ᐅᓈᑯᓂᑫᒃ 15 - ᐅᒋᐺ ᑭᒋᒪᓯᓇᐃᑲᓐ1 ᓈᓈᑫ ᑕᔥ ᐁᐊᓂ ᐃᔑᓭᓂᒃ ᐊᐲ ᑮᒪᓂᔑᑫᓈᓂᐗᓂᓂᒃ, ᓵᒥᓴᓐ Samson ᐅᑮ ᒪᐗᑎᓵᓐ ᐐᐗᓐ ᐁᑮ ᑕᑯ ᐃᔑᐎᓈᒡ ᒫᓇᑎᑰᓴᓐ ᐁᑮ ᐃᑭᑐᒡ, ᓂᑲ ᐲᑎᑫᐙᓐ ᓴ ᑳᔑ ᓂᐹᒡ ᓂᐐᐤ, ᑮᐃᑭᑐ᙮ ᐅᑌᑌᓂ ᑕᔥ ᑳᐐᓐ ᐅᑮ ᐸᑭᑎᓂᑯᓯᓐ ᒋᐲᑎᑫᒡ᙮ 2 ᒦᑕᔥ ᑳᐃᑯᒡ ᐅᑌᑌᓂ, ᒦ ᓴ ᑳᐃᓀᓂᒥᓈᓐ ᐐᑫ ᐁᔒᑫᓂᒪᒡ, ᒦᔥ ᑳᑮ ᐅᒋ ᒦᑭᐙᓇᒃ, ᐁᑮ ᒦᓇᒃ ᑭᓵᑭ ᐐᒌᐙᑲᓐ᙮ ᓇᐗᒡ ᐄᑐᒃ ᐅᔒᒣᔕᓐ ᒥᓄᓈᑯᓯᐗᓐ, ᐃᓇᔥᑫ ᒦ ᐊᐌ ᒣᔥᑾᒡ ᐊᔮᐤ, ᐁᑮᐃᑯᒡ᙮ 3 ᒦᔥ ᓵᒥᓴᓐ ᑳᐃᓈᒡ, ᑳᐐᓐ ᑕᔥ ᓃᓐ ᑫᑰᓐ ᓂᑲᔑ ᐊᓈᒣᑖᑯᓯᓰ ᐅᐅ ᓅᑯᒻ ᐋᓃᓐ ᑳᐐ ᑑᑕᐗᒀ ᐱᓬᐃᔅᑏ ᑳᑎᓄᐎᐙᒡ Philistines, ᑮᐃᑭᑐ᙮ 4 ᒦᑕᔥ ᓵᒥᓴᓐ ᑳᐃᔑ ᒫᒑᒡ ᐁᑮ ᐊᐎ ᑳᒋᑎᓈᒡ ᓃᔣᒃ 300 ᐙᑯᔕᐞ; ᒦᑕᔥ ᑳᐃᔑ ᓀᓃᔣᓄᐌᐱᓈᒡ ᐁᑮ ᑕᒀᐱᑑᒡ ᐙᓴᑯᓀᒋᑲᓈᑰᓐ ᐅᓱᐎᓃᕽ᙮ 5 ᐊᐲ ᑕᔥ ᑳᓴᑲᐊᕽ ᐃᓂ ᐙᓴᑯᓀᒋᑲᓈᑰᓐ ᒦ ᓴ ᐃ ᑳᐃᔑ ᐸᑭᑎᓈᒡ ᐙᑯᔕᐞ ᒋᐸᐹᒥᐸᐃᑎᓂᒡ ᑳᑮ ᐃᔑᐊᔮᓂᑭᓐ ᐅᑭᑎᑳᓂᓂ ᐱᓬᐃᔅᑏ ᑳᑎᓄᐎᓂᒡ᙮ ᒦᔥ ᑳᑮ ᐊᒀᑭᓴᒪᐙᒡ ᐅᑭᑎᑳᓂᓂ ᒪᔑ ᑳᑮ ᒪᓂᔑᑳᑌᓯᓂᓂᑭᓐ, ᐃᓂ ᑲᔦ ᑳᑮ ᐊᔪᑯᓯᓂᓂᑭᓐ ᑳᑮ ᒪᓂᔑᑳᑌᓂᑭᓐ᙮ ᑮᑕᑯ ᐊᒀᑭᑌᓂᐗᓐ ᑲᔦ ᑳᑮ ᐃᔑ ᑭᑎᑳᑌᓂᑭᓐ ᐋᓬᐃᑉ ᑎᓄᐎᒥᓇᓐ olive ᔔᒥᓇᒃ ᑲᔦ᙮ 6 ᒦᑕᔥ ᐅᐅ ᐱᓬᐃᔅᑏ ᑳᑎᓄᐎᓂᒡ ᑳᐃᑭᑐᓂᒡ, ᐊᐌᓀᓐ ᑕᔥ ᐅᐅ ᑳᐃᔑᒋᑫᒡ? ᒦᑕᔥ ᑳᐃᓂᑣ, ᓵᒥᓴᓐ ᐅᔕ ᐄᓴᓐ ᐊᐊ ᑳᐃᔑᒋᑫᒡ᙮ ᐅᔑᔐᔕᓐ ᐄᑐᒃ ᑎᒻᓇ ᐆᑌᓈᕽ ᐌᒌᓂᒡ ᐅᑮ ᒦᑭᐙᓈᓂ ᓵᒥᓴᓐ ᐐᐗᓐ ᒋᐐᑎᑫᒫᓂᒡ ᑳᓵᑭ ᐐᒌᐙᒡ, ᑮᐃᓈᐗᒃ᙮ ᐱᓬᐃᔅᑏ ᑳᑎᓄᐎᐙᒡ ᐃᑕᔥ ᑮᐲᔖᐗᒃ ᐁᑮ ᓴᑲᐙᐙᒡ ᐃᓂ ᐃᑴᐗᓐ, ᐅᑌᑌᓂ ᑲᔦ᙮ 7 ᒦᑕᔥ ᓵᒥᓴᓐ ᑳᐃᓈᒡ, ᐅᐅ ᑕᔥ ᐁᑮ ᐃᔑᒋᑫᔦᒃ, ᑫᓃᓐ ᓴ ᑫᒋᓈᒡ ᑭᑲ ᓇᓇᐊᓯᓂᓂᒻ; ᒦᑕᔥ ᐊᐲ ᐸᔦᔥ ᒋᐴᓂᒋᑫᔮᓐ, ᐅᑮ ᐃᓈᐞ᙮ 8 ᑳᐐᓐ ᑕᔥ ᐅᑮ ᒪᓈᒋᐋᓰᐞ ᐁᒦᑳᓈᒡ, ᓃᐱᐗᐞ ᓴ ᐅᑮ ᓂᓵᐞ᙮ ᐌᑎ ᑕᔥ ᑮᐃᔖ ᐄᑕᒻ Etam ᐆᑌᓈᕽ ᐁᑮ ᐊᐎ ᐊᔮᒡ ᐁᔑ ᐐᐹᐱᑳᓂᒃ᙮ ᓵᒥᓴᓐ ᑮᔖᑰᒋᐋᒡ ᐱᓬᐃᔅᑏ ᑳᑎᓄᐎᓂᒡ 9 ᐱᓬᐃᔅᑏ ᑳᑎᓄᐎᓂᒡ ᐃᑕᔥ ᑮᐲᔖᐗᐞ ᐁᑮ ᑲᐯᔑᓂᒡ ᐃᐃᒫ ᒎᑕ Judah ᐊᑮᕽ, ᐁᑮ ᒥᓯᑌᔩᓄᓂᒡ ᐃᐃᒫ ᐆᑌᓈᕽ ᓬᐄᐋᐃ Lehi ᐁᒋᑳᑌᓂᒃ᙮ 10 ᒦᑕᔥ ᐃᓂᓂᐗᒃ ᒎᑕ ᐌᒌᐙᒡ ᑳᐃᓈᐙᒡ ᐱᓬᐃᔅᑏ Philistines ᑳᑎᓄᐎᓂᒡ, ᐌᑯᓀᓐ ᑕᔥ ᐌᒋ ᓈᓯᑲᐎᔮᕽ, ᐁᐐ ᒦᑳᔑᔮᕽ ᐃᓇ? ᒦᑕᔥ ᑳᐃᔑ ᓇᑴᑖᑯᐙᒡ, ᓵᒥᓴᓐ ᐅᔕ ᐁᐐ ᒪᒫᒋᑾᐱᓇᑭᒡ ᑳᐅᒋ ᐲᔖᔮᕽ, ᐁᐐ ᑑᑕᐗᑭᒡ ᐋᓃᓐ ᑳᑑᑕᐎᓇᑭᒡ, ᐅᑮᐃᑯᐙᐞ᙮ 11 ᓂᓯᕽ ᒥᑖᔂᒃ 3,000 ᐃᑕᔥ ᒎᑕᐎᓂᓂᐗᒃ ᑮᐃᔖᐗᒃ ᐁᔑ ᐐᐹᐱᑳᓂᒃ ᐄᑕᒻ Etam ᐆᑌᓈᕽ ᐁᑮᐃᓈᐙᒡ ᓵᒥᓴᓅᓐ, ᑳᐐᓐ ᐃᓇ ᑭᑭᑫᑕᓰᓐ ᐁᑎᐯᓂᒥᔭᒥᑣ ᐱᓬᐃᔅᑏ ᑳᑎᓄᐎᐙᒡ? ᐁᑕᑕᐌ ᐅᔕ ᑭᑭᒋ ᒪᒥᔑᐃᓈᒻ, ᐅᑮᐃᓈᐙᓐ᙮ ᓵᒥᓴᓅᓐ ᐃᑕᔥ ᐅᑮᐃᑯᐙᓐ, ᑳᑮ ᑑᑕᐎᐙᒡ ᓴ ᐱᑯ ᑫᓃᓐ ᓂᑮ ᑑᑕᐙᒃ, ᐅᑮ ᒪᑗ ᐃᑯᐙᓐ᙮ 12 ᒦᑕᔥ ᑳᐃᓈᐙᒡ, ᒦ ᓴ ᐌᒋ ᐲᔖᔮᕽ ᐁᐐ ᒪᒫᒋᑾᐱᓂᑰᔭᓐ, ᐁᐐ ᐃᔑ ᐸᑭᑎᓂᑰᔮᓐ ᐃᑕᔥ ᐁᔑᐊᔮᐙᒡ ᐱᓬᐃᔅᑏ ᑳᑎᓄᐎᐙᒡ, ᐅᑮᐃᓈᐙᓐ᙮ ᒦᔥ ᑳᐃᑯᐙᒡ, ᑫᒋᓈᒡ ᓴ ᐊᔩᒋ ᐊᓱᑕᒪᐎᔑᒃ ᑮᓇᐙ ᒋᓂᔑᓯᐌᒃ, ᐅᑮᐃᑯᐙᓐ᙮ 13 ᒦᔥ ᐅᐅ ᑳᐃᓈᐙᒡ, ᑳᐐᓐ ᑭᑲ ᐸᐹᒣᓂᒥᑯᓰ, ᔖᑰᒡ ᑕᔥ ᑭᐐ ᒪᒫᒋᑾᐱᓂᑰ ᐁᐐ ᐃᔑᐎᓂᑰᔭᓐ ᐁᔑᐊᔮᐙᒡ ᐱᓬᐃᔅᑏ ᑳᑎᓄᐎᐙᒡ᙮ ᒦᔥ ᑳᐃᔑ ᒪᒫᒋᑾᐱᓈᐙᒡ ᓃᔑᓐ ᐅᔥᑭ ᔑᓅᑖᑲᓇᓐ ᐁᑮ ᐋᐸᒋᑑᐙᒡ, ᒦ ᑲᔦ ᑳᐃᔑ ᓵᑭᓯᐋᐙᒡ ᐃᐃᒫ ᐁᔑ ᐐᐹᐱᑳᓂᒃ᙮ 14 ᐊᐲ ᑕᔥ ᐁᐸᑲᒥᐎᒋᑲᓂᐎᓂᒡ ᓬᐄᐋᐃ ᐆᑌᓈᕽ, ᐱᓬᐃᔅᑏ ᑳᑎᓄᐎᓂᒡ ᑮᔖᔖᑯᐌᐗᐞ ᐁᐱ ᐊᑕ ᓇᑭᔥᑳᑯᒡ᙮ ᑳᑎᐯᒋᑫᓂᒡ ᐅᑕᒑᑯᓂ ᑕᔥ ᓵᒥᓴᓐ ᐅᑮ ᐅᑎᓯᑰᓐ ᐁᑮ ᒪᔥᑲᐎᓰᔥᑳᑯᒡ, ᐃᐃᐌᓂ ᓴ ᔑᓅᑖᑲᓐ ᑳᑮ ᒪᒫᒋᑾᐱᓱᒡ ᐅᓂᑭᕽ, ᐅᓂᒌᕽ ᑲᔦ ᐅᑮ ᐃᓀᑖᓐ ᑖᐱᔥᑰ ᑲᔥᑭᒀᒋᑲᓀᔮᑉ ᑳᒑᑭᓱᒡ, ᒦᑕᔥ ᑳᐃᔑ ᔕᔐᓂᑫᒡ᙮ 15 ᒦᔥ ᓵᒥᓴᓐ ᑳᑮ ᒥᑲᕽ ᐅᔥᑭ ᒫᔑᒥᑕᑎᒨᐎ ᐅᑖᒥᑲᓂᑫᑲᓐ᙮ ᒦ ᐃᐌᓂ ᑳᑌᐱᓇᒃ ᐁᑮ ᐋᐸᒋᑑᒡ ᐁᑮ ᓃᐗᓇᐙᒡ ᒥᑖᔂᒃ 1,000 ᐃᓂᓂᐗᐞ᙮ 16 ᒦᑕᔥ ᑳᐃᑭᑐᒡ, ᐅᐅᐌ ᓴ ᒫᔑᒥᑕᑎᒨᐎ ᐅᑖᒥᑲᓂᑫᑲᓐ, ᓂᑎᔑᐊᔮᑸᑑᔑᒫᒃ, ᐅᐅᐌ ᓴ ᒫᔑᒥᑕᑎᒨᐎ ᐅᑖᒥᑲᓂᑫᑲᓐ, ᒥᑖᔂᒃ 1,000 ᐃᓂᓂᐗᒃ ᓂᑑᒋ ᓂᓵᒃ, ᑮᐊᔨᑭᑐ᙮ 17 ᐊᐲ ᑕᔥ ᐃᐃ ᑳᐃᔥᒀ ᐃᑭᑐᒡ, ᓂᑯᒋ ᐅᑮ ᐊᐸᑭᑑᓐ ᐃᐃ ᐅᑖᒥᑲᓂᑫᑲᓐ᙮ ᒦᑕᔥ ᑳᐃᔑ ᐐᑕᕽ ᑳᑮ ᐃᔑᐊᔮᒡ ᐅᑖᒥᑲᓂᑫᑲᓂᐎ ᐱᑾᑎᓈᕽ ᐁᑮ ᐃᔑᓂᑳᑕᕽ᙮ 18 ᐐᑫ ᑕᔥ ᓵᒥᓴᓐ ᑮᓅᑌᔮᐹᑴ, ᒦᔥ ᑳᐃᔑ ᑲᓅᓈᒡ ᑳᑎᐯᒋᑫᓂᒡ ᐁᑮᐃᓈᒡ, ᐁᑮ ᐃᔑᐊᒡ ᐃᑕᔥ ᑭᑕᓄᑮᐋᑲᓐ ᒋᑭᒋ ᔖᑰᒋᑣᒡ, ᑭᐐ ᐸᑭᑎᓂᔥ ᐃᓇ ᒋᑲᐙᐹᑴᔮᓐ, ᒋᔖᑰᒋᐃᐙᒡ ᐃᑕᔥ ᐃᑭ ᑳᑭᑭᓇᐙᑕᔕᑫᔣᓯᐎᑣ? ᑮᐃᑭᑐ᙮ 19 ᒦᑕᔥ ᑭᔐᒪᓂᑑᓐ ᑳᑮ ᐃᔑᑑᓂᒡ ᐁᔑ ᐐᐸᑲᒥᑳᓂᒃ ᒋᑖᔥᑲᑲᒥᑭᓭᓂᒃ ᐃᐃᒫ ᓬᐄᐋᐃᕽ, ᒦᔥ ᐃᐃᒫ ᓂᐲᓂ ᑳᐅᒋᒋᐗᓂᓂᒃ᙮ ᐊᐲ ᑕᔥ ᑳᒥᓂᑴᒡ ᑮᒪᔥᑲᐗᒪᒋᐅ, ᐁᑮ ᑮᐌ ᒪᔥᑲᐙᑎᓯᒡ᙮ ᔖᑯᐙᓂ ᒨᑭᒋᐗᓐ En Hakkore ᐅᑮ ᐃᔑᓂᑳᑖᓐ ᐃᐃᒫ ᑳᑮ ᐅᒋᓭᓂᒃ ᓂᐱ, ᑫᔮᐱ ᑕᔥ ᓅᑯᒻ ᑳᑮᔑᑲᓂᓂᒃ ᐊᔮᓂ ᐌᑎ ᓬᐄᐋᐃᕽ ᐊᔮᐎᓂᕽ᙮ 20 ᓃᔥᑕᓇ ᑕᓱ ᐱᐴᓐ ᓴ ᐅᑮ ᐅᓈᑯᓈᐞ ᐃᔅᕒᐃᔭᓬᐊᐞ ᒣᒀ ᐱᓬᐃᔅᑏ ᑳᑎᓄᐎᓂᒡ ᑮᑎᐯᓂᒥᑯᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society