Esara 3 - ᐅᒋᐺ ᑭᒋᒪᓯᓇᐃᑲᓐᐃᔅᕒᐃᔭᓬᐊᒃ ᐁᑮᒫᒋᑖᐙᒡ ᒦᓇᐙ ᑳᑮᐃᔑᓂᑖᐊᓇᒥᐋᐙᐸᓐ 1 ᓃᔣᓱᑮᓯᓲᓐ 7 ᐁᐱᒪᑭᓱᓂᒡ ᐃᔅᕒᐃᔭᓬᐊᒃ ᐃᑕᔥ ᑳᑲᐯᔑᐙᒡ ᐁᔑ ᐗᐆᑌᓇᐗᓂᓂᒃ, ᑲᑭᓇ ᑮᐅᑯ ᓈᓯᑯᑖᑎᐗᒃ ᐃᐃᒫ ᒉᕒᐆᓴᓬᐊᒥᕽ Jerusalem ᑖᐱᔥᑰ ᐯᔑᒃ ᐃᓂᓃᕽ ᒋᐃᔑ ᓈᑲᑕᐌᑕᒧᐙᒡ᙮ 2 ᐊᐊ ᑕᔥ ᒉᔥᔫᐗ Jeshua ᑳᑮ ᐅᑌᑌᒡ ᒑᓴᑖᑰᓐ Jozadak, ᐃᐃᔥ ᑲᔦ ᐐᑕᓇᒥᐁᐎᑭᒫᐞ, ᐊᐊ ᓴ ᑲᔦ ᓯᕒᐊᐸᐸᓬ Zerubbabel ᑳᑮ ᐅᑌᑌᒡ ᔒᔭᓬᑏᔭᓬᐗᓐ Shealtiel, ᐃᐃᔥ ᑲᔦ ᐐᒋᑭᐌᔭᐞ, ᒦᐗᒃ ᓴ ᐅᑯ ᑳᐅᓈᐱᑭᓂᑫᐙᒡ ᐋᑎ ᑫᑕᔑ ᐸᑭᑎᓈᓲᑕᒪᐎᒥᓐᒡ ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ᙮ ᒦ ᐃᒫ ᒋᐸᑭᑎᓂᑳᑌᓂᑭᓐ ᐸᑭᑎᓈᓱᐎᓇᓐ ᑎᓄ ᑳᐊᒀᑭᓯᑳᑌᓂᑭᓐ ᑖᐱᔥᑰ ᑳᑮ ᐃᔑᐲᐃᑳᑌᓂᒃ ᒨᓯᓲᓐ Moses ᐅᑑᓇᔓᐌᐎᓂᓃᕽ, ᑭᔐᒪᓂᑑᓐ ᑳᑮ ᐅᑎᓂᓃᒥᑯᓂᒡ᙮ 3 ᐗᐐᑫᔥ ᑲᔦ ᐋᓇ ᐁᑮ ᑯᓵᐙᒡ ᐯᒫᑎᓯᓂᒡ ᐃᐃᒫ ᑳᑮ ᐃᔑᑖᓂᒡ ᐊᑮᕽ, ᐋᒋᑯ ᑕᔥ ᐅᑮ ᑮᐌ ᓈᐹᐱᑭᓈᓈᐙᓐ ᑫᔑ ᐸᑭᑎᓈᓱᐎᓐᒡ, ᑳᑮ ᐃᔑ ᑭᑕᑌᓂᑯᐸᓀᓐ᙮ ᒦᑕᔥ ᒦᓇ ᑳᐃᔑ ᒫᒌ ᐸᑭᑎᓇᒪᐙᐙᒡ ᑳᑎᐯᒋᑫᓂᒡ ᐸᑭᑎᓈᓱᐎᓇᓐ ᑎᓄ ᐁᒀᑭᓯᑳᑌᓂᑭᓐ ᐁᑕᓱ ᑭᑭᔐᑉ, ᐁᑕᓱᓈᑯᔥ ᑲᔦ᙮ 4 ᒦᔥ ᑳᐃᔑ ᐐᑾᑏᐗᑲᒥᑭᓯᐙᒡ ᐁᑮ ᓈᓈᑲᒋᑑᐙᒡ ᐃᐃ ᐊᑲᐙᑌᐃᑲᓂ ᐐᑾᑎᐎᓐ ᑳᑮᐃᑕᒧᐙᒡ ᐁᑮ ᐃᔑᒋᑫᐙᒡ ᐁᔑᐲᐃᑳᑌᓂᒃ ᐅᓇᔓᐌᐎᓐ᙮ ᐅᑮ ᐸᑭᑎᓇᒪᐙᐙᓐ ᑲᔦ ᐁᑕᓱ ᑮᔑᒃ ᒥᓂᒃ ᐃᑯ ᑳᑮ ᐃᓇᑕᒪᐙᐎᑣᐸᓀᓐ ᐃᓂ ᑎᓄ ᐸᑭᑎᓈᓱᐎᓇᓐ ᐐᑫ ᐁᒀᑭᓯᑳᑌᓂᑭᓐ᙮ 5 ᒦᑕᔥ ᑲᔦ ᑳᐃᔑᒋᑫᐙᒡ ᐁᑮ ᐸᑭᑎᓈᓱᐙᑫᐙᒡ ᑳᐊᒀᑭᓯᑳᑌᓂᑭᓐ ᑎᓄ᙮ ᐅᑮ ᐸᑭᑎᓈᓈᐙᓐ ᑲᔦ ᑎᓄ ᐸᑭᑎᓈᓱᐎᓇᓐ ᑳᑮ ᓂᑖ ᐃᔑᒋᑫᐙᐸᓐ ᑮᐅᔥᑲᑰᒋᓂᓂᒡ ᑎᐱᑭ ᑮᓯᓲᓐ, ᐃᓂ ᑲᔦ ᐸᑭᑎᓂᑫᐎᓇᓐ ᑳᑮ ᓂᑖ ᐃᓈᐎᑣᐸᓀᓐ ᒋᐸᑭᑎᓇᒪᐙᐙᒡ ᑳᑎᐯᒋᑫᓂᒡ ᒋᑎᐱᓇᐌᐎᓯᓂᒡ, ᐃᓂᔥ ᑲᔦ ᐐᓇᐙ ᑯ ᑳᑮ ᐃᓀᑕᒧᐙᒡ ᒋᒦᓈᐙᒡ᙮ 6 ᓃᔣᓱᑮᓯᓲᓐ ᐃᑕᔥ ᐁᐱᒪᑭᓱᓂᒡ, ᐯᔑᒃ ᐁᐃᓇᑭᓱᓂᒡ, ᒦ ᓴ ᐃ ᐊᐲ ᑳᑮ ᒫᒌ ᐸᑭᑎᓇᒧᐙᒡ ᐸᑭᑎᓈᓱᐎᓇᓐ ᐁᒀᑭᓴᒪᐎᒥᓐᒡ ᑳᑎᐯᒋᑫᓂᒡ᙮ ᐃᐃ ᓴ ᐊᐲ ᑳᐐᓐ ᒪᔑ ᐅᑮ ᐅᓈᐱᑭᓯᑑᓰᓈᐙ ᑫᔑ ᐸᑕᑭᑌᓂᒃ ᑳᑎᐯᒋᑫᓂᒡ ᐅᑕᓇᒥᐁᐎᑲᒥᑯᓂ᙮ ᑮᒫᒌᐅᔑᒋᑳᑌᒃ ᑭᒋ ᐊᓇᒥᐁᐎᑲᒥᒃ 7 ᐅᑮ ᒦᓈᐙᐞ ᐃᑕᔥ ᔔᓂᔮᓐ ᐃᐃ ᑳᑮ ᐅᓈᐱᑭᔑᒫᓂᒡ ᐊᓯᓃᐞ, ᐃᐃ ᑲᔦ ᒥᑎᑯᓈᐯᐞ᙮ ᐃᐃ ᑕᔥ ᐯᒫᑎᓯᓂᒡ ᑳᑮ ᐅᒌᓂᒡ ᐆᑌᓈᕽ ᓵᐃᑕᓐ Sidon, ᑕᔭᕒᐃᕽ Tyre ᑲᔦ ᐅᑮ ᐃᔑᓂᔕᐊᒪᐙᐙᐞ ᒦᒋᒻ, ᑫᒥᓂᑴᓂᒡ ᑲᔦ, ᐱᒥᑌᓂ ᑲᔦ ᑫᑮᔑᓭᒀᑫᓂᒡ, ᒋᐲᓈᓂᒡ ᑮᔥᑳᑎᑰᐞ ᑭᒋᑲᒦᕽ ᐃᓇᑫ, ᐌᑎ ᑕᔥ ᓬᐁᐸᓇᓐ Lebanon ᐊᑮᕽ ᒋᐅᒋᐎᓈᓂᒡ᙮ ᐃᐃᒫ ᑕᔥ ᒑᐸ Joppa ᐆᑌᓈᕽ ᐃᓇᑫ ᑫᑮ ᐱ ᐃᔑ ᐲᓈᓂᒡ ᐋᓃᔥ ᒦ ᐃ ᑳᐃᓈᑯᓂᑫᓂᒡ ᐯᕒᔕ Persia ᐊᑮᕽ ᑭᒋᐅᑭᒫᓐ ᓵᐃᕒᐊᔅ Cyrus ᐁᔑᓂᑳᓱᓂᒡ᙮ 8 ᓃᔓᐱᐴᓐ 2 ᐃᑕᔥ ᐁᐊᓂ ᐃᔑᓭᓂᒃ ᐊᐲ ᑳᑮ ᑕᑯᔑᓄᐙᒡ ᐌᑎ ᒉᕒᐆᓴᓬᐊᒥᕽ Jerusalem ᑳᑮ ᐐ ᐅᔑᑑᐙᒡ ᐃᐃ ᑭᒋ ᐊᓇᒥᐁᐎᑲᒥᑯᓂ, ᓃᔓᑮᓯᔅ ᓴ ᐁᐊᓂ ᐃᔑᓭᓂᒃ, ᒦ ᓴ ᐊ ᓭᕒᐊᐸᐸᓬ, ᐊᐊᔥ ᑲᔦ ᒉᔥᔫᐙ Jeshua, ᐐᒋᑭᐌᔨᐗᐞ ᐃᑕᔥ, ᐅᑮ ᒫᒌᑳᓈᐙ ᐁᑮ ᐅᔑᑑᐙᒡ ᐃᐃ ᑭᒋ ᐊᓇᒥᐁᐎᑲᒥᑯᓂ᙮ ᐃᑭ ᑲᔦ ᐊᓇᒥᐁᐎᑭᒫᒃ, ᓬᐄᐹᐃ ᑳᐅᑕᑳᓀᓯᐙᒡ ᑲᔦ, ᐃᑭ ᑲᔦ ᑲᑭᓇ ᒉᕒᐆᓴᓬᐊᒥᕽ ᑳᑮ ᐱᐅᒋ ᑕᑯᔑᓄᐙᒡ ᐹᐱᓬᐊᓐ Babylon ᐊᑮᕽ ᑳᑮ ᐱ ᐅᒌᐙᒡ ᑮᒫᑕᓄᑮᐗᒃ᙮ ᓬᐄᐹᐃ ᑳᑮ ᐅᑕᑳᓀᓯᓂᒡ ᓴ ᓃᔥᑕᓇ, ᐊᐗᔑᒣ ᑲᔦ ᑳᑮ ᑕᓱᐱᐴᓉᓂᒡ ᐅᑮ ᐅᓈᐸᒫᐙᐞ ᒋᓈᓈᑲᒋᑑᓂᒡ ᐃᐃ ᑳᑮ ᐅᔑᒋᑳᑌᓂᒃ ᑳᑎᐯᒋᑫᓂᒡ ᐅᐙᑳᐃᑲᓂᓂ᙮ 9 ᐊᐊ ᑕᔥ ᒉᔥᔫᐗ ᐅᑯᓯᓴᐞ ᑲᔦ, ᐐᒋᑭᐌᔭᐞ ᑲᔦ, ᐊᐊᔥ ᑲᔦ ᑲᑦᒦᔭᓬ Kadmiel, ᐅᑯᓯᓴᐞ ᐃᑕᔥ ᑲᔦ ᑳᑮ ᐅᑕᑳᓀᓯᐙᒡ ᐅᑕᐹᐃᔭ Hodaviah ᐃᓂ ᑕᔥ ᑲᔦ ᐁᓇᑖᑦ Henadad ᐅᑯᓯᓯᓂ, ᐐᒋᑭᐌᔨᓂ ᑲᔦ, ᑲᑭᓇ ᓬᐄᐹᐃ ᑮᐅᑕᑳᓀᓯᐗᐞ᙮ ᒦᔥ ᑳᐃᔑ ᒫᒪᐎ ᓈᑲᒋᐋᐙᒡ ᐃᐃ ᑳᑮ ᐅᔑᑑᓂᒡ ᑭᔐᒪᓂᑑᓐ ᐅᐙᑳᐃᑲᓂᓂ᙮ 10 ᐊᐲ ᑕᔥ ᐃᑭ ᐅᐙᑳᐃᑫᒃ ᐁᑮ ᒫᒌ ᐅᓈᐱᑭᓂᑫᐙᒡ ᑫᔑ ᐸᑕᑭᑌᓂᒃ ᐃᐃ ᐅᐙᑳᐃᑲᓂᓂ ᑳᑎᐯᒋᑫᓂᒡ, ᐊᓇᒥᐁᐎᑭᒫᒃ ᓴ ᑮᓃᐸᐎᐗᒃ ᐁᑮ ᐸᐲᒋᐙᒡ ᐴᑖᒋᑲᓇᓐ ᐁᑮ ᑕᑯᓇᒧᐙᒡ᙮ ᐃᑭ ᑕᔥ ᑲᔦ ᓬᐄᐹᐃ ᑳᑎᓄᐎᐙᒡ ᐁᓴᑉ Asaph ᐌᑕᑳᓀᓯᐙᒡ ᑮᓃᐸᐎᐗᒃ ᐁᑮ ᑕᑯᓇᒧᐙᒡ ᒪᑗᔮᐱᑭᓯᒋᑲᓇᓐ ᐁᐐ ᒦᑴᒋᐌᓂᒫᐙᒡ ᑳᑎᐯᒋᑫᓂᒡ᙮ ᑮᐃᔑᒋᑫᐗᒃ ᐃᑕᔥ ᑳᑮ ᐃᔑ ᑭᑭᓄᐃᑫᓂᑯᐸᓀᓐ ᑌᐱᑑᓐ David ᑳᑮ ᑭᒋᐅᑭᒫᑲᑕᐙᓂᒡ ᐃᔅᕒᐃᔭᓬᐊᐞ᙮ 11 ᒦᔥ ᑳᐃᔑ ᓂᑲᒧᐙᒡ ᐁᑮ ᐊᓇᒥᐁᑕᐙᐙᒡ, ᐁᑮ ᒦᑴᒋᐌᓂᒫᐙᒡ ᑲᔦ ᑳᑎᐯᒋᑫᓂᒡ᙮ ᒦᔥ ᐅᐅ ᑳᑮ ᓈᓇᓵᐱ ᐃᓇᐊᒧᐙᒡ, ᐋᐱᒋ ᐁᒥᓄᒋᑫᒡ, ᑳᐐᓐ ᐐᑳ ᑕᐴᓂᓭᓯᓂᓂ ᐃᐃ ᑳᔑ ᒥᓄᑑᑕᐙᒡ ᐃᔅᕒᐃᔭᓬᐊᐞ ᒨᔕᒃ᙮ ᑲᑭᓇ ᑕᔥ ᐯᒫᑎᓯᐙᒡ ᑮᑭᒋ ᔕᔖᑯᐌᐗᒃ ᐁᑮ ᒦᑴᒋᐌᓂᒫᐙᒡ ᑳᑎᐯᒋᑫᓂᒡ ᐋᓃᔥ ᐋᔕ ᑮᐅᓈᐱᑭᓂᑳᑌᓂ ᑫᔑ ᐸᑕᑭᑌᓂᒃ ᐅᐙᑳᐃᑲᓂᓂ ᑳᑎᐯᒋᑫᓂᒡ᙮ 12 ᐃᑭ ᓃᐱᐗᐞ ᑳᐊᑭᐌᓰᐎᐙᒡ ᐊᓇᒥᐁᐎᑭᒫᒃ, ᓬᐄᐹᐃ ᑳᐅᑕᑳᓀᓯᐙᒡ ᑲᔦ, ᑳᓃᑳᓂᔥᑲᒧᐙᒡ ᑲᔦ ᑖᐎᓇᓐ, ᑳᑮ ᐙᐸᑕᒧᐙᒡ ᐃᐃ ᓂᑕᒻ ᑭᒋ ᐊᓇᒥᐁᐎᑲᒥᑯᓂ, ᑮᑭᔒᐌᐗᒃ ᐐᑫ ᐁᑮ ᒪᐎᐙᒡ ᐁᐙᐸᑕᒧᐙᒡ ᐁᐅᓈᐱᑭᓂᑳᑌᓂᒃ ᐃᐃ ᑳᑎᐯᒋᑫᓂᒡ ᐅᐙᑳᐃᑲᓂᓂ᙮ ᐋᓂᑕ ᑕᔥ ᑮᑭᒋ ᔖᑯᐌᐗᒃ ᑳᐊᐲᒋ ᒌᑫᑕᒧᐙᒡ᙮ 13 ᑳᐐᓐ ᐊᐎᔭᐞ ᐅᑮ ᓂᓯᑐᑖᑯᓰᐙᐞ ᐋᓂᑕ ᑳᑮ ᒪᐎᐙᒡ, ᐃᐃ ᑲᔦ ᑳᑮ ᒌᑫᑕᒧᐙᒡ, ᐅᓵᒻ ᐋᓃᔥ ᑮᑭᒋ ᐃᓉᑳᓱᐙᒃ᙮ ᐋᐱᒋ ᓴ ᐙᓴ ᑮᐅᒋ ᑌᐱᑖᑯᓯᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society