ᑲᑮᑖᐎᑮᔗᐎᓇᓐ 5 - ᐅᒋᐺ ᑭᒋᒪᓯᓇᐃᑲᓐᐱᔑᒀᑎᓯᐎᓐ ᐁᑕᔑᑌᒃ 1 ᓂᑯᓯᔅ, ᑕᑲ ᓅᑕᓐ ᐁᔑ ᑲᑮᑖᐌᑕᒫᓐ, ᐱᓯᑕᓐ ᑲᔦ ᓂᓂᓯᑐᑕᒧᐎᓐ᙮ 2 ᒦᑕᔥ ᒋᑭᑫᑕᒪᓐ ᐋᓃᓐ ᑾᔭᒃ ᑫᐃᔑᒋᑫᔭᓐ, ᑭᑎᑭᑐᐎᓂᕽ ᒋᐅᒋ ᑭᑫᑖᑾᒃ ᐁᐅᑭᑫᑕᒫᐎᓂᔭᓐ᙮ 3 ᐅᑑᓂᕽ ᐃᓴ ᐊᐊ ᐃᑴ ᐯᔑᒀᑎᓯᒡ ᑖᐱᔥᑰ ᐋᒨᐎ ᓰᓯᐹᑾᑦ ᑳᐊᐲᒋ ᔒᐗᕽ, ᐐᑫ ᑲᔦ ᓂᑖ ᒥᓄ ᑮᔗ᙮ 4 ᐊᐲ ᑕᔥ ᐁᐃᔥᒀᑲᒥᑭᓯᒡ, ᑳᐐᓐ ᑫᑰᓐ ᑭᑎᔥᑯᓇᒫᑯᓰ, ᒦ ᐁᑕ ᑯ ᐁᓂᔥᑫᑕᒪᓐ, ᑲᔦ ᑕᔥ ᐁᐐᓴᑫᑕᒪᓐ ᑖᐱᔥᑰ ᐐᓱᑉ ᑳᐊᐲᒋ ᐐᓴᑭᐳᑾᒃ᙮ 5 ᑳᓂᐳᓂᒡ ᐁᔑᐊᔮᓂᒡ ᐅᔕ ᑭᑲ ᐃᔑᐎᓂᒃ, ᐅᐱᒧᓵᑖᓐ ᒦᑲᓇ ᐁᓇᒧᓂᓂᒃ ᑳᓂᐳᓂᒡ ᑳᐃᔑᐊᔮᓂᒡ᙮ 6 ᑳᐐᓐ ᐅᓈᓈᑲᑕᐌᑕᓰᓐ ᐃᓇᑫ ᑫᔑ ᐱᒫᑎᓯᒡ, ᐅᒦᑲᓈᒻ ᐁᑭᒋ ᐙᐙᑲᔥᑲᒧᓂᓂᒃ, ᐁᑭᑫᑕᓯᒃ ᐋᓃᓐ ᐁᔑᐌᐱᓯᒡ᙮ 7 ᐃᓇᔥᑫ ᑕᔥ ᓂᑯᓯᓴᒃ, ᐱᓯᑕᐎᔑᒃ, ᑫᑯ ᐐᑳ ᐗᓃᑫᑫᒃ ᑳᔑ ᑲᑲᓅᓂᓇᑰᒃ᙮ 8 ᑫᑯ ᓈᓯᑲᐙᑫᓐ ᐊᐊ ᑎᓄ ᐃᑴ᙮ ᑫᑯ ᐃᔖᐙᑫᓐ ᒌᑲᔭᐄ ᐅᑎᔥᒀᑌᒥᕽ᙮ 9 ᑮᔥᐱᓐ ᐃᑕᔥ ᐐᓐ ᐃᔑᒋᑫᓰᐗᓐ ᑳᐃᓂᓈᓐ, ᒦ ᐃ ᐄᓴᓐ ᐁᒪᑲᒥᒀ ᑯᑕᒃ ᐊᐎᔭᒃ ᐁᔑ ᑭᑌᓂᒥᑰᔭᐸᓐ᙮ ᐐᐸ ᑕᔥ ᑭᑲ ᓂᓯᑰᒃ ᐃᑭ ᒣᓈᒋᐋᓯᒀ ᐊᐎᔭᓐ᙮ 10 ᑌᐺ ᓴ ᐲᐎᑌᒃ ᑭᑲ ᒪᑲᒥᑰᒃ ᑲᑭᓇ ᐁᔑ ᐌᓅᑎᓯᔭᓐ, ᑯᑕᒃ ᒣᔭᑭᓯᐙᒡ ᐅᑲ ᐊᔮᓈᐙ ᑭᑕᔭᐄᒪᓐ ᑳᑮ ᑭᒋ ᐊᓄᑮᔭᓐ ᒋᑌᐱᓇᒪᓐ᙮ 11 ᑭᑲ ᒨᑯᓀ ᑕᔥ ᐊᓂ ᐃᔥᒀ ᐱᒫᑎᓯᔭᓐ, ᐊᐲ ᑭᐐᔮᓯᐱᒫᑎᓯᐎᓐ, ᑭᐐᔭᐤ ᑲᔦ ᒋᓂ ᐊᑰᒃ᙮ 12 ᒦᔥ ᑫᐃᑭᑐᔭᓐ, ᐌᑯᓀᓐ ᐃᑕᔥ ᑳᐅᒋ ᔒᑫᑕᒫᓐ ᐁᑭᑭᓄᐊᒫᑰᔮᓐ᙮ ᐌᑯᓀᓐ ᑲᔦ ᑳᐅᒋ ᐱᓯᑕᐙᓯᐗᒀ ᑳᑮ ᑲᑴ ᓇᓇᐃᒥᐙᒡ᙮ 13 ᑳᐐᓐ ᓂᑮ ᐱᓯᑕᐙᓰᒃ ᑳᑮ ᑭᑭᓄᐊᒪᐎᐙᒡ, ᑳᐐᓐ ᓂᑮ ᐸᐹᒥᑕᐙᓰᒃ ᑳᑮ ᒫᒦᓄᒥᐙᒡ᙮ 14 ᐃᓇᔥᑫ ᑕᔥ ᓅᑯᒻ ᒦ ᐃ ᑮᐅᑎᓵᐸᑕᒫᓐ ᑫᑳ ᐁᐊᓂ ᐃᔥᒀᓭᔮᓐ, ᐁᔑᐊᔮᐙᒡ ᑲᑭᓇ ᐊᐎᔭᒃ᙮ 15 ᑌᐺᔦᑖᑯᓰᑕᐤ ᑭᐐᐤ, ᐐᓐ ᐁᑕ ᑭᑲᓵᑭᐋ, ᒋᑎᓄᐌᓂᒪᒡ ᑭᑑᑕᐃᐹᓂᕽ ᑳᐅᒋ ᒥᓂᑴᔭᓐ᙮ 16 ᑫᑯ ᑕᔥ ᑎᓄᐐᑫᓐ ᑳᒨᑭᒋᐗᕽ ᓂᐱ ᑳᐅᒋ ᒥᓂᑴᐙᒡ ᐊᐌᓀᓇᒃ ᐱᑯ ᐃᑴᐗᒃ᙮ 17 ᑮᓐ ᐄᑐᒃ ᑭᑎᐱᓇᐌᐎᔅ ᐊᐊ ᑭᐐᐤ᙮ ᑫᑯ ᑕᔥ ᐸᐹᒣᓂᒫᑫᓐ ᐸᑳᓐ ᐃᑴᐗᒃ᙮ 18 ᑕᑲ ᓴ ᑕᒥᓉᑖᑾᓐ ᑳᒨᑭᒋᐗᕽ ᑭᓂᐲᒻ᙮ ᐃᔑ ᒌᑫᓂᒻ ᑳᑮ ᐐᑎᑫᒪᒡ ᑭᐐᐤ ᑮᐅᔥᑳᑎᓯᔭᓐ᙮ 19 ᑖᐱᔥᑰ ᓅᔐ ᐙᐙᔥᑫᔑ ᒣᓄᓈᑯᓯᒡ, ᑕᑲ ᐅᒎᒎᔑᒪᐞ ᑭᑲ ᒥᓉᑕᒥᐃᑰᐞ᙮ ᑕᑲ ᒫᓄ ᐁᔑ ᒥᓉᓂᒥᐌᒡ ᐃᔑ ᐸᑭᑎᓂᑎᓱᓐ᙮ 20 ᓂᑯᓯᔅ, ᐌᑯᓀᓐ ᐃᑕᔥ ᑫᐅᒋ ᒥᓉᓂᒪᑎᐸᓐ ᐸᑳᓐ ᐃᑴ᙮ ᐌᑯᓀᓐ ᐃᑕᔥ ᑫᐅᒋ ᒥᓉᓂᒥᒪᑎᐸᓐ ᐸᑳᓐ ᐊᐎᔭ ᐐᐗᓐ? 21 ᑳᑎᐯᒋᑫᒡ ᐄᑐᒃ ᑲᑭᓇ ᐃᓂᓂᐗᓐ ᐅᐙᐸᒫᓐ ᐁᑕᓱ ᐃᔑᒋᑫᓂᒡ, ᐅᐙᐸᒫᓐ ᑲᔦ ᐃᓇᑫ ᐁᔖᓂᒡ᙮ 22 ᒪᒋᐃᓂᓂ ᓴ ᐅᒪᒋᒋᑫᐎᓂᕽ ᐅᒋ ᑕᓲᓂᑎᓱ᙮ ᐐᓐ ᐃᑯ ᐅᒪᒋᑑᑕᒧᐎᓂᕽ ᐅᒋ ᑕᑯᐱᓂᑎᓱ᙮ 23 ᒦᔥ ᑳᐅᒋ ᓂᐳᒡ ᐁᑲᔥᑭᑑᓯᒃ ᒋᑲᓇᐌᓂᑎᓱᒡ, ᐅᑲᑮᐹᑎᓯᐎᓂᕽ ᐁᐅᒋ ᐗᓂᔑᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society