Oroot 4 - ᐅᒋᐺ ᑭᒋᒪᓯᓇᐃᑲᓐᐅᕒᐆᑦ ᑮᐐᑎᑫᒡ 1 ᐴᐙᔅ Boaz ᓴ ᑮᐃᔖ ᑳᑮ ᐃᔑᐊᔮᓂᒃ ᑭᒋ ᐆᑌᓈᐎ ᐃᔥᒀᑌᒻ, ᒦ ᓴ ᐌᑎ ᑳᐃᔑ ᐊᐱᒡ᙮ ᐅᑮ ᐙᐸᒫᓐ ᑕᔥ ᐁᐱᒧᓭᓂᒡ ᐃᓂᓂᐗᓐ ᑳᑮ ᑕᔑᒫᒡ ᓇᐗᒡ ᐯᔓ ᐁᐃᓇᐌᒫᓂᒡ ᐄᓬᐃᒣᓬᐁᑰᓐ Elimelech᙮ ᒦᔥ ᐴᐙᔅ ᑳᐃᓈᒡ, ᐊᐯ ᐅᐅᒫ ᓇᑫ ᐃᔑ ᐸᑫᓐ᙮ ᒦᑕᔥ ᔐᒫᒃ ᑳᐃᔑ ᐸᑫᓂᒡ᙮ 2 ᒦᔥ ᑲᔦ ᐴᐙᔅ ᑳᑮ ᐊᑐᒫᒡ ᒥᑖᓱ ᑳᑮ ᓃᑳᓀᑖᑯᓯᓂᒡ ᐆᑌᓈᕽ, ᐁᑮ ᑲᓅᓈᒡ ᒋᓇᒪᑕᐱᓂᒡ᙮ ᒦᔥ ᑫᐐᓐ ᐃᐃᒫ ᑳᐃᔑ ᐅᓇᐱᒡ᙮ 3 ᒦᑕᔥ ᑳᐃᓈᒡ ᐃᓂ ᐅᑎᓇᐌᒫᑲᓇᓐ, ᓀᔫᒦ Naomi ᓴ ᐌᑎ ᒨᐗᑉ Moab ᐊᑮᕽ ᑳᑮ ᐱᐅᒋ ᑮᐌᒡ ᐅᑕᑖᐙᑫᓐ ᐅᑕᑮᒥᓂ ᑳᑮ ᑎᐯᑕᒥᓂᒡ ᑳᑮ ᐃᓇᐌᒥᒪᑭᐸᓐ ᐄᓬᐃᒣᓬᐁᑰᓐ᙮ 4 ᑭᓇᑕᐌᓂᒥᓐ ᑕᔥ ᒋᑭᑫᑕᒪᓐ᙮ ᑮᔥᐱᓐ ᑕᔥ ᐐᐊᑖᐌᐗᒡ ᐃᐃ ᐅᑕᑮᒻ ᓅᑯᒻ ᓴ ᐊᑖᐌᓐ ᒣᒀ ᐁᐊᔮᐙᒡ ᐅᐅᒫ ᐅᑯ ᑳᓃᑳᓂᓯᐙᒡ ᐆᑌᓈᕽ, ᐅᑯ ᑲᔦ ᑭᒋ ᐊᔭᐋᒃ᙮ ᑮᔥᐱᓐ ᑕᔥ ᐐᐊᑖᐌᔭᓐ, ᑎᐹᒋᒧᓐ, ᐋᓃᔥ ᒦ ᐃ ᐁᔑᓈᑾᒃ ᑮᓐ ᓂᑕᒻ ᐁᑎᐱᓇᐌᐎᓯᔭᓐ ᒋᐊᑖᐌᔭᓐ᙮ ᓃᓐ ᑕᔥ ᐃᑯ ᐃᐃᒫ ᑕᓂ ᐃᔑᓭ ᒋᐊᑖᐌᔮᓐ, ᑮᐃᑭᑐ᙮ ᐃᓂ ᑕᔥ ᓇᐗᒡ ᐯᔓ ᐃᓇᐌᒫᑲᓇᓐ ᑮᐃᑭᑐᐗᓐ, ᐁᔭᐞ, ᓂᐐ ᐊᑖᐌ᙮ 5 ᒦᔥ ᐴᐙᔅ ᑳᐃᓈᒡ, ᐊᐲ ᑮᔑᑲᒃ ᐊᑖᒪᒡ ᓀᔫᒦ ᐃᐃ ᐊᑮᓂ, ᒦ ᓴ ᑲᔦ ᐁᔑᓈᑾᒃ ᒋᐊᔮᐗᒡ ᐅᕒᐆᑦ Ruth ᐁᔑᓂᑳᓱᒡ ᒨᐗᑉ ᐊᑮᕽ ᐌᒌᒡ, ᒋᓂᑖᐎᑭᐃᒪᒡ ᑲᔦ ᑫᐅᓃᒑᓂᓯᒡ᙮ ᐊᐊ ᑕᔥ ᐃᓂᓂ ᑳᐱᒫᑎᓯᓯᒃ ᑫᔮᐱ ᒋᑎᐯᑕᒥᓂᒡ ᐅᐲᐌᓰᒪᐞ ᐃᐃ ᐊᑮᓂ, ᐅᑮ ᐃᓈᓐ᙮ 6 ᐃᓂ ᑕᔥ ᓇᐗᒡ ᐯᔓ ᐃᓇᐌᒫᑲᓇᓐ ᑮᐃᑭᑐᐗᓐ, ᑮᔥᐱᓐ ᓴ ᐃ ᐃᔑᓭᒃ, ᐃᑕᐙ ᓴ ᓂᑲ ᐸᑭᑎᓈᓐ ᑳᔑ ᑎᐱᓇᐌᐎᓯᔮᓐ ᓃᓐ ᓂᑕᒻ ᒋᑮ ᐊᑖᐌᔮᐹᓐ ᐃᐃ ᐊᑭ, ᐋᓃᔥ ᓂᓃᒑᓂᓴᒃ ᑳᐐᓐ ᒥᓴᐙ ᐅᑖᓂ ᑎᐯᑕᓰᓈᐙ᙮ ᑮᓐ ᓴ ᐃᑕᐙ ᐊᑖᐌᓐ, ᑳᐐᓐ ᓃᓐ ᓂᐐ ᐊᑖᐌᓰ, ᐅᑮᐃᑰᓐ᙮ 7 ᒦᑕᔥ ᐅᐅ ᒣᐎᔕ ᑳᐃᔑᒋᑫᐙᒡ ᐃᔅᕒᐃᔭᓬᐊᒃ Israel ᐊᐎᔭ ᑮᐐ ᐊᑖᐌᒡ ᐊᑮᓂ, ᑯᒫ ᑲᔦ ᐊᐎᔭ ᑮᐐ ᒣᔥᑯᑑᓇᕽ ᐅᑕᑮᒻ, ᐊᐊ ᓴ ᐃᓂᓂ ᑳᑮ ᐊᑖᐙᑫᒡ ᐅᑕᑮᒻ ᑮᑮᑕᑭᓯᓀ ᐁᑮ ᒦᓈᒡ ᐃᐃ ᐅᒪᑭᓯᓐ ᐃᓂᓂᐗᓐ ᑳᑮ ᐐ ᐊᑖᒥᑯᒡ᙮ ᒦᑕᔥ ᐅᐅ ᑳᐃᔑᒋᑫᐙᒡ ᐁᓇᓇᐊᑑᐙᒡ ᑫᑰᓐ᙮ 8 ᒦᔥ ᐃᓂ ᐯᔓ ᐃᓇᐌᒫᑲᓇᓐ ᑳᐃᑯᒡ, ᑮᓐ ᓴ ᐃᑕᐙ ᐊᑖᐌᓐ ᐃᐃ ᐊᑭ᙮ ᒦᑕᔥ ᑳᐃᔑ ᑮᒋᑯᔥᑲᒥᓂᒡ ᐯᔑᒃ ᐅᒪᑭᓯᓂᓂ ᐁᑮ ᒦᓂᑯᒡ ᐴᐙᔅ᙮ 9 ᒦᑕᔥ ᐴᐙᔅ ᑳᐃᓈᒡ ᑳᓃᑳᓂᓯᓂᒡ, ᐃᐃ ᑲᔦ ᑲᑭᓇ ᐃᐃᒫ ᑳᐊᔮᓂᒡ, ᑮᓇᐙ ᑭᐙᐸᒥᔑᒻ ᓅᑯᒻ ᑳᑮᔑᑲᒃ ᐁᑮ ᐊᑖᒪᒃ ᓀᔫᒦ ᑲᑭᓇ ᑫᑰᓂᓂ ᑳᑮ ᑎᐯᑕᒥᓂᒡ ᐄᓬᐃᒣᓬᐁᑯᐸᓀᓐ᙮ ᑲᑭᓇ ᑲᔦ ᑫᑰᓂᓂ ᑳᑮ ᑎᐯᑕᒥᓂᒡ ᑭᓬᐃᔭᓇᓐ Chilion, ᐃᓂ ᑲᔦ ᒣᓬᐊᓇᓐ Mahlon᙮ 10 ᐊᐊ ᓴ ᑲᔦ ᐅᕒᐆᑦ, ᒣᓬᐊᓐ ᑳᑮᐃᓂᓐᒡ ᐅᑮᐗᔑᑴᒪᓐ, ᒦ ᓴ ᐊᐌ ᑫᐐᐎᔮᓐ, ᒋᐅᐱᑭᐃᒪᒃ ᑲᔦ ᑫᐅᓃᒑᓂᓯᒡ᙮ ᐊᐊ ᓴ ᐃᓂᓃᐸᓐ ᑳᐱᒫᑎᓯᓯᒃ ᐅᑎᓇᐌᒫᑲᓇᐞ ᒋᑎᐯᑕᒥᓂᒡ ᐃᐃ ᐊᑭ᙮ ᐅᐐᓱᐎᓐ ᑲᔦ ᐊᐊ ᐃᓂᓃᐸᓐ ᒋᓂ ᐊᔮᓂᒃ ᑳᔑ ᐊᔮᓂᒡ ᐅᑎᓇᐌᒫᑲᓇᐞ, ᑳᑮ ᐃᔑ ᓂᑖᐎᑭᒡ ᑲᔦ᙮ ᑮᓇᐙ ᐄᑐᒃ ᑭᐙᐸᒥᔑᒻ ᓅᑯᒻ ᑳᑮᔑᑲᒃ, ᑮᐃᑭᑐ᙮ 11 ᐃᑭ ᑕᔥ ᑳᓃᑳᓂᓯᐙᒡ, ᐃᑭ ᑲᔦ ᐃᐃᒫ ᑳᐊᔮᐙᒡ ᑮᐃᑭᑐᐗᒃ, ᓃᓇᐎᓐᑦ ᓴ ᑌᐺ ᑭᐙᐸᒥᑰ᙮ ᑕᑲ ᑲᔦ ᑳᑎᐯᒋᑫᒡ ᐅᑲ ᐃᔑᐋᓐ ᑭᐐᐗᓐ ᑖᐱᔥᑰ ᐅᕒᐁᒐᓬᐗᓐ Rachel, ᓬᐄᔭᐗᓐ Leah ᑲᔦ ᑳᑮ ᐃᓀᑖᑯᓯᓂᒡ᙮ ᓃᐱᐗᐞ ᐁᑮ ᐊᔮᐙᐙᒡ ᐊᐱᓅᒌᔕᐞ ᒉᑲᐳᕽ Jacob ᐁᑮ ᐅᑎᓈᐙᒡ᙮ ᑕᑲ ᑲᔦ ᑭᑲ ᐌᓅᑎᔅ ᐃᐃᒫ ᑳᔑ ᐃᓇᐌᑎᐙᒡ ᐃᑭ ᐁᐸᕒᐊᑦ ᑳᐃᔑ ᑎᐯᑖᑯᓯᐙᒡ, ᐐᑫ ᑲᔦ ᒋᑭᑫᑖᑯᓯᔭᓐ ᐃᐃᒫ ᐯᑕᓬᐃᐁᒥᕽ Bethlehem᙮ 12 ᑕᑲ ᑳᑎᐯᒋᑫᒡ ᑫᒦᓂᒃ ᐊᐱᓅᒌᔕᐞ ᑭᐐᐎᕽ ᐅᒋ, ᑭᑖᐎᓐ ᑕᐃᔑᓈᑾᓐ ᑳᑮ ᐃᔑᓈᑾᓂᓂᒃ ᐲᕒᐃᔅ Perez ᐅᑖᐎᓐ᙮ ᒦ ᐄᑐᒃ ᐊᐊ ᑳᑮ ᐅᑯᓯᓯᒥᑯᒡ ᒎᑕᐗᓐ Judah ᑳᑮ ᐃᔑᓂᑳᓱᓂᒡ, ᐅᒫᒫᓐ ᑕᔥ ᑌᒫᕒ Tamar ᑮᐃᔑᓂᑳᓱᐗᓐ, ᒦ ᐃ ᑳᐃᑯᒡ᙮ ᐴᐙᔅ, ᐃᐃ ᑲᔦ ᐅᐲᐌᓰᒪᐞ ᐁᑕᔑᓱᓂᒡ 13 ᐴᐙᔅ Boaz ᑕᔥ ᐅᑮ ᑮᐌᐎᓈᓐ ᐅᕒᐆᑕᓐ Ruth ᐁᑮ ᐐᐎᒡ᙮ ᒦᔥ ᐊᐊ ᐃᑴ ᑳᑎᐯᒋᑫᓂᒡ ᑳᑮ ᔕᐌᓂᒥᑯᒡ᙮ ᐊᐱᓅᒌᔕᓐ ᐅᑮ ᐊᔮᐙᓐ ᐁᑮ ᑸᐎᓭᓯᐎᓂᒡ᙮ 14 ᐃᑴᐗᒃ ᑕᔥ ᐅᑮᐃᓈᐙᓐ ᓀᔫᒦᐗᓐ Naomi, ᑕᑲ ᑕᒦᑴᒋᐌᑖᑯᓯ ᑳᑎᐯᒋᑫᒡ, ᐁᒦᓂᒃ ᑫᓂ ᓈᓈᑲᒋᐃᒥᒃ ᓅᑯᒻ ᑳᑮᔑᑲᓂᓂᒃ᙮ ᐊᐊ ᑕᔥ ᑸᐎᓭᔅ ᑕᓂ ᑭᒋ ᐃᓀᑖᑾᓂᓂ ᐅᐐᓱᐎᓐ ᐃᐃᒫ ᐃᔅᕒᐃᔭᓬᐃᑳᕽ Israel᙮ 15 ᑭᔑᒥᔅ ᓴ ᑲᔦ ᑭᓵᑭᐃᒃ, ᐋᐱᒋ ᑲᔦ ᓃᐱᐗᐞ ᑭᐱ ᑑᑖᒃ ᐊᐲᒡ ᐐᓐ ᓃᔣᓱ 7 ᐅᑯᓯᓯᒫᒃ ᑫᑮ ᑑᑕᐎᒀᐸᓐ᙮ ᓅᑯᒻ ᐃᑕᔥ ᑳᑮᔑᑲᓂᓂᒃ ᑭᒦᓂᒃ ᑸᐎᓭᓴᓐ ᑫᐅᔫᔑᓯᐗᒡ᙮ ᒦ ᓴ ᑕᔥ ᐃᐃᒫ ᑫᐅᒋ ᑮᐌ ᒪᔥᑲᐙᑎᓯᔭᓐ, ᒦᑲᔦ ᐊᐊ ᑫᓂ ᓈᓈᑲᒋᐃᒃ ᑭᒋ ᐊᔮᐋᐎᔭᓐ, ᐅᑮᐃᑰᐞ᙮ 16 ᒦᑕᔥ ᓀᔫᒦ ᑳᑮ ᐅᑖᐱᓈᒡ ᐃᓂ ᐊᐱᓅᒌᔕᓐ ᐁᑮ ᑕᑯᓈᒡ ᐅᒌᑾᓂᕽ, ᐐᓐ ᑲᔦ ᐅᑮ ᓈᓈᑲᒋᐋᓐ᙮ 17 ᐃᑴᐗᐞ ᑕᔥ ᐯᔓ ᑳᑮ ᐐᒋᑖᒫᒡ ᑮᐃᑭᑐᐗᐞ, ᓀᔫᒦ ᓂᑖᐎᑭᐗᓐ ᐅᑯᓯᓴᓐ, ᑮᐃᑭᑐᐗᐞ᙮ ᐆᐯᑦ Obed ᐃᑕᔥ ᐅᑮ ᐃᔑᓂᑳᓈᐙᓐ ᐃᓂ ᑸᐎᓭᓴᓐ᙮ ᐆᐯᑦ ᓴ ᑮᐊᓂ ᐅᑯᓯᓯ ᒉᓯᐗᓐ Jesse, ᑌᐱᑑᓐ David ᑳᑮ ᐅᑌᑌᓂᒡ᙮ 18 ᒦᐗᐞ ᐃᑕᔥ ᐅᓄ ᐲᕒᐃᔅ Perez ᑳᑮ ᐊᓂ ᐊᔮᓂᑫ ᓂᑖᐎᑭᐋᒡ᙮ ᐲᕒᐃᔅ ᑮᐅᑯᓯᓯ ᐁᔅᕒᐊᓇᓐ Hezron᙮ 19 ᐁᔅᕒᐊᓐ ᑮᐅᑯᓯᓯ ᐅᕒᐋᒪᓐ Ram᙮ ᐅᕒᐋᒻ ᑮᐅᑯᓯᓯ ᐊᒥᓇᑖᐴᓐ Amminadab᙮ 20 ᐊᒥᓇᑖᑉ ᑮᐅᑯᓯᓯ ᓇᔕᓅᓐ Nahshon᙮ ᓇᔕᓐ ᑮᐅᑯᓯᓯ ᓵᓬᒪᓇᓐ Salmon᙮ 21 ᓵᓬᒪᓐ ᑕᔥ ᑮᐅᑯᓯᓯ ᐴᐙᓴᓐ᙮ ᐴᐙᔅ ᑕᔥ ᑮᐅᑯᓯᓯ ᐆᐯᑕᓐ Obed᙮ 22 ᐆᐯᑦ ᐃᑕᔥ ᑮᐅᑯᓯᓯ ᒉᓰᓐ᙮ ᒉᓯ ᑕᔥ ᑮᐅᑯᓯᓯ ᑌᐱᑑᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society