Neham 2 - ᐅᒋᐺ ᑭᒋᒪᓯᓇᐃᑲᓐᑮᔖᑰᒋᒋᑳᑌᒃ ᓂᓂᐯ 1 ᓂᓂᐯ ᐁᔮᔦᒃ, ᐋᔕ ᑭᐱ ᐊᑕ ᒪᐎᓀᐅᑰᒻ ᒣᔥᑲᐎᓰᐙᒡ ᑫᔖᑰᒋᐃᓀᒀ ᐋᔕ ᐱᑕᑯᔑᓅᒃ᙮ ᐊᔓ ᓈᑕᒫᓱᒃ ᒋᓃᐸᐎᐙᒡ ᔑᒫᑲᓂᔕᒃ ᐗᑭᒐᔭᐄ ᐙᑳᔮᐱᑭᓂᑲᓂᕽ᙮ ᒦᑲᓈᕽ ᑲᔦ ᐃᔑ ᐊᔕᐙᐱᒃ᙮ ᐊᔛᒃ ᒋᒦᑳᓱᔦᒃ᙮ 2 ᑳᑎᐯᒋᑫᒡ ᐅᔕ ᐅᐐ ᑑᑕᐙᐞ ᐃᔅᕒᐃᔭᓬᐊᐞ ᒋᑮᐌ ᑭᒋ ᐃᓀᑖᑯᓯᓂᒡ ᑳᑮ ᐃᔑᓈᑯᓯᓂᐸᓐ ᒋᑆ ᒪᑲᒥᒥᓐᒡ ᑲᑭᓇ ᑫᑰᓐ ᑳᑮ ᑎᐱᓇᐌᐎᓯᓂᐸᓐ, ᑲᑭᓇ ᑲᔦ ᑳᔑ ᑭᑎᑫᐙᐸᓐ ᐁᑮᓂᔑᐗᓈᒋᒋᑳᑌᓂᑭᓐ᙮ 3 ᐃᑭ ᔑᒫᑲᓂᔕᒃ ᑳᐱ ᐊᑕ ᒦᑳᓱᐙᒡ ᒥᔅᒀᓂᐗᓐ ᐅᓇᑳᐃᑲᓂᐙᓐ, ᒥᔅᑯᑯᓇᔦᐗᒃ ᑲᔦ᙮ ᐋᔕ ᑮᔒᐗᒃ᙮ ᐅᒦᑳᓱᐎ ᐅᑖᐹᓈᑯᐙᐞ ᐗᐙᓭᔮᐱᑭᓭᐗᐞ᙮ ᐅᒥᑕᑎᒨᒥᐙᐞ ᑲᔦ ᐅᒑᓂᒥᐸᓂᐅᐗᐞ᙮ 4 ᒦᑳᓱᐎ ᐅᑖᐹᓈᑾᒃ ᓴ ᐸᐹ ᑮᐗᔥᑴ ᐊᔮᔕᐎᓭᐗᒃ ᒦᑲᓈᑳᕽ, ᐁᐊᔮᔕᐎᓭᐙᒡ ᐃᐃᒫ ᐁᔑ ᑕᐙᓂᒃ ᐆᑌᓈᕽ᙮ ᒦ ᓴ ᐃ ᐁᔑᓈᑯᓯᐙᒡ ᑖᐱᔥᑰ ᐃᔥᑯᑌᕽ, ᐐᑫ ᐁᐸᐹᑭᔒᓭᐙᒡ ᑖᐱᔥᑰ ᑳᐙᐙᑌᓭᒃ᙮ 5 ᒦᑳᓱᐎᑭᒫᒃ ᐋᔕ ᑲᓅᒋᑲᓂᐎᐗᒃ ᒋᒦᑳᓱᐙᒡ, ᐱᓱᑫᔑᓄᐗᒃ ᐁᑳᒋᔥᑳᐙᒡ᙮ ᑲᔦ ᑭᔒᐸᐃᑎᐗᒃ ᐁᐊᐸᑑᐙᒡ ᐙᑳᔮᐱᑭᓂᑲᓂᕽ ᒦᔥ ᑲᔦ ᒋᐅᔑᑑᐙᒡ ᑫᔑ ᐋᑰᔑᒨᓄᐙᒡ ᐊᐲ ᐐᐋᐸᒋᐋᐙᒡ ᑭᒋ ᒥᑎᑰᓐ ᐐᐲᑯᐌᐸᐊᒧᐙᒡ ᐙᑳᔮᐱᑭᓂᑲᓐ᙮ 6 ᐃᓂ ᓴ ᑭᒋ ᐃᔥᒀᑌᒪᓐ ᓰᐱᕽ ᐃᓇᑫ ᐁᔮᑭᓐ ᐹᑭᓭᐗᓐ, ᑭᒋᐅᑭᒫᐎᑲᒥᒃ ᐃᓴ ᓂᔑᐗᓈᒋᒋᑳᑌ᙮ 7 ᐋᔕ ᐁᑮ ᐅᓇᒋᑳᑌᒃ ᐃᐃᒫ ᐆᑌᓈᕽ ᑳᐊᔮᐙᒡ ᒋᒫᒌᒋᑲᓂᐎᐙᒡ᙮ ᑳᐸᒦᑖᑫᐙᒡ ᑳᐃᑴᐎᐙᒡ ᓴ ᐅᒦᒦᓰᕽ ᐃᓂᑖᑯᓯᐗᒃ ᐁᒨᑴᑕᒧᐙᒡ, ᐁᐸᐸᑭᑌᐊᑭᑲᓀᐅᑎᓱᐙᒡ ᐁᒥᒌᓇᐌᓯᐙᒡ᙮ 8 ᑖᐱᔥᑰ ᓴ ᓂᐱ ᑳᒫᒌᒋᐗᓂᓭᒃ ᑮᐲᑯᓭᒃ ᑭᐸᐃᑲᓐ, ᒦ ᓴ ᐃ ᐁᔑᓈᑯᓯᐙᒡ ᐯᒫᑎᓯᐙᒡ ᐁᔮᐙᒡ ᓂᓂᐯ ᑭᒋ ᐆᑌᓈᕽ ᐁᒫᒌᐸᐃᐌᐙᒡ᙮ ᑭᐱᒌᒃ! ᑭᐱᒌᒃ! ᐃᔑ ᔖᔖᑯᐌᓈᓂᐗᓐ, ᑳᐐᓐ ᐃᑕᔥ ᐊᐎᔭ ᒋᐐ ᑭᐱᒌᒡ᙮ 9 ᒪᑲᑗᒃ ᐙᐹᐱᑯ ᔔᓂᔮ ᐙᐱᒃ! ᒪᑲᑗᒃ ᐅᓵᐎ ᔔᓂᔮ ᐙᐱᒃ! ᑳᐐᓐ ᑕᒑᑭᓭᓯᓅᓐ ᐁᐹᑏᓇᑎᕽ, ᐁᒨᔥᑭᓀᒃ ᑲᔦ ᐌᓅᑎᓯᐎᓐ ᐃᐃᒫ ᑭᒋ ᐆᑌᓈᕽ᙮ 10 ᒦ ᓴ ᐃ ᓂᓂᐯ ᐁᓂᔑᐗᓈᒋᒋᑳᑌᒃ, ᐁᒪᔕᔥᑯᓂᑳᑌᒃ, ᐋᐲᓐᒡ ᑫᑰᓐ ᐁᐊᔮᓯᓄᒃ᙮ ᐁᐲᒋ ᓭᑭᓯᓈᓂᐗᕽ ᐅᑌᐃᐙᕽ ᐃᔑ ᑲᐙᓂᒥᓯᐗᒃ, ᐅᑭᑎᑯᐙᐞ ᑲᔦ ᓂᓂᑭᐱᓱᐗᐞ, ᑫᔮᐱ ᐁᒪᔥᑲᐎᓰᓯᒀ ᑲᔦ ᑕᔥ ᐙᐱᓀᐎᓯᐗᒃ ᐁᐲᑖᓂᒥᓯᐙᒡ᙮ 11 ᐋᓃᑎ ᑕᔥ ᐃᐃ ᓅᑯᒻ ᓂᓂᐯ ᑭᒋ ᐆᑌᓇ ᒥᔑᐱᔑᐤ ᐅᐙᔑᕽ ᐁᓀᑖᑾᑭᐸᓐ? ᓀᑖ ᐃᔑ ᑕᔑ ᐊᔕᒥᑣᐸᓐ ᒥᔑᐱᔑᐌᓴᒃ? ᒥᔑᐱᔑᐤ, ᓅᔐ ᒥᔑᐱᔑᐤ ᑲᔦ ᓀᑖ ᐃᔖᐙᐸᓐ, ᐅᓃᒑᓂᓯᐙᐞ ᑲᔦ ᐁᑮ ᓇᓃᓵᓂᓯᓯᓂᒃ? 12 ᒥᔑᐱᔑᐤ ᓴ ᐅᓂᓵᓐ ᐊᔭᐋᐎᔕᓐ, ᒦᔥ ᐁᔑ ᐲᓯᐱᓈᒡ, ᐁᐊᐎ ᐊᔕᒫᒡ ᐅᐐᒌᐙᑲᓇᓐ, ᐅᓃᒑᓂᓴᐞ ᑲᔦ; ᐅᒨᔥᑭᓇᑑᓐ ᐅᐙᔥ ᐐᔮᓯᓂ ᑳᑮ ᐲᓯᐱᑑᒡ᙮ 13 ᒦᑕᔥ ᐅᐅ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᐁᑭᑐᒡ, ᓃᓐ ᐄᑐᒃ ᑭᑖᓍᐸᒥᓂᓂᒻ! ᓂᑲ ᒑᑭᔂᒃ ᑭᒦᑳᓱᐎ ᐅᑖᐹᓈᑯᐙᒃ ᒋᐹᔥᑭᓀᐙᒡ᙮ ᑭᔑᒫᑲᓂᔒᒥᐙᒃ ᑲᔦ ᑕᓂᓵᐗᒃ ᐁᑕᔑ ᒦᑳᑎᐎᓐᒡ᙮ ᓃᓐ ᑲᔦ ᑭᑲ ᒪᑲᒥᓂᓂᒻ ᑲᑭᓇ ᑫᑰᓐ ᑳᑮ ᒪᑲᒣᒀ ᐊᐎᔭᒃ᙮ ᐯᐹ ᐃᑭᑐᐙᒡ ᐅᒫᒌᔮᒋᒨᒃ ᓴ ᑳᐐᓐ ᑕᓅᑕᐙᓰᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society