Neham 3 - ᐅᒋᐺ ᑭᒋᒪᓯᓇᐃᑲᓐ1 ᐃᐃ ᓴ ᑭᒋ ᐆᑌᓇ ᑳᔑ ᒨᔥᑭᓀᐙᒡ ᐅᑲᑮᓇᐎᔥᑲᒃ, ᐅᓂᔑᐌᒃ ᑲᔦ ᑕᓂᔑᐗᓈᒋᒋᑳᑌ᙮ ᐹᑏᓇᑦ ᐌᓅᑎᓯᐎᓐ ᒋᒫᒌᒋᑳᑌᒃ, ᒋᒪᑲᑎᓈᓂᐗᕽ ᑲᔦ᙮ 2 ᐃᓇᔥᑫ ᐊᑐᑕᒧᒃ ᐁᓂᑖᑾᒃ! ᐸᔕᔐᐃᑲᓐ ᑳᒎᐌᔮᐲᑭᓭᒃ! ᑳᑎᑎᐱᓭᐙᒡ ᒪᑗᔮᐱᑭᓭᐗᒃ! ᒥᑕᑎᒨᒃ ᒪᑗᑲᒥᑭᐸᑑᐗᒃ! ᒦᑳᓱᐎ ᐅᑖᐹᓈᑾᒃ ᐱᒬᐌᔮᐱᑭᔑᓅᒃ᙮ 3 ᔑᒫᑲᓂᔕᒃ ᐯᒥᐗᓀᐸᐃᑯᐙᒡ ᒨᑮᒋᑫᐗᒃ, ᐸᔑᐸᐃᑫᐎᑯᒫᓇᓐ, ᒌᐳᐌᐱᓂᑲᓇᓐ ᑲᔦ ᓵᓵᑳᑌᔮᐱᑭᓭᐗᓐ᙮ ᑳᓂᓯᑣ ᒪᑭ ᐅᑯᔑᓅᒃ᙮ ᐐᔭᐎᒫᓐ ᒥᓯᐌ ᐁᑕᑕᐌ ᐹᑏᓇᑎᓅᓐ᙮ ᔑᒫᑲᓂᔕᒃ ᐅᐱᓱᔥᑳᓈᐙᓐ ᐁᐹᐹᔑᑕᐊᒧᐙᒡ᙮ 4 ᓂᓂᐯ ᑭᒋ ᐆᑌᓇ ᐱᔑᒀᒋᑴᕽ ᐁᓀᑖᑾᒃ ᐃᓴ ᓂᔑᐗᓈᒋᒋᑳᑌ᙮ ᐐᑫ ᒥᓴᐎᓈᑯᓯ, ᐅᒥᓄᓈᑯᓯᐎᓐ ᐃᑕᔥ ᓂᐳᐎᓂᕽ ᐃᓀᑖᑾᓂᓂ᙮ ᐅᐱᔑᒀᒋ ᒥᓄᓈᑯᓯᐎᓐ, ᑲᔦ ᑕᔥ ᐅᒪᓂᑑᑫᐎᓐ ᐅᑖᐸᒋᑑᓇᓐ ᒋᒥᓴᐌᓂᒥᑯᒡ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ, ᒦᔥ ᑳᐅᒋ ᑲᔥᑭᐋᒡ ᒋᑎᐯᓂᒫᒡ᙮ 5 ᒦᔥ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᑭᑐᒡ, ᓂᓂᐯ, ᑭᐐ ᓇᓇᐊᓯᓐ᙮ ᑭᐐ ᑮᒋᑯᓇᔦᐱᓂᒃ ᐱᓵᓐ ᒋᐙᐸᒥᒀ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᒋᐊᑲᑌᑖᑯᓯᔭᓐ᙮ 6 ᑭᑲ ᐊᐸᑭᑕᐎᓐ ᓴ ᑳᒪᒋ ᐐᓀᑖᑾᒃ ᒋᓈᑯᑑᔮᓐ ᐁᐋᓇᐌᓂᒥᓈᓐ᙮ ᐯᒫᑎᓯᐙᒡ ᐃᑕᔥ ᑫᐙᐸᒥᒀ ᑭᑲ ᑲᒀᓂᓴᑫᓂᒥᑰᒃ᙮ 7 ᑲᑭᓇ ᐊᐎᔭᒃ ᑫᐙᐸᒥᒀ ᑕᑴᑮᐗᒃ ᒋᑲᒀᓂᓴᑫᑕᒧᐙᒡ᙮ ᒦᔥ ᑫᐃᑭᑐᐙᒡ, ᓂᓂᐯ ᓴ ᓂᔑᐗᓈᓯᓈᑾᓐ᙮ ᐊᐌᓀᓐ ᐃᑕᔥ ᐃᓈ ᑫᑰᐹᑌᓂᒥᑯᐸᓐ? ᐋᑎ ᑫᐅᑎᓇᒀᐸᓐ ᑫᑲᑴ ᒥᓉᑕᒥᐃᒀᐸᓐ᙮ 8 ᓂᓂᐯ ᒦ ᓇ ᑕᔥ ᐁᓀᓂᑎᓱᔭᓐ ᓇᐗᒡ ᑮᓐ ᐁᑭᒋ ᐃᓀᑖᑯᓯᔭᓐ ᐊᐲᒡ ᑏᐱᔅ Thebes ᑭᒋ ᐆᑌᓇ ᑳᓃᑳᓀᑖᑾᒃ ᐃᐃᒫ ᐄᒋᐸᑮᕽ Egypt᙮ ᑫᐐᓐ ᐄᑐᒃ ᐅᑮ ᐊᔮᓐ ᓰᐲᓂ ᐁᓈᑕᒫᑯᒡ ᑖᐱᔥᑰ ᐙᑳᔮᐱᑭᓂᑲᓐ ᑳᔑ ᓈᑕᒫᑫᒪᑲᒃ, ᓈᔭᓬ Nile ᓰᐱ ᐁᒋᑳᑌᓂᒃ᙮ 9 ᐃᐃ ᓴ ᑭᒋ ᐆᑌᓇ ᑏᐱᔅ ᐅᑮ ᑎᐯᑖᓇᓐ ᓱᑌᓐ Sudan, ᐃᐃ ᑲᔦ ᐄᒋᐸᑮᓂ᙮ ᐅᒪᔥᑲᐌᑖᑯᓯᐎᓐ ᑲᔦ ᑳᐐᓐ ᐐᑳ ᑕᐗᔦᒀᓭᓯᓂᓂ᙮ ᐃᐃ ᓴ ᓬᐃᐱᔭ Libya ᐊᑮᓂ ᐅᑮ ᐐᒌᐎᑰᓐ᙮ 10 ᔖᑰᒡ ᐃᑕᔥ ᐯᒫᑎᓯᐙᒡ ᐁᔮᐙᐸᓐ ᐃᐃᒫ ᑏᐱᔅ ᑭᒋ ᐆᑌᓈᕽ ᐙᓴ ᐸᑳᓐ ᐊᑮᕽ ᑮᐃᔑ ᒫᒌᒋᑲᓂᐎᐗᒃ ᑖᐱᔥᑰ ᑕᑯᓈᑲᓇᒃ᙮ ᐁᑕᓱ ᐸᐸᑫᒧᑭᓐ ᒦᑲᓇᐗᓐ ᑮᑕᔑ ᓇᓃᐗᓇᐙᐗᒃ ᐊᐱᓅᒌᔕᒃ᙮ ᐃᓂᓂᐗᒃ ᑳᑮ ᓃᑳᓀᑖᑯᓯᐙᐸᓐ ᑮᒫᒌᒋᑲᓂᐎᐗᒃ ᓴᑳᐹᓀᔮᐲᓐ ᐁᑮ ᑕᑯᐱᓱᐙᒡ, ᑮᐊᐸᑭᒋᑫᓈᓂᐗᓂᓂ ᑫᐅᒋ ᑭᑫᑖᑾᒃ ᑫᔑ ᒪᒫᑕᐅᑳᓂᑎᓈᓂᐎᐙᒡ᙮ 11 ᓂᓂᐯ, ᑫᑮᓐ ᐃᑕᔥ ᑭᑲ ᐸᑭᔑᓐ ᑖᐱᔥᑰ ᐅᑮᐗᔥᑴᐲ ᑳᔑ ᐸᑭᔑᕽ᙮ ᑭᑲ ᑲᑴ ᒫᒌᐸᐃᐙᓈᒃ ᑳᔒᑫᓂᒥᒀ ᐁᑲᑴ ᑳᓱᑕᐗᑣ᙮ 12 ᑲᑭᓇ ᓴ ᑳᓲᑭᒋᑳᑌᑭᓐ ᑭᑑᑌᓈᒥᐙᓐ ᑕᐃᔑᓈᑾᓅᓐ ᑖᐱᔥᑰ ᐱᒃ ᑎᓄᐙᑎᒃ fig ᑳᑮᔕᑎᑌᑭᓐ ᒦᓇᓐ᙮ ᐁᐗᑲᐎ ᐌᐱᓂᓐᒡ ᐊᐊ ᒥᑎᒃ, ᒦ ᐃ ᐁᔑ ᐸᑭᓯᑭᓐ ᒦᓇᓐ, ᐁᐲᒋᓭᑭᓐ ᐅᑯᓀᐎᒫᕽ᙮ 13 ᑭᔑᒫᑲᓂᔒᒪᒃ ᐃᓴ ᐃᑴᕽ ᐃᓀᑖᑯᓯᐗᒃ᙮ ᑭᑕᑮᒻ ᑲᔦ ᑳᐐᓐ ᑕᑲᔥᑭᒋᑳᑌᓯᓅᓐ ᒋᓈᑕᒫᑳᑌᒃ ᐊᐲ ᐐᒦᑳᓂᒀ ᑳᔒᑫᓂᒥᒀ᙮ ᑕᒑᑭᑌᐗᓐ ᑲᔦ ᑳᐅᒋ ᑭᐹᑯᓯᑭᓐ ᑭᑭᒋ ᐃᔥᒀᑌᒪᓐ᙮ 14 ᑮᔖᒡ ᐃᑕᔥ ᓈᑕᐃᐲᒃ ᒋᑮᔒᔦᒃ ᐊᐲ ᑳᔒᑫᓂᒥᓀᒀ ᐙᑳᔥᑲᒧᐙᒡ ᑭᑑᑌᓈᒥᐙ᙮ ᓲᑭᑑᒃ ᑭᐙᑳᔮᐱᑭᓂᑲᓂᐙ᙮ ᒫᒫᑯᔥᑲᐎᒃ ᑲᔦ ᐙᐱᑲᓐ ᒋᔑ ᐲᓇᐌᒃ ᒥᑎᑯᒪᑲᑯᕽ ᒋᐅᔑᐁᒀ ᑲᑲᑫᔮᐱᑲᓯᓃᒃ᙮ 15 ᔖᑰᒡ ᐃᑕᔥ ᐃᔥᑯᑌ ᑭᑲ ᓂᓯᑰᒻ ᒋᒑᑭᓱᔦᒃ, ᐸᔑᐸᐃᑫᐎᑯᒫᓂᕽ ᑲᔦ ᑭᑲ ᐅᒋ ᓂᓯᑰᒻ᙮ ᒦ ᓴ ᐃ ᑫᑑᑖᑰᔦᒃ ᑖᐱᔥᑰ ᑭᒋ ᐸᐸᑭᓀᒃ ᑳᓂᔑᐗᓈᒋᑑᐙᒡ ᐁᑭᑖᐙᒡ ᑫᑎᑳᑌᓂᑭᓐ᙮ ᑭᑮ ᐊᓂ ᐹᑏᓄᒻ ᐃᓴ ᑖᐱᔥᑰ ᑭᒋ ᐸᐸᑭᓀ ᑳᔑ ᐹᑏᓄᐙᒡ᙮ 16 ᑭᑮ ᐊᓂ ᐹᑏᓄᐋᐙᒃ ᐊᑖᐌᐎᓂᓂᐗᒃ ᑖᐱᔥᑰ ᑳᔑ ᐹᑏᓄᐙᒡ ᐗᓇᑯᔕᒃ ᐃᔥᐱᒥᕽ᙮ ᑳᐐᓐ ᐃᑕᔥ ᓅᑯᒻ ᐊᔮᓰᐗᒃ, ᑖᐱᔥᑰ ᑭᒋ ᐸᐸᑭᓀ ᑳᔑ ᑌᓯᓂᑸᓂᒡ ᐁᒫᒋᓭᒡ᙮ 17 ᐃᑭ ᓴ ᑭᔑᒫᑲᓂᔒᒥᐙᒃ ᒦ ᐃ ᐁᓀᑖᑯᓯᐙᒡ ᑖᐱᔥᑰ ᑭᒋ ᐸᐸᑭᓀᕽ ᐁᐊᑰᓯᐙᒡ ᐋᓴᒫᑎᒃ ᑮᑕᑳᔮᓂᒃ᙮ ᐊᐲ ᑕᔥ ᐁᐊᓂ ᓵᑳᑌᓂᒃ ᒦ ᐃ ᐁᔑ ᒫᒋᓭᐙᒡ᙮ ᑳᐐᓐ ᐃᑕᔥ ᒋᑭᑫᑖᑯᓯᐙᒡ ᐋᑎ ᐁᔮᐙᑴᓐ᙮ 18 ᑮᓐ ᐃᑕᔥ ᑫᒋᐅᑭᒫᐎᔭᓐ ᐃᐃᒫ ᐊᓰᕒᐃᔭ ᐊᑮᕽ, ᑭᑖᓂᑫᐎᑭᒫᒪᒃ ᐃᓴ ᓂᐳᐗᒃ᙮ ᑳᓃᑳᓀᑖᑯᓯᐙᒡ ᐯᒫᑎᓯᐙᒡ ᑲᔦ ᓀᐱᒋ ᓂᐹᐗᒃ᙮ ᑭᐱᒫᑎᓰᒪᒃ ᐃᓴ ᐃᔑ ᐅᓶ ᐊᔮᐗᒃ ᑭᒋ ᐗᒌᑳᕽ, ᑳᐐᓐ ᐃᑕᔥ ᐊᐎᔭᓐ ᐊᔮᓰᐗᓐ ᑫᐱᑮᐌᐎᓂᑯᐙᐸᓐ᙮ 19 ᑳᐐᓐ ᓴ ᑫᑰᓐ ᐊᔮᒪᑲᓯᓅᓐ ᑫᓈᑕᒫᑯᔭᐸᓐ ᐃᐃ ᑳᔑ ᐐᓴᑫᑕᒪᓐ᙮ ᐃᐃ ᑲᔦ ᑳᔑ ᒫᑭᐃᑰᔭᓐ ᑳᐐᓐ ᑭᑲ ᒥᓄᐊᔮᓰ᙮ ᑲᑭᓇ ᓴ ᐊᐎᔭᒃ ᑫᓅᑕᒧᐙᒡ ᐋᓃᓐ ᐁᔑ ᒫᔑᓭᔭᓐ ᑕᐸᐸᓯᓂᒌᐅᑎᓱᐗᒃ ᑫᐊᐲᒋ ᒌᑫᑕᒧᐙᒡ᙮ ᐊᐎᔭ ᓇ ᑕᔥ ᑮᔖᐾ ᑳᑮ ᐃᔑ ᓂᑖ ᑲᒀᓂᓴᑭᓯᔭᐸᓐ? |
Ojibwe Shorter Bible (Syllabic Script) © 2008 Canadian Bible Society
Canadian Bible Society