ᑲᑮᑖᐎᑮᔗᐎᓇᓐ 7 - ᐅᒋᐺ ᑭᒋᒪᓯᓇᐃᑲᓐ1 ᓂᑯᓯᔅ, ᑲᓇᐌᑕᓐ ᓴ ᓂᑎᑭᑐᐎᓇᓐ, ᒫᐗᒋᑑᓐ ᑲᔦ ᓂᑎᓈᑯᓂᑫᐎᓇᓐ ᑭᐱᒫᑎᓯᐎᓂᕽ᙮ 2 ᑲᓇᐌᑕᓐ ᐁᑭᑐᔮᓐ ᒋᐱᒫᑎᓯᔭᓐ᙮ ᐌᐌᓂ ᑲᓇᐌᑕᓐ ᓂᑭᑭᓄᐊᒫᑫᐎᓇᓐ ᑖᐱᔥᑰ ᐌᐌᓂ ᑳᔑ ᑲᓇᐌᑕᒪᓐ ᑭᔥᑮᔑᑰᓐ᙮ 3 ᑭᓂᒌᕽ ᐃᔑ ᐊᑾᐱᑑᓐ ᑳᔑ ᑭᑭᓄᐊᒪᐎᓈᓐ, ᑭᑌᐃᕽ ᑲᔦ ᐃᔑ ᐅᔑᐲᐊᓐ᙮ 4 ᐅᐅ ᓴ ᐄᑕᓐ ᑲᑮᑖᐌᑕᒧᐎᓐ, ᑮᓐ ᓂᑕᐌᒫ᙮ ᐃᐃᔥ ᑲᔦ ᓂᓯᑐᑕᒧᐎᓐ ᑫᑑᑕᐗᑎᐸᓐ ᒫᐗᒡ ᐯᔓ ᑳᓵᑭᐃᒃ, ᒦ ᐃᐌ ᑫᐃᓀᑕᒪᓐ᙮ 5 ᒦᐗᓐ ᓴ ᐃᓂ ᑫᒦᑖᑴᓂᑯᔭᓐ ᒋᓈᓯᑲᐙᓯᐗᒡ ᐱᔑᒀᒋᑴ, ᐊᐊ ᑲᔦ ᐐᐎᒫ ᓅᒋᑯ ᐁᔑᐊᔮᒡ ᑳᓂᑖ ᐐᓂᑮᔗᒡ᙮ ᑳᑲᑮᐹᑎᓯᒡ ᐃᑴ ᐁᑕᔑᓱᒡ 6 ᓂᐙᑳᐃᑲᓂᕽ ᑳᔑ ᐙᓭᒋᑲᓂᐗᕽ ᑕᔥ ᐁᐅᓵᐱᔮᓐ, 7 ᓂᑮ ᐙᐸᒫᒃ ᓃᐱᐗᐞ ᐅᔥᑭᓃᑭᐗᒃ ᑳᐁᔖᐙᑎᓯᓯᒀ ᑎᓄ᙮ ᐯᔑᒃ ᑕᔥ ᒣᒥᑕᑫ ᐅᔥᑭᓃᑭ ᑮᓂᓯᑕᐎᓈᑯᓯ ᐁᔖᐙᑎᓯᓯᒃ᙮ 8 ᓂᑮ ᐙᐸᒫ ᐁᑮ ᐱᒪᐊᑑᒡ ᐁᑮ ᐊᓂ ᐃᔖᒡ ᑳᑮ ᐃᔑ ᑮᑫᒧᓂᓂᒃ ᒦᑲᓇ ᒌᑲᔭᐄ ᐁᔑᑖᓂᒡ ᐯᔑᒃ ᐃᑴᐗᓐ᙮ 9 ᐋᔕ ᑕᔥ ᐃᐃ ᐊᐲ ᑮᐊᓂ ᑎᐱᑲᓂᓂ ᐁᐊᓂ ᐅᓈᑯᔑᓂᓂᒃ, ᐋᔕ ᐱᑯ ᐁᐊᓂ ᑲᔥᑮᑎᐱᑲᓂᓂᒃ᙮ 10 ᒦᑕᔥ ᐃᑴᐗᓐ ᑳᑮ ᐱ ᓵᑲᐊᒥᓂᒡ ᐁᑮ ᓇᑭᔥᑳᑯᒡ, ᐱᔑᒀᒋᑴᕽ ᐁᑮ ᐃᔑᐅᓂᒡ, ᓭᓯᒃ ᐁᑮ ᐃᓀᑕᓯᓂᒃ᙮ 11 ᐐᑫ ᓴ ᑮᓲᑭᑌᐁᐗᓐ, ᑳᐐᓐ ᑲᔦ ᑮᐊᑲᒋᓰᐗᓐ, ᐐᑳ ᐁᐊᐱᓯᓂᒃ ᐅᑖᐎᓂᓃᕽ᙮ 12 ᒨᔕᒃ ᐃᑯ ᒦᑲᓈᕽ, ᑳᔑ ᐊᔭᑖᐌᐎᑲᒥᑯᑫᕽ ᑲᔦ, ᑳᒐᔭᐄ ᑲᔦ ᐁᑕᔑ ᐱᐅᓃᒡ᙮ 13 ᒦᑕᔥ ᑳᐃᔑ ᑭᑭᒋᑴᐱᓂᑯᒡ ᐁᑮ ᐊᔪᒌᒥᑯᒡ, ᐁᑮ ᑲᓇᐙᐸᒥᑯᒡ ᐯᔓ ᐅᐅ ᐁᐃᑯᒡ, 14 ᓂᑕᔮᓇᓐ ᐅᔕ ᒥᓄ ᐐᒌᑎᐎ ᐸᑭᑎᓂᑫᐎᓇᓐ ᑳᔑᑖᔮᓐ, ᐁᑮ ᐃᔑᒋᑫᔮᓐ ᑲᔦ ᑫᑮ ᐃᔑᒋᑫᔮᐹᓐ᙮ 15 ᒦᑕᔥ ᐃᐃ ᑳᐅᒋ ᓵᑲᐊᒫᓐ ᐁᓇᓈᑕᐙᐸᒥᓈᓐ, ᐁᑮ ᑲᑴ ᒥᑲᐎᓈᓐ, ᑌᐺ ᓴ ᑕᔥ ᑭᒥᑲᐎᓐ᙮ 16 ᐋᔕ ᑲᔦ ᓂᑮ ᑕᔗᑭᓯᑑᓇᓐ ᐯᐹᑳᓐ ᑳᐃᔑᓈᑾᑭᓐ ᓭᓂᐹᐌᑭᓅᓐ ᓂᓂᐯᐎᓈᑯᕽ ᐄᒋᐸᑮᕽ Egypt ᑳᐅᒌᑭᓐ᙮ 17 ᐋᔕ ᑲᔦ ᐅᓄ ᑎᓄ ᒥᓈᑯᐅᓇᓐ ᓂᑮ ᐊᑑᓇᓐ ᓂᓂᐯᐎᓂᕽ, ᐱᑭᐎ ᒥᓈᑯᐅᓐ ᒪᕒ myrrh ᑳᐃᔑᓂᑳᑌᒃ, ᐊᓃᐲᔑᐎ ᒥᓈᑯᐅᓐ ᐋᓬᐆᔅ aloes ᑳᐃᔑᓂᑳᑌᒃ, ᑲᔦ ᐐᑫᔥ ᓯᓇᒪᓐ cinnamon ᑳᐃᒋᑳᑌᒃ᙮ 18 ᐊᐯ, ᑕᑲ ᒥᓉᓂᑎᑖ ᑲᐯᑎᐱᒃ ᐲᓂᔥ ᒋᓂ ᐙᐸᕽ᙮ ᐐᑫ ᓴ ᑯ ᒋᒥᓉᑕᒪᕽ ᒋᑲᑮᑭᒋᒋᓂᑎᔭᕽ᙮ 19 ᑳᐐᓐ ᐅᔕ ᐊᐱᓰ ᓂᓈᐯᒻ; ᐊᐸᓀ ᐅᔕ ᐙᓴ ᑮᐃᔖ᙮ 20 ᓃᐱᐗᐞ ᑲᔦ ᔔᓂᔮᓐ ᐅᑮ ᒫᒌᓈᓐ ᐅᔔᓂᔮᐗᔑᕽ, ᑳᐐᓐ ᑕᔥ ᑕᑕᑯᔑᓰ ᐲᓂᔥ ᐹᓂᒫ ᐙᐎᔮᓯᓂᒡ ᑎᐱᑭᑮᓯᓲᓐ, ᑮᐃᑭᑐᐗᓐ ᐱᔑᒀᒋᑴᓐ᙮ 21 ᒦᑕᔥ ᑳᐃᔑ ᔖᑰᓱᒥᑯᒡ ᐁᑮ ᐗᓂᒥᑯᒡ ᐃᓂ ᐃᑴᐗᓐ, ᐁᑮ ᑲᔥᑭᒥᑯᒡ ᐐᑫ ᐁᒪᒥᓄ ᑮᔗᓂᒡ᙮ 22 ᒦᑕᔥ ᑳᐃᔑ ᒫᒌ ᐐᒌᐙᒡ ᐁᐃᔑᓈᑯᓯᒡ ᑖᐱᔥᑰ ᐱᔑᑭ ᑳᐊᐎ ᓂᓯᓐᒡ, ᐙᐙᔥᑫᔑ ᑲᔦ ᑳᐃᔑ ᒀᔥᒀᓂᒡ ᓇᒀᑲᓂᕽ᙮ 23 ᒦᑕᔥ ᑖᐱᔥᑰ ᐱᑾᑯᓂ ᑫᔑ ᔖᐳᓭᓂᒃ ᐅᑌᐃᕽ, ᐁᐃᔑᓈᑯᓯᒡ ᑲᔦ ᑖᐱᔥᑰ ᐱᓀᔒᓐᔥ ᑳᐃᔖᒡ ᐊᓴᐲᕽ ᐁᑭᑫᑕᓯᒃ ᐁᑮ ᓇᓃᓵᓇᑎᓂᓂᒃ ᐅᐱᒫᑎᓯᐎᓐ! 24 ᓂᑯᓯᓴᒃ, ᑕᑲ ᑕᔥ ᓅᑯᒻ ᐱᓯᑕᐎᔑᒃ ᐋᓃᓐ ᐁᓂᓇᑰᒃ᙮ 25 ᑫᑯ ᑕᔥ ᐸᑭᑎᓈᑫᒃ ᐊᐊ ᑎᓄ ᐃᑴ ᒋᑲᔥᑭᒥᓀᒃ ᑭᑌᐃᐙᕽ; ᑫᑯ ᐅᑎᔑᐊᔮᐎᓂᕽ ᑭᑲ ᐃᔑ ᐗᓂᔑᒥᑯᓰ᙮ 26 ᓃᐱᐗᐞ ᐅᔕ ᐋᔕ ᐅᐱ ᓂᔑᐗᓈᒋᐋᐞ ᐃᓂᓂᐗᐞ, ᑳᐱ ᓂᓵᒡ ᑲᔦ ᐅᓵᒻ ᐹᑏᓄᐗᐞ ᒋᐊᑭᒥᒥᑎᐸᓐ᙮ 27 ᐅᐙᑳᐃᑲᓐ ᓴ ᒦ ᐃ ᐁᓀᑖᑾᓂᓂᒃ ᑖᐱᔥᑰ ᒦᑲᓇ ᐁᓇᒧᓂᓂᒃ ᑳᔑ ᐊᔮᓂᒡ ᓀᐳᓂᒡ᙮ ᒦ ᐃᒫ ᓇᑫ ᐁᔑ ᐯᔗᑖᑾᒃ ᓂᐳᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society