Nikamonan 31 - ᐅᒋᐺ ᑭᒋᒪᓯᓇᐃᑲᓐᑫᔑᐊᓇᒥᐋᕽ ᐐᑌᐺᔦᓂᒥᓐᒡ ᑭᔐᒪᓂᑑ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᐆ ᑌᐯᒋᑫᔭᓐ ᑮᓐ ᓴ ᑳᓈᒋᐸᐃᐙᓂᓈᓐ; ᑫᑯ ᐸᑭᑎᓂᔑᑫᓐ ᒋᐊᑲᒋ ᔖᑰᒋᐃᑰᔮᓐ᙮ ᑭᑾᔭᒀᑎᓯᐎᓂᕽ ᓴ ᐃᔑ ᓈᑕᒪᐎᔑᓐ᙮ 2 ᓅᑕᐎᔑᓐ ᓴ, ᐌᔩᑉ ᐲᔖᓐ ᒋᐱ ᓈᑕᒪᐎᔭᓐ᙮ ᐊᓯᓐ ᑳᓈᒋᐸᐃᐙᓇᒃ ᐄᑐᒃ ᑭᑎᓄᐤ, ᑳᓲᑭᒋᑳᑌᒃ ᐊᐸᐃᐌᐎᑲᒥᒃ ᒋᓈᑕᒪᐎᔭᓐ᙮ 3 ᑮᓐ ᐄᑐᒃ ᐊᓯᓃᕽ ᑭᑎᓀᓂᒥᓐ ᐁᑌᐺᔦᓂᒥᓈᓐ, ᓂᑕᐸᐃᐌᐎᑲᒥᒃ ᑭᑎᓀᓂᒥᓐ ᑲᔦ, ᑭᐐᓱᐎᓂᕽ ᓴ ᐅᒋ ᓃᑳᓃᑕᒪᐎᔑᓐ, ᐅᒋ ᑭᑭᓄᐎᓂᔑᓐ ᑲᔦ᙮ 4 ᑲᓇᐌᓂᒥᔑᓐ ᓴ ᒋᐃᔖᓯᐙᓐ ᑳᑮ ᐅᓇᒋᑳᑌᒃ ᐙᐅᒋ ᑳᒋᑎᓂᑰᔮᓐ, ᑮᓐ ᐄᑐᒃ ᑳᓈᒋᐸᐃᐙᓂᓈᓐ᙮ 5 ᑭᓂᒌᕽ ᓴ ᓂᑎᔑ ᐸᑭᑎᓈ ᓂᑕᒑᒃ; ᐆ ᑌᐯᒋᑫᔭᓐ ᑌᐺ ᐁᔑ ᒪᓂᑑᐎᔭᓐ, ᐱᒫᒋᐃᔑᓐ! 6 ᑳᐐᓐ ᓴ ᓂᒥᓉᓂᒫᓰᒃ ᑫᒋᐌᓂᒫᐙᒡ ᑫᑰᓐ ᐁᓀᑖᑯᓯᓯᓂᒃ ᒪᓂᑑᑳᓇᐞ; ᓃᓐ ᐃᑕᔥ ᑳᑎᐯᒋᑫᒡ ᓂᑲ ᑌᐺᔦᓂᒫ᙮ 7 ᓂᑲ ᒥᓉᑖᓐ ᓴ, ᓂᑲ ᒌᑫᑕᒻ ᑲᔦ ᐁᓵᑭᐃᔭᓐ, ᑭᐙᐸᑖᓐ ᐄᑐᒃ ᐁᔑ ᑲᒀᑕᑭᓭᔮᓐ, ᑭᑭᑫᑖᓐ ᑲᔦ ᐁᔑ ᑲᒀᑕᑫᑕᒫᓐ ᓂᑕᒑᑯᕽ᙮ 8 ᑳᐐᓐ ᓴ ᑲᔦ ᒪᔑ ᑭᑎᔑ ᐸᑭᑎᓂᓰ ᐁᔑᐊᔮᐙᒡ ᑳᔒᑫᓂᒥᐙᒡ; ᑮᓐ ᓴ ᑯ ᑭᑎᔑ ᐸᑭᑎᓂᔥ ᐁᔑ ᒪᑭᑕᐙᒃ ᐋᑎ ᐱᑯ ᐙᐃᔖᔮᓐ ᒋᐃᔖᔮᓐ᙮ 9 ᐆ ᑌᐯᒋᑫᔭᓐ, ᑰᐹᑌᓂᒥᔑᓐ, ᐁᑕᑕᐌ ᐅᔕ ᓂᐗᓯᑖᐎᓭ; ᐐᑫ ᐅᔕ ᓂᑎᔥᑭᒑᑉ ᐁᐲᒋ ᒨᔕᒃ ᒪᐎᔮᓐ; ᐐᑫ ᑲᔦ ᐋᔕ ᓂᒑᑮ᙮ 10 ᒫᓀᑕᒧᐎᓐ ᓴ ᐋᔕ ᓂᒑᑳᐱᓇᓂᑯᓐ, ᐁᒨᑯᓀᔮᓐ ᓴ ᐌᒋ ᑕᒀᒃ ᓂᐱᒫᑎᓯᐎᓐ; ᒦᑕᔥ ᑲᔦ ᐌᒋ ᓃᓇᒥᓯᔮᓐ ᐅᓵᒻ ᐁᑲᒀᑕᑭᑑᔮᓐ, ᓂᑲᓇᓐ ᑲᔦ ᑳᓂ ᐅᒋ ᓃᓇᒪᑭᓐ᙮ 11 ᐁᐊᔮᐙᒡ ᓴ ᑲᑭᓇ ᑳᔒᑫᓂᒥᐙᒡ, ᒦ ᓴ ᐃ ᐌᒋ ᒫᓀᓂᒥᑰᔮᓐ, ᒣᒥᑕᑫ ᑯ ᓂᐐᒋᑖᒫᑲᓇᒃ; ᐁᑯᔑᐙᒡ ᓭᔮᑭᐃᐙᒡ, ᐁᒫᒌᐸᐃᐙᔑᐙᒡ ᐃᑭ ᑳᐙᐸᒥᐙᒡ ᒦᑲᓈᑳᕽ᙮ 12 ᒦᔥ ᐁᔑ ᐗᓃᑫᓄᑖᑰᔮᓐ ᑖᐱᔥᑰ ᑳᓂᐳᒡ ᑳᑑᑕᐎᓐᒡ, ᐁᐃᓀᓂᒥᑰᔮᓐ ᑖᐱᔥᑰ ᑳᐲᑯᔥᑳᒃ ᐙᐱᑲᓂ ᐋᐸᒋᒋᑲᓐ᙮ 13 ᓂᓅᑕᒻ ᐅᔕ ᐁᔑᐊᔮᓄᒥᐙᒡ ᑳᐹᑏᓄᐙᒡ, ᒥᓯᐌ ᐙᑳᔭᐄ ᐃᓇᑫ ᐁᐃᔑ ᓇᓃᓵᓀᑕᒫᓐ᙮ ᒫᒪᐤ ᐅᔕ ᐃᓀᑕᒧᑐᑫᓇᒃ ᑫᑰᓐ ᐁᐐ ᐅᒋ ᓂᔑᐙᒡ᙮ 14 ᐆ ᑌᐯᒋᑫᔭᓐ, ᔖᑰᒡ ᐃᑕᔥ ᓃᓐ ᑭᑌᐺᔦᓂᒥᓐ, ᐁᐃᑭᑐᔮᓐ, ᑮᓐ ᓴ ᓂᑭᔐᒪᓂᑑᒻ! 15 ᑮᓐ ᓴ ᒨᔕᒃ ᑭᑲᓇᐌᑖᓐ ᓂᐱᒫᑎᓯᐎᓐ; ᔖᐾᐃᔑᓐ ᐅᒋ ᑳᔒᑫᓂᒥᐙᒡ, ᐃᑭ ᑲᔦ ᑳᑲᒀᑕᑭᐃᐙᒡ᙮ 16 ᑕᑲ ᒥᓍᐸᒥᔑᓐ ᑮᑲᓇᐙᐸᒥᔭᓐ ᑭᑕᓄᑮᐋᑲᓐ ᑌᓄᐎᔮᓐ; ᑭᒥᓄᑑᑖᑫᐎᓂᕽ ᐃᓇᑫ ᐃᔑ ᐱᒫᒋᐃᔑᓐ᙮ 17 ᐆ ᑌᐯᒋᑫᔭᓐ, ᑭᑲᓅᓂᓐ, ᑫᑯ ᐸᑭᑎᓂᔑᑫᓐ ᒋᐊᑲᒋ ᔖᑰᒋᐃᑰᔮᓐ; ᑕᑲ ᐃᑭ ᑳᒪᒑᑎᓯᐙᒡ ᑕᐊᑲᒋ ᔖᑰᒋᐋᐗᒃ, ᒋᓅᑖᑎᓯᒀ ᒋᐊᔮᐙᒡ ᐁᔑᐊᔮᓂᒡ ᓀᐳᓂᒡ᙮ 18 ᑕᑲ ᑑᑕᐤ ᑳᑲᑮᓇᐎᔥᑭᐙᒡ ᒋᓅᑖᑎᓯᒀ, ᑲᑭᓇ ᑫᒋ ᐃᓀᓂᑎᓱᐙᒡ, ᑳᒦᑭᓱᒫᐙᒡ ᑴᔭᒀᑎᓯᓂᒡ ᓭᓯᒃ ᐁᐃᓈᓯᒀ᙮ 19 ᐁᑕᑕᐌ ᓴ ᒫᒪᑳᑌᑖᑾᓐ ᑭᒥᓄᒋᑫᐎᓐ, ᑳᑲᓇᐌᑕᒪᐗᑣ ᑴᑖᓀᓂᒥᒀ! ᑲᑭᓇ ᓴ ᐁᑕᔑᐙᒡ ᐊᐎᔭᒃ ᐅᑲ ᐙᐸᑖᓈᐙ ᐁᔑ ᑲᓇᐌᓂᒥᒪᒡ ᐃᐃ ᑳᓈᒋᐸᐃᐙᓂᒥᒃ᙮ 20 ᑮᓐ ᓴ ᐱᑯ ᐁᔑᐊᔮᔭᓐ ᑭᑎᔑ ᐋᑰᔥᑲᐙᒃ ᒋᑌᐱᓂᑯᓯᒀ ᐙᑑᑖᑯᐙᒡ ᐯᒫᑎᓯᓂᒡ; ᐁᔑᑖᔭᓐ ᓴ ᑭᑎᔑ ᐋᑰᔥᑲᐙᒃ ᒋᑌᐱᒫᓯᐎᑣ ᐁᓈᐱᓀᒥᑯᐙᒡ ᑳᔒᑫᓂᒥᑯᐙᒡ᙮ 21 ᑕᑲ ᑕᒦᑴᒋᐌᑖᑯᓯ ᑳᑎᐯᒋᑫᒡ, ᐐᓐ ᐅᔕ ᑳᑮ ᐙᐸᑕᐃᒡ ᑳᒫᒪᑳᑌᑖᑾᓂᓂᒃ ᐅᓵᑭᐃᐌᐎᓐ ᑮᐃᓀᑖᑯᓯᔮᐹᓐ ᑖᐱᔥᑰ ᑭᒋ ᐆᑌᓇ ᑳᐙᑳᔥᑭᑳᑌᒃ᙮ 22 ᒦᑕᔥ ᑳᐃᑭᑐᔮᐹᓐ ᐁᑯᔥᑴᑕᒫᓐ, ᒦ ᓴ ᐃ ᑳᐐᓐ ᐊᐗᔑᒣ ᑭᓈᓈᑲᒋᐃᓰ ᒋᑲᓇᐌᓂᒥᔭᐸᓐ! ᔖᑰᒡ ᐃᑕᔥ ᑭᑮ ᓅᑕᐤ ᐁᔖᑯᐙᓂᓈᓐ ᒋᑰᐹᑌᓂᒥᔭᓐ, ᒋᐐᒋᐃᔭᓐ ᑲᔦ᙮ 23 ᓵᑭᐃᒃ ᑳᑎᐯᒋᑫᒡ, ᑮᓇᐙ ᑲᑭᓇ ᑳᑎᐱᓇᐌᐎᓰᒥᓀᒃ! ᑳᑎᐯᒋᑫᒡ ᐅᔕ ᐅᑲᓇᐌᓂᒫᐞ ᑳᑌᐺᔦᑖᑯᓯᓂᒡ, ᐅᑕᔐ ᐌᐱᓈᐞ ᐃᑕᔥ ᐐᓐ ᑳᑭᒋ ᐃᓀᓂᑎᓱᓂᒡ᙮ 24 ᒪᔥᑲᐎᐊᔮᒃ, ᒪᔥᑲᐌᑕᒧᒃ ᑲᔦ ᑭᑌᐃᐙᕽ, ᑮᓇᐙ ᑲᑭᓇ ᐁᐯᓂᒧᓄᑕᐌᒃ ᑳᑎᐯᒋᑫᒡ! |
Ojibwe Shorter Bible (Syllabic Script) © 2008 Canadian Bible Society
Canadian Bible Society