ᑲᑮᑖᐎᑮᔗᐎᓇᓐ 3 - ᐅᒋᐺ ᑭᒋᒪᓯᓇᐃᑲᓐᐁᑲᓅᓂᑣ ᐅᔥᑭᓃᑭᐗᒃ 1 ᓂᑯᓯᔅ, ᑫᑯ ᐗᓃᑫᑫᓐ ᑳᐃᔑ ᑭᑭᓄᐊᒪᐎᓈᓐ᙮ ᐱᔑᔑᒃ ᒫᒥᑲᐎᓐ ᑳᐃᔑ ᐐᑕᒪᐎᓈᓐ ᑫᐃᔑᒋᑫᔭᓐ᙮ 2 ᒦ ᓴ ᐃᐃᒫ ᑭᓉᔥ ᑫᐅᒋ ᐱᒫᑎᓯᔭᓐ ᒦ ᑲᔦ ᐃᒫ ᑫᐅᒋ ᒥᓄᓭᔭᓐ᙮ 3 ᑫᑯ ᐸᑭᑎᓇᑫᓐ ᑭᑎᒫᑭᓈᑫᐎᓐ ᑫᒋᓇᐁᑖᑯᓯᐎᓐ ᑲᔦ᙮ ᓈᐱᔥᑲᓐ, ᒋᐃᔑ ᐅᔑᐲᐊᒪᓐ ᑲᔦ ᐃᐃᒫ ᑭᑌᐃᕽ᙮ 4 ᑮᔥᐱᓐ ᐅᐅ ᑑᑕᒪᓐ ᑭᔐᒪᓂᑑ ᐃᑭ ᑲᔦ ᑲᑭᓇ ᐊᐎᔭᒃ ᑭᑲ ᑭᒋ ᐃᓀᓂᒥᑰᒃ᙮ 5 ᑌᐺᔦᓂᒻ ᑳᑎᐯᒋᑫᒡ ᐁᓂᑯᑯᑌᐁᔭᓐ, ᑫᑯ ᐐᓐ ᐊᐯᓂᒧᓄᑕᑫᓐ ᑭᓂᓯᑐᑕᒧᐎᓐ᙮ 6 ᑭᑫᑕᓐ ᐃᓴ ᒋᒫᒥᑲᐎᓅᑕᐗᒡ ᑳᑎᐯᒋᑫᒡ ᒥᓯᐌ ᑳᑕᓱ ᐃᔑᒋᑫᔭᓐ, ᒦᔥ ᒋᑭᑭᓄᐎᓂᒃ ᑾᔭᒃ ᐋᓃᑎ ᑫᐃᔖᐗᒡ᙮ 7 ᑫᑯ ᐐᓐ ᓂᑭᑫᑖᓐ ᑫᑰᓐ ᐃᓀᓂᑎᓱᑫᓐ; ᑯᑖᓀᓂᒻ ᑳᑎᐯᒋᑫᒡ, ᑫᑯ ᑲᔦ ᐸᐹᐱᓯᔅᑫᑕᑫᓐ ᓅᒋ ᑫᑰᓐ᙮ 8 ᒦᑕᔥ ᐃᐃ ᒋᒥᓄᐊᔮᔭᓐ ᑭᐐᔭᐎᕽ, ᒋᒥᓄᐊᔮᑭᓐ ᑲᔦ ᑭᑲᓇᓐ᙮ 9 ᑳᔑ ᐌᓅᑎᓯᔭᓐ ᓴ ᐅᒋ ᑭᑌᓂᒻ ᑳᑎᐯᒋᑫᒡ ᒋᐅᒋ ᒦᓇᒡ ᒫᐗᒡ ᐃᑯ ᓂᑕᒻ ᑲᑭᓇ ᑫᑰᓇᓐ ᑳᓂᑖᐎᑭᑑᔭᓐ᙮ 10 ᒦᑕᔥ ᐃᐃ ᒋᒪᒨᔥᑭᓀᑭᓐ ᑭᑭᑎᑳᓂᑲᒥᑰᓐ ᑫᐊᐲᒋ ᐌᓅᒋᓭᔭᓐ, ᐅᔥᑭ ᔔᒥᓈᐳ ᑲᔦ ᑕᐊᔮᒥᐲ ᑭᑕᑑᐹᓂᕽ᙮ 11 ᓂᑯᓯᔅ, ᑫᑯ ᔒᑫᑕᑫᓐ ᑳᑎᐯᒋᑫᒡ ᑮᒫᒦᓄ ᐸᔕᔐᐅᒃ, ᑫᑯ ᑲᔦ ᓅᑌᔦᑕᒧᐙᑫᓐ ᑮᒫᒦᓄᒥᒃ᙮ 12 ᑳᑎᐯᒋᑫᒡ ᐄᑐᒃ ᐅᒫᒦᓄ ᐸᔕᔐᐙᓐ ᐊᐎᔭᓐ ᑳᔕᐌᓂᒫᒡ ᑖᐱᔥᑰ ᐅᑌᑌᒫ ᑳᑑᑕᐙᒡ ᐅᑯᓯᓴᓐ ᑳᒥᓍᐸᒫᒡ᙮ 13 ᐋᐱᒋ ᓴ ᔕᐌᑖᑯᓯ ᐊᐊ ᐃᓂᓂ ᑳᑌᐱᓇᕽ ᑲᑮᑖᐌᑕᒧᐎᓐ, ᐊᐊᐌᑎ ᑳᓂ ᐅᒋ ᐅᓂᓯᑐᑕᒧᐎᓂᒡ᙮ 14 ᓇᐗᒡ ᐄᑐᒃ ᐃᐃ ᑲᔥᑭᒋᑫᐌᑖᑾᓐ ᐊᐲᒡ ᐐᓐ ᐊᐊ ᐙᐹᐱᑯ ᔔᓂᔮ, ᓇᐗᒡ ᑲᔦ ᐃᐃ ᑭᒋ ᐃᓀᑖᑾᓐ ᐊᐲᒡ ᐐᓐ ᐊᐊ ᐅᓵᐎ ᔔᓂᔮ᙮ 15 ᑲᑮᑖᐌᑕᒧᐎᓐ ᓴ ᓇᐗᒡ ᑭᒋ ᐃᓇᑭᑌ ᐊᐲᒡ ᐐᓐ ᐊᐊ ᒥᔅᒀᐱᑲᓯᓐ, ᐅᕒᐆᐱ Ruby ᑳᐃᓂᓐᒡ; ᑳᐐᓐ ᐄᑐᒃ ᑫᑰᓐ ᑳᒥᓴᐌᑕᒪᓐ ᐃᐃ ᐊᐲᑌᑖᑾᓯᓅᓐ᙮ 16 ᒦᔥ ᑲᔦ ᐃᐃᒫ ᐌᒌᒃ ᑭᓉᔥ ᐱᒫᑎᓯᐎᓐ, ᐌᓅᑎᓯᐎᓐ, ᑭᑌᓂᒥᑰᐎᓐ ᑲᔦ᙮ 17 ᒦ ᑲᔦ ᐃᐃᒫ ᑲᑮᑖᐌᑕᒧᐎᓂᕽ ᐌᒌᒃ ᑳᐅᓂᔑᔑᕽ ᐱᒫᑎᓯᐎᓐ, ᐱᓵᓐ ᐃᑯ ᑲᔦ ᐊᐎᔭ ᑫᐅᒋ ᐱᒫᑎᓯᐸᓐ᙮ 18 ᐃᑭ ᓴ ᑳᓂ ᑲᑮᑖᐌᑕᒧᐙᒡ ᑕᒥᓉᑕᒨᒃ, ᒦ ᓴ ᐃᒫ ᑫᐅᑎᓇᒧᐙᒡ ᐱᒫᑎᓯᐎᓐ᙮ 19 ᑭᔐᒪᓂᑑ ᐅᑮ ᐅᒋ ᐅᔑᑑᓐ ᐅᐅ ᐊᑮᓂ ᐃᐃᒫ ᐅᑲᑮᑖᐌᑕᒧᐎᓂᕽ; ᐃᐃᒫ ᑲᔦ ᐅᑭᑫᑖᓱᐎᓂᕽ ᐅᑮ ᐅᒋ ᐅᓇᑑᓐ ᓀᐗᒋᑮᔑᒃ᙮ 20 ᐅᑲᑮᑖᐌᑕᒧᐎᓂᕽ ᑮᐅᒋ ᐃᔑᓭᓂᐗᓐ ᓰᐲᓐ ᒋᐱᒥᒋᐗᑭᓐ, ᐗᑸᕽ ᑲᔦ ᒋᐅᒋ ᑭᒥᐗᕽ ᐅᐅᒫ ᐊᑮᕽ᙮ 21 ᓂᑯᓯᔅ, ᑭᒋᐎᓇᓐ ᑭᑲᑮᑖᐌᑕᒧᐎᓐ ᑲᔦ ᑳᐃᔑ ᓂᓯᑕᐎᓇᒪᓐ᙮ ᑫᑯ ᐸᑭᑎᓇᑫᓐ ᒋᓇᑲᓂᑰᔭᓐ᙮ 22 ᑭᑲ ᐅᑎᓇᒫᑯᓐ ᑫᐅᒋ ᒥᓉᑕᒪᓐ ᑫᐅᒋ ᒥᓄᓭᔭᓐ ᑲᔦ ᐃᐃᒫ ᑭᐱᒫᑎᓯᐎᓂᕽ᙮ 23 ᒦ ᐃ ᑫᐊᓂ ᐃᔑ ᒫᒑᔭᓐ ᒋᓇᓃᓵᓀᑕᓰᐗᓐ ᑲᔦ ᒋᐱᓱᑫᔑᓰᐗᓐ᙮ 24 ᑳᐐᓐ ᑭᑲ ᑯᑖᒋᓰ ᐊᐲ ᐊᓂ ᑲᐎᔑᒧᔭᓐ, ᐋᐱᒋ ᒋᒥᓄᒀᒥᔭᓐ᙮ 25 ᑳᐐᓐ ᒣᒬᒡ ᒋᐅᒋ ᐅᒑᓂᒣᑕᒪᓐ ᓭᓴᑰᒡ ᑕᑯᓭᒃ ᒫᔑᓭᐎᓐ, ᑳᐃᔑ ᐅᑎᓯᑯᐙᒡ ᐃᑭ ᑳᑲᒀᓂᓴᑭᓯᐙᒡ᙮ 26 ᑳᑎᐯᒋᑫᒡ ᑭᑲ ᑲᓇᐌᓂᒥᒃ, ᑳᐐᓐ ᑲᔦ ᑭᑲ ᐸᑭᑎᓂᑯᓰ ᒋᑕᓲᓱᔭᓐ᙮ 27 ᐋᓃᓐ ᐃᑯ ᑫᐊᑯ ᑲᔥᑭᑑᔭᓐ, ᒋᒥᓄᒋᑫᐊᑣ ᐃᑭ ᑳᓅᑌᓭᐙᒡ᙮ 28 ᑫᑯ ᐐᑳ ᐃᑭᑐᑫᓐ, ᐹᒫ ᐙᐸᕽ ᑭᑲ ᐐᒋᐃᓐ, ᒋᐃᓇᒡ ᑭᐐᒋᑖᒫᑲᓐ ᔐᒫᒃ ᐃᔑᓭᒃ ᒋᑑᑕᒪᓐ᙮ 29 ᑫᑯ ᑫᑰᓐ ᐃᔑᒋᑫᑫᓐ ᑫᐅᒋ ᒫᓀᑕᕽ ᑭᐐᒋᑖᒫᑲᓐ; ᐯᔓ ᑳᐅᒋ ᐐᒋᑖᒪᒡ ᐁᐊᐯᓂᒧᓄᑕᐎᒃ᙮ 30 ᑫᑯ ᐅᒋ ᑭᒋ ᑲᓅᓈᑫᓐ ᐁᐊᔮᒪᑲᓯᓄᒃ ᑫᐅᒋᒫᔑ ᑲᑲᓅᓇᒡ, ᐐᑳ ᐐᓐ ᑫᑰᓐ ᐁᐃᔑ ᒫᔑ ᑑᑕᐎᓯᓄᒃ᙮ 31 ᑫᑯ ᐅᑌᓂᒫᑫᓐ ᐃᑭ ᑳᓂᔑᐗᓈᑕᑲᒥᑭᓯᐙᒡ ᑫᑯ ᑲᔦ ᑮᓐ ᑲᑴ ᐃᔑᒋᑫᑫᓐ ᐃᐃᐌ ᑳᑑᑕᒧᐙᒡ᙮ 32 ᐋᓃᔥ ᑳᑎᐯᒋᑫᒡ ᐅᔒᑫᓂᒫᐞ ᑳᒪᒋᑑᑕᒥᓂᒡ, ᑳᑾᔭᒀᑎᓯᓂᒡ ᐃᑕᔥ ᐅᑲ ᐗᐐᑕᒪᐙᐞ ᐐᓐ ᑳᐃᔑ ᓇᓈᑲᑕᐌᑕᕽ᙮ 33 ᑳᑎᐯᒋᑫᒡ ᐅᑲ ᒪᒐᑭᑖᓐ ᐁᑖᓂᒡ ᑳᒪᒑᑎᓯᓂᒡ, ᔑᑾ ᐅᑲ ᒥᓋᑭᑖᓐ ᐁᑖᓂᒡ ᐃᓂᐌᓂᐗᐞ ᑳᑾᔭᒀᑎᓯᓂᒡ᙮ 34 ᑳᐐᓐ ᑫᑰᓐ ᐅᑎᓈᐸᑌᓂᒫᓰᐞ ᑳᑭᒋ ᐃᓀᓂᑎᓱᓂᒡ, ᔑᑾ ᐅᐙᐸᑕᐋᐞ ᒥᓄᒋᑫᐎᓐ ᐃᐃ ᑳᑕᐸᓭᓂᒧᓂᒡ᙮ 35 ᑳᑲᑮᑖᐌᑕᒧᐙᒡ ᒦ ᐃᒫ ᑫᐅᒋ ᑭᒋᐃᓀᓂᒫᑲᓂᐎᐙᒡ, ᔑᑾ ᑳᑲᑮᐹᑎᓯᐙᒡ ᐊᐗᔑᒣ ᑕᐊᓂ ᐅᒋ ᐊᑲᒋᐃᑎᓱᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society