Nikamonan 24 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐁᑎᐯᑕᕽ ᑲᑭᓇ ᑫᑰᓐ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᑳᑎᐯᒋᑫᒡ ᓴ ᐅᑎᐯᑖᓐ ᐊᑮᓂ, ᑲᑭᓇ ᑲᔦ ᑫᑰᓇᓐ ᐃᐃᒫ ᑳᐊᔮᓂᑭᓐ᙮ ᐅᑎᐯᑖᓐ ᑲᔦ ᒥᓯᐌ ᐅᐅ ᐊᑮᓂ, ᑲᑭᓇ ᑲᔦ ᐅᐅᒫ ᑳᑕᔑ ᐱᒫᑎᓯᓂᒡ᙮ 2 ᑭᒋᑲᒦᕽ ᐄᑐᒃ ᐅᑮ ᐃᔑ ᐅᔑᑑᓐ, ᓂᐲᑳᕽ ᓴ ᐅᑮ ᐃᔑ ᐋᔩᑕᑭᑑᓐ ᐊᑮᓂ᙮ 3 ᐊᐌᓀᓐ ᑕᔥ ᑫᐃᔖᐸᓐ ᑳᔑ ᐱᑾᑎᓈᓂᒃ, ᐁᔑᐊᔮᓂᒡ ᑳᑎᐯᒋᑫᓂᒡ? ᐊᐌᓀᓐ ᐃᑕᔥ ᑲᔦ ᑫᓃᐸᐎᐸᓐ ᐌᑎ ᐅᑕᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ? 4 ᐊᐊᐌ ᓴ ᐁᑕ ᑳᐯᑫᑖᑾᓂᓂᒃ ᐅᑎᔑᒋᑫᐎᓐ ᑲᔦ ᑳᐯᑫᑕᕽ ᑳᐊᓇᒥᐁᑕᐙᓯᒃ ᒪᓂᑑᑳᓇᐞ, ᐊᓂᔖ ᑲᔦ ᑳᔑ ᐊᔓᑕᒫᑫᓯᒃ᙮ 5 ᒦ ᓴ ᐊᐌ ᑫᔕᐌᓂᒥᑯᒡ ᑳᑎᐯᒋᑫᓂᒡ, ᒦ ᑲᔦ ᐊᐊᐌ ᑫᐃᑯᒡ ᑭᔐᒪᓂᑑᓐ ᑫᑰᓐ ᐁᔑ ᐊᓈᒣᑖᑯᓯᓯᒃ᙮ 6 ᒦᐗᒃ ᓴ ᐃᑭ ᑎᓄ ᐯᒫᑎᓯᐙᒡ ᑳᐱ ᓈᓯᑲᐙᐙᒡ ᑭᔐᒪᓂᑑᓐ, ᑳᐱᔖᐙᒡ ᐁᔑᐊᔮᓂᒡ ᒉᑲᐴᓐ Jacob ᐅᑭᔐᒪᓂᑑᒥᓂ᙮ 7 ᑕᑲ ᑭᒋ ᐃᔥᒀᑌᒪᓐ ᑕᒪᑲᑌ ᐹᑭᓂᑳᑌᐗᓐ, ᐃᓂ ᑲᔦ ᑫᑌ ᐃᔥᒀᑌᒪᓐ ᑕᐹᑭᓂᑳᑌᐗᓐ, ᒋᐲᑎᑫᒡ ᑳᑭᒋ ᐃᓀᑖᑯᓯᒡ ᑭᒋᐅᑭᒫ᙮ 8 ᐊᐌᓀᓐ ᑕᔥ ᐊᐊ ᑳᑭᒋ ᐃᓀᑖᑯᓯᒡ ᑭᒋᐅᑭᒫ? ᒦ ᓴ ᐊᐌ ᑳᑎᐯᒋᑫᒡ ᑳᓲᑭᓯᒡ, ᑳᒪᔅᑲᐌᑖᑯᓯᒡ ᑲᔦ, ᑳᑎᐯᒋᑫᒡ ᓴ ᑳᒪᔥᑲᐌᑖᑯᓯᒡ ᑮᒦᑳᓱᒡ᙮ 9 ᑕᑲ ᑭᒋ ᐃᔥᒀᑌᒪᓐ ᑕᒪᑲᑌ ᐹᑭᓂᑳᑌᐗᓐ, ᐃᓂ ᑲᔦ ᑫᑌ ᐃᔥᒀᑌᒪᓐ ᑕᐹᑭᓂᑳᑌᐗᓐ, ᒋᐲᑎᑫᒡ ᑳᑭᒋ ᐃᓀᑖᑯᓯᒡ ᑭᒋᐅᑭᒫ᙮ 10 ᐊᐌᓀᓐ ᑕᔥ ᐊᐊ ᑳᑭᒋ ᐃᓀᑖᑯᓯᒡ ᑭᒋᐅᑭᒫ? ᒦ ᓴ ᐊᐌ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ; ᒦ ᐅᔕᐊ ᑳᑭᒋ ᐃᓀᑖᑯᓯᒡ ᑭᒋᐅᑭᒫ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society