ᑲᑮᑖᐎᑮᔗᐎᓇᓐ 6 - ᐅᒋᐺ ᑭᒋᒪᓯᓇᐃᑲᓐᐊᔮᒀᒥᒥᑰᐎᓇᓐ 1 ᓂᑯᓯᔅ, ᑭᑮ ᐊᔓᑕᒫᑫ ᓇ ᑮᓐ ᐁᐐ ᑎᐸᐊᒧᐗᒡ ᐸᑳᓐ ᐊᐎᔭ ᐅᒪᓯᓇᐃᑫᐎᓇᓐ? 2 ᑭᑮ ᐅᒋ ᑲᒋᑎᓂᑰ ᓇ ᑮᓐ ᐃᑯ ᑭᑎᑭᑐᐎᓇᓐ, ᑮᓐ ᐃᑯ ᐁᑮ ᐅᒋ ᑕᓲᓂᑰᔭᓐ ᐃᓂ ᑭᑕᔓᑕᒫᑫᐎᓇᓐ? 3 ᓂᑯᓯᔅ, ᒦᑕᔥ ᐃᐃ ᑫᐅᒋ ᑎᐯᓂᒥᒃ ᐊᐊ ᐃᓂᓂ, ᐅᐅ ᓴ ᐃᔑᒋᑫᓐ ᑫᐅᒋ ᑲᔥᑭᐅᔭᓐ, ᐌᔩᐱᓯᓐ ᐊᑕ ᑲᑴ ᑲᔥᑭᒻ ᒋᐸᑭᑎᓂᒃ᙮ 4 ᑫᑯ ᐊᑲᐌ ᓂᐹᑫᓐ, ᑫᑯ ᑲᔦ ᑭᐱᒌᑫᓐ ᒋᐊᑌᔑᓇᓐ᙮ 5 ᑲᑴ ᑲᔥᑭᑑᓐ ᒋᑲᔥᑭᐅᔭᓐ, ᑖᐱᔥᑰ ᐱᓀᔒᓐᔥ ᔑᑾ ᐙᐙᔥᑫᔑ ᑳᒫᒌᐸᐃᐙᓈᒡ ᐃᓂ ᐁᑕᐌᒋᑫᓂᒡ᙮ 6 ᑫᑎᒥᔥᑭᔭᓐ, ᐃᓇᔥᑫ ᐁᓂᑰ ᐊᑕ ᐙᐸᒻ; ᑭᑭᓇᐙᐸᒻ ᒋᑲᑮᑖᐌᑕᒪᓐ᙮ 7 ᑳᐐᓐ ᐄᑐᒃ ᐅᑑᑭᒫᒥᓰ, ᑳᐐᓐ ᑲᔦ ᐊᐎᔭᓐ ᒋᑲᓇᐙᐸᒥᑯᒡ, ᑳᐐᓐ ᑲᔦ ᐊᐎᔭᓐ ᒋᑎᐯᓂᒥᑯᒡ᙮ 8 ᔖᑰᒡ ᐃᑕᔥ ᐁᓃᐱᓂᓂᒃ ᐅᒫᐗᑑᓈᓐ ᒦᒋᒻ ᐁᑾᔮᒋᓯᑑᒡ ᑫᒦᒋᒡ ᐱᐴᓂᓂᒃ᙮ 9 ᐋᓃᓐ ᐃᑕᔥ ᒥᓂᒃ ᐌᑎ ᐙᐱᒥᔑᓇᓐ, ᑫᑎᒥᔥᑭᔭᓐ? ᐋᓇᐲ ᐙᑯᔥᑯᓯᔭᓐ ᐃᐃ ᑳᓂᐹᔭᓐ? 10 ᒦᔥ ᐅᐅ ᐁᑭᑐᒡ, ᐊᒋᓇ ᓴ ᐁᑕ ᓂᑲ ᓇᓂᐹ᙮ ᓂᑲ ᓇᓇᐳᓂᑫᓐ ᒋᐊᓉᐱᔮᓐ᙮ 11 ᒣᒀ ᑕᔥ ᓇᓂᐹᒡ, ᒦ ᐃ ᒋᐅᑎᓯᑯᒡ ᑭᑎᒫᑭᓯᐎᓐ ᒋᐃᓀᑖᑾᓂᓂᒃ ᑖᐱᔥᑰ ᐃᓇᑫ ᑳᔑ ᐅᑎᔑᐌᒡ ᐅᑭᒨᒋᔥᒃ᙮ 12 ᐃᑭᐌᓂᐗᒃ ᑫᑰᓐ ᑳᐃᓈᐸᑎᓯᓯᒀ ᑳᒪᒑᑎᓯᐙᒡ ᐁᐸᐹᑮᐗᓂᒧᐙᒡ᙮ 13 ᐁᑲᔥᑳᐱᐸᓂᐅᐙᒡ, ᐁᐗᐙᑲᐎᓯᑌᓂᐙᒡ, ᐅᓂᒌᐙᓐ ᐁᐃᓅᐃᑳᑫᐙᒡ ᐃᐃ ᑫᐅᒋ ᐗᔦᔑᒥᒀ, 14 ᐃᐃᒫ ᐁᔑ ᓇᓈᑲᑕᐌᑕᒧᐙᒡ ᑫᐅᒋ ᒪᒋᑑᑕᐎᒀ ᑲᔦ ᐁᐸᐹ ᒥᑯᔥᑳᒋᒋᑫᐙᒡ᙮ 15 ᒦᑕᔥ ᓭᓴᑰᒡ ᑫᐅᒋ ᐅᑎᓯᑯᐙᒡ ᐗᓯᑖᐎᓭᐎᓐ ᑫᓂᔑᐗᓈᒋᐃᑯᐙᒡ᙮ 16 ᓃᔣᒋᓂᓂᐗᓐ ᓴ ᑳᑎᐯᒋᑫᒡ ᑳᔒᑫᑕᕽ, ᑫᒀᓂᓴᑫᑕᕽ ᑲᔦ᙮ ᒦᐗᓐ ᓴ ᐅᓄ: 17 ᑭᒋ ᐃᓀᓂᑎᓱᐎᓐ, ᑲᑮᓇᐎᔥᑭᐎᓐ, ᐃᐃ ᑲᔦ ᓀᓵᓂᒡ ᑫᑰᓐ ᑳᐃᔑᒋᑫᓯᓂᒃ, 18 ᐊᐎᔭᓐ ᑲᔦ ᑳᐃᓀᑕᒥᓂᒡ ᓅᒋᑯ ᐁᐐ ᐃᔑᒋᑫᓂᒡ, ᑳᑭᑖᑕᐱᓈᓯᑲᒥᓂᒡ ᑲᔦ ᒪᒋᑫᑰᓐ, 19 ᐊᐎᔭᓐ ᑲᔦ ᓅᒋᑯ ᑳᐃᓈᒋᒧᓂᒡ, ᐃᓂ ᑲᔦ ᐃᓂᓂᐗᓐ ᑳᐅᒻᐺᓇᒥᓂᒡ ᑫᐅᒋ ᒫᔑ ᐐᒌᑎᓂᒡ ᐐᒋᑭᐌᔨᒫᐞ᙮ ᐱᔑᒀᑎᓯᐎᓐ ᐁᑕᔑᑌᒃ ᒋᐃᔑᒋᑳᓂᐗᓯᓄᒃ 20 ᓂᑯᓯᔅ, ᐃᔑᒋᑫᓐ ᑭᑌᑌ ᑳᐃᔑ ᐐᑕᒪᐎᒃ, ᑫᑯ ᐗᓃᑫᑫᓐ ᑭᒫᒫ ᑳᑮ ᐃᔑ ᑭᑭᓄᐊᒪᐎᒃ᙮ 21 ᑭᒋᐎᓇᒧᐤ ᐅᑎᑭᑐᐎᓂᐙᓐ ᐊᐸᓀ ᐱᑯ ᐃᐃᒫ ᑭᑌᐃᕽ᙮ 22 ᐅᑭᑭᓄᐊᒫᑫᐎᓂᐙᓐ ᑭᑲ ᐐᒋᐃᑯᓇᓐ ᑮ ᐱᒥᐊᔮᔭᓐ, ᑭᑲ ᑲᓇᐌᓂᒥᑯᓐ ᑮᑎᐱᑳᒃ, ᑭᑲ ᑭᑭᓄᐎᓂᑯᓐ ᑲᔦ ᑮᑮᔑᑳᒃ᙮ 23 ᐅᑭᑭᓄᐃᑫᐎᓂᐙᓐ ᑖᐱᔥᑰ ᑫᑰᓐ ᑳᐙᓴᑯᓀᒃ, ᑳᐃᔑ ᑾᔭᑯᒥᒀ ᑭᑲ ᑭᑭᓄᐊᒫᑯᓐ ᑫᐃᔑ ᐱᒫᑎᓯᔭᓐ᙮ 24 ᒦᐗᓐ ᐃᑕᔥ ᐃᓂ ᑫᒦᑖᑴᓂᑯᔭᓐ ᒋᓈᓯᑲᐙᓯᐗᒡ ᒪᒋ ᐃᑴ, ᐐᐎᒫ ᑎᓄ ᑳᓇᑲᒋ ᐗᔦᔑᒥᐌᒡ᙮ 25 ᑫᑯ ᑭᑲ ᐃᔑ ᒥᓴᐌᑕᒧᐃᑯᓰ ᑳᐃᔑ ᒥᓄᓈᑯᓯᐙᒡ; ᑫᑯ ᐃᐃᒫ ᑭᑲ ᐅᒋ ᑕᓲᓱᓰ ᑳᐃᔑ ᑲᓇᐙᐸᒥᒀ᙮ 26 ᐃᓂᓂ ᐅᑖ ᐅᒋ ᐐᒌᐙᓐ ᐱᔑᒀᒋᑴᓐ ᐃᐃ ᑳᐃᓇᑭᓱᒡ ᐯᔑᒀᑎᒃ ᐸᑴᔑᑲᓇᓐ, ᐃᓂ ᑕᔥ ᐐᓐ ᐐᒌᐙᒡ ᑳᐅᓈᐯᒥᓂᒡ ᐱᔑᒀᒋᑴᓐ ᐅᑲ ᐅᒋ ᒑᑭᓂᑫᐃᑰᓐ ᑲᑭᓇ ᑫᑰᓐ ᑳᐊᔮᒡ᙮ 27 ᑭᑖ ᐱᒥᐎᑑᓐ ᐃᓇ ᐃᔥᑯᑌ ᑭᑳᑭᑲᓂᕽ ᒋᒑᑭᑌᓯᓄᒃ ᑫᑭᔥᑲᒪᓐ? 28 ᑭᑖ ᐱᒧᓭ ᓇ ᐁᔑᑭᔖᔐᒃ ᒋᒑᑭᑌᓯᓄᑭᓐ ᑭᓯᑕᓐ? 29 ᒦ ᐯᔑᑾᓐ ᐁᐲᒋ ᓇᓃᓵᓀᑖᑾᒃ ᐎᐯᒥᒪᒡ ᐊᐎᔭ ᐐᐗᓐ᙮ ᐊᐎᔭ ᑳᑑᑕᕽ ᐅᐅ ᑕᐅᒋ ᑲᒀᑕᑭᓭ᙮ 30 ᑳᐐᓐ ᑕᐋᓍᐸᒫᓰ ᐊᐊ ᑳᑮᒨᑎᒡ ᐸᑴᔑᑲᓇᓐ ᑮᓅᑌᔅᑲᑌᒡ᙮ 31 ᑮᔥᐱᓐ ᑳᒋᑎᓂᑲᓂᐎᒡ ᒋᑮᐌ ᑎᐸᐃᑫᒡ ᓃᔣᒋᕽ ᒥᓂᒃ, ᒥᓴᐙ ᑯ ᐐᑫ ᑲᑭᓇ ᒑᑭᓂᑫᒡ᙮ 32 ᐊᐊ ᐃᓂᓂ ᑳᑑᑕᕽ ᐱᔑᒀᑎᓯᐎᓐ ᑳᐐᓐ ᓈᑲᑕᐌᑕᓰ, ᒦ ᑯᐃ ᐁᓂᔑᐗᓈᒋᐃᑎᓱᒡ᙮ 33 ᐐᑫ ᑕᐋᓍᐸᒋᑲᓂᐎ, ᑕᑭᒋ ᓃᐗᓇᐙᑲᓂᐎ ᑲᔦ ᒋᓀᐱᒋ ᒣᓂᔒᐋᑲᓂᐎᒡ᙮ 34 ᐊᐊ ᐅᓈᐯᒥᒫ ᑳᐅᑌᑕᕽ ᐋᐱᒋ ᐋᑯᑭᑖᓱ, ᐃᐃᐌ ᑳᐐ ᑑᑕᕽ ᑳᐐᓐ ᑕᐅᒋ ᑌᐱᓇᐌᓯᓰ ᑮᐎ ᑮᐌ ᑎᐸᐃᑫᒡ᙮ 35 ᑳᐐᓐ ᐅᑖ ᐅᑖᐱᓇᓰᓐ ᐋᓃᓐ ᐃᑯ ᒥᓂᒃ ᑎᐸᐊᒪᐙᑲᓂᐎᒡ, ᑳᐐᓐ ᑲᔦ ᐅᑖ ᐅᑖᐱᓇᓰᓐ ᐌᑯᓀᓐ ᐃᑯ ᑫᒦᓈᑲᓂᐎᒡ ᒋᐅᒋ ᐴᓂᑭᑖᓱᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society