ᐅᓈᑯᓂᑫᒃ 13 - ᐅᒋᐺ ᑭᒋᒪᓯᓇᐃᑲᓐᓵᒥᓴᓐ ᐊᐲ ᑮᓂᑖᐎᑭᒡ 1 ᐃᔅᕒᐃᔭᓬᐊᒃ Israel ᓴ ᒦᓇᐙ ᑮᒪᒋᐃᔑᒋᑫᐗᒃ ᐁᓈᓴᒦᓂᒡ ᑳᑎᐯᒋᑫᓂᒡ; ᐅᑮ ᐸᑭᑎᓂᑯᐙᓐ ᐃᑕᔥ ᐱᓵᓐ ᐃᑯ ᒋᑎᐯᓂᒥᑯᓂᒡ ᐱᓬᐃᔅᑏ Philistines ᑳᑎᓄᐎᓂᒡ ᓃᒥᑕᓇ 40 ᑕᓱ ᐱᐴᓐ᙮ 2 ᐃᐃ ᓴ ᐊᐲ ᑮᐊᔮ ᐃᓂᓂ ᒣᓅᐗ Manoah ᐁᐃᔑᓂᑳᓱᒡ, ᐁᑮ ᐅᒌᒡ ᐆᑌᓈᕽ ᓲᕒᐊ Zorah ᐁᒋᑳᑌᓂᒃ ᑌᓂᕽ Dan ᐁᑮ ᐅᑕᑳᓀᓯᒡ᙮ ᐐᐗᓐ ᑕᔥ ᑳᐐᓐ ᐅᑮ ᑲᔥᑭᑑᓰᓂ ᒋᐊᔮᐙᓂᒡ ᐊᐱᓅᒌᔕᐞ᙮ 3 ᑳᑎᐯᒋᑫᓂᒡ ᐃᑕᔥ ᐅᑌᒐᓬᐃᒥᓂ ᐅᑮ ᓈᑯᓰᑖᑰᓐ ᐊᐊ ᐃᑴ ᐁᑮᐃᑯᒡ, ᐃᓇᔥᑫ ᑳᐐᓐ ᓅᑯᒻ ᑭᑲᔥᑭᑑᓰᓐ ᒋᐊᔮᐗᒡ ᐊᐱᓅᒌᔥ, ᐐᐸ ᑕᔥ ᑭᑲ ᑭᑭᔥᑲᐙᐗᔅ, ᒋᓂᑖᐎᑭᐊᒡ ᑸᐎᓭᔅ᙮ 4 ᐋᐱᒋ ᓴ ᐊᔮᒀᒥᓰᑲᓐ; ᑫᑯ ᒥᓂᑴᑫᓐ ᔔᒥᓈᐳ, ᑳᒪᔥᑲᐙᒃ ᑲᔦ ᒥᓂᑴᐎᓐ, ᑫᑯ ᑲᔦ ᒦᒋᑫᓐ ᒦᒋᒻ ᑳᐸᑭᑎᓂᑯᓯᐌᒃ ᒋᒦᒋᔦᒃ᙮ 5 ᑭᑲ ᑭᑭᔥᑲᐙᐗᔅ ᐃᑕᔥ ᒋᓂᑖᐎᑭᐊᒡ ᑸᐎᓭᔅ, ᑳᐐᓐ ᑕᔥ ᐐᑳ ᑲᔥᑭᐹᓱᓐ ᒋᐋᐸᑕᓂᓂᒃ ᐅᑎᒀᓂᕽ; ᐋᓃᔥ ᐊᐊ ᑸᐎᓭᔅ ᑫᓂᑖᐎᑭᒡ ᐅᑑᒋ ᒫᒌ ᑎᐱᓇᐌᐎᓰᒥᑰᓐ ᑭᔐᒪᓂᑑᓐ ᓈᓴᕒᐋᔨᑦ Nazirite ᐁᑎᓄᐎᒡ᙮ ᒦᑕᔥ ᐊᐊ ᑫᐱᒫᒋᐋᒡ ᐃᔅᕒᐃᔭᓬᐊᐞ ᑳᔑ ᑎᐯᓂᒥᑯᓂᒡ ᐱᓬᐃᔅᑏ ᑳᑎᓄᐎᓂᒡ, ᐅᑮᐃᑰᓐ᙮ 6 ᒦᑕᔥ ᐊᐊ ᐃᑴ ᑳᑮ ᐱᐊᑕ ᐙᐸᒫᒡ ᐅᓈᐯᒪᓐ ᐁᑮᐃᓈᒡ, ᑭᔐᒪᓂᑑ ᐅᑎᓂᓃᒪᓐ ᓴ ᓂᑮ ᐱᐊᑕ ᐙᐸᒥᒥᒃ, ᐁᑮ ᐃᔑᓈᑯᓯᓂᒡ ᑖᐱᔥᑰ ᑳᐃᔑᓈᑯᓯᓂᒡ ᑭᔐᒪᓂᑑ ᐅᑌᒐᓬᐃᒪᓐ, ᑮᑯᑖᓂ ᓈᑯᓯᐗᓐ᙮ ᑳᐐᓐ ᐃᑕᔥ ᓂᑮ ᑲᑴᒋᒫᓰ ᐋᑎ ᑳᐱ ᐅᒌᑴᓐ, ᑳᐐᓐ ᑲᔦ ᓂᑮ ᐐᑕᒫᑯᓰ ᐅᐐᓱᐎᓐ᙮ 7 ᒦᔥ ᐅᐅ ᑳᐃᔑᒡ, ᐃᓇᔥᑫ ᑭᑲ ᑭᑭᔥᑲᐙᐗᔅ ᒋᓂᑖᐎᑭᐊᒡ ᑸᐎᓭᔅ᙮ ᑫᑯ ᒥᓂᑴᑫᓐ ᔔᒥᓈᐳ, ᑳᒪᔥᑲᐙᒃ ᑲᔦ ᒥᓂᑴᐎᓐ, ᑫᑯ ᑲᔦ ᒦᒋᑫᓐ ᒦᒋᒻ ᑳᐸᑭᑎᓂᑯᓯᐌᒃ ᒋᒦᒋᔦᒃ᙮ ᐊᐊ ᓴ ᑸᐎᓭᔅ ᓂᑖᐎᑭᒡ ᐅᑲ ᐅᒋ ᒫᒌ ᑎᐱᓇᐌᐎᓰᒥᑰᓐ ᑭᔐᒪᓂᑑᓐ ᓈᓴᕒᐋᔨᑦ ᒋᑎᓄᐎᒡ ᐲᓂᔥ ᒌᔥᒀ ᐱᒫᑎᓯᒡ, ᐅᑮᐃᓈᓐ᙮ 8 ᒦᑕᔥ ᒣᓅᐗ ᑳᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ ᐁᑮᐃᓈᒡ, ᐆ ᑌᐯᒋᑫᔭᓐ, ᑕᑲ ᑭᔐᒪᓂᑑ ᐅᑎᓂᓃᒪᓐ ᑳᑮ ᐲᒋᓂᔕᐗᑎᐸᓐ ᒦᓇᐙ ᑕᑕᑯᔑᓐ ᒋᑭᑭᓄᐊᒪᐎᔭᒥᓐᒡ ᐋᓃᓐ ᑫᔑ ᐅᐱᑭᐃᒪᑭᒡ ᐃᓂ ᑸᐎᓭᓴᓐ ᑫᓂᑖᐎᑭᓂᒡ, ᑮᐃᑭᑐ᙮ 9 ᑭᔐᒪᓂᑑᓐ ᓴ ᑕᔥ ᐅᑮ ᓅᑖᑰᓐ ᒣᓅᐗ ᑳᑮ ᐃᔑ ᐊᓇᒥᐁᑕᐙᒡ᙮ ᒦᑕᔥ ᐊᐊ ᐃᑴ ᐁᓇᓇᒪᑕᐱᒡ ᒥᔕᐗᑲᒥᒃ, ᑳᑮ ᓈᓯᑳᑯᒡ ᒦᓇᐙ ᑭᔐᒪᓂᑑ ᐅᑌᒐᓬᐃᒥᓂ᙮ ᐅᓈᐯᒪᓐ ᐃᑕᔥ ᒣᓅᐗᐗᓐ ᑳᐐᓐ ᐃᐃᒫ ᐅᑮ ᐐᒌᐎᑯᓰᓐ᙮ 10 ᐌᔩᑉ ᓴ ᐊᐊ ᐃᑴ ᑮᐊᐸᑑ ᐁᑮ ᐊᐎ ᐐᑕᒪᐙᒡ ᐅᓈᐯᒪᓐ ᐁᑮᐃᓈᒡ, ᐃᓇᔥᑫ ᓴ ᐊᐊ ᐃᓂᓂ ᑳᑮ ᐲᔖᐸᓐ ᐅᑖᓈᕽ ᐁᑮᔑᑲᓂᓂᒃ ᒦᓇᐙ ᓂᑮ ᓈᑯᓰᑖᒃ, ᑮᐃᑭᑐ᙮ 11 ᒦᔥ ᒣᓅᐗ ᑳᑮ ᐸᓯᑸᒡ ᐁᑮ ᐱᒥᓂᔕᐙᒡ ᐐᐗᓐ᙮ ᐊᐲ ᑕᔥ ᑳᐅᑎᑕᕽ ᐁᔑᐊᔮᓂᒡ ᐃᓂ ᐃᓂᓂᐗᓐ, ᒦᔥ ᑳᐃᓈᒡ, ᑮᓐ ᐃᓇ ᐃᓂᓂ ᑳᑮ ᑲᓅᓈᐸᓐ ᓂᐐᐗᓐ? ᐁᔭᐞ, ᓃᓐ ᐅᔕ! ᐅᑮᐃᑰᓐ᙮ 12 ᒦᔥ ᐅᐅ ᒣᓅᐗ ᑳᐃᓈᒡ, ᐊᐲ ᓴ ᐃᔑᓭᒃ ᑳᐃᑭᑐᔭᓐ, ᐋᓃᓐ ᐃᑕᔥ ᑫᔑ ᐱᒫᑎᓯᒡ ᐊᐊ ᑸᐎᓭᔅ, ᐋᓃᓐ ᑲᔦ ᑫᐃᓇᓄᑮᒡ? ᐅᑮᐃᓈᓐ᙮ 13 ᑳᑎᐯᒋᑫᓂᒡ ᐅᑌᒐᓬᐃᒥᓂ ᓴ ᐅᐅ ᐅᑮᐃᑰᓐ, ᒦ ᓴ ᐃ ᐁᔑᓈᑾᓂᓂᒃ ᑲᑭᓇ ᒌᔑᒋᑫᒡ ᑭᐐᐤ ᑳᑮᐃᓇᒃ᙮ 14 ᑳᐐᓐ ᓴ ᐅᑲ ᒦᒋᓰᓐ ᑫᑰᓐ ᐌᒌᒪᑲᓂᓂᒃ ᔔᒥᓈᑎᑯᕽ, ᑳᐐᓐ ᑲᔦ ᑕᒥᓂᑴᓰ ᔔᒥᓈᐳ, ᒣᔥᑲᐙᑲᒥᓂᓂᒃ ᑲᔦ ᒥᓂᑴᐎᓐ᙮ ᑳᐐᓐ ᑲᔦ ᐅᑲ ᒦᒋᓰᓐ ᑳᒪᓈ ᒦᒋᓈᑳᑌᓂᒃ ᑫᑰᓐ; ᒦ ᓴ ᐃ ᑫᐃᔑᒋᑫᒡ ᑲᑭᓇ ᑫᑰᓐ ᑳᑮ ᐃᓇᑭᐸᓐ, ᐅᑮᐃᑰᓐ᙮ 15 ᒦᑕᔥ ᒣᓅᐗ ᑳᐃᓈᒡ ᐃᓂ ᐁᒐᓬᐊᓐ, ᑕᑲ ᓴ ᒦ ᐅᒫ ᐊᔮᓐ, ᒋᑾᔮᒋᑕᒫᑰᔭᓐ ᒫᓇᑎᑰᔅ, ᐅᑮᐃᓈᓐ᙮ 16 ᒦᔥ ᑳᐃᑯᒡ ᐃᓂ ᐁᒐᓬᐊᓐ, ᒥᓴᐙ ᓴ ᑯ ᐅᐅᒫ ᐋᓇ ᑭᒋᐎᓂᔭᓐ, ᑳᐐᓐ ᓴ ᓂᑲ ᒦᒋᓰᓐ ᑭᒦᒋᒥᒻ᙮ ᑮᔥᐱᓐ ᐃᑕᔥ ᐐᓐ ᑾᔮᒋᑑᔦᒃ ᐙᐸᑭᑎᓈᓱᐙᑫᔦᒃ, ᑳᑎᐯᒋᑫᒡ ᓴ ᐸᑭᑎᓇᒪᐙᑫᒃ ᐃᐃᐌᓂ, ᐅᑮᐃᑰᓐ᙮ ᑳᐐᓐ ᐄᑐᒃ ᐅᑮ ᑭᑫᓂᒫᓰᓐ ᐁᐋᐎᓂᒡ ᑳᑎᐯᒋᑫᓂᒡ ᐅᑌᒐᓬᐃᒥᓂ᙮ 17 ᒦᔥ ᐅᐅ ᒣᓅᐗ ᑳᐃᓈᒡ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ, ᐋᓃᓐ ᐃᑕᔥ ᐁᔑᓂᑳᓱᔭᓐ, ᒋᑭᑌᓂᒥᑰᔭᓐ ᐊᐲ ᑌᐺ ᐃᔑᓭᒃ ᑳᐃᑭᑐᔭᓐ? ᐅᑮᐃᓈᓐ᙮ 18 ᐅᐅ ᑕᔥ ᐅᑮᐃᑰᓐ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ, ᐌᑯᓀᓐ ᐃᑕᔥ ᐌᒋ ᑲᑴᒋᒥᔭᓐ ᐁᔑᓂᑳᓱᔮᓐ, ᐁᒫᒪᑳᑌᑖᑾᒃ ᐃᑕᔥ? ᐅᑮᐃᑰᓐ᙮ 19 ᒦᔥ ᒣᓅᐗ ᑳᑮ ᐅᑖᐱᓈᒡ ᐅᔥᑭ ᒫᓇᑎᑰᓴᓐ, ᑕᑯ ᑲᔦ ᐸᑴᔑᑲᓂᒥᓇᓐ, ᐁᑮ ᐸᑭᑎᓇᒪᐙᒡ ᐃᐃᒫ ᐊᓯᓃᕽ ᑳᑎᐯᒋᑫᓂᒡ᙮ ᒦᔥ ᑳᑮ ᒫᒪᑳᒋᒋᑫᓂᒡ ᒣᒀ ᒣᓅᐗ, ᐐᐗᓐ ᑲᔦ ᐁᑲᓇᐙᐸᒫᐙᒡ᙮ 20 ᐃᐃᒫ ᑕᔥ ᑳᔑ ᐸᑭᑎᓈᓱᐎᓐᒡ ᐃᐃ ᐃᔥᑯᑌᓂ ᑭᒋ ᑮᔑᑯᕽ ᐃᓇᑫ ᑮᐃᓇᑯᓀᓂ᙮ ᒦᑕᔥ ᐃᐃᒫ ᐃᔥᑯᑌᕽ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ ᑳᐊᓂ ᐃᔑ ᐃᔥᐱᔥᑳᓂᒡ᙮ ᒣᓅᐗ ᑕᔥ ᐐᐗᓐ ᑲᔦ ᐅᐅ ᐁᐃᓈᐱᔑᓄᐙᒡ, ᒦ ᓴ ᐃ ᒥᑕᑲᒥᒃ ᑳᐃᔑ ᐊᓂᒥᑯᐸᓂᐅᐙᒡ᙮ 21 ᐊᐲ ᑕᔥ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ ᒦᓇᐙ ᐁᑮ ᐅᒋ ᓈᑯᓰᑖᑯᓯᒃ ᒦ ᐃ ᒣᓅᐗ, ᐐᐎᓂ ᑲᔦ, ᑳᑮ ᑭᑫᑕᒧᐙᒡ ᑳᑎᐯᒋᑫᓂᒡ ᐅᑌᒐᓬᐃᒥᓂ ᐁᐋᐎᓂᒡ ᐃᓂ᙮ 22 ᒦᔥ ᒣᓅᐗ ᑳᐃᓈᒡ ᐐᐗᓐ, ᒦ ᓴ ᐃ ᑌᐺ ᒋᓂᐳᔭᕽ, ᑭᑮ ᐙᐸᒫᓈᓐ ᐄᑐᒃ ᑭᔐᒪᓂᑑ, ᑮᐃᑭᑐ᙮ 23 ᐅᐅ ᑕᔥ ᐐᐗᓐ ᐅᑮᐃᑰᓐ, ᑮᔥᐱᓐ ᓴ ᑳᑎᐯᒋᑫᒡ ᐃᓀᑕᑭᐸᓐ ᐁᐐ ᓂᓯᓇᕽ, ᑳᐐᓐ ᐄᑐᒃ ᐅᑖᑮ ᒥᓍᐸᑕᓰᓐ ᑳᑮ ᐸᑭᑎᓇᒪᐗᕽ ᑳᐊᒀᑭᑌᓂᒃ ᑎᓄ ᐸᑭᑎᓈᓱᐎᓐ, ᐸᑴᔑᑲᓂᒥᓇᓐ ᑲᔦ, ᑳᐐᓐ ᑲᔦ ᑭᑖᑮ ᐙᐸᑕᐃᑯᓰᓈᓐ ᑲᑭᓇ ᐅᓄ, ᑳᐐᓐ ᑲᔦ ᑭᑖᑮ ᐸᑭᑎᓂᑯᓰᓈᓐ ᒋᓅᑕᒧᐗᕽ ᐅᓄ ᐅᐅ ᐃᔑ ᐊᐲ, ᐅᑮᐃᑰᓐ᙮ 24 ᒦᑕᔥ ᐊᐊ ᐃᑴ ᑳᑮ ᓂᑖᐎᑭᓈᐗᓱᒡ ᐁᑮ ᐊᔮᐙᒡ ᑸᐎᓭᓴᓐ; ᓵᒥᓴᓐ ᐁᑮ ᐃᔑᓂᑳᓈᒡ᙮ ᐊᐊ ᑕᔥ ᐊᐱᓅᒌᔥ ᑮᐊᓂ ᐅᐱᑭ, ᐁᑮ ᔕᐌᓂᒥᑯᒡ ᑲᔦ ᑳᑎᐯᒋᑫᓂᒡ᙮ 25 ᑳᑎᐯᒋᑫᓂᒡ ᐅᑕᒑᑯᓂᓂ ᓴ ᑮᒫᑕᓄᑮᐗᓐ ᐅᐱᒫᑎᓯᐎᓂᕽ ᑮᐊᔮᒡ ᑳᑮ ᐃᔑ ᑲᐯᔑᓂᒡ ᑌᓂᕽ Dan, ᐃᐃᒫ ᓇᓴᐗᔭᐄ ᐆᑌᓈᕽ ᓲᕒᐊ Zorah, ᐆᑌᓈᕽ ᐁᔥᑌᔪᓬ Eshtaol ᑲᔦ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society