᑲᔦ ᐃᑭ ᒥᑎᑰᒃ ᑳᔑ ᓂᑖᐎᑭᕽ ᔒᐎᒦᒋᒻ ᐋᔕ ᒋᑮᔑᑭᐙᑴᓐ, ᒦᑕᔥ ᐌᑎ ᑫᑕᔑ ᒥᓉᓂᒥᓈᓐ᙮ 13 ᒦᑕᔥ ᒋᒥᓈᑕᒪᓐ ᑎᓄ ᑳᓂᑖᐎᑭᑭᓐ ᐌᒋ ᐅᑕᐱᓅᒌᔑᒥᕽ, ᑲᑭᓇ ᑲᔦ ᐌᓂᔑᔑᕽ ᔒᐎᒦᒋᒻ ᓀᑖᐎᑭᕽ ᐯᔓ ᐊᑾᒌᕽ ᐃᔥᒀᑌᕽ ᐁᐊᔮᒃ᙮ ᑳᒥᓉᓂᒥᓈᓐ, ᓂᑮ ᒪᐙᒋᑑᓐ ᐅᔕ ᐅᑖᓈᕽ ᑳᑮ ᓂᑖ ᒥᓉᑕᒧᐃᑯᔭᓐ, ᐅᔥᑭ ᑫᑰᓐ ᑲᔦ ᑫᒥᓉᑕᒧᐃᑯᔭᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society