ᐄᐸᕒᐆᐗᒃ 4 - ᐅᒋᐺ ᑭᒋᒪᓯᓇᐃᑲᓐ1 ᑫᑮᓇᐎᓐᑦ ᓴ ᓅᑯᒻ ᑭᔐᒪᓂᑑ ᑭᐐᒦᓂᑯᓈᓐ ᑳᑮᐊᔓᑕᒫᑫᒡ, ᐊᓉᐱᐎᓐ ᑳᑮᑕᔑᑕᕽ ᒋᑌᐱᓇᒧᐗᑭᒡ᙮ ᑕᑲ ᑕᔥ ᐊᔮᒀᒥᓯᑖ, ᑮᓇᐙ ᑳᑕᔑᔦᒃ ᒋᒥᑲᐙᓯᐎᓐᒡ ᐊᐎᔭ ᒋᑆ ᓇᐎᑑᒡ ᒋᑌᐱᓇᕽ ᐃᐃ ᐊᓉᐱᐎᓐ ᑳᑮᐐᑌᓂᒃ᙮ 2 ᑭᑮᓅᑖᒥᓐ ᓴ ᐃᐃ ᒥᓍᒋᒧᐎᓐ ᑖᐱᔥᑰ ᑫᐐᓇᐙ ᑳᑮᐃᔑᓅᑕᒧᐙᒡ᙮ ᑳᐐᓐ ᐃᑕᔥ ᑫᑰᓂᓂ ᐅᑮᐃᓈᐸᒋᑑᓰᓈᐙ ᐃᐃ ᑎᐹᒋᒧᐎᓐ ᐋᓇᐐᓐ ᐁᑮᓅᑕᒧᐙᒡ, ᐋᓃᔥ ᑳᐐᓐ ᑌᐺᑕᒧᐎᓂᕽ ᐅᑮᐃᔑ ᐅᑖᐱᓇᓰᓈᐙ᙮ 3 ᑮᓇᐎᓐᑦ ᐃᑕᔥ ᑳᑌᐺᑕᒪᕽ ᑭᐲᑎᑫᒥᓐ ᐃᐃᒫ ᐊᓉᐱᐎᓂᕽ ᑭᔐᒪᓂᑑ ᑳᑮᐊᔓᑕᒫᑫᒡ᙮ ᐋᓃᔥ ᑮᐃᑭᑐ: ᐁᑮᒫᓈᐸᒪᒀ ᑕᔥ ᒦᐃ ᑳᐃᔑᐊᔓᑕᒫᓐ, ᑳᐐᓐ ᓴ ᐐᑳ ᑕᐲᑎᑫᓰᐗᒃ ᐃᐃᐌᓂ ᐊᑮᓂ ᑫᑮᐃᔑ ᐊᓉᐱᐙᐸᓐ ᑳᐐᒦᓇᒀᐸᓐ᙮ ᒦ ᓴ ᐅᐅ ᑳᐃᑭᑐᒡ ᐋᓇᐐᓐ ᐁᑮᐃᔑ ᑮᔑᓈᑾᓂᓂᑭᓐ ᐅᑕᓄᑮᐎᓇᓐ ᐊᐸᓀ ᑳᑮᐃᔥᒀᐅᔑᑑᒡ ᐅᐅᐌᓂ ᐊᑮᓂ᙮ 4 ᓂᑯᒋ ᓴ ᑭᒋᒪᓯᓇᐃᑲᓂᕽ ᑭᔐᒪᓂᑑ ᐅᑮᑕᔑᑖᓐ ᐃᐃ ᑳᓃᔣᓱ ᑮᔑᑾᑳᓂᒃ: ᑭᔐᒪᓂᑑ ᑮᐊᓉᐱ ᐁᓃᔣᓱ ᑮᔑᑾᑳᓂᒃ ᐃᐃᒫ ᐅᒋ ᐅᑕᓄᑮᐎᓂᕽ, ᐁᐃᔑᐲᐃᑳᑌᒃ᙮ 5 ᐃᐃ ᑕᔥ ᐯᔑᑾᓐ ᑫᔮᐱ ᐊᓂᑕᔑᒋᑳᑌ: ᑳᐐᓐ ᓴ ᐐᑳ ᑕᐲᑎᑫᔥᑳᓰᐗᒃ ᐃᐃᐌᓂ ᐊᑮᓂ ᑫᑮᐃᔑᐊᓉᐱᐙᐸᓐ ᑳᐐᒦᓇᒀᐸᓐ᙮ 6 ᑫᔮᐱ ᑕᔥ ᑕᐎᓂᑳᑌ ᐱᓵᓂᑯ ᐊᐎᔭ ᒋᐲᑎᑫᒡ ᐃᐃᒫ ᐊᓉᐱᐎᓂᕽ᙮ ᐃᑭ ᑕᔥ ᑳᑮᐐᑕᒪᐎᑣᐸᓐ ᒥᓄᑎᐹᒋᒧᐎᓐ ᑳᐐᓐ ᑮᐲᑎᑫᓰᐗᒃ, ᐋᓃᔥ ᑮᔕᔒᐱᑕᒨᒃ᙮ 7 ᒦ ᓴ ᑕᔥ ᐅᐅᒫ ᑌᐺ ᐁᔑᐙᐸᑕᒧᐗᕽ ᑭᔐᒪᓂᑑ ᐁᑮᐐᑕᕽ ᐯᔑᒃ ᑯᑕᒃ ᑳᑮᔑᑲᓂᓂᒃ, ᓅᑯᒻ ᑳᑮᔑᑲᒃ ᐁᑮᐃᔑᓂᑳᑕᕽ᙮ ᑌᐱᑑᓐ David ᐅᑮᐋᐸᒋᐋᓐ ᐁᑮᐃᑭᑐᒡ ᑖᐱᔥᑰ ᐋᔕ ᒣᐎᔕ ᑳᑮᐃᑭᑐᑯᐸᓀᓐ: ᑮᔥᐱᓐ ᓅᑕᐌᒃ ᑭᔐᒪᓂᑑ ᐁᑲᓅᓂᓀᒃ ᓅᑯᒻ ᑳᑮᔑᑲᓂᓂᒃ, ᑫᑯ ᔕᔒᐱᑕᐙᑫᒃ᙮ 8 ᐃᓇᔥᑫ ᑮᔥᐱᓐ ᒑᔓᐙ Joshua ᑮᒦᓈᑯᐸᓀᓐ ᐊᓉᐱᐎᓂᓂ ᐃᐃ ᐯᒫᑎᓯᓂᒡ ᑳᑮᐱᒥᐎᓈᒡ, ᑳᐐᓐ ᐃᑕᔥ ᑭᔐᒪᓂᑑ ᐅᑖᑮᑕᔑᑕᓰᓐ ᒦᓇᐙ ᓈᓈᑫ ᑯᑕᒃ ᑫᑮᔑᑲᓂᓂᒃ ᒋᑮᐊᓉᐲᐎ ᑮᔑᑲᓂᓂᑭᐸᓐ᙮ 9 ᒦᑕᔥ ᐁᔑᓈᑾᒃ ᐯᒫᑎᓯᐙᒡ ᑳᑎᐯᓂᒥᑯᐙᒡ ᑭᔐᒪᓂᑑᓐ ᑫᔮᐱ ᐁᐃᔥᑯᓇᒪᐎᑣ ᒋᐊᓉᐱᐙᒡ ᑖᐱᔥᑰ ᑭᔐᒪᓂᑑ ᑳᑮᐃᔑ ᐊᓉᐱᑯᐸᓀᓐ ᐅᒋ ᐅᑕᓄᑮᐎᓂᕽ ᐁᓃᔣᓱ ᑮᔑᑾᑳᓂᒃ᙮ 10 ᐊᐎᔭ ᓴ ᑳᑌᐱᓇᕽ ᐃᐃ ᐊᓉᐱᐎᓐ ᑭᔐᒪᓂᑑᓐ ᑳᑮᐊᔓᑕᒫᑫᓂᒡ, ᑫᐐᓐ ᓴ ᑕᐊᓉᐱ ᐅᒋ ᐅᑕᓄᑮᐎᓂᕽ ᑖᐱᔥᑰ ᑭᔐᒪᓂᑑᓐ ᑳᐃᔑᐊᓉᐱᓂᒡ᙮ 11 ᑕᑲ ᑕᔥ ᑫᑮᓇᐎᓐᑦ, ᐌᐌᓂ ᐃᔑᒋᑫᑖ ᒋᑌᐱᓇᒪᕽ ᐃᐃ ᐊᓉᐱᐎᓐ, ᐊᐎᔭ ᓴ ᑮᓇᐎᓐᑦ ᒋᓅᑌᑆᓇᐎᐅᓯᐗᕽ, ᒋᐃᔑᒋᑫᐙᓯᐗᕽ ᑳᑮᐃᔑᒋᑫᐙᒡ ᐁᑮᔕᔒᐱᑕᒧᐙᒡ᙮ 12 ᑭᔐᒪᓂᑑ ᑳᐃᑭᑐᒡ ᓴ ᐱᒫᑕᓂᓂ, ᐊᓄᑮᒪᑲᓂᓂ ᑲᔦ, ᓇᐗᒡ ᑲᔦ ᑳᔖᓂ ᐊᐲᒡ ᐐᓐ ᑳᐄᑕᐎᑳᔖᓂᒃ ᐸᔑᐸᐃᑫᐎᑯᒫᓐ᙮ ᒦ ᓴ ᐁᐲᒋᑳᔖᓂᒃ ᐃᐃ ᐅᑎᑭᑐᐎᓐ, ᐁᑲᔥᑭᒋᑫᒪᑲᓂᓂᒃ ᒋᐅᒋᒋᔑᑫᒪᑲᓂᓂᒃ ᐋᑎ ᐁᔑᐋᓂᑲᐎᓯᓂᓂᒃ ᐱᒫᑎᓯᐎᓂᓂ ᐃᐃᒫ ᐊᒑᑯᕽ᙮ ᒥᑯᔑᑫᒪᑲᓂᓂ ᑲᔦ ᐋᑎ ᐅᑲᓂᓂ ᐃᐃ ᑲᔦ ᐹᓴᐃᐎᓈᓂᓂ ᐁᔑᐋᓂᑲᐎᓯᓂᓂᒃ᙮ ᑭᑫᑕᒫᒪᑲᓐ ᐊᐎᔭᓐ ᐁᔑᒥᓴᐌᒋᑫᓂᒡ ᐅᑌᐃᓃᕽ, ᐁᔑᓈᓈᑲᑕᐌᒋᑫᓂᒡ ᑲᔦ᙮ 13 ᑳᐐᓐ ᓴ ᑫᑰᓂᓂ ᑲᑭᓇ ᑳᐅᔑᒋᑳᑌᓂᒃ ᑖᑳᑕᒪᐙᓰ ᑭᔐᒪᓂᑑ ᒋᐙᐸᑕᓯᑭᐸᓐ᙮ ᑳᐐᓐ ᑲᔦ ᑫᑰᓐ ᐅᐱᔂᐸᑕᓰᓐ, ᑲᑭᓇ ᓴ ᑫᑰᓂᓂ ᒧᔐᓈᑾᓂᓂ ᐁᓈᓴᒦᒡ᙮ ᐐᓐ ᓴ ᑕᐱᓇᐌ ᑫᐐᑕᒪᐗᕽ ᐋᓃᓐ ᑳᑮᐱ ᐃᔑᒋᑫᐗᕽ᙮ ᒋᓴᔅ ᑳᑭᒋ ᐃᓀᑖᑯᓯᒡ ᑭᒋᐊᓇᒥᐁᐎᑭᒫ 14 ᑕᑲ ᑕᔥ ᐋᔩᒋᒥᒋᒥᓇᑖ ᐃᐃ ᑭᑌᐺᑕᒧᐎᓂᓈᓐ ᑳᐐᑕᒪᕽ᙮ ᐋᓃᔥ ᑭᑕᔮᐙᓈᓐ ᐁᑭᒋ ᐃᓀᑖᑯᓯᒡ ᒫᐗᒡ ᑭᑭᒋᐊᓇᒥᐁᐎᑭᒫᒥᓈᓐ ᐃᔑᑾᔭᒃ ᐁᑮᐃᔖᒡ ᑭᔐᒪᓂᑑᓐ ᑳᐃᔑᐊᔮᓂᒡ᙮ ᒦ ᓴ ᐊᐊ ᒋᓴᔅ ᑭᔐᒪᓂᑑ ᐅᑯᓯᓴᓐ᙮ 15 ᐗᐊ ᑕᔥ ᒫᐗᒡ ᑭᑭᒋᐊᓇᒥᐁᐎᑭᒫᒥᓈᓐ, ᑳᐐᓐ ᐐᓐ ᑭᒥᒋᑰᐹᑌᓂᒥᑯᓰᓈᓐ ᑳᐃᔑᐱᒪᑎᓯᔭᕽ᙮ ᑫᐐᓐ ᐅᔕ ᒥᓯᐌ ᑮᐃᔑᑲᑴᒋᐋ ᑖᐱᔥᑰ ᑮᓇᐎᓐᑦ ᑳᐃᔑᑲᑴᒋᐃᑰᔭᕽ, ᑳᐐᓐ ᐃᑕᔥ ᐐᑳ ᑮᒪᒋᑑᑕᓰ᙮ 16 ᑕᑲ ᑕᔥ ᑮᓇᐎᓐᑦ ᓲᑭᑌᐁᑖ ᒋᓈᓯᑲᒧᐗᕽ ᑭᔐᒪᓂᑑ ᐅᑭᒋᐅᑭᒫᐗᐱᐎᓐ, ᒦ ᐋᓃᔥ ᐃᒫ ᐌᑎᓂᑳᑌᒃ ᑭᔐᐙᑎᓯᐎᓐ, ᒦ ᓴ ᐃᒫ ᑫᔑᑌᐱᓇᒪᕽ ᑰᐹᓯᓈᑰᐎᓐ, ᑭᑲᒦᓂᑰᒥᓐ ᑲᔦ ᑭᔐᐙᑎᓯᐎᓐ ᑫᐐᒋᐃᑯᔭᕽ ᐊᐲ ᓅᑌᓭᔭᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society