Emahs 8 - ᐅᒋᐺ ᑭᒋᒪᓯᓇᐃᑲᓐ

ᐁᒪᔅ ᑮᐸᐙᑕᕽ ᐯᔑᑯᒪᔥᑯᓰᐗᔥ ᒦᒋᒻ

¹ ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᑳᐃᔑᓇᒧᐃᒡ, ᐁᑮ ᐙᐸᑕᐃᒡ ᒦᒋᒥᒪᔥᑯᓰᐗᔓᓂ ᐁᒨᔥᑭᓀᓂᒃ ᑳᑮ ᐊᑎᑌᓂᒃ ᔒᐎᒦᒋᒻ᙮

² ᒦᔥ ᐅᐅ ᑳᐃᔑᒡ, ᐁᒪᔅ Amos ᐌᑯᓀᓐ ᐌᔮᐸᑕᒪᓐ? ᒦᔥ ᐅᐅ ᑳᐃᓇᒃ, ᒦᒋᒥᒪᔥᑯᓰᐗᔥ ᐁᒨᔥᑭᓀᒃ ᑳᐊᑎᑌᒃ ᔒᐎᒦᒋᒻ᙮ ᒦᑕᔥ ᑳᑎᐯᒋᑫᒡ ᑳᐃᔑ ᓇᑴᑕᐎᒡ, ᒦ ᐅᔕ ᐃ ᐁᐅᒋᒋᓭᓂᒃ ᓂᐱᒫᑎᓰᒪᒃ ᐃᔅᕒᐃᔭᓬᐊᒃ ᐊᐗᔑᒣ ᒋᑮ ᐊᔮᓯᒀᐸᓐ᙮ ᑳᐐᓐ ᒦᓇᐙ ᓂᐐ ᐋᑌᑕᓰ ᐁᐐ ᓇᓇᐊᓴᒀ᙮

³ ᐃᐃ ᓴ ᐊᐲ ᑮᔑᑲᓂᓂᒃ, ᐃᓂ ᓴ ᓂᑲᒧᓇᓐ ᑳᓂᑖ ᐃᓇᐊᒧᐙᒡ ᐃᐃᒫ ᑭᒋ ᐊᓇᒥᐁᐎᑲᒥᑯᕽ, ᒣᔥᑾᒡ ᓴ ᑕᒪᐎᑖᑾᓂᓂᐗᓐ᙮ ᒥᓯᐌ ᓴ ᑕᐲᐎᔑᓅᒃ ᑫᓂᐳᐙᒡ᙮ ᑳᐐᓐ ᓴ ᐊᐎᔭ ᑕᓅᑕᐙᓰ᙮

ᐃᔅᕒᐃᔭᓬᐊᒃ ᑫᔑᓂᔑᐗᓈᑎᓯᐙᒡ

⁴ ᓅᑕᒧᒃ ᐅᐅ ᑮᓇᐙ ᑳᐌᓵᓂᐁᒀ ᑳᓅᑌᓭᐙᒡ, ᑫᑴ ᓂᔑᐗᓈᒋᐁᒀ ᑲᔦ ᑫᑎᒫᑭᓯᐙᒡ ᐅᐅᒫ ᐊᑮᕽ,

⁵ ᐅᐅ ᐁᐃᑭᑐᔦᒃ, ᐊᐯᔥ ᐃᓈ ᐌᔩᑉ ᐴᓂᓭᒃ ᑳᓂᑖ ᐐᑾᑏᐗᑲᒥᑭᓯᕽ ᑮᐅᔥᑲᑰᒋᕽ ᑎᐱᑭᑮᓯᔅ, ᒦᓇᐙ ᒋᐊᑖᐙᑫᔭᕽ ᐸᑴᔑᑲᓐ᙮ ᐴᓂ ᐊᓉᐲᐎ ᑮᔑᑲᒃ ᑲᔦ ᒦᓇᐙ ᒋᐹᑭᓯᑑᔭᕽ ᑭᑕᑖᓲᐎᑲᒥᑯᓈᓂᓐ᙮ ᒦᔥ ᑫᔑ ᑳᑕᑭᒋᑫᔭᕽ, ᒋᑲᑲᔦᔑ ᑎᐹᐲᔥᑰᒋᑫᔭᕽ ᒋᐋᐸᒋᑑᔭᕽ ᑳᐗᔦᔑᒥᐌᒪᑲᑭᓐ ᑎᐹᐲᔥᑰᒋᑲᓇᓐ᙮

⁶ ᑭᑲ ᐊᑕᐙᑫᒥᓐ ᑲᔦ ᑫᑰᓐ ᐁᐲᑌᑖᑾᓯᓄᑭᓐ ᐸᑴᔑᑲᓂᒥᓇᓐ ᒋᐋᑾᑭᑕᒪᕽ᙮ ᑫᑎᒫᑭᓯᐙᒡ ᓴ ᑭᑲ ᐊᑖᐌᒥᓐ ᒋᒥᑕᓄᑮᑕᐎᓇᒀ ᑳᑌᑎᐸᐊᓯᒀ ᐅᒪᓯᓇᐃᑫᐎᓂᐙᓐ, ᐋᓇ ᑯᑕ ᒥᓂᒃ ᐁᑕ ᐁᒪᓯᓇᐃᑫᐙᒡ ᑳᐃᓇᑭᑌᓂᑭᓐ ᐯᔑᑴᐙᓐ ᒪᑭᓯᓇᓐ᙮

⁷ ᑳᑎᐯᒋᑫᒡ ᐃᑕᔥ ᐃᔅᕒᐃᔭᓬᐊᒃ ᐌᑭᔐᒪᓂᑑᒥᐙᒡ ᐅᐅ ᐃᔑ ᐋᔩᒋ ᐊᔓᑕᒻ, ᑳᐐᓐ ᓴ ᐐᑳ ᓂᑲ ᐗᓃᑫᓄᑕᒧᐙᓰᓇᓐ ᐅᒪᒋᑑᑕᒧᐎᓂᐙᓐ᙮

⁸ ᒦᑕᔥ ᐊᑭ ᒋᑯᔥᑯᓭᒃ, ᑲᑭᓇ ᐊᐎᔭ ᐁᔮᒡ ᐅᐅᒫ ᐊᑮᕽ ᑕᓭᑫᑕᒻ᙮ ᒥᓯᐌ ᓴ ᑯ ᐅᐅ ᐊᑭ ᑕᑯᔥᑯᓭ ᒋᐃᓀᑖᑾᒃ ᑖᐱᔥᑰ ᓈᔭᓬ Nile ᓰᐱ ᐁᔮᒃ ᐄᒋᐸᑮᕽ ᑮᐗᑲᐙᑲᒥᓭᒃ ᑮᒫᒨᔥᑲᐊᕽ, ᑮᐊᔨᔅᑲᑌᒃ ᑲᔦ᙮

⁹ ᒦᔥ ᐅᐅ ᐁᑭᑐᔮᓐ ᓃᓐ ᑳᒫᐗᒋ ᑎᐯᒋᑫᔮᓐ, ᒦ ᐅᔕ ᐃ ᐋᔕ ᐁᐅᒋᒋᓭᒃ ᒋᐃᔑᒋᑫᔮᓐ ᒋᐸᑭᔑᒧᒡ ᑮᓯᔅ ᓈᐗᑴᓂᒃ, ᒋᑲᔥᑮᑎᐱᑲᒃ ᑲᔦ ᒣᒀ ᑮᔑᑲᒃ᙮

¹⁰ ᓂᑲ ᑴᑭᓈᓇᓐ ᓴ ᑳᔑ ᐐᑾᑏᐗᑲᒥᑭᓯᔦᒃ ᒋᐊᓂ ᒫᓀᑕᒧᓈᓂᐗᕽ, ᑲᑭᓇ ᑲᔦ ᑭᓂᑲᒧᓂᐙᓐ ᑳᒌᑭᑖᑾᑭᓐ ᒋᐊᓂ ᒪᐎᐎᑖᑾᑭᓐ᙮ ᑭᑲ ᑑᑕᐎᓂᓂᒻ ᑲᔦ ᒋᑳᔥᑭᐹᑑᔦᒃ ᑭᑎᒀᓂᐙᓐ, ᒋᐱᓯᑲᒣᒃ ᑲᔦ ᐊᓴᐸᑕᐲᐌᑭᓅᓐ᙮ ᒦᔥ ᑫᐃᓀᑖᑯᓯᔦᒃ ᑖᐱᔥᑰ ᐅᓃᑭᐃᑯᒫᒃ ᑳᒪᐎᒫᐙᒡ ᒣᒋᐯᔑᑯᓂᒡ ᐅᑯᓯᓯᐙᓐ᙮ ᐃᐃᔥ ᐊᐲ ᐃᔑ ᑮᔑᑲᒃ, ᒦ ᐃ ᑲᑭᓇ ᑫᑰᓐ ᒋᐃᔥᒀᓭᒃ᙮

¹¹ ᐱᒌᓇᒃ ᓴ ᑕᐅᒋᒋᓭ ᒋᐃᔑᒋᑫᔮᓐ ᐅᐅᒫ ᐊᑮᕽ ᒋᐊᔮᓯᓄᒃ ᒦᒋᒻ᙮ ᐯᒫᑎᓯᐙᒡ ᓴ ᑕᓅᑌᔅᑲᑌᐗᒃ, ᑳᐐᓐ ᐃᑕᔥ ᐐᓐ ᐸᑴᔑᑲᓇᓐ ᐅᑲ ᓅᑌᔅᑲᑌᓄᑕᐙᓯᐙᐙᓐ, ᓅᑕᔮᐹᑴᐙᒡ ᑲᔦ ᑳᐐᓐ ᐐᓐ ᓂᐲᓂ ᑫᐊᑕᐌᑕᒧᐙᒡ᙮ ᐊᔭᐄᓂ ᐅᔕ ᑫᓅᑌᔅᑲᑌᓄᑕᒧᐙᒡ, ᑫᓅᑌᔮᐹᑴᓄᑕᒧᐙᒡ ᑲᔦ ᐁᐐ ᓅᑕᒧᐙᒡ ᐁᑭᑐᓂᒡ ᑳᑎᐯᒋᑫᓂᒡ᙮

¹² ᐯᒫᑎᓯᐙᒡ ᓴ ᑕᐱᒥ ᐊᔪᒌᐗᒃ ᑭᒋᑲᒦᑳᕽ ᑮᐌᑎᓄᕽ ᐃᓇᑫ, ᐙᐸᓄᕽ ᑲᔦ ᐃᓇᑫ; ᒥᓯᐌ ᓴ ᑕᐸᐹ ᐃᔖᐗᒃ ᒋᑲᑴ ᒥᑲᒧᐙᒡ ᐋᓃᓐ ᐁᑭᑐᓂᒡ ᑳᑎᐯᒋᑫᓂᒡ, ᑳᐐᓐ ᐃᑕᔥ ᐅᑲ ᒥᑲᓰᓈᐙ᙮

¹³ ᐃᐃ ᓴ ᐊᐲ ᑮᔑᑲᓂᓂᒃ ᐌᓂᔑᔑᐙᒡ ᐃᑴᐗᒃ, ᑳᒪᔥᑲᐙᑎᓯᐙᒡ ᑲᔦ ᐅᔥᑭᓃᑭᐗᒃ ᑕᐗᓃᑫᐗᒃ ᑫᐊᐲᒋ ᓅᑕᔮᐹᑴᐙᒡ᙮

¹⁴ ᐃᑭ ᑕᔥ ᑳᐊᐱᒧᐙᒡ ᒪᓂᑑᑳᓇᐞ ᐁᔮᓂᒡ ᓴᒣᕒᐃᔭ Samaria ᐅᐅ ᑳᐃᑭᑐᐙᒡ, ᑌᐺ ᓴ ᑳᔑ ᐱᒫᑎᓯᒡ ᑭᒪᓂᑑᒥᐙ, ᑌᓐ Dan ᐁᔮᔦᒃ, ᑯᒫ ᑲᔦ ᐅ, ᑌᐺ ᓴ ᑳᔑ ᐱᒫᑎᓯᒡ ᒪᓂᑑᑳᓐ ᐁᔮᒡ ᐲᐊᕒᔒᐸ Beersheba, ᐅᑯ ᓴ ᐅᐅ ᑳᐃᑭᑐᐙᒡ, ᒦᐗᒃ ᓴ ᐃᑭ ᑫᓂᓯᑣ, ᑳᐐᓐ ᑕᑮᐌ ᐱᒫᑎᓯᓰᐗᒃ᙮