Nikamonan 65 - ᐅᒋᐺ ᑭᒋᒪᓯᓇᐃᑲᓐᒋᒦᑴᒋᐌᓂᒥᑎᐸᓐ ᑭᔐᒪᓂᑑ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᐆ ᑭᔐᒪᓂᑑ, ᑭᐐ ᒦᑴᒋᐌᓂᒥᑰ ᓴ ᐌᑎ ᓵᔭᓐ Zion ᐁᒋᑳᑌᒃ, ᓂᑲ ᑎᐱ ᑑᑖᒥᓐ ᑲᔦ ᑳᑮ ᐃᔑ ᐊᐱᒧᓄᑖᑰᔭᐸᓐ ᐁᐐ ᐃᔑᒋᑫᔮᕽ᙮ 2 ᑮᓐ ᐄᑐᒃ ᑳᓅᑕᒪᓐ ᐁᔑ ᐊᓇᒥᐁᑕᐎᓈᓐ, ᑲᑭᓇ ᓴ ᐃᓂᓂᐗᒃ ᑭᐱ ᓈᓯᑳᑰᒃ᙮ 3 ᓂᒪᒫᔒᐎᓂᓈᓂᓐ ᓴ ᓂᑮ ᔖᑰᒋᐃᑯᒥᓐ, ᑮᓐ ᐃᑕᔥ ᐐᓐ ᑭᑮ ᐴᓀᑖᓇᓐ ᓂᒪᒋᑑᑕᒧᐎᓂᓈᓂᓐ᙮ 4 ᐋᐱᒋ ᓴ ᔕᐌᑖᑯᓯ ᐃᓂᓂ ᑳᐅᓈᐸᒪᒡ ᐯᔓ ᒋᐃᔑᑖᒡ ᐁᑕᔑ ᐊᓇᒥᐁᑖᑯᐗᒡ᙮ ᐐᑫ ᓴ ᓂᑲ ᒥᓉᑕᒥᔥᑳᑰᒥᓐ ᐌᓂᔑᔑᑭᓐ ᐁᔮᑭᓐ ᑭᐙᑳᐃᑲᓂᕽ, ᒦ ᓴ ᐃ ᑌᐯᑕᒪᓐ ᑭᒋ ᐊᓇᒥᐁᐎᑲᒥᒃ᙮ 5 ᐆ ᑭᔐᒪᓂᑑ ᐁᓇᑴᑕᐎᔮᕽ ᓴ ᑭᑎᔑᒋᑫᑕᒪᐎᔑᓈᒻ ᒋᔖᑰᒋᑣᔮᕽ, ᐐᑫ ᑭᒫᒪᑳᒋᒋᑫ ᒋᐱᒫᒋᐃᔮᕽ᙮ ᑲᑭᓇ ᓴ ᐯᒫᑎᓯᐙᒡ ᒥᓯᐌ ᐊᑮᕽ, ᐊᑳᒥᕽ ᑲᔦ ᑭᒋᑲᒦᕽ ᐁᐐ ᑌᐺᔦᓂᒥᒀ᙮ 6 ᑮᓐ ᑳᑮ ᐅᓇᑑᔭᓐ ᐗᒌᓐ ᑭᓲᑭᓯᐎᓐ ᐁᑮ ᐋᐸᒋᑑᔭᓐ, ᐁᑮ ᓈᑯᑑᔭᓐ ᑭᒪᔥᑲᐎᓰᐎᓐ᙮ 7 ᑮᓐ ᑲᔦ ᑳᑯᔥᒀᐙᒋᑲᒥᑑᔭᓐ ᑭᒋᑲᒻ, ᑳᑑᑕᒪᓐ ᑲᔦ ᒋᒪᑗᔮᔥᑳᓯᓄᒃ; ᑳᑯᔥᒀᐙᒋᐊᑣ ᑲᔦ ᐯᒫᑎᓯᐙᒡ ᑮᒥᑯᔥᑳᒋᐊᔮᐙᒡ᙮ 8 ᐃᑭ ᓴ ᐙᓴ ᐁᔮᐙᒡ ᐅᑯᑖᓀᑖᓈᐙᓐ ᐁᔑ ᒫᒪᑳᒋᒋᑫᐗᒡ; ᒦᔥ ᑮᐱᑖᐸᕽ, ᑮᐅᓈᑯᔑᒃ ᑲᔦ ᑳᐅᒋ ᐊᑕᐌᑕᒪᓐ ᒋᒋᑫᑕᒧ ᓂᑲᒧᓈᓂᐗᕽ᙮ 9 ᐁᑭᒥᐗᓄᑫᔭᓐ ᓴ ᑭᑎᔑ ᓈᑯᑑᓐ ᐁᓈᓈᑲᒋᑑᔭᓐ ᐊᑭ ᒋᐅᒋ ᐌᓅᒋ ᓂᑖᐎᑭᒋᑫᒪᑲᒃ᙮ ᓰᐲᓐ ᐯᒥᒋᐗᑭᓐ ᐁᒪᒨᔥᑭᓀᐲᑭᓐ, ᐊᑭ ᒋᓂᑖᐎᑭᒋᑫᒪᑲᒃ, ᒦ ᐃ ᓇᑫ ᐁᔑ ᑾᔮᒋᑑᔭᓐ᙮ 10 ᑭᑭᒥᐗᓄᑫ ᓴ ᐁᔖᐳᐸᑑᔭᓐ ᑳᔑ ᐲᑾᑲᒥᑭᐱᒋᑫᕽ ᒥᔕᐗᑲᒥᒃ, ᐁᑕᑕᒀᐹᐗᑑᔭᓐ ᐁᔑ ᐸᐲᑾᑲᒥᑭᐱᒋᑫᕽ, ᐁᓅᑳᐹᐗᑑᔭᓐ, ᒦᔥ ᑫᑰᓐ ᐃᐃᒫ ᐌᒋ ᒫᒌᑭᕽ᙮ 11 ᑭᒥᓄᒋᑫᐎᓂᕽ ᓴ ᐅᒌᒪᑲᓐ ᒋᑭᒋ ᐌᓅᒋ ᒪᓂᔑᑫᕽ! ᐋᑎ ᓴ ᐱᑯ ᐁᔖᔭᓐ, ᐐᑫ ᐹᑏᓇᑎᓐ ᑫᒦᒋᕽ᙮ 12 ᐐᑫ ᓴ ᒪᒨᔥᑭᓀᑳᐸᐎᐗᒃ ᐊᔭᐋᐎᔕᒃ ᐁᔑ ᒪᒪᔥᑯᓰᑳᓂᒃ, ᐯᑾᑎᓈᑭᓐ ᓴ ᐱᑯ ᒥᓉᑕᒨᒪᑲᓅᓐ᙮ 13 ᐁᔑ ᒪᒪᔥᑯᓰᑳᒃ ᓴ ᐐᑫ ᒨᔥᑭᓀ ᐊᔮᐗᒃ ᒫᓇᒑᓂᔕᒃ, ᐁᔑ ᐸᐸᓴᑎᓈᒃ ᐹᑏᓄ ᐸᑴᔑᑲᓂᒥᓐ ᑲᑭᓇ ᐁᔖᑯᐌᒪᑲᑭᓐ ᐁᒥᓉᑕᒨᒪᑲᑭᓐ, ᐁᓂᑲᒨᒪᑲᑭᓐ ᑲᔦ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society