Nikamonan 33 - ᐅᒋᐺ ᑭᒋᒪᓯᓇᐃᑲᓐᒦᑴᒋᐎᓂᑲᒧᓐ 1 ᒌᑫᑕᒧᒃ ᓴ ᒋᓂᑲᒨᑕᐌᒃ ᑳᑎᐯᒋᑫᒡ, ᑮᓇᐙ ᑳᑾᔭᒀᑎᓯᔦᒃ; ᒦ ᐄᑐᒃ ᓀᑖ ᐃᔑᒋᑫᐙᒡ ᑴᔭᒀᑎᓯᐙᒡ᙮ 2 ᒦᑴᒋᐌᓂᒥᒃ ᑳᑎᐯᒋᑫᒡ ᑭᑐᒋᑲᓐ ᒪᑗᔮᐲᑭᐱᒋᑲᓐ ᒋᐋᐸᒋᐁᒃ; ᑭᑐᒋᑫᑕᒪᐎᒃ ᑳᑎᐯᒋᑫᒡ ᒋᐋᐸᒋᐁᒃ ᑳᒥᑖᓶᔮᐱᑳᓱᒡ ᒪᑗᔮᐲᑭᐱᒋᑲᓐ᙮ 3 ᐅᔥᑭ ᓂᑲᒧᓐ ᓂᑲᒨᑕᐎᒃ; ᒪᒪᓯᓉᐌᒧᒋᑫᓐ ᒋᑕᑯ ᔖᑯᐌᔭᓐ ᐁᐲᒋ ᒥᓉᑕᒪᓐ᙮ 4 ᐁᑭᑐᒡ ᓴ ᑳᑎᐯᒋᑫᒡ ᑾᔭᑾᓂᓂ, ᑌᐺᐗᓂᓂ ᑲᔦ; ᑌᐺᔦᑖᑾᓂᓂ ᑲᔦ ᑲᑭᓇ ᐁᔑᒋᑫᒡ᙮ 5 ᑳᑎᐯᒋᑫᒡ ᐅᔕ ᐅᓵᑭᑑᓐ ᑾᔭᑯᒋᑫᐎᓐ, ᐌᐌᓂ ᑲᔦ ᐃᓈᑯᓂᑫᐎᓐ; ᐅᒥᓄᑑᑖᑫᐎᓐ ᓴ ᒨᔥᑭᓀ ᐁᑖᑾᓂᓂ ᒥᓯᐌ ᐅᐅᒫ ᐊᑮᕽ᙮ 6 ᑳᑎᐯᒋᑫᒡ ᐅᔕ ᐅᑎᑭᑐᐎᓂᕽ ᑮᐅᒋ ᐅᔑᒋᑳᑌ ᑮᔑᒃ, ᐁᔑ ᓵᑭᑕᓈᒧᒡ ᑮᐅᒋ ᐅᔑᒋᑲᓂᐎᐗᒃ ᑲᑭᓇ ᐗᓇᑯᔕᒃ᙮ 7 ᐯᔑᑾᓄᕽ ᓴ ᐅᑮ ᐃᔑ ᒫᐗᑑᓈᓇᓐ ᑭᒋᑲᒦᓐ, ᑳᑮᔥᑲᔭᐙᓂᒃ ᐁᐃᔑ ᓇᐃᓇᕽ ᐊᑖᓱᐎᑲᒥᑯᕽ᙮ 8 ᑕᑲ ᑲᑭᓇ ᑫᑰᓐ ᐁᔮᓂᒃ ᐅᐅᒫ ᐊᑮᕽ ᐅᑲ ᑯᑖᓀᓂᒥᑰᓐ ᑳᑎᐯᒋᑫᒡ; ᑕᑲ ᑲᑭᓇ ᑲᔦ ᐯᒫᑎᓯᓂᒡ ᐅᐅᒫ ᐊᑮᕽ ᐁᔮᓂᒡ ᐅᑲ ᐊᓇᒥᐁ ᑯᑖᓀᓂᒥᑰᐞ! 9 ᑳᑮ ᐃᑭᑐᒡ ᓴ ᑯ ᑮᐃᔑᓈᑾᓂᓂ; ᐁᓇᓅᑮᒡ ᓴ ᑯ ᑲᑭᓇ ᑫᑰᓐ ᑮᐃᔑᓈᑾᓂᓂ᙮ 10 ᑳᑎᐯᒋᑫᒡ ᓴ ᐅᐲᑯᓈᓐ ᐁᔑ ᐅᓀᑕᒥᓂᒡ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ, ᐅᐗᓇᔥᑴᐋᐞ ᑲᔦ ᐙᐃᔑᒋᑫᓂᒡ ᐯᒫᑎᓯᓂᒡ᙮ 11 ᑳᑎᐯᒋᑫᒡ ᐃᑕᔥ ᐐᓐ ᐁᔑ ᐅᓀᑕᕽ ᓀᐱᒡ ᑕᐱᒥᓭᓂ, ᐙᐃᔑᒋᑫᒡ ᑲᔦ ᓀᐱᒡ ᑕᓂ ᐊᔮᓂ᙮ 12 ᑕᔕᐌᑖᑯᓯᐗᒃ ᓴ ᐯᒫᑎᓯᐙᒡ ᐌᑭᔐᒪᓂᑑᒥᐙᒡ ᑳᑎᐯᒋᑫᓂᒡ, ᐯᒫᑎᓯᓂᒡ ᐐᓐ ᐃᑯ ᑳᑎᐯᒋᑫᒡ ᑳᑮ ᐅᓈᐸᒫᒡ ᐁᐐ ᑎᐱᓇᐌᐎᓯᒡ᙮ 13 ᑭᒋᑮᔑᑯᕽ ᓴ ᑳᑎᐯᒋᑫᒡ ᐅᓵᐱ ᐁᑲᓇᐙᐸᒫᒡ ᑲᑭᓇ ᐯᒫᑎᓯᓂᒡ᙮ 14 ᐁᔑᑖᒡ ᓴ ᑯ ᐅᑑᓵᐸᒫᐞ ᑲᑭᓇ ᐅᐅᒫ ᐊᑮᕽ ᐯᒫᑎᓯᓂᒡ᙮ 15 ᐐᓐ ᐄᑐᒃ ᑳᐅᔑᑑᒡ ᑲᑭᓇ ᐁᓀᑕᒥᓂᒡ, ᐅᑭᑫᑖᓐ ᑲᔦ ᑲᑭᓇ ᐁᔑᒋᑫᓂᒡ᙮ 16 ᑭᒋᐅᑭᒫ ᓴ ᑳᐐᓐ ᐅᒋ ᔖᐾᐋᓰ ᐁᑕᔑᓂᒡ ᐅᔑᒫᑲᓂᔒᒪᐞ, ᔑᒫᑲᓂᔥ ᑲᔦ ᑳᐐᓐ ᐅᒋ ᔖᐾᓰ ᐅᑕᐲᒌᐎᓂᕽ᙮ 17 ᑳᐐᓐ ᑫᑰᓐ ᐃᓈᐸᑕᓯᓂᓂ ᑮᐊᐯᓂᒧᓄᑕᐎᓐᒡ ᒥᑕᑎᒻ ᒋᔖᑰᒋᑣᒡ; ᐋᓇ ᒪᔥᑲᐎᓰᒡ, ᑳᐐᓐ ᓴ ᐅᑲᔥᑭᑑᓰᓐ ᒋᐱᒫᒋᐃᐌᒡ᙮ 18 ᑳᑎᐯᒋᑫᒡ ᓴ ᐅᓈᓈᑲᓵᐸᒫᐞ ᑳᑯᑖᓀᓂᒥᑯᒡ, ᐃᐃ ᐁᐯᓂᒧᓄᑕᒥᓂᒡ ᐅᒥᓄᑑᑖᑫᐎᓐ, 19 ᒋᐱᒫᒋᐋᒡ ᒋᓂᐳᓯᓂᒃ; ᐅᓈᑲᒋᐋᐞ ᒋᐱᒫᑎᓯᓂᒡ ᒣᒀ ᑮᓅᑌᓭᓂᒃ ᒦᒋᒻ᙮ 20 ᑳᑎᐯᒋᑫᒡ ᓴ ᑭᐲᐋᓈᓐ; ᐐᓐ ᓴ ᑳᐐᒋᐃᓇᑭᒡ, ᑳᓈᑕᒪᐎᓇᑭᒡ ᑲᔦ᙮ 21 ᐐᓐ ᓴ ᑳᐅᒋ ᒥᓉᑕᒪᕽ ᑭᑌᐃᓈᓂᕽ ᐋᓃᔥ ᑭᑌᐺᔦᑕᒧᐙᒥᓐ ᑫᑌᑖᑾᓂᓂᒃ ᐅᐐᓱᐎᓐ᙮ 22 ᐆ ᑌᐯᒋᑫᔭᓐ, ᑕᑲ ᑭᒥᓄᑑᑖᑫᐎᓐ ᓂᑲ ᒪᔮᐎᔥᑳᑯᒥᓐ, ᒪᔮ ᓴ ᑳᔑ ᐊᐯᓂᒧᓄᑖᑰᔭᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society