ᑲᑮᑖᐎᑮᔗᐎᓇᓐ 9 - ᐅᒋᐺ ᑭᒋᒪᓯᓇᐃᑲᓐᑲᑮᑖᐌᑕᒧᐎᓐ ᐁᑭᑑᒪᑲᒃ᙮ 1 ᑲᑮᑖᐌᑕᒧᐎᓐ ᐄᑐᒃ ᐅᑑᔑᑑᓐ ᐅᐙᑳᐃᑲᓐ, ᓃᔣᓱ 7 ᐯᑕᑭᓱᓂᒡ ᐊᔂᑾᐃᑲᓇᐞ ᐁᐋᐸᒋᐋᒡ᙮ 2 ᐅᑮ ᓂᓵᓐ ᐊᔭᐋᐎᔕᓐ ᐁᑮ ᑾᔮᒋᑑᒡ ᐁᐐ ᑭᒋ ᐐᑾᑫᒡ, ᐋᔕ ᔔᒥᓈᐳ ᐁᑮ ᑕᒀᑲᒥᓇᕽ᙮ ᑑᐳᐎᓈᒃ ᑲᔦ ᐋᔕ ᐅᑮ ᐅᔑᓯᑑᓐ᙮ 3 ᐋᔕ ᑲᔦ ᐅᑮ ᐃᔑᓂᔕᐙᐞ ᑳᐃᑴᐎᓂᒡ ᐅᑕᓄᑮᐋᑲᓇᐞ ᒫᐗᒡ ᐁᔑ ᐃᔥᐹᓂᒃ ᐆᑌᓇ, ᐅᐅ ᒋᐃᑭᑐᓂᒡ, 4 ᑲᑭᓇ, ᐊᐯᔪᒃ ᐲᑎᑫᒃ, ᑫᑫᑕᓯᐌᒃ ᑫᑰᓐ, ᐅᑎᓈᐞ ᓀᓯᑕᐌᒋᑫᓯᓂᒃ᙮ 5 ᐊᐯᔪᒃ, ᐱᐐᓯᓂᒃ ᒋᒦᒋᔦᒃ ᓂᒦᒋᒥᒻ, ᒋᒥᓂᑴᔦᒃ ᑲᔦ ᔔᒥᓈᐳ ᑳᑮ ᑕᒀᑲᒥᓇᒫᓐ᙮ 6 ᓇᑲᑕᒧᒃ ᑭᑲᑮᐹᑎᓯᐎᓂᐙ ᒋᐱᒫᑎᓯᔦᒃ, ᓂᓯᑐᑕᒧᐎᓂᕽ ᐃᔑ ᐱᒧᓭᒃ᙮ 7 ᑮᔥᐱᓐ ᒫᒦᓄᒪᒡ ᓀᑖᒫᓀᒋᑫᒡ, ᑌᑾᒡ ᐐᓐ ᑭᑲ ᒥᑯᔥᑳᒋᐃᒃ᙮ ᑮᔥᐱᓐ ᑲᔦ ᒫᒦᓄᒪᒡ ᐅᒪᒑᑎᔅ, ᑫᒋᓈᒡ ᑭᑲ ᐐᓴᑫᑕᒥᐃᑯᓐ᙮ 8 ᑫᑯ ᐐᑳ ᒫᒦᓄᒫᑫᓐ ᓀᑖᒫᓀᒋᑫᒡ, ᑭᑲ ᐅᒋ ᓂᔥᑫᓂᒥᒃ ᐅᔕ᙮ ᑮᔥᐱᓐ ᐃᑕᔥ ᐐᓐ ᒫᒦᓄᒪᒡ ᑫᑮᑖᐌᑕᕽ, ᐋᒋᑯ ᑭᑲ ᓵᑭᐃᒃ᙮ 9 ᑭᑭᓄᐊᒪᐗᒡ ᑫᑮᑖᐌᑕᕽ, ᐋᒋᑯ ᑕᓂ ᐅᒋ ᑲᑮᑖᐌᑕᒻ, ᑭᑭᓄᐊᒪᐗᒡ ᑴᔭᒀᑎᓯᒡ ᐋᒋᑯ ᑕᓂ ᐅᒋ ᑭᑫᑖᓱ᙮ 10 ᑮᑯᑖᓀᓂᒥᓐᒡ ᑳᑎᐯᒋᑫᒡ ᐅᒋ ᒫᒋᓭ ᑲᑮᑖᐌᑕᒧᐎᓐ, ᑮᑭᑫᓂᒥᓐᒡ ᑫᑌᑖᑯᓯᒡ, ᒦ ᐃᐌ ᐁᐊᔮᑳᑌᒃ ᓂᓯᑐᑕᒧᐎᓐ᙮ 11 ᑲᑮᑖᐌᑕᒧᐎᓂᕽ ᐅᔕ ᑕᐅᒋ ᐹᑏᓇᑎᓅᓐ ᒥᓂᒃ ᑫᓂ ᑲᑮᔑᑲᓂᔑᔭᓐ, ᒥᓂᒃ ᑲᔦ ᑫᓂ ᐱᐴᓂᔑᔭᓐ᙮ 12 ᑮᔥᐱᓐ ᑲᑮᑖᐌᑕᒪᓐ, ᒦ ᓴ ᐃᐌ ᑫᒥᓄ ᑎᐸᐊᒫᑯᔭᓐ᙮ ᑮᔥᐱᓐ ᐃᑕᔥ ᒫᓀᒋᑫᔭᓐ ᑮᓐ ᐁᑕ ᑭᑲ ᑲᒀᑕᑭᑑ᙮ 13 ᑲᑮᐹᑎᓯᐎᓐ ᐄᑐᒃ ᐃᓀᑖᑾᓐ ᑖᐱᔥᑰ ᐃᑴ ᑳᓂᐹᑗᐎᑕᕽ, ᑫᑭᓄᐊᒫᓯᐎᓐᒡ, ᐁᔮᓯᒃ ᑭᑫᑕᒫᐎᓐ᙮ 14 ᑳᓇᒪᑕᐱᒡ ᐅᑎᔥᒀᑌᒥᕽ, ᒫᐗᒡ ᐃᑯ ᐁᔑ ᐃᔥᐹᓂᒃ ᐆᑌᓇ, 15 ᐁᑲᓅᓈᒡ ᐊᐎᔭᐞ ᑳᒪᔮᔥᑳᑯᒡ, ᐁᔖᓂᒡ ᐃᑯ ᐗᐃᔖᓂᐸᓐ, ᒦᔥ ᐅᐅ ᐁᐃᓈᒡ, 16 ᐲᑎᑫᒃ ᑫᑰᓐ ᑫᑫᑕᓯᐌᒃ, ᐁᓈᒡ ᑫᑮᐹᑎᓯᓂᒡ, 17 ᑳᑮᒨᑎᓈᓂᐗᕽ ᓂᐱ ᐅᔕ ᓇᐗᒡ ᒥᓄᐳᑾᓐ᙮ ᐸᑴᔑᑲᓐ ᑳᑮᒨᑎᓈᓂᐎᒡ ᓇᐗᒡ ᒥᓄᐳᑯᓯ᙮ 18 ᑳᐐᓐ ᐄᑐᒃ ᐅᑭᑫᑕᓰᓂ ᑳᐲᑎᑳᑯᒡ ᒋᓂᐳᓂᒡ᙮ ᐃᓂ ᑕᔥ ᐋᔕ ᑳᑮ ᐲᑎᑳᑯᒡ ᐋᔕ ᐁᑕᓀᑖᑯᓯᓂᒡ ᐁᔑᐊᔮᓂᒡ ᓀᐳᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society