ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 17 - ᐅᒋᐺ ᑭᒋᒪᓯᓇᐃᑲᓐᑯᐹᓯᓈᑯᓯ ᐊᐎᔭ ᑳᒪᒋᑑᑕᕽ (Matthew 18.6-7,21-22; Mark 9.42) 1 ᒦᑕᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᑫᑰᓇᓐ ᓴ ᑕᑕᑯᔑᓅᒪᑲᓅᓐ ᑫᐅᒋ ᒪᒋᑑᑕᒥᕽ᙮ ᐋᐱᒋ ᑕᔥ ᑕᑯᐹᓯᓈᑯᓯ ᐊᐊ ᐊᐎᔭ ᐐᓐ ᑳᐅᒋ ᐅᑎᔑᐌᒪᑲᓂᓂᑭᓐ᙮ 2 ᓇᐗᒡ ᐄᑐᒃ ᑖᐅᓂᔑᔑᓂᓂ ᑳᒥᒑᐱᑭᓯᓂᒡ ᐲᓯᐴᒋᑲᓇᓯᓃᓐ ᒋᑕᑯᐱᒋᑲᓂᐎᓂᐸᓐ ᐅᑴᑲᓂᕽ ᒋᓂᓵᐹᐗᒋᑲᓂᐎᐸᓐ ᐃᐃᒫ ᑳᔑ ᑮᔥᑳᔭᐙᓂᒃ ᑭᒋᑲᒦᕽ, ᐊᐲᒡ ᐐᓐ ᒋᐸᑭᔑᒫᐸᓐ ᐃᓂ ᑳᑌᐺᔦᓂᒥᒥᒡ᙮ 3 ᑲᓇᐌᓂᑎᓱᓐ ᑕᔥ ᐁᔑᒋᑫᔭᓐ᙮ ᑮᔥᐱᓐ ᑮᒋᑭᐌᓯ ᒪᒋᑑᑕᕽ, ᑭᑖ ᑲᓅᓈ ᐅᔕ, ᑮᔥᐱᓐ ᑕᔥ ᐐᐴᓂᑑᒡ ᐅᑎᔑᒋᑫᐎᓐ, ᑭᑲ ᐴᓀᑕᒪᐙ᙮ 4 ᑮᔥᐱᓐ ᑕᔥ ᒪᒋᑑᑕᐎᒃ ᓃᔣᒋᕽ ᐋᐱᑎᕽ ᐁᑮᔑᑲᓂᓂᒃ, ᓃᔣᒋᕽ ᑕᔥ ᐱᓈᓯᑲᐎᒃ ᐅᐅ ᐃᓂᒃ: ᑕᑲ ᐴᓀᑕᒪᐎᔑᓐ᙮ ᐱᓵᓐ ᓴ ᑭᑲ ᐴᓀᑕᒪᐙ᙮ ᑌᐺᔦᑕᒧᐎᓐ ᐁᑕᔑᑌᒃ 5 ᐃᔑᓂᔕᐙᑲᓇᒃ ᐅᑮᐃᓈᐙᓐ ᑳᑎᐯᒋᑫᓂᒡ: ᐐᒋᐃᔑᓈᒻ ᒋᒪᔥᑲᐎᓰᒪᑲᒃ ᓂᑌᐺᑕᒧᐎᓂᓈᓐ᙮ 6 ᑳᑎᐯᒋᑫᒡ ᑕᔥ ᑮᐃᔑ ᓇᑴᑕᒻ: ᑮᔥᐱᓐ ᐊᔮᔦᑭᐸᓐ ᑌᐺᐗᑫᑕᒧᐎᓐ ᑖᐱᔥᑰ ᐯᔑᑯᒥᓐ ᒫᐗᒡ ᑳᐊᑳᓯᕽ ᑭᑎᑳᓀᔅ ᑭᑖᐃᓈᐙ ᐗᐊᐌᑎ ᑭᒋ ᒥᑎᒃ: ᐸᑾᒋᒌᐱᑫᐱᓂᑎᓱᓐ ᐊᑕᐎ ᐸᑕᑭᓱᓐ ᑭᒋᑲᒦᕽ, ᑭᑕ ᓇᐃᑖᑯᐙ ᐅᔕ, ᐅᑮᐃᓈᐞ᙮ ᑾᔭᒃ ᐊᓄᑮᐋᑲᓐ ᑫᔑᒋᑫᐸᓐ 7 ᑳᓂᑲ ᐐᓐ ᑮᓇᐙ ᐯᔑᒃ ᐊᔮᐌᒃ ᐊᓄᑮᐋᑲᓐ ᐁᐅᒻᐺᑲᑲᒥᑭᐱᑑᒡ ᑭᑎᑫᐗᑮᓂ, ᑲᔦ ᑕᔥ ᐁᓇᓈᑲᒋᐋᒡ ᒫᓇᒑᓂᔕᐞ᙮ ᐊᐲ ᑕᔥ ᐁᐱ ᐅᒋ ᑕᑯᔑᕽ ᑭᑎᑫᐗᑲᒥᑯᕽ ᑭᑖᐃᓈ ᓇ: ᑕᑲ ᐌᔩᑉ ᑲᑭᑖᑕᐲᓐ ᒋᐐᓯᓂᔭᓐ? 8 ᑳᐐᓐ ᐃᐃᐌ ᑭᑎᔑᒋᑫᓰ᙮ ᓇᐗᒡ ᐅᐅᐌᓂ ᑭᑖᐃᓈ: ᑾᔮᒋᑕᒪᐎᔑᓐ ᑫᐅᓈᑯᔑ ᒦᒋᔮᓐ᙮ ᐱᓯᑲᓐ ᐋᑰᐱᓱᓐ ᒋᐸᒥᐃᔭᓐ ᐁᐐᓯᓂᔮᓐ, ᑲᔦ ᑕᔥ ᐁᒥᓂᑴᔮᓐ᙮ ᐹᓂᒫ ᑕᔥ ᐃᔥᒀ ᐐᓯᓂᔮᓐ, ᒦ ᑮᓐ ᐃᐃ ᐸᔦᔥ ᒋᐐᓯᓂᔭᓐ, ᑭᑲᐃᓈ᙮ 9 ᑳᐐᓐ ᐃᓇ ᑕᔥ ᒦᑴᒡ ᑖᐃᒋᑲᓂᐎᓰ ᐊᐊ ᐊᓄᑮᐋᑲᓐ ᐁᑮᐃᔑᒋᑫᒡ ᑳᑮᐃᔑ ᐊᓅᓂᓐᒡ? 10 ᒦᑕᔥ ᐯᔑᑾᓐ ᑫᑮᓇᐙ ᑫᐃᔑᒋᑫᔦᑭᐸᓐ᙮ ᐊᐲ ᑮᐃᔥᒀ ᐃᔑᒋᑫᔦᒃ ᑲᑭᓇ ᑳᑮᐃᑰᔦᒃ, ᒦ ᐃ ᑫᐃᑭᑐᔦᑭᐸᓐ: ᓃᓇᐎᓐᑦ ᓴ ᐱᑯ ᐊᓄᑮᐋᑲᓇᒃ ᓂᒥᒋ ᑎᓄᐎᒥᓐ, ᐁᑮᒥᒋ ᐃᔑᒋᑫᔮᕽ ᐁᑕ ᑫᑮᐃᓇᓄᑮᔮᑭᐸᓐ᙮ ᒥᑖᓱ ᑮᒥᓍᒋᐃᑣ ᑳᐅᒥᑮᐙᐱᓀᐙᒡ 11 ᒋᓴᔅ ᑕᔥ ᐁᐊᓂᐱᒥ ᐊᔮᒡ ᒉᕒᐆᓴᓬᐊᒥᕽ Jerusalem ᐁᐃᔖᒡ, ᓇᓴᐗᔭᐄ ᐃᓇᑫ ᑮᐊᓂ ᐃᔖ ᐁᔑ ᐊᔮᓂᒃ ᓴᒣᕒᐃᔭ Samaria ᐊᑭ, ᐃᐃ ᑲᔦ ᑳᓬᐊᓬᐄ Galilee ᐊᑭ᙮ 12 ᐋᔕ ᑕᔥ ᑫᑳ ᐁᐊᓂ ᐅᑎᑕᕽ ᐁᔑᑖᓂᐗᓂᓂᒃ, ᒥᑖᓱ ᐃᓂᓂᐗᐞ ᐌᒥᑮᐙᐱᓀᓂᒡ ᐅᑮᐱ ᐊᑕ ᓇᑭᔥᑳᑰᐞ᙮ ᐙᓴᔩᔥ ᐃᑯ ᑮᒪᑗ ᓃᐸᐎᐗᐞ᙮ 13 ᒦᑕᔥ ᑳᒪᑗᐃᑯᒡ: ᒋᓴᔅ ᐅᑭᑭᓄᐊᒫᑫ, ᑕᑲ ᑰᐹᓯᓇᐎᔑᓈᒻ! 14 ᒋᓴᔅ ᐁᐙᐸᒫᒡ ᒦ ᐃ ᑳᐃᓈᒡ: ᒫᒑᒃ, ᐊᑕ ᐙᐸᒥᒃ ᐊᓇᒥᐁᐎᑭᒫ ᒋᐊᑕ ᑭᑫᓂᒥᓀᒃ᙮ ᒣᒀ ᑕᔥ ᐁᐊᓂ ᐱᒥ ᐊᔮᐙᒡ, ᒦ ᐃ ᑳᑮ ᐯᑭᐃᑰᐎᓯᐙᒡ ᐁᔑ ᐅᒥᑮᐙᐱᓀᐙᐸᓐ᙮ 15 ᐯᔑᒃ ᐃᑕᔥ ᐊᐊ ᐁᐙᐸᑕᕽ ᐁᐯᑭᐃᑰᐎᓯᒡ, ᐅᑮᑮᐌ ᓈᓯᑲᐙᓐ ᒋᓴᓲᓐ, ᐁᑮᑭᔒᐌᒡ ᐁᓇᓈᑯᒫᒡ ᑭᔐᒪᓂᑑᓐ᙮ 16 ᐁᔑᓯᑌᑳᐸᐎᓂᒡ ᒋᓴᓲᓐ ᑮᐃᔑ ᐊᓂᒥᑯᐸᓂᐅ ᐁᑮᓇᓈᑯᒫᒡ᙮ ᐊᐊ ᓴ ᑕᔥ ᐃᓂᓂ ᓴᒣᕒᐃᔭ ᐊᑮᕽ ᑮᐅᒌ᙮ 17 ᒦᑕᔥ ᒋᓴᔅ ᑳᐃᑭᑐᒡ: ᒥᑖᓱ ᐅᔕ ᐃᓂᓂᐗᒃ ᑮᐯᑭᐃᑰᐎᓯᐗᒃ, ᐋᑎ ᑕᔥ ᐐᓐ ᐃᑭ ᑯᑕᒃ ᔖᑲᓱ? 18 ᐋᓃᓐ ᑕᔥ ᐐᓐ ᐁᑕ ᐗᐊ ᐸᑳᓐ ᐊᑮᕽ ᑳᐅᒌᒡ ᐌᒋ ᐱᑮᐌᒡ ᐁᐱ ᓇᓈᑯᒫᒡ ᑭᔐᒪᓂᑑᓐ? 19 ᒦᔥ ᑳᐃᓈᒡ ᐃᓂ ᐃᓂᓂᐗᓐ: ᐸᓯᑸᓐ ᒦ ᐃ ᐃᔑ ᒫᒑᓐ᙮ ᑭᑌᐺᐗᑫᑕᒧᐎᓐ ᑭᑮᒥᓍᒋᐃᑯᓐ, ᐅᑮᐃᓈᓐ᙮ ᑭᔐᒪᓂᑑ ᐅᑎᐯᒋᑫᐎᓐ ᑳᐐᐱ ᑕᑯᔑᓅᒪᑲᓂᓂᒃ (Matthew 24.23-28,37-41) 20 ᐋᓂᑕ ᐯᕒᐊᓰᒃ Pharisees ᐅᑮ ᑲᑴᒋᒫᐙᓐ ᒋᓴᓲᓐ ᐋᓇᐲ ᑫᐅᔑᓯᒋᑳᑌᓂᒃ ᑭᔐᒪᓂᑑ ᐅᑎᐯᒋᑫᐎᓐ᙮ ᐅᐅ ᑕᔥ ᒋᓴᔅ ᐅᑮᐃᓈᐞ: ᐊᐲ ᑭᔐᒪᓂᑑ ᐱᐅᔑᓯᑑᒡ ᐅᑎᐯᒋᑫᐎᓐ ᑳᐐᓐ ᐄᑐᒃ ᑕᓂᓯᑕᐎᓈᑯᓯᓂᓂ᙮ 21 ᑳᐐᓐ ᑲᔦ ᐊᐎᔭ ᑖᐃᑭᑐᓰ: ᐃᓇᔥᑫ, ᒦ ᐅᐌᓂ, ᑯᒫ ᑲᔦ ᐃᓇ ᐃᐌᓂ ᑭᔐᒪᓂᑑ ᐅᑎᐯᒋᑫᐎᓐ᙮ ᑭᔐᒪᓂᑑ ᐅᑎᐯᒋᑫᐎᓐ ᐅᔕ ᐊᔮᒪᑲᓐ ᑭᐱᒫᑎᓯᐎᐙᕽ᙮ 22 ᒦᑕᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᑕᐅᒋᒋᓭ ᐅᓴ ᑎᐸᐃᑲᓐ ᐊᐲ ᒋᒥᓴᐌᑕᒣᒃ ᒋᑮᐙᐸᑕᒣᑭᐸᓐ ᐯᔑᒃ ᐅᑮᔑᑲᓄᒻ ᐃᓂᓂ ᐅᑯᓯᓴᓐ, ᑳᐐᓐ ᑕᔥ ᑭᑲ ᐙᐸᑕᓰᒻ᙮ 23 ᑕᓂ ᐊᔮᐗᒃ ᑕᔥ ᐅᐅ ᑫᐃᓂᓀᒀ: ᐃᓇᔥᑫ ᐌᑎ ᐃᓈᐱᓐ᙮ ᐃᓇᔥᑫ ᐅᒫ ᐃᓈᐱᓐ᙮ ᑫᑯ ᑕᔥ ᐌᑎ ᐃᔖᑫᒃ ᒋᐊᐎ ᐃᓈᐱᔦᒃ᙮ 24 ᑖᐱᔥᑰ ᑳᔑ ᐙᑌᓭᒃ ᐌᑎ ᐃᔥᐱᒥᕽ, ᑴᑴᒃ ᐃᑕᔥ ᐃᓇᑫ ᐌᑎ ᐃᔥᐱᒥᕽ ᐁᐃᔑ ᒪᒥᔕᑮ ᐙᓭᔮᒃ, ᒦᓴ ᑫᐃᔑᓈᑾᓂᓂᒃ ᐊᐲ ᐱᑕᑯᔑᓂᓂᒡ ᐃᓂᓂ ᐅᑯᓯᓴᓐ᙮ 25 ᐱᓇᒫ ᑕᔥ ᓂᑕᒻ ᓃᐱᐗᐞ ᑕᔑ ᑲᒀᑕᑭᑑ, ᒋᐋᓇᐌᓂᒥᑯᒡ ᐯᒫᑎᓯᓂᒡ ᐅᐅ ᓅᑯᒻ ᑳᑮᔑᑲᓂᓂᒃ᙮ 26 ᐃᐃᐌᓴ ᑳᑮᐱ ᐊᔨᔑᓭᓂᒃ ᒣᒀ ᐊᐲ ᓅᐗ Noah ᑮᐱ ᐱᒫᑎᓯᒡ, ᒦᑕᔥ ᐯᔑᑾᓐ ᑫᐃᔑᓈᑾᓂᓂᒃ ᐃᓂᓂ ᐅᑯᓯᓴᓐ ᐅᑮᔑᑲᓄᒻ᙮ 27 ᐯᒫᑎᓯᐙᒡ ᑮᐐᓯᓂᐗᒃ, ᑮᒥᓂᑴᐗᒃ ᑲᔦ᙮ ᐃᓂᓂᐗᒃ, ᐃᑴᐗᒃ ᑲᔦ ᐁᑮᐙᐐᑎᑫᑎᐙᒡ ᐲᓂᔥ ᐊᐲ ᓅᐗ ᑳᑮ ᐴᓯᒡ ᑭᒋ ᒌᒫᓐ᙮ ᒦᑕᔥ ᑳᑮᓂᑭᐲᒃ ᒥᓯᐌ ᐊᑮᕽ ᑲᑭᓇ ᐯᒫᑎᓯᐙᒡ ᑮᓂᔑᐗᓈᑎᓯᐗᒃ᙮ 28 ᒦᑕᔥ ᐃᐃᐌ ᑫᐃᔑᓭᒃ ᑳᑮᐱ ᐃᔑᓭᒃ ᒣᒀ ᓬᐋᑦ Lot ᑮᐱᒫᑎᓯᒡ᙮ ᐯᒫᑎᓯᐙᒡ ᐄᑐᒃ ᑮᐐᓯᓂᐗᒃ, ᑮᒥᓂᑴᐗᒃ ᑲᔦ᙮ ᑮᐊᑖᐌᐗᒃ, ᑲᔦ ᑕᔥ ᑮᐊᑖᐙᑫᐗᒃ᙮ ᑮᑭᑎᑫᐗᒃ, ᑲᔦ ᑕᔥ ᑮᐙᑳᐃᑫᐗᒃ᙮ 29 ᐊᐲ ᑕᔥ ᐁᑮᔑᑲᓂᓂᒃ ᓬᐋᑦ ᐃᐃᒫ ᑮᐅᒋ ᒫᒑᒡ ᔂᑕᒻ Sodom ᐆᑌᓈᕽ, ᒦᔥ ᐃᔥᑯᑌ, ᐊᐊ ᑲᔦ ᐊᓯᓐ ᑳᐐᓴᑳᐸᓱᐌᒡ ᑳᑮᐅᒋ ᐸᑭᔑᕽ ᑮᔑᑯᕽ ᑲᑭᓇ ᐃᐃᒫ ᐁᔮᐙᒡ ᐁᑮᓂᓯᑯᐙᒡ᙮ 30 ᒦᑕᔥ ᐃᐃᐌ ᐯᔑᑾᓐ ᑫᐃᔑᓈᑾᒃ ᑮᔑᑲᒃ ᐊᐲ ᐃᓂᓂ ᐅᑯᓯᓴᓐ ᓈᑯᓯᓂᒡ᙮ 31 ᐊᐲ ᐃᐃ ᐃᔑ ᑮᔑᑲᒃ, ᐊᐎᔭ ᐗᑭᒋ ᐙᑳᐃᑲᓂᕽ ᑳ ᐊᔮᒡ ᑕᑲ ᑳᐐᓐ ᑕᐱ ᓃᓵᑕᐌᓰ ᐱᓇᒫ ᒋᐱ ᓈᓯᑲᕽ ᐅᑕᔭᐄᒪᓐ᙮ ᐊᐊ ᑲᔦ ᐌᑎ ᑳᐊᔮᒡ ᒥᔕᐗᑲᒥᒃ ᑳᐐᓐ ᑕᑮᐌᓰ ᒋᓈᓯᑲᕽ ᑫᑰᓐ᙮ 32 ᒫᒥᑴᓂᒥᒃ ᑳᑮᐃᔑᐌᐱᓯᓂᒡ ᓬᐋᑦ ᐐᐗᓐ᙮ 33 ᐊᐌᓀᓐ ᓴ ᐱᑯ ᑫᑲᑴ ᑭᒋᐎᓇᕽ ᐅᐱᒫᑎᓯᐎᓐ ᑳᐐᓐ ᐅᑲ ᐅᑎᓇᓰᓐ ᒋᐱᒫᑎᓯᒡ᙮ ᐊᐊ ᑕᔥ ᑲᔦ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ, ᒦ ᐊᐌ ᑫᐱᒫᑎᓯᒡ᙮ 34 ᒦᔥ ᐁᔑ ᐐᑕᒪᐎᓇᑰᒃ᙮ ᓃᔑᓐ ᐊᐎᔭᒃ ᑕᓂᐹᐗᒃ ᓂᐯᐎᓈᑯᕽ ᐁᑎᐱᑲᓂᓂᒃ᙮ ᐯᔑᒃ ᑕᐅᒋ ᐅᑖᐱᓈ, ᑯᑕᒃ ᐃᑕᔥ ᑕᓇᑲᓈ᙮ 35 ᓃᔑᓐ ᐃᑴᐗᒃ ᑕᐊᓄᑮᐗᒃ ᐁᐲᓯᐴᒋᑫᐙᒡ᙮ ᐯᔑᒃ ᑕᐅᒋ ᐅᑖᐱᓈ, ᐊᐊ ᑕᔥ ᑯᑕᒃ ᑕᓇᑲᓈ᙮ 36 [ᓃᔑᓐ ᓴ ᐃᓂᓂᐗᒃ ᑕᐊᔮᐗᒃ ᐃᔑᐯᔑᑾᓐ ᒥᔕᐗᑲᒥᒃ, ᐯᔑᒃ ᑕᐅᒋ ᐅᑖᐱᓈ, ᐊᐊ ᑕᔥ ᑯᑕᒃ ᑕᓇᑲᓈ᙮] 37 ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮᐃᔑ ᑲᑴᒋᒥᑰᐞ: ᑌᐯᒋᑫᔭᓐ, ᐋᓇᐲ ᐃᐃᐌ ᑫᐃᔑᓭᒃ? ᐅᐅ ᑕᔥ ᒋᓴᔅ ᑮᐃᔑᓇᑴᑕᒻ: ᐋᑎ ᓴ ᐱᑯ ᑫᔑᐊᑌᒃ ᑳᓂᐴᒪᑲᒃ ᒦᔭᐤ, ᒦ ᓴ ᐃᒫ ᑫᑕᔑ ᒫᐗᒋᐃᑎᐙᒡ ᐃᑭ ᒥᑕᔅᑭᑎᒀᓀᓯᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society