ᐅᓈᑯᓂᑫᒃ 14 - ᐅᒋᐺ ᑭᒋᒪᓯᓇᐃᑲᓐᓵᒥᓴᓐ ᑮᐐᐎᒡ ᐃᑴᐗᓐ ᐌᒌᓂᒡ ᑎᒻᓇ ᐆᑌᓈᕽ 1 ᓵᒥᓴᓐ Samson ᓴ ᑮᐃᔖ ᑎᒻᓇ Timnah ᐆᑌᓈᕽ, ᒦᑕᔥ ᑳᑮ ᐙᐸᒫᒡ ᐃᑴᐗᓐ ᐃᐃᒫ ᐌᒌᓂᒡ᙮ ᐱᓬᐃᔅᑏᐎᓂᓂᐗᓐ Philistines ᓴ ᑮᐅᑌᑌᐗᓐ᙮ 2 ᑳᐱᑮᐌᒡ ᐃᑕᔥ ᐅᑮ ᐐᑕᒪᐙᓐ ᐅᑌᑌᓐ, ᐅᒫᒫᓐ ᑲᔦ ᐅᐅ ᐁᑮᐃᓈᒡ, ᓂᑮ ᐙᐸᒫ ᓴ ᐃᑴ ᑎᒻᓇ ᐌᒌᒡ, ᐱᓬᐃᔅᑏᐎᑴ ᑎᓄ, ᑕᑲ ᓅᑯᒻ ᓈᓯᑲᒪᐎᔑᒃ ᒋᐐᐎᔮᓐ, ᐁᑮᐃᓈᒡ᙮ 3 ᒦᔥ ᐅᐅ ᑳᐃᑯᒡ ᐅᑌᑌᓐ, ᐅᒫᒫᓐ ᑲᔦ, ᑳᐐᓐ ᐃᓇ ᐊᔮᓰ ᐃᑴ ᒋᐅᒌᒡ ᑭᑎᓇᐌᒫᑲᓂᑳᕽ, ᑯᒫ ᑲᔦ ᐅᐅᒫ ᐁᔑᐊᔮᐙᒡ ᑭᐐᑖᑎᓰᒫᑲᓂᓈᓂᒃ? ᒦ ᓇ ᐃ ᐁᔑᓈᑾᒃ ᒣᒬᒡ ᒋᐅᑎᓂᑴᐌᔭᐸᓐ ᐌᑎ ᐁᔑᐊᔮᐙᒡ ᑫᑭᓇᐙᑕᔕᑫᔣᓯᐎᑣ ᐱᓬᐃᔅᑏ ᑳᑎᓄᐎᐙᒡ, ᐅᑮᐃᑰᐞ᙮ ᒦᔥ ᐅᐅ ᑳᐃᓈᒡ ᐅᑌᑌᓐ, ᒫᒑᓐ ᓈᓯᑲᐤ, ᐁᑕᑕᐌ ᐅᔕ ᓂᒥᓄᓇᐙ, ᐅᑮᐃᓈᓐ᙮ 4 ᐅᓃᑭᐃᑰᐞ ᐃᑕᔥ ᑳᐐᓐ ᐅᑮ ᑭᑫᑕᓰᓂ ᑳᑎᐯᒋᑫᓂᒡ ᐃᓇᑾᓇ ᐃᐃᐌᓂ ᐅᑎᔑᒋᑫᐎᓂᓂ, ᐋᓃᔥ ᐅᑮ ᓇᓈᑐᑯᐋᓂ ᐱᓬᐃᔅᑏ ᑳᑎᓄᐎᓂᒡ᙮ ᒦ ᐄᑐᒃ ᐃᐃ ᐊᐲ ᐱᓬᐃᔅᑏ ᑳᑎᓄᐎᐙᒡ ᑳᑮ ᑎᐯᓂᒫᐙᒡ ᐃᔅᕒᐃᔭᓬᐊᐞ᙮ 5 ᓵᒥᓴᓐ ᐃᑕᔥ ᐅᑮ ᒫᒌ ᐐᒌᐙᓐ ᐅᑌᑌᓐ, ᐅᒫᒫᓐ ᑲᔦ ᐁᑮ ᒫᒪᐎ ᐃᔖᐙᒡ ᑎᒻᓇ ᐆᑌᓈᕽ᙮ ᐁᐊᓂ ᑕᑯᔑᓄᐙᒡ ᐃᑕᔥ ᐁᔑᐊᔮᓂᒡ ᐁᔑ ᑭᑎᑳᓱᓂᒡ ᔔᒥᓇᐞ ᐃᐃᒫ ᑎᒻᓇ, ᐅᑮ ᐙᐸᒫᓐ ᓴ ᐅᔥᑭ ᒥᔑᐱᔑᐗᓐ ᐁᐲᒋᐸᑑᓂᒡ ᐁᓅᑖᑯᓯᓂᒡ᙮ 6 ᒦᑕᔥ ᑳᑎᐯᒋᑫᓂᒡ ᐅᑕᒑᑯᓂ ᑳᑮ ᐅᑎᓯᑯᒡ ᐁᑮ ᒪᔥᑲᐎᓰᔥᑳᑯᒡ᙮ ᒦᑕᔥ ᒥᒋᓂᓐᒡ ᐃᑯ ᑳᐃᔑ ᐲᓯᐱᓈᒡ ᐁᑮ ᑑᑕᐙᒡ ᑳᑑᑕᐎᒥᓐᒡ ᒫᓇᑎᑰᓴᓐ᙮ ᑳᐐᓐ ᐃᑕᔥ ᐅᑮ ᐐᑕᒪᐙᓰᐞ ᐅᓃᑭᐃᑰᐞ ᐋᓃᓐ ᑳᐃᔑᒋᑫᒡ᙮ 7 ᒦᑕᔥ ᑳᐃᔑ ᐃᔖᒡ ᐁᑮ ᐊᐎ ᑲᑲᓅᓈᒡ ᐃᓂ ᐃᑴᐗᓐ; ᐐᑫ ᓴ ᐱᑯ ᐅᑮ ᒥᓉᓂᒫᓐ᙮ 8 ᐊᐲ ᑕᔥ ᓈᓈᑫ ᐁᐃᔑᓭᓂᒃ ᐁᓈᓯᑲᐙᒡ ᐃᓂ ᐃᑴᐗᓐ, ᑮᐸᑫ ᓴ ᐁᐐ ᐙᐸᒫᒡ ᒥᔑᐱᔑᐗᓐ ᑳᑮ ᓂᓵᐸᓐ᙮ ᒦᑕᔥ ᑳᑮ ᐙᐸᒫᒡ ᐁᐹᑏᓄᓂᒡ ᐋᒨᐞ, ᐋᒨᐎ ᓰᓯᐹᑾᑦ ᑲᔦ ᐁᐊᔮᓂᒃ ᐃᐃᒫ ᒥᔑᐱᔑᐐᔭᐎᕽ᙮ 9 ᐅᑮ ᒀᐱᐱᑑᓐ ᓴ ᑕᔥ ᐃᐃ ᐋᒨᐎ ᓰᓯᐹᑾᑦ ᐁᑮ ᐊᓂ ᒫᒑᒡ, ᐅᑮ ᐊᓂ ᒦᒋᓐ ᐃᑕᔥ ᐁᐊᓂ ᐸᐱᒧᓭᒡ᙮ ᐌᑎᓵᒡ ᐃᑕᔥ ᐅᑌᑌᓐ, ᐅᒫᒫᓐ ᑲᔦ, ᐅᑮ ᐊᔕᒫᐞ, ᒦᔥ ᑳᐃᔑ ᒦᒋᓂᒡ᙮ ᑳᐐᓐ ᐃᑕᔥ ᐅᑮ ᐐᑕᒪᐙᓰᐞ ᒥᔑᐱᔑᐐᔭᐎᕽ ᐁᑮ ᐅᑎᓇᕽ ᐃᐃ ᐋᒨᐎ ᓰᓯᐹᑾᑦ᙮ 10 ᐅᑌᑌᓐ ᑕᔥ ᐅᑮ ᐊᑕ ᐙᐸᒫᓂ ᐃᓂ ᐃᑴᐗᓐ᙮ ᒦᑕᔥ ᓵᒥᓴᓐ ᐌᑎ ᑳᑕᔑ ᐐᑾᑫᒡ, ᒦ ᓴ ᐃ ᑳᓂᑖ ᐃᔑᒋᑫᐙᒡ ᐅᔥᑭᓃᑭᐗᒃ ᑮᐐᑎᑫᐙᒡ᙮ 11 ᐊᐲ ᓴ ᑕᔥ ᑳᐙᐸᒥᓐᒡ, ᑮᐲᑕᒪᐙ ᓂᓯᒥᑕᓇ 30 ᐃᓂᓂᐗᐞ ᒋᐐᒌᐎᑯᒡ᙮ 12 ᒦᑕᔥ ᓵᒥᓴᓐ ᑳᐃᓈᒡ ᐃᐃ ᐃᓂᓂᐗᐞ, ᑕᑲ ᑭᐐ ᐐᑕᒪᐎᓂᓂᒻ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᒃ᙮ ᑮᔥᐱᓐ ᐃᑕᔥ ᐐᑕᒪᐎᔦᒃ ᐋᓃᓐ ᐁᑭᑑᒪᑲᒃ ᒋᑆ ᐃᔥᒀᓭᒃ ᐅᐅ ᓃᔣᓱᑮᔑᒃ ᑳᐐᑾᑏᐗᑲᒥᑲᒃ, ᑭᑲ ᒦᓂᓂᓂᒻ ᓴ ᓂᓯᒥᑕᓇ 30 ᑳᓲᑲᑭᓐ ᓂᑕᒥᔥᑭᑲᓇᓐ, ᓂᓯᒥᑕᓇ 30 ᑲᔦ ᑭᑭᔥᑭᑲᓇᓐ ᑫᒣᔥᑯᓯᑲᒣᒃ᙮ 13 ᑮᔥᐱᓐ ᐃᑕᔥ ᐐᓐ ᑲᔥᑭᑑᓯᐌᒃ ᒋᐐᑕᒪᐎᔦᒃ, ᒦᑕᔥ ᐁᔑᓈᑾᒃ ᑮᓇᐙ ᒋᒦᔑᔦᒃ ᓂᓯᒥᑕᓇ 30 ᑳᓲᑲᑭᓐ ᓂᑕᒥᔥᑭᑲᓇᓐ, ᓂᓯᒥᑕᓇ 30 ᑲᔦ ᑭᑭᔥᑭᑲᓇᓐ ᑫᒣᔥᑯᓯᑲᒫᓐ, ᐅᑮ ᐃᓈᐞ᙮ ᒦᔥ ᐅᐅ ᑳᐃᑯᒡ, ᐊᐎᓴ, ᐐᑕᒪᐎᔑᓈᒻ ᐃᐃ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᒃ, ᒋᓅᑕᒫᕽ, ᐅᑮᐃᑰᐞ᙮ 14 ᒦᑕᔥ ᓵᒥᓴᓐ ᑳᐃᑭᑐᒡ, ᐊᐊ ᓴ ᑳᐊᒧᐌᒡ, ᑫᑰᓐ ᐃᐃᒫ ᑮᐅᒌᓂ ᑫᒦᒋᓈᑳᑌᓂᒃ᙮ ᐊᐊ ᓴ ᑳᓲᑭᓯᒡ, ᑫᑰᓐ ᑳᔒᐗᓂᓂᒃ ᐃᐃᒫ ᑮᐅᒌᓂ, ᑮᐃᑭᑐ᙮ ᓂᓱᑮᔑᒃ ᐃᑕᔥ ᐁᐃᔑᓭᓂᒃ, ᑳᐐᓐ ᐅᑮ ᑲᔥᑭᑑᓰᓂ ᒋᐐᑕᒫᑯᒡ ᐃᐃ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᓂᓂᒃ᙮ 15 ᓃᐎᑮᔑᒃ ᐃᑕᔥ ᐁᐊᓂ ᐃᔑᓭᓂᒃ, ᐅᑮ ᐊᑕ ᐙᐸᒫᓂ ᓵᒥᓴᓐ ᐐᐗᓐ ᐁᑮᐃᓈᓂᒡ, ᑲᑴ ᑲᔥᑭᒻ ᑭᓈᐯᒻ ᒋᐐᑕᒪᐎᔭᒥᓐᒡ ᐁᑭᑑᒪᑲᓂᓂᒃ ᐃᐃ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᓂᓂᒃ᙮ ᑮᔥᐱᓐ ᐃᑕᔥ ᐃᐃ ᐃᔑᒋᑫᓯᐗᓐ, ᑭᑲ ᓴᑲᐅᑰ, ᑭᑌᑌ ᑲᔦ ᐅᐙᑳᐃᑲᓐ᙮ ᒦ ᓇ ᐃ ᑳᐅᒋ ᐊᑐᒥᔮᕽ ᐁᐐ ᐗᔦᔑᐃᔮᕽ, ᐅᑮᐃᓈᓂ᙮ 16 ᑮᒪᐎᐗᓐ ᐃᑕᔥ ᓵᒥᓴᓐ ᐐᐗᓐ ᐁᐱ ᓈᓯᑳᑯᒡ ᐁᑮᐃᑯᒡ, ᑭᔒᑫᓂᒥᔥ ᐄᓴᓐ, ᑳᐐᓐ ᑭᓵᑭᐃᓰ᙮ ᑭᑮ ᒦᓈᒃ ᓃᒋᐱᒫᑎᓰᒃ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᓂᓂᒃ, ᑳᐐᓐ ᐃᑕᔥ ᓃᓐ ᒪᔑ ᑭᐐᑕᒪᐎᓰ ᐋᓃᓐ ᐁᑭᑑᒪᑲᒃ, ᐅᑮᐃᑰᓐ᙮ ᒦᔥ ᐅᐅ ᑳᐃᓈᒡ, ᐃᓇᔥᑫ, ᑳᐐᓐ ᐅᔕ ᐊᐙᒡ ᓂᑌᑌ, ᓂᒫᒫ ᑲᔦ ᓂᑮ ᐐᑕᒪᐙᓰᒃ, ᐌᑯᓀᓐ ᐃᑕᔥ ᑫᐅᒋ ᐐᑕᒪᐎᓈᐹᓐ, ᐅᑮᐃᓈᓐ᙮ 17 ᒦᑕᔥ ᑳᐃᔑ ᒪᐎᓂᒡ ᑲᐯ ᓃᔣᓱᑮᔑᒃ 7 ᒥᓂᒃ ᐃᑯ ᑳᑮ ᐐᑾᑏᐗᑲᒥᑲᓂᓂᒃ᙮ ᑫᑲᐲ ᑕᔥ ᓃᔣᓱᑮᔑᒃ ᐁᐃᔑᓭᓂᒃ, ᐅᑮ ᐐᑕᒪᐙᓐ ᐋᓃᓐ ᐁᑭᑑᒪᑲᓂᓂᒃ ᐃᐃ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᓂᓂᒃ, ᐋᓃᔥ ᐅᓵᒻ ᐅᑮ ᒥᑯᔥᑳᓱᒥᑰᓐ᙮ ᒦᑕᔥ ᑳᐃᔑ ᐐᑕᒪᐙᓂᒡ ᐃᐃ ᐃᓂᓂᐗᐞ ᐅᐐᒋ ᐱᒫᑎᓰᓂ ᐁᑭᑑᒪᑲᓂᓂᒃ ᐃᐃ ᒪᔭᑭᐃᑭᑐᐎᓐ ᑫᑰᓐ ᐃᑕᔥ ᑳᐃᑭᑑᒪᑲᓂᓂᒃ᙮ 18 ᒦᑕᔥ ᐃᐃ ᐃᓂᓂᐗᐞ ᐃᐃᒫ ᐆᑌᓈᕽ ᐌᒌᓂᒡ ᐅᐅ ᑳᐃᑯᒡ ᒋᑆ ᐸᑭᔑᒧᓂᒡ ᑮᓯᓲᓐ, ᐌᑯᓀᓐ ᓇᐗᒡ ᑳᔒᐗᕽ ᐊᐲᒡ ᐐᓐ ᐃᐃ ᐋᒨᐎ ᓰᓯᐹᑾᑦ? ᐌᑯᓀᓐ ᓇᐗᒡ ᒣᔥᑲᐎᓰᒪᑲᒃ ᐊᐲᒡ ᐐᓐ ᒥᔑᐱᔑᐤ? ᐅᑮᐃᑰᐞ᙮ ᒦᔥ ᓵᒥᓴᓐ ᑳᐃᓈᒡ, ᑮᔥᐱᓐ ᓴ ᓂᐱᔑᑮᒻ ᐋᐸᒋᐋᓯᐌᑭᐸᓐ ᑮᐲᑯᑲᒥᑭᐱᒋᑫᔦᒃ, ᑳᐐᓐ ᓴ ᑭᑖᑮ ᑭᑫᑕᓰᒻ ᐁᑭᑑᒪᑲᒃ ᒪᔭᑭ ᐃᑭᑐᐎᓐ ᑫᑰᓐ ᑳᐃᑭᑑᒪᑲᒃ, ᑮᐃᑭᑐ᙮ 19 ᒦᑕᔥ ᑳᑎᐯᒋᑫᓂᒡ ᐅᑕᒑᑯᓂ ᑳᑮ ᒪᔥᑲᐎ ᓈᓯᑳᑯᒡ᙮ ᐌᑎ ᑕᔥ ᑮᐃᔖ ᐆᑌᓈᕽ ᐊᔥᑫᓬᐊᓐ Ashkelon ᐁᑮ ᐊᐎ ᓂᓵᒡ ᓂᓯᒥᑕᓇ 30 ᐃᓂᓂᐗᐞ ᐁᑮ ᒪᒪᔑᔥᑰᓇᒪᐙᒡ ᑳᑭᑭᔥᑲᒥᓂᒡ᙮ ᒦᔥ ᑳᐃᔑ ᒦᓈᒡ ᐃᐃ ᐃᓂᓂᐗᐞ ᑫᒣᔥᑯᒋᑯᓇᔮᑕᒥᓂᒡ ᑳᑮ ᐐᑕᒫᑯᒡ ᐁᑭᑑᒪᑲᓂᓂᒃ ᒪᔭᑭ ᐃᑭᑐᐎᓐ᙮ ᐐᑫ ᑕᔥ ᑮᓂᔥᑳᑎᓯ᙮ ᒦᑕᔥ ᑳᐃᔑ ᑮᐌᒡ ᐅᑌᑌᓐ ᐅᑖᐎᓂᓃᕽ᙮ 20 ᓵᒥᓴᓐ ᐃᑕᔥ ᐐᐗᓐ ᑮᒦᑭᐙᑲᓂᐎᐗᓐ, ᐁᑮ ᒦᓂᒥᓐᒡ ᓭᔮᑭ ᐐᒌᐙᒡ ᑳᑮ ᐐᒋᑳᐸᐎᑖᑯᒡ ᑮᑭᒋ ᐐᑎᑫᐸᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society