Esara 6 - ᐅᒋᐺ ᑭᒋᒪᓯᓇᐃᑲᓐᒫᐗᒡ ᑭᒋᐅᑭᒫ ᓵᐃᕒᐊᔅ ᑮᒥᑭᑳᑌᓂᒃ ᑳᑮᐃᓈᑯᓂᑫᑯᐸᓀᓐ 1 ᒦ ᐃᐌ ᑳᑮ ᐅᒋ ᐅᓈᑯᓂᑫᒡ ᑭᒋᐅᑭᒫ ᑕᕒᐋᔭᔅ Darius, ᒋᑲᑴ ᒥᑭᑳᑌᓂᑭᓐ ᐋᓃᓐ ᐁᔑᐲᐃᑳᑌᓂᑭᓐ ᑫᑌ ᐅᔑᐲᐃᑲᓇᓐ ᑳᔑ ᑲᓇᐌᒋᑳᑌᓂᑭᓐ ᑭᒋ ᑫᑰᓇᓐ ᔑᑾ ᑳᐊᑭᑌᓂᑭᓐ ᐹᐱᓬᐊᓐ Babylon ᑭᒋ ᐆᑌᓈᕽ᙮ 2 ᐌᑎ ᑕᔥ ᑮᐃᔑ ᒥᑭᑳᑌᓂ ᑭᒋ ᐆᑌᓈᕽ ᐁᑭᐸᑖᓇ Ecbatana, ᒦᑎᔭ Media ᐊᑮᕽ ᒪᓯᓇᐃᑲᓐ ᑌᑎᐲᑭᓂᑳᑌᓂᒃ᙮ ᒦᔥ ᐅᐅ ᑳᐃᔑᐲᐃᑳᑌᓂᒃ, 3 ᓂᑕᒻ ᐊᐲ ᑳᐊᑮᐗᓂᓂᒃ ᑳᒫᒌ ᑭᒋᐅᑭᒫᐎᒡ ᓵᐃᕒᐊᔅ Cyrus, ᒦ ᓴ ᑳᐃᓈᑯᓂᑫᒡ ᐁᑕᔑᑕᕽ ᑭᔐᒪᓂᑑᓐ ᐅᑭᒋ ᐊᓇᒥᐁᐎᑲᒥᑯᓂ ᐁᔮᓂᒃ ᐆᑌᓈᕽ ᒉᕒᐆᓴᓬᐊᒥᕽ, ᑕᑲ ᑭᒋ ᐊᓇᒥᐁᐎᑲᒥᒃ ᑕᑕᔑ ᑮᐌ ᐅᔑᒋᑳᑌ, ᒋᐊᔮᒃ ᑫᑕᔑ ᐸᑭᑎᓈᓱᕽ, ᒋᑕᔑ ᐸᑭᑎᓂᑳᑌᑭᓐ ᑲᔦ ᑎᓄ ᑳᐊᒀᑭᓯᑳᑌᑭᓐ᙮ ᔖᑲᓯᒥᑕᓇ 90 ᑕᓱ ᒥᓯᑦ ᒋᐊᐲᑖᒃ, ᔖᑲᓯᒥᑕᓇ 90 ᑕᔥ ᑕᓱ ᒥᓯᑦ ᒋᐃᓂᑯᑾᑌᔮᒃ᙮ 4 ᐁᑕᓱ ᓂᓯᕽ ᒋᑭᔑᐹ ᐋᑸᑑᐙᐱᑭᔑᓄᐙᒡ ᑭᒋ ᐊᓯᓃᒃ, ᔑᑾ ᑕᔥ ᐋᐱᑎᕽ ᑭᒋ ᒥᑎᑰᒃ᙮ ᒥᓂᒃ ᓴ ᑯ ᑫᐃᓇᑭᑌᒃ ᑕᐅᒋ ᑎᐸᐃᑳᑌ ᐃᐃᒫ ᑭᒋᐅᑭᒫᐎ ᔔᓂᔮᕽ᙮ 5 ᐃᓂ ᓴ ᑲᔦ ᐋᐸᒋᒋᑲᓇᓐ ᐌᓵᐎ ᔔᓂᔮ ᐙᐱᑯᐗᑭᓐ, ᐌᔮᐹᐱᑯ ᔔᓂᔮ ᐙᐱᑯᐗᑭᓐ ᑲᔦ ᐌᒋ ᑎᐯᑖᑾᑭᓐ ᑭᔐᒪᓂᑑ ᐅᑭᒋ ᐊᓇᒥᐁᐎᑲᒥᑯᕽ, ᓀᐸᑲᓈᓴᕒ Nebuchadnezzar ᑳᑮ ᐲᑑᒡ ᐅᐅᒫ ᐹᐱᓬᐊᓐ ᐊᑮᕽ ᑳᑮ ᐅᒋ ᐲᑑᑯᐸᓀᓐ ᐁᔮᓂᒃ ᒉᕒᐆᓴᓬᐊᒥᕽ; ᒦ ᓴ ᐃᓂ ᑫᑮᐌᐎᒋᑳᑌᓂᑭᓐ, ᒋᑮᐌ ᐸᑭᑎᓂᑳᑌᓂᑭᓐ ᑭᔐᒪᓂᑑᓐ ᐅᑭᒋ ᐊᓇᒥᐁᐎᑲᒥᑯᓃᕽ ᐌᑎ ᒉᕒᐆᓴᓬᐊᒥᕽ, ᑮᐃᔑᐲᐃᑳᑌᓂ᙮ ᒫᐗᒡ ᑭᒋᐅᑭᒫ ᑕᕒᐋᔭᔅ ᑮᐊᓅᑮᒡ ᒋᐴᓇᓄᑮᓈᓂᐗᓯᓄᒃ 6 ᒦᑕᔥ ᐅᐅ ᒫᐗᒡ ᑭᒋᐅᑭᒫ ᑕᕒᐋᔭᔅ ᑳᐃᔑ ᓇᑴᐲᐃᑫᒡ, ᑕᑲ ᓴ ᑕᔥ ᑮᓐ ᑕᑏᓈᐃ Tattenai ᐌᑭᒫᑲᑕᒪᓐ ᐁᔑ ᓂᑳᐲᐊᓄᐗᕽ ᐃᔫᐸᕒᐁᑏᔅ ᓰᐱ, ᑲᔦ ᑮᓐ ᔒᑕᕒ ᐳᓯᓈᐃ Shethar Bozenai, ᐃᑭ ᑲᔦ ᑮᒋᑭᒫᒥᐙᒃ ᐁᔮᐙᒡ ᐌᑎ ᐊᑮᕽ, ᑫᑯ ᐌᑎ ᐃᔖᑫᒃ᙮ 7 ᑫᑯ ᐗᓇᔥᑴᐋᑫᒀᓂᒃ ᐁᐊᓄᑳᑕᒧᐙᒡ ᑭᔐᒪᓂᑑᓐ ᐅᐙᑳᐃᑲᓂᓂ᙮ ᑕᑲ ᐱᓵᓐ ᑌᐯᓂᒫᐙᒡ ᒎᐗᐞ, ᐃᑭ ᑲᔦ ᑳᓃᑳᓂᓯᐙᒡ ᒎᐗᐞ ᐅᑲ ᑮᐌ ᐅᔑᑑᓈᐙ ᑭᔐᒪᓂᑑᓐ ᐅᐙᑳᐃᑲᓂᓂ ᑳᑮ ᐃᔑ ᐸᑕᑭᑌᓂᑭᐸᓐ᙮ 8 ᒦᑕᔥ ᑲᔦ ᐅᐅ ᐁᓂ ᐃᓈᑯᓂᑫᔮᓐ, ᐅᐅ ᒋᐃᔑ ᐐᒋᐁᒀᐸᓐ ᐃᑭ ᑳᓃᑳᓂᓯᐙᒡ ᒎᐗᒃ ᑳᑮᐌ ᐅᔑᑑᐙᒡ ᐃᐃ ᑭᔐᒪᓂᑑᓐ ᐅᐙᑳᐃᑲᓂᓂ, ᐃᐃᒫ ᑭᒋᐅᑭᒫᐎ ᔔᓂᔮᕽ ᒋᐅᒋ ᑎᐸᐃᑳᑌᓂᑭᓐ ᒥᓂᒃ ᑫᒑᑭᓂᑫᐙᒡ, ᒋᑭᐱᒋᓭᓯᓄᒃ ᐃᐃ ᐊᓄᑮᐎᓐ᙮ ᐊᐊ ᔔᓂᔮ ᒋᐅᒌᒡ ᑖᑭᔅ tax ᑌᐸᐃᑳᓂᐗᕽ ᐃᐃᒫ ᐁᔑ ᓂᑳᐲᐊᓄᐗᕽ ᐃᔫᐸᕒᐁᑏᔅ ᓰᐱ᙮ 9 ᐌᑯᓀᓐ ᐃᑕᔥ ᐃᑯ ᑫᓅᑌᓭᓂᒃ ᑕᒦᓈᐗᒃ ᐁᑕᓱ ᑮᔑᒃ ᐁᔑ ᐊᑐᑕᒫᑫᐙᒡ ᐊᓇᒥᐁᐎᑭᒫᒃ ᒉᕒᐆᓴᓬᐊᒥᕽ᙮ ᑕᒦᓈᐗᒃ ᐋᐯ ᐱᔑᑮᓴᐞ, ᐋᐯ ᒫᓇᒑᓂᔕᐞ, ᑯᒫ ᑲᔦ ᐋᐯ ᒫᓇᒑᓂᔐᓴᐞ, ᑫᐊᒀᑭᓴᒪᐙᐙᒡ ᑭᔐᒪᓂᑑᓐ ᐁᔮᓂᒡ ᑭᒋᑮᔑᑯᕽ᙮ ᑯᒫ ᑲᔦ ᓅᑌᓭᐙᒡ ᐸᑴᔑᑲᓂᒥᓇᓐ, ᔒᐎᑖᑲᓐ, ᑯᒫ ᑲᔦ ᔔᒥᓈᐳ, ᑯᒫ ᑲᔦ ᐋᓬᐃᑉ ᐱᒥᑌ, ᐅᒋᑕ ᐱᑯ ᑕᒦᓈᐗᒃ᙮ 10 ᒦᑕᔥ ᑎᓄ ᐸᑭᑎᓈᓱᐎᓇᓐ ᒣᓍᐸᑕᒥᓂᒡ ᒋᐸᑭᑎᓇᒪᐙᐙᒡ ᑭᔐᒪᓂᑑᓐ ᐁᔮᓂᒡ ᑭᒋᑮᔑᑯᕽ, ᒋᐊᓇᒥᐁᑕᒪᐎᐙᒡ ᓃᓐ ᐁᑭᒋᐅᑭᒫᐎᐗᒃ, ᓂᑯᓯᓴᐞ ᑲᔦ ᒋᐅᒋ ᒥᓄᓭᔮᕽ᙮ 11 ᒦᑕᔥ ᐁᓂ ᐃᓈᑯᓂᑫᔮᓐ ᐊᐎᔭ ᓴ ᑯ ᑫᐲᑯᓇᕽ ᐅᐅ ᐃᓈᑯᓂᑫᐎᓐ, ᒦ ᓴ ᒋᐅᑖᐱᓂᑲᓂᐎᓂᒡ ᐋᔀᑯᐃᑲᓈᑎᑰᓐ ᐃᐃᒫ ᐅᐙᑳᐃᑲᓂᕽ᙮ ᒦᐗᓐ ᓴ ᐃᓂ ᑫᒌᐳᑯᓱᓂᒡ, ᒋᐋᐸᑎᓯᓂᒡ ᒋᐸᔑᐴᒌᐅᓐᒡ ᒋᐅᐸᑾᐙᑲᓂᐎᒡ᙮ ᐅᐙᑳᐃᑲᓐ ᓴ ᑲᔦ ᑕᐊᑯᐱᒋᑳᑌᓂ ᑕᐅᑯᐌᐸᐃᑳᑌᓂ ᑲᔦ, ᐅᐅᓇᑫ ᐁᑮ ᐃᔑ ᒪᒫᔒᒡ᙮ 12 ᑕᑲ ᓴ ᑭᔐᒪᓂᑑ ᑳᑮ ᐅᓀᑕᕽ ᐌᑎ ᒉᕒᐆᓴᓬᐊᒥᕽ ᒋᑕᔑ ᐊᓇᒥᐁᑕᐎᓐᒡ, ᐅᑲ ᔖᑯᑌᓂᒫᓐ ᐊᐌᓀᓇᓐ ᐃᑯ ᑎᓄ ᑭᒋᐅᑭᒫᓐ, ᐊᐌᓀᓇᐞ ᐃᑯ ᑲᔦ ᑫᑕᓶᐙᓇᑭᓯᓂᒡ ᐋᐲᒋᑯ ᑫᑲᑴ ᐋᒋᑑᓂᒡ ᐅᐅ ᐃᓈᑯᓂᑫᐎᓐ, ᑯᒫ ᑲᔦ ᑫᑲᑴ ᓂᔑᐗᓈᒋᑑᓂᒡ ᐅᐅ ᑭᒋ ᐊᓇᒥᐁᐎᑲᒥᒃ ᐁᔮᓂᒃ ᒉᕒᐆᓴᓬᐊᒥᕽ᙮ ᓃᓐ ᐅᔕ ᑕᕒᐋᔭᔅ ᐅᐅ ᑳᐃᓈᑯᓂᑫᔮᓐ, ᔖᑰᒡ ᐃᑯ ᐌᐌᓂ ᒋᑑᒋᑳᑌᒃ, ᑮᐃᔑᐲᐃᑫ᙮ ᑭᒋ ᐊᓇᒥᐁᐎᑲᒥᒃ ᑮᑮᔑᒋᑳᑌᒃ, ᑮᑭᑌᑖᑯᒋᑳᑌᒃ ᑲᔦ ᑭᔐᒪᓂᑑ ᐁᑎᐯᑕᕽ᙮ 13 ᐊᐲᔥ ᐁᐙᐸᑕᒧᐙᒡ ᐁᔑᐲᐃᑫᓂᒡ ᑭᒋᐅᑭᒫᓐ ᐊᐊ ᑕᑏᓈᐃ Tattenai ᑌᐯᑕᕽ ᐁᔑ ᓂᑳᐲᐊᓄᐗᓂᓂᒃ ᐃᔫᐸᕒᐁᑏᔅ ᐊᐊ ᑲᔦ ᔒᑕᕒ ᐳᓰᓈᐃ Shethar Bozenai ᐁᔑᓂᑳᓱᓂᒡ, ᐃᐃ ᑲᔦ ᐅᐐᒋᑭᒫᒥᐙᐞ ᑮᐃᔑᒋᑫᐗᒃ ᒪᔮ ᑳᑮ ᐃᓈᑯᓂᑫᓂᒡ ᒫᐗᒡ ᑭᒋᐅᑭᒫᓐ ᑕᕒᐋᔭᓴᓐ Darius᙮ 14 ᐃᑭ ᑕᔥ ᑳᓃᑳᓂᓯᐙᒡ ᒎᐗᒃ ᐐᑫ ᑮᒥᓄᓭᓂ ᐁᐅᔑᑑᐙᒡ ᑭᒋ ᐊᓇᒥᐁᐎᑲᒥᒃ᙮ ᑮᐅᒋ ᒪᔥᑲᐌᑕᒨᒃ ᓴ ᑳᑮ ᐃᔑ ᑲᑮᑴᓂᒡ ᑫᓅᑕᒪᐙᓂᒡ ᑭᔐᒪᓂᑑᓐ ᐋᑫᐋᐃ Haggai ᐁᔑᓂᑳᓱᓂᒡ, ᓭᑲᕒᐋᔭᐗᓐ Zechariah ᑲᔦ ᑳᑮ ᐅᑕᑳᓀᓯᓂᒡ ᐃᑑᕽ Iddo᙮ ᒦᑕᔥ ᑳᑮ ᐊᓂ ᑮᔑᑑᐙᒡ ᒪᔮ ᑳᑮ ᐃᔑ ᐊᑕᐌᓂᒥᑯᐙᒡ ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ, ᑳᑮ ᐃᓈᑯᓂᑫᓂᒡ ᑲᔦ ᓵᐃᕒᐊᓲᓐ Cyrus, ᑕᕒᐋᔭᓴᓐ ᑲᔦ, ᐃᓂ ᑲᔦ ᐋᕒᑕᓴᕒᑭᓰᔅ Artaxerxes ᑳᑮ ᐊᓂᑫ ᑭᒋᐅᑭᒫᐎᓂᒡ ᐯᕒᔕ Persia ᐊᑮᕽ᙮ 15 ᒦ ᓴ ᑳᑮ ᑮᔑᑑᐙᒡ ᐃᐃ ᑭᒋ ᐊᓇᒥᐁᐎᑲᒥᒃ ᐁᑕᕒ Adar ᑮᓯᓲᓐ ᐁᐱᒪᑭᓱᓂᒡ, ᓂᓯᓐ 3 ᐁᐃᓇᑭᓱᓂᒡ, ᓂᑯᑣᓱ ᐱᐴᓐ ᐁᐊᓂ ᐃᔑᓭᓂᒃ ᑳᑭᒋᐅᑭᒫᐎᓂᒡ ᑕᕒᐋᔭᓴᓐ᙮ 16 ᒦᑕᔥ ᐯᒫᑎᓯᐙᒡ ᐃᔅᕒᐃᔭᓬᐊᒃ, ᐊᓇᒥᐁᐎᑭᒫᒃ, ᓬᐄᐹᐃ ᑳᐅᑕᑳᓀᓯᐙᒡ Levites, ᐃᑭ ᑕᔥ ᑲᔦ ᑳᑮ ᒫᒌᓂᑣᐸᓐ ᐁᑮ ᐱᑮᐌᐙᒡ ᑮᐐᑾᑏᐗᑲᒥᑭᓯᐗᒃ ᐁᑮ ᒌᑲᑲᒥᑭᓯᐙᒡ ᐁᑮ ᑭᑌᑖᑯᒋᑳᑌᓂᒃ ᑭᒋ ᐊᓇᒥᐁᐎᑲᒥᑯᓂ ᒋᑎᐯᑕᒥᓂᒡ ᑭᔐᒪᓂᑑᓐ᙮ 17 ᒋᑭᑌᑖᑯᑑᐙᒡ ᓴ ᑭᔐᒪᓂᑑᓐ ᐅᐙᑳᐃᑲᓂᓂ, ᒦ ᓴ ᐅ ᒥᓂᒃ ᐊᔭᐋᐎᔕᐞ ᑳᐸᑭᑎᓈᓱᐙᑫᐙᒡ; ᓂᑯᑣᒃ 100 ᐋᐯ ᐱᔑᑭᐗᐞ, ᓃᔣᒃ 200 ᐋᐯ ᒫᓇᒑᓂᔕᐞ, ᓃᐙᒃ 400 ᐋᐯ ᒫᓇᒑᓂᔐᓴᐞ᙮ ᐃᐃ ᑕᔥ ᒥᑖᔑᓃᔑᓐ 12 ᐋᐯ ᒫᓇᑎᑾᐞ ᑮᐸᑭᑎᓈᔂᐗᐞ ᑫᐅᒋ ᐴᓀᑕᒪᐎᒥᓐᒡ ᑲᑭᓇ ᐃᔅᕒᐃᔭᓬᐊᐞ, ᐯᐯᔑᒃ ᑳᔑ ᒥᑖᔑᓃᔗᐙᓇᑭᓯᐙᒡ᙮ 18 ᒦᑕᔥ ᑳᐃᔑ ᐅᓂᓈᐙᒡ ᐊᓇᒥᐁᐎᑭᒫᐞ ᐯᐸᑳᓄᕽ, ᓬᐄᐹᐃ ᑳᐅᑕᑳᓀᓯᓂᒡ ᑲᔦ, ᐯᐸᑳᓐ ᑫᑕᑕᓇᓄᑮᑕᐙᓂᒡ ᑭᔐᒪᓂᑑᓐ ᐃᐃᒫ ᒉᕒᐆᓴᓬᐊᒥᕽ, ᐁᑮ ᐃᔑᒋᑫᐙᒡ ᐁᔑᓯᓂᓂᒃ ᒪᓯᓇᐃᑲᓐ ᐁᔑ ᐅᔑᐲᐃᑳᑌᓂᒃ ᒨᓯᔅ Moses ᐅᑑᓇᔓᐌᐎᓐ᙮ ᐱᒫᒋᐃᑰᐎ ᐐᑾᑎᐎᓐ ᑮᑲᓇᐌᒋᑳᑌᒃ 19 ᒦᑕᔥ ᐃᑭ ᑳᑮ ᒫᒌᓂᑣᐸᓐ ᐁᑮ ᐱᑮᐌᐙᒡ ᐃᔅᕒᐃᔭᓬᐊᒃ Israel ᑳᑮ ᐐᑾᑏᐗᑲᒥᑭᓯᐙᒡ ᐁᑲᓇᐌᑕᒧᐙᒡ ᐱᒫᒋᐃᑰᐎ ᐐᑾᑎᐎᓐ ᒥᑖᔑᓃᐎᓐ 14 ᐁᐃᓇᑭᓱᓂᒡ ᓂᑕᒻ ᑮᓯᓲᓐ᙮ 20 ᑲᑭᓇ ᓴ ᐊᓇᒥᐁᐎᑭᒫᒃ, ᓬᐄᐹᐃ ᑳᐅᑕᑳᓀᓯᐙᒡ ᑲᔦ ᑮᐊᓇᒥᐁ ᐯᑭᐃᑎᓱᐗᒃ ᑫᐅᒋ ᐃᓇᑭᒥᑣ ᒋᒥᓍᐸᒥᑯᐙᒡ ᑭᔐᒪᓂᑑᓐ᙮ ᒦᑕᔥ ᓬᐄᐹᐃ ᑳᐅᑕᑳᓀᓯᐙᒡ ᑳᑮ ᓂᓵᐙᒡ ᒫᓇᒑᓂᔐᓴᐞ ᑫᐸᑭᑎᓂᒥᓐᒡ ᐱᒫᒋᐃᑰᐎ ᐐᑾᑎᕽ ᐃᐃ ᐅᒋ ᐃᔅᕒᐃᔭᓬᐊᐞ ᑳᑮ ᒫᒌᓂᒥᑎᐸᓐ, ᐃᐃ ᓴ ᑲᔦ ᐊᓇᒥᐁᐎᑭᒫᐞ, ᑫᐐᓇᐙ ᑕᔥ ᐅᒋ᙮ 21 ᒦᑕᔥ ᐃᑭ ᐃᔅᕒᐃᔭᓬᐊᒃ ᑳᑮ ᐱᑮᐌᐙᒡ ᐅᑮ ᐊᒸᐙᓐ ᑳᐸᑭᑎᓈᓱᐙᑲᓂᐎᓂᒡ᙮ ᐃᐃ ᓴ ᐅᑮ ᐐᑑᐸᒥᑯᐙᐞ ᑲᑭᓇ ᑳᑮ ᒦᑖᑴᑕᒥᓂᒡ ᓀᐱᒡ ᑳᐐᓀᑖᑾᓂᓂᑭᓐ ᓀᑖ ᐃᔑᒋᑫᓂᒡ ᑳᒎᐎᐎᓯᓂᒃ ᐁᑮ ᐱ ᐊᑕ ᐊᓇᒥᐁᑕᐙᓂᒡ ᑳᑎᐯᒋᑫᓂᒡ ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ᙮ 22 ᓃᔣᓱᑮᔑᒃ 7 ᓴ ᑮᐐᑾᑏᐗᑲᒥᑭᓯᐗᒃ ᐁᑮ ᒌᑫᑕᒧᐙᒡ ᐁᑮ ᐊᒸᐙᒡ ᐸᑴᔑᑲᓇᓐ ᐌᐱᓯᑲᓂᐎᓯᓂᒃ᙮ ᐋᓃᔥ ᑳᑎᐯᒋᑫᓂᒡ ᐅᑮ ᒌᑫᑕᒧᐃᑯᐙᓐ, ᐁᑮ ᐃᔑᐋᓂᒡ ᐊᓰᕒᐃᔭ ᑭᒋᐅᑭᒫᓐ ᒋᒥᓍᐸᒥᑯᐙᒡ᙮ ᒦᐗᓐ ᐄᑐᒃ ᐃᓂ ᑳᑮ ᐐᒋᐃᑯᐙᒡ ᐁᐅᔑᒋᑳᑌᓂᒃ ᐃᐃ ᑭᒋ ᐊᓇᒥᐁᐎᑲᒥᒃ ᐁᑕᔑ ᐊᓇᒥᐁᑕᐎᒥᓐᒡ ᑭᔐᒪᓂᑑᓐ, ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society