ᐅᓈᑯᓂᑫᒃ 8 - ᐅᒋᐺ ᑭᒋᒪᓯᓇᐃᑲᓐᒥᑎᔭᓐ ᑳᑎᓄᐎᐙᒡ ᑮᔖᑰᒋᐃᑣ 1 ᐃᐃ ᑕᔥ ᐃᓂᓂᐗᐞ ᐄᐸᕒᐃᔭᒻ Ephraim ᐌᒌᓂᒡ ᐅᑮ ᐱᐃᑰᐞ ᑮᑎᔭᓐ Gideon, ᐋᓃᓐ ᐃᑕᔥ ᑳᑑᑕᐎᔮᕽ ᐃᐃ ᑳᑮ ᐃᔑᒋᑫᔭᓐ ᐁᑮ ᑲᓅᔑᓯᐙᕽ ᑮᐊᑕ ᒦᑳᓀᒀ ᒥᑎᔭᓐ Midianites ᑳᑎᓄᐎᐙᒡ? ᐐᑫ ᐅᑮ ᐅᒋ ᒥᑯᔥᑳᓱᒥᑰᐞ ᐅᐅ ᐅᒋ᙮ 2 ᒦᔥ ᐅᐅ ᑳᐃᔑ ᓇᑴᑕᐙᒡ, ᐋᓃᓐ ᐃᑕᔥ ᓃᓐ ᐊᐗᔑᒣ ᑳᐃᔑᒋᑫᔮᓐ ᐊᐲᒡ ᑮᓇᐙ? ᑮᓇᐙ ᐃᓂᓂᐗᒃ ᐄᐸᕒᐃᔭᒻ ᐌᒌᔦᒃ, ᐃᐃ ᓴ ᐸᑮ ᐁᔑᒋᑫᔦᒃ ᓇᐗᒡ ᓃᐱᐗᐞ ᐃᓇᑭᑌ ᐊᐲᒡ ᓃᓇᐎᓐᑦ ᑳᑮ ᐃᔑᒋᑫᔮᕽ᙮ 3 ᑭᔐᒪᓂᑑ ᐄᑐᒃ ᑭᑮ ᒦᓂᑯᐙ ᐅᓃᑳᓂᓰᐞ ᐅᕒᐁᐴᓐ Oreb, ᐃᓂ ᑲᔦ ᓰᐁᐴᓐ Zeeb ᐌᒌᓂᒡ ᒥᑎᔭᓐ ᐊᑮᕽ ᒋᓂᓯᒣᒃ! ᐋᓃᓐ ᐃᑕᔥ ᑫᔑ ᑲᔥᑭᑑᔮᐹᓐ ᐊᐗᔑᒣᐃ ᒋᑮ ᐃᔑᒋᑫᔮᐹᓐ? ᐅᑮ ᐃᓈᐞ᙮ ᒦᑕᔥ ᑳᐃᔑ ᐴᓂᓇᐌᓯᓂᒡ ᐅᐅ ᐁᑮᐃᓈᒡ᙮ 4 ᑮᑎᔭᓐ ᓴ ᑕᔥ, ᐃᐃ ᑲᔦ ᓃᔣᒃ ᐃᓂᓂᐗᐞ ᑳᑮ ᐐᒌᐎᑯᒡ ᑮᐱ ᑕᑯᔑᓅᒃ ᒞᕒᑕᓐ Jordan ᓰᐱᕽ ᐁᑮ ᐋᔕᐎᔥᑳᐙᒡ, ᐁᑮ ᐊᔦᑯᓯᐙᒡ, ᔖᑰᒡ ᐃᑕᔥ ᑮᐱᒥᓂᔕᐃᑫᐗᒃ᙮ 5 ᐃᐃᒫ ᑕᔥ ᓴᑲᑦ Succoth ᐊᔮᐎᓂᕽ ᑮᐃᔑ ᑕᑯᔑᓅᒃ᙮ ᒦᑕᔥ ᑳᐃᓈᒡ ᐃᐃ ᐃᓂᓂᐗᐞ ᐃᐃᒫ ᐁᔮᓂᒡ, ᑕᑲ ᐊᔕᒥᑾᒃ ᓂᑎᓂᓃᒪᒃ ᐸᑴᔑᑲᓇᓐ᙮ ᐐᑫ ᐅᔕ ᒑᑮᐗᒃ᙮ ᑫᔮᐱ ᐅᔕ ᓂᐱᒥᓂᔕᐙᒃ ᒥᑎᔭᓐ ᐅᒋ ᑭᒋᐅᑭᒫᒃ ᓰᐸ Zebah ᐁᔑᓂᑳᓱᒡ, ᐊᐊ ᑲᔦ ᓵᓬᒥᔫᓇ Zalmunna ᐁᔑᓂᑳᓱᒡ᙮ 6 ᐃᐃ ᑕᔥ ᐅᓃᑳᓂᓰᐞ ᓴᑲᑦ Succoth ᐊᔮᓂᒡ ᐅᐅ ᐅᑮᐃᑰᐞ, ᑳᐐᓐ ᐄᑐᒃ ᒪᔑ ᑭᑳᒋᑎᓈᓯᐙᐙ ᓰᐸ, ᐊᐊ ᑲᔦ ᓵᓬᒥᔫᓇ, ᐌᑯᓀᓐ ᐃᑕᔥ ᑫᐅᒋ ᐊᔕᒪᑭᑣᐸᓐ ᑭᔑᒫᑲᓂᔒᒪᒃ? ᐅᑮᐃᑰᐞ᙮ 7 ᒦᔥ ᑮᑎᔭᓐ ᑳᐃᔑ ᓇᑴᑕᐙᒡ, ᐊᐤ, ᐊᐲ ᓴ ᑕᔥ ᑳᑎᐯᒋᑫᒡ ᐃᔑ ᒦᔑᒡ ᒋᐊᑎᒥᒪᒃ ᓰᐸᐗᓐ, ᓵᓬᒥᔫᓇᐗᓐ ᑲᔦ, ᒦᑕᔥ ᐊᐲ ᒋᐸᐸᑭᑌᐅᓇᑰᒃ ᑭᐐᔭᐎᐙᕽ ᒋᐋᐸᒋᑑᔮᓐ ᐅᑳᐎᒥᓇᑲᔒᐙᑎᑰᓐ, ᑳᔑᓰᓐ ᑲᔦ ᑳᓂᑖᐎᑭᑭᓐ ᐱᑾᑕᑲᒥᒃ, ᐅᑮ ᐃᓈᐞ᙮ 8 ᒦᑕᔥ ᐃᐃᒫ ᑳᐅᒋ ᒫᒑᒡ ᐌᑎ ᐁᑮ ᐃᔖᒡ ᐯᓄᐌᓬ Penuel ᐁᒋᑳᑌᓂᒃ᙮ ᒦᑕᔥ ᐯᔑᑾᓐ ᑳᐃᑭᑐᒡ᙮ ᐃᐃ ᑕᔥ ᐃᓂᓂᐗᐞ ᐯᓄᐌᓬ ᐌᒌᓂᒡ ᒦᐯᔑᑾᓐ ᑳᑮᐃᑯᒡ ᑖᐱᔥᑰ ᑳᑮᐃᑯᒡ ᐃᓂᓂᐗᐞ ᓴᑲᑦ ᐌᒌᓂᒡ᙮ 9 ᒦᔥ ᐅᐅ ᑳᐃᔑ ᓇᑴᑕᐙᒡ ᐃᐃ ᐃᓂᓂᐗᐞ ᐯᓄᐌᓬ ᐌᒌᓂᒡ, ᐊᐲ ᓴ ᐱᑮᐌᔮᓐ ᑮᔖᐾᔮᓐ, ᓂᑲ ᐲᑯᐱᑑᓐ ᓴ ᐅᐅ ᐅᓵᐱᐎᓐ, ᐅᑮ ᐃᓈᐞ᙮ 10 ᐃᓂ ᑕᔥ ᓰᐸᐗᓐ, ᐃᓂ ᑲᔦ ᓵᓬᒥᔫᓇᐗᓐ ᑮᐊᔮᐗᐞ ᐌᑎ ᑳᕒᑲᕒ Karkor ᐊᔮᐎᓂᕽ᙮ ᐅᔑᒫᑲᓂᔒᒥᓂ ᓴ ᒥᑖᔑᓈᓂᕽ ᒥᑖᔣᒃ 15,000 ᑳᑮ ᐃᔥᑯᐃᒥᓐᒡ ᒫᒪᐎᑯ ᑮᑕᔑᐗᐞ ᐃᐃ ᑲᔦ ᑯᑕᒃ ᐃᓂᓂᐗᐞ ᐙᐸᓄᕽ ᑳᑮ ᐅᒌᓂᒡ᙮ ᓂᑯᒋ ᑯ ᒫᒪᐤ ᓂᑯᑣᒃ ᓃᔥᑕᓇ ᒥᑖᔂᒃ 120,000 ᓴ ᑮᓂᓵᑲᓂᐎᐗᐞ ᐅᔑᒫᑲᓂᔒᒥᐙᐞ ᐃᐃ ᐁᑮᔑᑲᓂᓂᒃ᙮ 11 ᑮᑎᔭᓐ ᐃᑕᔥ ᐌᑎ ᓇᑫ ᑮᐊᓂ ᐃᔖ ᒌᑳᑯᐎᔭᐄ ᑳᐃᔑ ᐸᔥᑾᑖᐗᑳᓂᒃ ᐙᐸᓄᕽ ᐃᓇᑫ ᐁᔑᐊᔮᓂᒃ ᐊᔮᐎᓇᓐ ᓅᐸ Nopah, ᐃᐃ ᑲᔦ ᒞᒃᐲᐊ Jogbehah, ᒦᑕᔥ ᐐᑫ ᑳᑮ ᑫᑕᑐᐎᓈᒡ ᐃᐃ ᔑᒫᑲᓂᔕᐞ ᐁᒦᑳᓈᒡ᙮ 12 ᐊᐲ ᓴ ᐁᒫᒌᐸᐃᐌᓂᒡ ᓰᐸᐗᓐ, ᐃᓂ ᑲᔦ ᓵᓬᒥᔫᓇᐗᓐ, ᐅᑮ ᐱᒥᓂᔕᐙᐞ᙮ ᒦᑕᔥ ᑳᑮ ᑳᒋᑎᓈᒡ ᐃᐃ ᓃᔑᓐ ᒥᑎᔭᓐ ᐅᒋ ᑭᒋᐅᑭᒫᐞ, ᐁᑮ ᐗᐙᓀᑕᒫᓂᒥᐋᒡ ᑲᔦ ᑲᑭᓇ ᐅᔑᒫᑲᓂᔒᒥᓂ᙮ 13 ᒦᑕᔥ ᑮᑎᔭᓐ ᑳᑮ ᐅᑌᑌᒡ ᒎᐊᔕᓐ Joash ᐁᐱᑮᐌᒡ ᐁᑮ ᐃᔥᒀ ᒦᑳᓱᒡ, ᐌᑎ ᓇᑫ ᐃᔖᐎᓂᕽ ᐁᕒᐊᔅ Heres ᐁᒋᑳᑌᓂᒃ ᑮᐲᐃᔖ᙮ 14 ᒦᑕᔥ ᑳᑮ ᑳᒋᑎᓈᒡ ᐅᔥᑭᓃᑭᐗᓐ ᓴᑲᑦ ᐌᒌᓂᒡ, ᒦᔥ ᑳᐃᔑ ᑲᑴᒋᒫᒡ ᒋᐐᑕᒫᑯᒡ ᑫᑰᓂᓂ᙮ ᒦᔥ ᐃᓂ ᐅᔥᑭᓃᑭᐗᓐ ᑳᐃᔑ ᐅᔑᐲᐊᒥᓂᒡ ᐁᔑᓂᑳᓱᓂᒡ ᐃᐃ ᐅᓃᑳᓂᓰᐞ ᐃᐃᒫ ᓴᑲᑦ ᑳᑮ ᐊᔮᓂᒡ ᓃᔣᓯᒥᑕᓇᔑᓃᔣᓱ 77 ᑳᑮ ᑕᔑᓂᒡ᙮ 15 ᑮᑎᔭᓐ ᓴ ᑕᔥ ᑮᐃᔖ ᓴᑲᑦ, ᒦᔥ ᐅᐅ ᑳᐃᓈᒡ ᐃᐃ ᐃᓂᓂᐗᐞ, ᐃᓇᔥᑫ ᐙᐸᒥᒃ ᓰᐸ ᐊᐊ ᑲᔦ ᓵᓬᒥᔫᓇ, ᒦ ᐄᑐᒃ ᑳᑮᐃᔑᔦᑭᐸᓐ ᐁᒫᓀᓂᒥᔦᒃ, ᑳᐐᓐ ᐄᑐᒃ ᒪᔑ ᑭᑳᒋᑎᓈᓯᐙᐙ ᓰᐸ ᐊᐊ ᑲᔦ ᓵᓬᒥᔫᓇ, ᐌᑯᓀᓐ ᐃᑕᔥ ᑫᐅᒋ ᐊᔕᒪᑭᑣᐸᓐ ᑭᔑᒫᑲᓂᔒᒪᒃ? ᑮᐃᑭᑐ᙮ 16 ᒦᑕᔥ ᑳᐃᔑ ᐅᑖᐱᓈᒡ ᐅᓃᑳᓂᓰᐞ ᐃᐃᒫ ᐆᑌᓈᕽ, ᐁᑮ ᐸᐸᔕᔐᐙᒡ ᐁᐋᐸᒋᑑᒡ ᐅᑳᐎᒥᓇᑲᔒᐙᑎᑰᓐ, ᑳᔑᓰᓐ ᑲᔦ ᐱᑾᑕᑲᒥᒃ ᑳᑮ ᐅᑎᓇᕽ᙮ 17 ᐅᑮ ᐲᑯᐱᑑᓐ ᐃᑕᔥ ᑲᔦ ᐅᓵᐱᐎᓐ ᐯᓄᐌᓬ Penuel ᑳᑮ ᐊᔮᓂᒃ, ᑲᑭᓇ ᑲᔦ ᐃᓂᓂᐗᐞ ᐅᑮ ᓂᓵᐞ ᐃᐃᒫ ᐆᑌᓈᕽ᙮ 18 ᒦᔥ ᑮᑎᔭᓐ ᑳᑮ ᑲᑴᒋᒫᒡ ᓰᐸᐗᓐ Zebah ᐃᓂ ᑲᔦ ᓵᓬᒥᔫᓇᐗᓐ ᐁᑮᐃᓈᒡ, ᐊᐌᓀᓇᒃ ᑎᓄ ᐃᓂᓂᐗᒃ ᑳᑮ ᓂᓭᒀ ᐌᑎ ᑌᐳᕒ Tabor ᐗᒌᕽ? ᐅᑮ ᐃᓈᐞ᙮ ᒦᔥ ᑳᐃᑯᒡ, ᑮᓐ ᑎᓄ ᑖᐱᔥᑰ, ᑮᐃᔑᓈᑯᓯᐗᒃ ᑭᒋᐅᑭᒫᓐ ᐁᐅᑯᓯᓯᒥᑯᐙᒡ, ᐅᑮᐃᑰᐞ᙮ 19 ᒦᔥ ᑮᑎᔭᓐ ᑳᐃᑭᑐᒡ, ᒦᐗᒃ ᓴ ᐃᑭ ᓃᓐ ᓃᒋᑭᐌᔭᒃ, ᓂᒫᒫ ᐅᑯᓯᓴᐞ᙮ ᑫᒋᓈᒡ ᐃᑯ ᐁᑌᐺᔮᓐ ᐅᐅ ᑳᐃᑭᑐᔮᓐ, ᑮᔥᐱᓐ ᐸᑭᑎᓀᒀᐸᓐ ᒋᑮ ᐱᒫᑎᓯᐙᐸᓐ, ᑳᐐᓐ ᓴ ᑭᑖᑮ ᓂᓯᓯᓅᓂᓂᒻ, ᐅᑮ ᐃᓈᐞ᙮ 20 ᒫᐗᒡ ᐃᑕᔥ ᓭᓰᑭᓯᓂᒡ ᐅᑯᓯᓴᓐ ᒌᑕᕒ Jether ᐁᔑᓂᑳᓱᓂᒡ ᐅᑮᐃᓈᓐ, ᐸᓯᑸᓐ, ᑮᓐ ᓂᔑ, ᐅᑮᐃᓈᓐ᙮ ᑳᐐᓐ ᐃᑕᔥ ᐃᓂ ᐅᔥᑭᓃᑭᐗᓐ ᐅᑮ ᑭᑎᓇᓰᓂ ᐸᔑᐸᐃᑫᐎᑯᒫᓐ, ᐋᓃᔥ ᑮᔖᑴᓂᒧᐗᓐ ᐅᓵᒻ ᐁᑮ ᑸᐎᓭᓯᐙᑎᓯᓂᒡ᙮ 21 ᒦᔥ ᓰᐸᐗᓐ ᐃᓂ ᑲᔦ ᓵᓬᒥᔫᓇᐗᓐ ᑳᐃᑯᒡ, ᐃᓇᔥᑫ ᑮᓐ ᐸᓯᑸᓐ ᒋᓂᔑᔮᕽ, ᐃᓂᓂ ᓴ ᐃᔑᒋᑫ ᐁᐲᑌᑖᑯᓯᒡ, ᐅᑮᐃᑰᐞ᙮ ᒦᑕᔥ ᑮᑎᔭᓐ ᑳᐃᔑ ᐸᓯᑸᒡ ᐁᑮ ᓂᓵᒡ, ᐁᑮ ᐅᑖᐱᓇᕽ ᑲᔦ ᐗᐌᔑᐅᓇᓐ ᑳᑮ ᓈᐱᔥᑲᒥᓂᒡ ᐅᑴᑲᓂᓃᕽ ᐅᐱᒀᐎᑲᓀ ᒥᑕᑎᒨᓂ᙮ 22 ᒦᑕᔥ ᑮᑎᔭᓐ ᑳᐃᑯᒡ ᐃᔅᕒᐃᔭᓬᐊᐞ Israel, ᑕᑲ ᑮᓐ ᑎᐯᓂᒥᔑᓈᒻ, ᑭᑯᓯᔅ, ᑫᓂ ᐅᔫᔑᓯᔭᓐ ᓂᑲᓂ ᑎᐯᓂᒥᑯᓈᓐ, ᐋᓃᔥ ᑮᓐ ᑳᑮ ᐱᒫᒋᐃᔮᕽ ᐃᑭ ᐅᒋ ᒥᑎᔭᓐ ᑳᑎᓄᐎᐙᒡ, ᐅᑮᐃᑰᐞ᙮ 23 ᒦᔥ ᑮᑎᔭᓐ ᑳᐃᔑ ᓇᑴᑕᐙᒡ, ᑳᐐᓐ ᓃᓐ ᑭᑲ ᑎᐯᓂᒥᓯᓅᓂᓂᒻ, ᓂᑯᓯᔅ ᑲᔦ ᑳᐐᓐ ᑭᑲ ᑎᐯᓂᒥᑯᓰᐙ; ᑳᑎᐯᒋᑫᒡ ᓴ ᐐᓐ ᑭᑲ ᑎᐯᓂᒥᑯᐙ, ᐅᑮ ᐃᓈᐞ᙮ 24 ᒦᔥ ᐅᐅ ᑳᐊᓂᐃᓈᒡ, ᐯᔑᒃ ᐃᑕᔥ ᑫᑰᓐ ᑭᐐ ᑲᑴᒋᒥᓂᓂᒻ, ᑲᑭᓇ ᐁᑕᔑᔦᒃ ᒋᒦᔑᔦᒃ ᓈᐱᑌᐱᓱᓇᒃ ᑳᑮ ᐐᑑᑳᓱᔦᒃ ᐁᒪᑲᑗᔦᒃ, ᑮᐃᑭᑐ᙮ ᐃᔥᒣᔭᓬ ᑳᑎᓄᐎᓂᒡ ᓴ ᐅᑮ ᓂᑖ ᑭᑭᔥᑲᐙᓂ ᐅᓵᐎ ᔔᓂᔮ ᐙᐱᑯᐎ ᓈᐱᑌᐱᓱᓇᐞ᙮ 25 ᒦᑕᔥ ᑳᐃᑯᒡ, ᑌᐺ ᓴ ᑭᑲ ᒦᓂᑰ᙮ ᒦᑕᔥ ᑳᐃᔑ ᑕᔗᑭᓯᑑᓂᒡ ᐃᔒᑭᓐ, ᐁᑕᓱ ᐯᔑᑯᓂᒡ ᐃᑕᔥ ᐅᑮ ᐊᐸᑭᓈᓂ ᓈᐱᑌᐱᓱᓇᓐ ᑳᑮ ᒪᑲᑗᓂᒡ᙮ 26 ᐃᐃ ᑕᔥ ᑳᑮ ᐊᑐᑕᒫᑫᒡ ᐅᓵᐎ ᔔᓂᔮ ᐙᐱᑯᐎ ᓈᐱᑌᐱᓱᓇᐞ ᓃᒥᑕᓇ 40 ᑕᓱ ᑎᐹᐲᔥᑰᒋᑲᓐ ᑮᐊᐲᑎᓂᑾᓂᓂᐗᐞ᙮ ᑳᐐᓐ ᐃᑕᔥ ᑮᑕᑾᑭᒋᑳᑌᓯᓅᓇᓐ ᐗᐌᔑᐅᓇᓐ, ᓈᐱᑳᑲᓂᒥᓇᐞ ᑲᔦ, ᒪᑲᑌ ᒥᔅᑴᑲᓂ ᑭᑭᔥᑭᑲᓇᓐ ᑲᔦ ᑳᑮ ᑭᑭᔥᑲᒥᓂᒡ ᒥᑎᔭᓐ ᐅᒋ ᑭᒋᐅᑭᒫᐞ, ᐃᓂ ᑕᔥ ᑲᔦ ᑳᑮ ᓈᐱᑴᐱᓱᓐᒡ ᐃᐃ ᐱᒀᐎᑲᓀ ᒥᑕᑎᒨᐞ᙮ 27 ᒦᑕᔥ ᑮᑎᔭᓐ ᑳᑮ ᐋᐸᒋᐋᒡ ᐃᓂ ᐅᓵᐎ ᔔᓂᔮ ᐙᐱᒃ ᐁᑮ ᐅᔑᐋᒡ ᒪᓂᑑᑳᓇᓐ, ᐅᑑᑌᓈᒥᕽ ᐃᑕᔥ ᐅᐸᕒᐊ Ophrah ᐁᔑᓂᑳᑌᓂᒃ ᐅᑮ ᐃᔑ ᐊᓵᓐ᙮ ᑲᑭᓇ ᑕᔥ ᐃᔅᕒᐃᔭᓬᐊᐞ Israel ᐅᐱᔑᒀᑎᓰᐞ ᑮᐃᓀᑖᑯᓯᐗᐞ ᐁᑮ ᐊᓇᒥᐁᑕᐙᓂᒡ᙮ ᒦᑕᔥ ᐅᐅᐌᓂ ᑮᑎᔭᓐ ᑳᑮ ᒫᔑᐱᓂᑯᒡ, ᐃᐃ ᑲᔦ ᐅᑖᐎᓂᕽ ᑳᑮ ᐊᔮᓂᒡ᙮ 28 ᒦ ᓴ ᑕᔥ ᐅᐅᓇᑫ ᐃᔅᕒᐃᔭᓬᐊᒃ Israel ᑳᐃᔑ ᔖᑰᒋᐋᐙᒡ ᒥᑎᔭᓐ ᑳᑎᓄᐎᓂᒡ Midianites ᑳᐐᓐ ᐃᑕᔥ ᐊᐗᔑᒣ ᐅᑮ ᒥᑯᔥᑳᒋᐃᑯᓰᐙᐞ᙮ ᐐᑫ ᑕᔥ ᐱᓵᓐ ᑮᐊᔮᓂᐗᓐ ᐃᐃᒫ ᐊᑮᕽ ᓃᒥᑕᓇ ᑕᓱ ᐱᐴᓐ ᑮᐱᒫᑎᓯᒡ ᑮᑎᔭᓐ Gideon᙮ ᑮᑎᔭᓐ ᑮᐃᔥᒀᐱᒫᑎᓯᒡ 29 ᒦᑕᔥ ᑮᑎᔭᓐ, ᒉᕒᐊᐯᔭᓬ Jerub-baal ᑳᑮ ᐃᔑᓂᑳᓂᓐᒡ ᑳᑮ ᐅᑌᑌᒡ ᒎᐊᔕᓐ Joash ᑮᑮᐌ ᐅᑖᐎᓂᕽ ᐁᑮ ᐊᐎ ᐃᔑᑖᒡ᙮ 30 ᓃᔣᓯᒥᑕᓇ 70 ᓴ ᑮᑕᔑᐗᐞ ᐅᑯᓯᓴᐞ ᐐᐎᕽ ᑳᑮ ᐅᒌᓂᒡ, ᐋᓃᔥ ᑮᐹᑏᓄᐗᐞ ᐐᐗᐞ᙮ 31 ᑮᐊᔮᐗᓐ ᐃᑕᔥ ᑲᔦ ᐅᑖᓂᑫ ᐐᐗᓐ ᐌᑎ ᔒᑲᒻ Shechem ᐁᔮᐎᓂᕽ᙮ ᐅᑯᓯᓭᓴᓐ ᐃᑕᔥ ᐅᑮ ᐊᔮᐙᓂ, ᐊᐱᒣᓬᐁᒃ Abimelech ᐅᑮ ᐃᔑᓂᑳᓈᓐ᙮ 32 ᒦᔥ ᑮᑎᔭᓐ Gideon ᑳᑮ ᐅᑌᑌᒡ ᒎᐊᔕᓐ Joash ᑳᑮ ᐃᔥᒀ ᐱᒫᑎᓯᒡ ᐁᑮ ᐊᑭᐌᓰᐎᒡ ᐁᑮ ᑭᒋ ᑕᓱ ᐱᐴᓉᒡ᙮ ᐌᑎ ᑕᔥ ᑮᐃᔑ ᓇᐃᓈ ᑳᑮ ᐃᔑ ᓇᐃᓂᒥᓐᒡ ᐅᑌᑌᐸᓃᓐ ᐅᐸᕒᐊ Ophrah ᐆᑌᓈᕽ ᑳᑮ ᐅᒌᓂᒡ ᐁᐱᐁᓴᕒ ᑳᑎᓄᐎᓂᒡ Abiezerites᙮ 33 ᑳᐐᓐ ᑕᔥ ᑕᔑ ᓈᓈᑫ ᑮᐃᔑᓭᓯᓂᓂ ᑳᐃᔥᒀ ᐱᒫᑎᓯᒡ ᑮᑎᔭᓇᓐ, ᐃᔅᕒᐃᔭᓬᐊᒃ Israel ᐋᔕ ᒦᓇᐙ ᐱᔑᒀᒋᑴᕽ ᑮᐃᓀᑖᑯᓯᐗᒃ ᐁᑮ ᓅᒋᐋᐙᒡ ᐯᔭᓬ Baal ᐁᓂᒥᓐᒡ᙮ ᐃᓂ ᓴ ᐯᔭᓬ ᐲᕒᐃᑦ Baal-berith ᐅᑮ ᐅᓇᓵᐙᓐ ᐁᑮ ᐅᒪᓂᑑᒥᐙᒡ᙮ 34 ᑳᐐᓐ ᓴ ᑮᒫᒥᑲᐎᓰᐗᒃ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ ᑳᑮ ᓈᑕᒫᑯᐙᒡ ᐁᑮ ᒦᑳᓈᓂᐸᓐ ᑳᔒᑫᓂᒥᑯᐙᒡ ᐙᑳᔭᐄ ᒥᓯᐌ ᐁᔮᓂᒡ᙮ 35 ᑳᐐᓐ ᐊᐙᒡ ᒦᑴᒡ ᒋᑮ ᐃᓀᓂᒫᓂᐸᓐ ᒉᕒᐊᐯᔭᓬᐗᓐ ᐅᑖᐎᓂᓃᕽ ᑳᑮ ᐊᔮᓂᒡ; ᑮᑎᔭᓐ ᑯᑕ ᑳᑮᐃᓂᒥᓐᒡ᙮ ᑳᐐᓐ ᑲᔦ ᒋᑮ ᑌᐯᑕᒧᐙᒡ ᐋᓃᓐ ᑲᑭᓇ ᑳᐃᔑ ᒥᓄᑑᑕᐙᓂᒡ ᐃᔅᕒᐃᔭᓬᐊᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society