Emahs 9 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐅᑎᐹᑯᓂᐌᐎᓐ ᐁᑕᔑᑌᓂᒃ 1 ᓂᑮ ᐙᐸᒫ ᑕᔥ ᑳᑎᐯᒋᑫᒡ ᐁᓃᐸᐎᒡ ᑳᐃᔑ ᐸᑭᑎᓈᓱᐎᓐᒡ ᐅᐅ ᐁᑮ ᐃᑭᑐᒡ, ᐗᑭᒐᔭᐄ ᓴ ᐃᔑ ᐸᑭᑌᐅ ᐊᓯᓃᒃ ᑳᐸᑕᑭᓱᐙᒡ ᑳᐅᒋ ᓰᑡᑭᑌᒃ ᑭᒋ ᐊᓇᒥᐁᐎᑲᒥᒃ, ᒦᔥ ᐃᐃ ᒋᑯᔥᑯᓭᒃ ᑳᔑ ᐸᑕᑭᑌᒃ ᑭᒋ ᐊᓇᒥᐁᐎᑲᒥᒃ᙮ ᐃᔥᐱᒥᕽ ᐌᑎ ᒋᔑ ᐲᑯᓭᐙᒡ ᐃᑭ ᐊᓯᓃᒃ ᒋᑕᓲᓱᐙᒡ ᐅᑎᒀᓂᐙᕽ ᐃᑭ ᐯᒫᑎᓯᐙᒡ᙮ ᐃᑭ ᓴ ᑫᐃᔥᒀᐱᓀᐙᒡ ᑳᑕᔑ ᒦᑳᑎᐎᓐᒡ ᑕᔑ ᓂᒋᑲᓂᐎᐗᒃ, ᑳᐐᓐ ᓴ ᐊᐎᔭ ᐋᐲᒋᑯ ᑕᔖᐾᓰ᙮ 2 ᒥᓴᐙ ᓴ ᑯ ᐋᓇ ᐅᑎᑖᓂᑫᐙᒡ ᐙᓴ ᐊᓈᒥᒃ ᑳᔑ ᐊᔮᓂᒡ ᑳᓂᐳᓂᒡ, ᒦ ᓴ ᐌᑎ ᑫᔑ ᑳᒋᑎᓇᒀ ᒋᐱ ᐗᑭᒋᐎᓇᒀ᙮ ᒥᓴᐙ ᓴ ᑯ ᐃᔥᐱᒥᕽ ᑮᔑᑯᕽ ᐅᑎᑕᒧᐙᒡ, ᒦ ᓴ ᐌᑎ ᑫᐱᐅᒋ ᓈᔑᐱᓇᒀ᙮ 3 ᒥᓴᐙ ᓴ ᑯ ᑲᔦ ᐃᔑ ᑳᓱᐙᒡ ᐌᑎ ᐗᑭᒐᔭᐄ ᐗᒌᕽ ᑳᕒᒪᓬ Carmel ᐁᒋᑳᑌᓂᒃ, ᓂᑲ ᐊᑐᓀᐙᒃ ᓴ, ᒦᔥ ᐌᑎ ᑫᔑ ᑳᒋᑎᓇᒀ᙮ ᒥᓴᐙ ᑯ ᑲᔦ ᐃᔑ ᑳᓲᑕᐎᐙᒡ ᐊᔑᒌᑎᒻ ᑭᒋᑲᒦᕽ, ᓂᑲ ᐊᓅᓂᒫᓐ ᓴ ᒥᔑᑭᓀᐱᑰᓐ ᒋᒫᑾᒥᑯᐙᒡ᙮ 4 ᒥᓴᐙ ᓴ ᑯ ᑲᔦ ᑳᔒᑫᓂᒥᑯᐙᒡ ᒫᒌᓂᑯᐙᒡ, ᓂᑲ ᐊᓅᑮᐙᓐ ᓴ ᐸᔑᐸᐃᑫᐎᑯᒫᓂᕽ ᒋᐅᒋ ᓂᓯᑣ᙮ ᐋᔕ ᐅᔕ ᓂᑮ ᐅᓀᑕᒻ ᐁᐐ ᒫᔑ ᑑᑕᐗᒀ, ᑳᐐᓐ ᑕᔥ ᓂᐐ ᒥᓄᑑᑕᐙᓰᒃ᙮ 5 ᑳᑎᐯᒋᑫᒡ ᑭᔐᒪᓂᑑ ᑳᒫᐗᒋ ᒪᔥᑲᐎᓰᒡ ᑮᓵᒥᓇᕽ ᐅᐅ ᐊᑮᓂ, ᒦ ᐃ ᐁᔑ ᑯᔥᑯᓭᓂᒃ, ᐃᑭ ᑕᔥ ᐃᐃᒫ ᑳᑖᐙᒡ ᑕᒪᐎᐗᒃ᙮ ᒥᓯᐌ ᓴ ᐊᑭ ᑳᑯᔥᑯᓭᒃ ᑕᐃᓀᑖᑾᓐ ᑖᐱᔥᑰ ᓈᔭᓬ ᓰᐱ ᐄᒋᐸᑮᕽ ᑳᐊᔮᒃ ᑳᒫᒨᔥᑲᐊᕽ, ᑳᐊᔨᔅᑲᑌᒃ ᑲᔦ᙮ 6 ᐐᓐ ᐅᔕ ᑳᐅᔑᑑᒡ ᑫᐃᔑᑖᒡ ᐌᑎ ᐃᔥᐱᒥᕽ ᑮᔑᑯᕽ, ᐐᓐ ᑲᔦ ᑳᐊᑾᓇᐊᕽ ᐊᑮᓂ ᐋᓴᒥᑮᔑᑯᓂ ᐁᐊᑾᓇᐃᑳᑫᒡ᙮ ᐐᓐ ᑲᔦ ᑳᑲᓅᑕᕽ ᓂᐲᓂ ᑭᒋᑲᒦᕽ ᑳᐊᔮᓂᒃ ᒦᑕᔥ ᐁᔑ ᓰᑭᓇᕽ ᐅᐅᒫ ᒥᓯᐌ ᐊᑮᕽ᙮ ᑳᑎᐯᒋᑫᒡ ᐃᓴ ᐃᔑᓂᑳᓱ! 7 ᒦᑕᔥ ᐅᐅ ᑳᑎᐯᒋᑫᒡ ᑳᐃᑭᑐᒡ, ᑮᓇᐙ ᐯᒫᑎᓯᔦᒃ ᐃᔅᕒᐃᔭᓬᐊᒃ ᑳᑎᓄᐎᔦᒃ, ᒦ ᓴ ᐯᔑᑾᓐ ᐁᓀᓂᒥᓇᑰᒃ ᑳᐃᓀᓂᒪᒀ ᐯᒫᑎᓯᐙᒡ ᓱᑌᓐ Sudan ᐌᒌᐙᒡ᙮ ᐱᓬᐃᔅᑏ ᑳᑎᓄᐎᐙᒡ ᐄᑐᒃ ᑲᕒᐄᑦ Crete ᐊᑮᕽ ᓂᑮ ᐅᒋ ᓵᑭᒋᐎᓈᒃ, ᐃᑭᔥ ᑲᔦ ᓰᕒᐃᔭ Syrians ᑳᐅᒌᐙᒡ ᑫᕒ Kir ᐊᑮᕽ ᓂᑮ ᐅᒋ ᓵᑭᒋᐎᓈᒃ, ᑖᐱᔥᑰ ᑳᑮ ᑑᑕᐎᓇᑰᒃ ᐄᒋᐸᑮᕽ Egypt ᑮᐅᒋ ᓵᑭᒋᐎᓂᓇᑰᒃ᙮ 8 ᓃᓐ ᓴ ᑳᑎᐯᒋᑫᔮᓐ ᑳᑭᔐᒪᓂᑑᐎᔮᓐ ᓂᑲᓇᐙᐸᑖᓐ ᐁᒪᒋᓈᑾᓂᓂᒃ ᐃᔅᕒᐃᔭᓬᐊᒃ ᐃᓇᑫ ᑳᔑ ᐅᑭᒫᐎᐙᒡ᙮ ᒦᑕᔥ ᑳᐐ ᐅᒋ ᓂᔑᐗᓈᒋᑖᐗᒃ ᑳᔑ ᐅᑭᒫᐎᐙᒡ᙮ ᒉᑲᑉ Jacob ᑕᔥ ᐐᓐ ᐅᐲᐌᓰᒪᐞ ᑳᐐᓐ ᓂᐐ ᒑᑭᐃᒫᓰᐞ᙮ 9 ᓂᑲ ᐊᓅᑮ ᓴ ᒋᐗᑲᐎ ᐌᐱᓂᑣ ᐯᒫᑎᓯᐙᒡ ᐃᔅᕒᐃᔭᓬᐊᒃ ᑖᐱᔥᑰ ᒥᑕᑲᒥᒃ ᑳᑑᒋᑳᑌᒃ ᑮᓀᓈᐎᓂᑳᑌᒃ᙮ ᓂᐐ ᐗᑲᐎᐌᐱᓈᒃ ᓴ ᒣᑴᔭᐄ ᐁᐊᔮᐙᒡ ᐁᔑᐊᔮᓂᒡ ᐯᒫᑎᓯᓂᒡ ᐁᐐ ᑲᑮᑭᓇᒀ ᐊᐎᔭᐞ ᑫᑰᓂᓂ ᑳᐊᐲᑌᑖᑯᓯᓯᓂᒃ᙮ 10 ᑲᑭᓇ ᓴ ᐅᒪᒋᑑᑕᒨᒃ ᐁᔮᐙᒡ ᐃᐃᒫ ᒣᑴᔭᐄ ᑳᔑ ᐊᔮᓂᒡ ᓂᐱᒫᑎᓰᒪᐞ, ᐸᔑᐸᐃᑫᐎᑯᒫᓂᕽ ᑕᐅᒋ ᓂᐳᐗᒃ᙮ ᒥᓴᐙ ᑯ ᐃᑭ ᑲᔦ ᑳᐃᑭᑐᐙᒡ, ᓂᔑᐗᓈᑎᓯᐎᓐ ᓴ ᓃᓇᐎᓐᑦ ᑳᐐᓐ ᓂᑲ ᐸᑲᒥᔥᑳᑯᓰᒥᓐ᙮ ᑳᑎᐯᒋᑫᒡ ᐱᒌᓇᒃ ᐁᐐᑮᐌᒥᓄᓭᐋᒡ ᐃᔅᕒᐃᔭᓬᐊᐞ 11 ᒦᔥ ᑳᑎᐯᒋᑫᒡ ᐁᑭᑐᒡ, ᐱᒌᓇᒃ ᐅᔕ ᑕᐅᒋᒋᓭ ᒋᑮᔑᑲᒃ ᐊᐲ ᑳᐐ ᑮᐌ ᐅᔑᑖᐗᒃ ᑌᐱᑦ David ᑳᑮ ᐃᔑ ᑭᒋᐅᑭᒫᐎᐸᓐ ᑳᐲᑯᓈᑾᓂᓂᒃ ᐁᐐ ᑮᐌ ᓈᐱᓈᑾᒃ᙮ ᓂᐐ ᑮᐌ ᐅᔑᑑᓐ ᐙᑳᔮᐱᑭᓂᑲᓐ, ᐁᐐ ᐃᔑᑑᔮᓐ ᑳᑮ ᐃᔑᓈᑾᑭᐸᓐ ᐅᑖᓈᕽ᙮ 12 ᒦᔥ ᐯᒫᑎᓯᐙᒡ ᐃᔅᕒᐃᔭᓬᐊᒃ ᒋᔖᑰᒋᑣᐙᒡ ᒋᒪᑲᑗᐙᒡ ᐄᑕᒻ Edom ᐊᑮᕽ ᑳᑮ ᐃᔥᑯᓭᓂᒃ, ᐃᐃ ᑲᔦ ᑲᑭᓇ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᑳᑮ ᑎᐯᓂᒥᒪᑭᐸᓐ ᐋᐱᑎᕽ᙮ ᒦ ᓴ ᐃ ᐁᑭᑐᒡ ᑳᑎᐯᒋᑫᒡ ᑳᐐ ᐃᔑᑑᒡ ᐅᐅ ᒋᐃᔑᓭᓂᒃ᙮ 13 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐋᔕ ᐅᔕ ᐅᒋᒋᓭ ᐁᐃᔑ ᑮᔑᑲᒃ ᐊᐲ ᐸᑴᔑᑲᓐ ᓇᐗᒡ ᒋᑭᑖᑕᐱᑭᒡ, ᑳᐐᓐ ᑕᐋᒋᓈᒋᑲᓂᐎᓰ ᒋᒪᓂᔓᓐᒡ᙮ ᔔᒥᓇᒃ ᑲᔦ ᓇᐗᒡ ᑕᑭᑖᑕᐱᑭᐗᒃ ᐊᐲᒡ ᐐᓐ ᒥᓂᒃ ᑳᑕᔒᑭᑳᑌᒃ ᔔᒥᓈᐳ ᑮᐅᔑᒋᑳᑌᒃ᙮ ᔔᒥᓈᐳ ᓴ ᑳᔒᐙᑲᒥᒃ ᑭᒋ ᐗᒌᕽ ᑕᐅᒋ ᐸᐹᐸᑭᑲᐎᓐ, ᑳᔑ ᐱᑾᑎᓈᒃ ᓴ ᑲᔦ ᑕᐅᒋᒋᐗᓐ᙮ 14 ᓂᐐ ᐱᑮᐌᐎᓈᒃ ᓴ ᓂᐱᒫᑎᓰᒪᒃ ᐅᑕᑮᒥᐙᕽ᙮ ᐅᑲ ᑮᐌ ᐅᔑᑑᓈᐙᓐ ᓴ ᐆᑌᓇᐗᓐ ᑳᓇᓂᔅᑯᓯᓂᓂᑭᓐ, ᒦᔥ ᐃᐃᒫ ᑫᐃᔑᑖᐙᒡ᙮ ᐅᑲ ᐅᔑᑑᓈᐙ ᓴ ᑫᔑ ᑭᑎᑳᓱᓂᒡ ᔔᒥᓇᐞ, ᑫᐅᒋ ᒥᓂᑴᐙᒡ ᔔᒥᓈᐴᓂ᙮ ᐅᑲ ᐅᔑᑑᓈᐙᓐ ᑲᔦ ᑫᔑ ᑭᑎᑫᐙᒡ, ᒋᒦᒋᐙᒡ ᑳᑭᑎᑳᑕᒧᐙᒡ᙮ 15 ᒦ ᓴ ᐃ ᑫᑑᑕᐗᒀ ᐃᔅᕒᐃᔭᓬᐊᒃ ᐅᑕᑮᐙᕽ ᐁᐐ ᑮᑎᑳᓇᒀ, ᑳᐐᓐ ᑕᔥ ᒦᓇᐙ ᐐᑳ ᑕᐅᒋ ᐸᑾᑕᑮᐱᒋᑲᓂᐎᓰᐗᒃ ᐃᐃᒫ ᐊᑮᕽ ᑳᒦᓇᒀ, ᒦ ᐃ ᐁᑭᑐᒡ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society