ᐅᓈᑯᓂᑫᒃ 9 - ᐅᒋᐺ ᑭᒋᒪᓯᓇᐃᑲᓐᐊᐱᒣᓬᐁᒃ ᐁᑕᔑᓱᒡ 1 ᐊᐱᒣᓬᐁᒃ Abimelech ᐃᑕᔥ ᑳᑮ ᐅᑌᑌᒡ ᒉᕒᐊᐯᔭᓬᐗᓐ Jerub-baal ᑮᐃᔖ ᔒᑲᒻ Shechem ᐆᑌᓈᕽ ᑳᑮ ᐃᔑᐊᔮᓂᒡ ᐅᒫᒫᓐ ᐅᑎᓇᐌᒫᑲᓂᓂ᙮ ᒦᑕᔥ ᑳᑮ ᑲᑲᓅᓈᒡ ᑲᑭᓇ ᐅᒫᒫᓐ ᐅᑎᓇᐌᒫᑲᓂᓂ ᐁᑮ ᐃᑭᑐᒡ, 2 ᐅᐅ ᓴ ᐃᓈᑫᒀᓂᒃ ᐃᑭ ᑲᑭᓇ ᑳᓃᑳᓂᓯᐙᒡ ᐅᐅᒫ ᔒᑲᒻ, ᐋᓃᓐ ᐃᐃ ᑫᐃᔑ ᐅᓂᔑᔑᑭᐸᓐ, ᑯᒫ ᓃᔣᓯᒥᑕᓇ 70 ᐃᓂᓂᐗᒃ ᑲᑭᓇ ᒉᕒᐊᐯᔭᓬ ᐅᑯᓯᓴᐞ ᒋᑎᐯᓂᒥᓀᒀᐸᓐ, ᑯᒫ ᑲᔦ ᐯᔑᒃ ᐁᑕ ᐃᓂᓂ ᒋᑎᐯᓂᒥᓀᑭᐸᓐ? ᒫᒥᑲᐎᒃ ᐃᑕᔥ ᑲᔦ ᓃᓐ ᐁᔑ ᐅᒥᔅᑸᒥᔦᒃ, ᐁᔑ ᐅᑲᓂᔦᒃ ᑲᔦ ᓃᓐ ᐁᐃᔑᐊᔮᔭᓐ, ᑮᐃᑭᑐ᙮ 3 ᐊᐲ ᑕᔥ ᐅᒫᒫᓐ ᐅᑎᓇᐌᒫᑲᓂᓂ ᑳᐐᑕᒪᐙᓂᒡ ᑲᑭᓇ ᑳᑮ ᐃᑭᑐᒡ ᐃᐃ ᔒᑲᒻ ᐁᔮᓂᒡ, ᒦ ᓴ ᐃ ᐊᐱᒣᓬᐁᒃ ᑳᐃᔑ ᐱᒥᓂᔕᐅᑯᒡ ᐅᐅ ᐁᑮ ᐃᑭᑐᓂᒡ, ᓂᑎᓇᐌᒫᑲᓂᓈᓐ ᐄᑐᒃ ᐊᐊ, ᑮᐃᑭᑐᐗᐞ᙮ 4 ᓃᔣᓯᒥᑕᓇ 70 ᑕᔥ ᐙᐹᐱᑯ ᔔᓂᔮᐞ ᑮᐅᒋ ᒦᓈ ᐁᔑ ᐊᓇᒥᐁᑕᐎᒥᓐᒡ ᐯᔭᓬ ᐲᕒᐃᑕᓐ Baal-berith᙮ ᒦᐗᓐ ᐃᑕᔥ ᐃᓂ ᔔᓂᔮᓐ ᐊᐱᒣᓬᐁᒃ ᑳᐋᐸᒋᐋᒡ ᐁᑮ ᐊᓄᑮᐋᒡ ᐃᓂᓂᐗᐞ ᑫᑰᓐ ᐁᓀᑖᑯᓯᓯᓂᒃ, ᑫᑰᓐ ᑲᔦ ᒣᓈᒋᑑᓯᓂᒃ᙮ ᒦᑕᔥ ᑳᐃᔑ ᐱᒥᓂᔕᐅᑯᒡ᙮ 5 ᒦᑕᔥ ᑳᐃᔑ ᐃᔖᒡ ᐅᐸᕒᐊ Ophrah ᐆᑌᓈᕽ ᐅᑌᑌᐸᓃᓐ ᑳᑮ ᐃᔑᑖᓂᐸᓐ᙮ ᒦᑕᔥ ᑳᐃᔑ ᓂᓵᒡ ᒉᕒᐊᐯᔭᓬᐗᓐ ᐅᑯᓯᓯᓂ ᓃᔣᓯᒥᑕᓇ 70 ᑳᑮ ᑕᔑᓂᒡ᙮ ᐯᔑᑾᔭᐄ ᑕᔥ ᐁᔑ ᐱᒀᐱᑳᓂᒃ ᐅᑮ ᑕᔑ ᓂᓵᐞ᙮ ᐃᓂ ᑕᔥ ᒫᐗᒡ ᐌᔒᒣᔑᒫᐎᓂᒡ ᒉᕒᐊᐯᔭᓬ ᐅᑯᓯᓴᓐ ᒎᑕᒻ Jotham ᐁᔑᓂᑳᓱᓂᒡ ᑮᑳᓱᐗᓐ, ᑳᐐᓐ ᐃᑕᔥ ᐃᓂ ᑮᓂᓵᓰᐗᓐ᙮ 6 ᑲᑭᓇ ᑕᔥ ᐃᐃ ᐃᓂᓂᐗᐞ ᔒᑲᒻ ᐌᒌᓂᒡ, ᐃᐃ ᑲᔦ ᑲᑭᓇ ᐯᑦᒥᓬᐆ Bethmillo ᑮᐅᑸᓄᐃᑎᐗᐞ ᐃᐃᒫ ᐁᔑ ᐸᑕᑭᓱᓂᒡ ᑫᑌᓂᒥᒥᓐᒡ ᐆᒃ ᑎᓄᐙᑎᑰᓐ, ᐁᑮ ᐃᔑᐋᐙᒡ ᐊᐱᒣᓬᐁᑰᓐ ᒋᑭᒋᐅᑭᒫᐎᓂᒡ᙮ 7 ᐊᐲ ᑕᔥ ᒎᑕᒻ Jotham ᑳᐱ ᐐᑕᒪᐎᓐᒡ ᐁᓇᑲᒥᑲᓂᓂᒃ, ᑮᐃᔖ ᓴ ᐗᑭᒋ ᐱᑾᑎᓈᕽ ᑮᕒᐋᐃᓯᒻ Gerizim ᐁᒋᑳᑌᓂᒃ᙮ ᒦᑕᔥ ᐅᐅ ᑳᐃᑭᑐᒡ ᐋᐱᒋ ᐁᓂᑯᒃ ᐁᑮ ᑮᑭᑐᒡ, ᐱᓯᑕᐎᔑᒃ, ᑮᓇᐙ ᐃᓂᓂᐗᒃ ᔒᑲᒻ ᐌᒌᔦᒃ, ᒦᔥ ᑭᔐᒪᓂᑑ ᒋᐱᓯᑕᐎᓀᒃ᙮ 8 ᐋᐱᑎᕽ ᓴ ᒥᑎᑰᒃ ᑮᒫᒑᐗᒃ ᐁᐐ ᐅᓈᐸᒫᐙᒡ ᑫᐅᑭᒫᑲᑖᑯᐙᒡ᙮ ᒦᔥ ᐄᓴᓐ ᐅᐅ ᑳᐃᓈᐙᒡ ᐋᓬᐃᑉ ᑎᓄᐙᑎᑰᓐ olive, ᑕᑲ ᑮᓐ ᐅᑭᒫᑲᑕᐎᔑᓈᒻ᙮ 9 ᐅᐅᔥ ᐄᓴᓐ ᐃᓂ ᐋᓬᐃᑉ ᑎᓄᐙᑎᑰᓐ ᐅᑮᐃᑯᐙᓐ, ᓂᑲ ᓇᑲᑖᓐ ᐃᓇ ᐃᑕᔥ ᐅᐅ ᐱᒥᑌᐙᐳ ᐌᒋ ᑭᑌᓂᒥᑣ ᒪᓂᑑᒃ, ᐃᓂᓂᐗᒃ ᑲᔦ, ᐌᑎ ᑕᔥ ᒋᐊᐎ ᑕᔑ ᑎᐯᓂᒪᒀᐸᓐ ᒥᑎᑰᒃ? 10 ᐃᑭ ᑕᔥ ᒥᑎᑰᒃ ᐅᑮᐃᓈᐙᓐ ᐄᓴᓐ ᐱᒃ ᑎᓄᐙᑎᑰᓐ figs, ᑕᑲ ᑮᓐ ᐲᔖᓐ ᒋᐱ ᐅᑭᒫᑲᑕᐎᔮᕽ! 11 ᐅᐅᔥ ᐄᓴᓐ ᐅᑮ ᐃᔑ ᓇᑴᑖᑯᐙᓐ ᐃᓂ ᐱᒃ ᑎᓄᐙᑎᑰᓐ, ᒋᓇᑲᑕᒫᓐ ᐃᓇ ᑕᔥ ᐃᓂ ᔒᐎᒥᓇᓐ, ᐌᓂᔑᔑᑭᓐ, ᑳᔒᐗᑭᓐ ᑲᔦ, ᐌᑎ ᑕᔥ ᒋᐊᐎ ᑕᔑ ᑎᐯᓂᒪᒀᐸᓐ ᒥᑎᑰᒃ? ᐅᑮᐃᑯᐙᓐ᙮ 12 ᐃᑭ ᑕᔥ ᒥᑎᑰᒃ ᐅᑮᐃᓈᐙᓐ ᐄᓴᓐ ᔔᒥᓈᑎᑰᓐ, ᑕᑲ ᑮᓐ ᐲᔖᓐ ᒋᐱ ᐅᑭᒫᑲᑕᐎᔮᕽ! 13 ᒦᔥ ᐄᓴᓐ ᐅᐅ ᐃᓇᑫ ᑳᐃᑯᐙᒡ ᔔᒥᓈᑎᑰᓐ, ᒋᓇᑲᑕᒫᓐ ᐃᓇ ᐃᑕᔥ ᓂᑑᔥᑭ ᔔᒥᓈᐴᒻ, ᒣᓄᒪᒋᐃᔥᑳᑯᐙᒡ ᒪᓂᑑᒃ, ᐃᓂᓂᐗᒃ ᑲᔦ, ᒋᐃᔖᔮᓐ ᐃᑕᔥ ᐌᑎ ᒋᐊᐎ ᑕᔑ ᑎᐯᓂᒪᒀᐸᓐ ᒥᑎᑰᒃ? ᐅᑮᐃᑯᐙᓐ᙮ 14 ᑫᑲᐲ ᑕᔥ ᑲᑭᓇ ᒥᑎᑰᒃ ᐅᑮᐃᓈᐙᓐ ᐄᓴᓐ ᐃᓂ ᑳᐎᒥᓇᑲᔒᐙᑎᑰᓐ, ᑕᑲ ᑮᓐ ᐲᔖᓐ ᒋᐱ ᐅᑭᒫᑲᑕᐎᔮᕽ! ᐅᑮᐃᓈᐙᓐ᙮ 15 ᒦᔥ ᐄᓴᓐ ᐅᐅ ᑳᐃᑯᐙᒡ, ᑮᔥᐱᓐ ᓴ ᑌᐺ ᐅᓈᐸᒥᔦᒃ ᒋᐅᑭᒫᑲᑕᐎᓇᑰᒃ, ᐲᔖᒃ ᓴ ᐅᐅ ᒋᐊᑲᐙᑌᔑᒨᓄᔦᒃ ᐁᔑ ᐊᑲᐙᑌᔥᑭᑫᔮᓐ᙮ ᑮᔥᐱᓐ ᐃᑕᔥ ᐐᓐ ᐃᐃ ᐃᔑᒋᑫᓯᐌᒃ, ᑕᑲ ᓴ ᐃᔥᑯᑌ ᑕᐅᒋᓭ ᐅᐅᒫ ᑳᐎᒥᓇᑲᔒᐙᑎᑯᕽ ᒋᐊᒀᑭᓱᐙᒡ ᑲᑭᓇ ᑮᔥᑳᑎᑰᒃ ᐁᔮᐙᒡ ᓬᐁᐸᓇᓐ Lebanon ᐊᑮᕽ, ᐅᑮᐃᑯᐙᓐ᙮ 16 ᑌᐺ ᓇ ᑕᔥ ᑾᔭᒃ ᑭᑮ ᐃᔑᒋᑫᒻ ᑮᑭᒋᐅᑭᒫᐎᐁᒃ ᐊᐱᒣᓬᐁᒃ? ᑳᐐᓐ ᐃᓇ ᑭᑭᑌᓂᒫᓯᐙᐙ ᒉᕒᐊᐯᔭᓬ, ᐃᐃ ᑲᔦ ᐅᑖᐎᓂᕽ ᐌᒌᓂᒡ, ᒋᑮ ᑑᑕᐌᑭᐸᓐ ᐋᓃᓐ ᐃᓇᑫ ᑳᑮ ᐃᔑ ᐐᑑᑲᐎᓀᒃ? 17 ᒫᒥᑲᐎᒃ, ᓂᑌᑌᐸᓐ ᐄᑐᒃ ᑭᑮ ᒦᑳᓱᑕᒫᑯᐙ, ᐅᑮ ᓇᓃᓵᓂᑑᓐ ᑲᔦ ᐅᐱᒫᑎᓯᐎᓐ, ᑭᑮ ᐅᒋ ᔖᐾᐃᑯᐙ ᑲᔦ ᐅᒋ ᑳᑮ ᓂᑖ ᒦᑳᓂᒥᓀᒃ ᒥᑎᔭᓐ ᑳᑎᓄᐎᓂᒡ᙮ 18 ᓅᑯᒻ ᐃᑕᔥ ᑳᑮᔑᑲᒃ ᑭᑎᔑᒋᑫᒻ ᐁᒦᑳᑕᒧᐌᒃ ᓂᑌᑌᐸᓐ ᐅᑖᐎᓐ, ᐁᑮ ᓂᓯᒣᒃ ᓃᔣᓯᒥᑕᓇ 70 ᐅᑯᓯᓴᐞ ᐃᐃᒫ ᐯᔑᑾᔭᐄ ᐁᔑ ᐱᒀᐱᑳᒃ᙮ ᐊᐱᒣᓬᐁᒃ ᐃᑕᔥ ᐌᑯᓯᓯᒥᑯᒡ ᐸᒦᑖᑲᓂᐎᑴᐗᓐ, ᒦ ᐊᐌ ᑳᐃᔑᐁᒃ ᒋᐅᑭᒫᑲᑕᐙᒡ ᐃᓂᓂᐗᐞ ᔒᑲᒻ Shechem ᐌᒌᓂᒡ, ᐋᓃᔥ ᑭᑎᓇᐌᒫᑲᓂᐙ ᐊᐊ᙮ 19 ᑮᔥᐱᓐ ᐃᑕᔥ ᓅᑯᒻ ᑳᑮᔑᑲᓂᓂᒃ ᑌᐺ, ᑾᔭᒃ ᑲᔦ ᑳᑑᑕᐙᐌᑴᓐ ᒉᕒᐊᐯᔭᓬ, ᐃᐃ ᑲᔦ ᐅᑖᐎᓂᕽ ᐌᒌᓂᒡ, ᓇᐁᓂᒥᒃ ᐃᑕᔥ ᐊᐱᒣᓬᐁᒃ, ᑫᐐᓐ ᐃᑕᔥ ᑭᑲ ᓇᐁᓂᒥᑯᐙ᙮ 20 ᑮᔥᐱᓐ ᐃᑕᔥ ᐃᐃ ᐃᔑᓭᓯᓄᒃ, ᑕᑲ ᓴ ᐃᔥᑯᑌ ᑕᐅᒋᓭ ᐊᐱᒣᓬᐁᑯᕽ ᒋᐊᒀᑭᓱᑯᐙᒡ ᐌᒌᐙᒡ ᐃᐃᒫ ᔒᑲᒻ ᐆᑌᓈᕽ, ᐃᐃᒫ ᑲᔦ ᐯᑦᒥᓬᐆ ᐌᒌᐗᒡ᙮ ᐃᐃᒫᔥ ᑲᔦ ᒣᔥᑾᒡ ᐃᔥᑯᑌ ᑕᐅᒋᓭ ᐃᓂᓃᕽ ᐌᒌᐙᒡ ᔒᑲᒥᕽ, ᑲᔦ ᐃᐃᒫ ᐃᓂᓃᕽ ᐌᒌᐙᒡ ᐯᑦᒥᓬᐆ ᒋᐊᒀᑭᓱᑯᒡ ᐊᐱᒣᓬᐁᒃ, ᑮᐃᑭᑐ᙮ 21 ᒦᑕᔥ ᒎᑕᒻ ᑳᐃᔑ ᑕᐸᓰᒡ ᐁᑮ ᒫᒌᐸᐃᐌᒡ᙮ ᐌᑎ ᑕᔥ ᐊᔮᐎᓂᕽ ᐲᔭᕒ ᐁᒋᑳᑌᓂᒃ ᑮᐃᔖ, ᒦᔥ ᐌᑎ ᑳᐊᔭᔮᒡ ᐋᓃᔥ ᐅᑮ ᑯᓵᓐ ᐐᒋᑭᐌᔭᓐ ᐊᐱᒣᓬᐁᑰᓐ᙮ 22 ᓂᓱᐱᐴᓐ ᐃᑕᔥ ᐊᐱᒣᓬᐁᒃ ᐅᑮ ᐅᑭᒫᑲᑖᓐ ᐃᔅᕒᐃᔭᓬᐊᑮᓂ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society