Emahs 8 - ᐅᒋᐺ ᑭᒋᒪᓯᓇᐃᑲᓐᐁᒪᔅ ᑮᐸᐙᑕᕽ ᐯᔑᑯᒪᔥᑯᓰᐗᔥ ᒦᒋᒻ 1 ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᑳᐃᔑᓇᒧᐃᒡ, ᐁᑮ ᐙᐸᑕᐃᒡ ᒦᒋᒥᒪᔥᑯᓰᐗᔓᓂ ᐁᒨᔥᑭᓀᓂᒃ ᑳᑮ ᐊᑎᑌᓂᒃ ᔒᐎᒦᒋᒻ᙮ 2 ᒦᔥ ᐅᐅ ᑳᐃᔑᒡ, ᐁᒪᔅ Amos ᐌᑯᓀᓐ ᐌᔮᐸᑕᒪᓐ? ᒦᔥ ᐅᐅ ᑳᐃᓇᒃ, ᒦᒋᒥᒪᔥᑯᓰᐗᔥ ᐁᒨᔥᑭᓀᒃ ᑳᐊᑎᑌᒃ ᔒᐎᒦᒋᒻ᙮ ᒦᑕᔥ ᑳᑎᐯᒋᑫᒡ ᑳᐃᔑ ᓇᑴᑕᐎᒡ, ᒦ ᐅᔕ ᐃ ᐁᐅᒋᒋᓭᓂᒃ ᓂᐱᒫᑎᓰᒪᒃ ᐃᔅᕒᐃᔭᓬᐊᒃ ᐊᐗᔑᒣ ᒋᑮ ᐊᔮᓯᒀᐸᓐ᙮ ᑳᐐᓐ ᒦᓇᐙ ᓂᐐ ᐋᑌᑕᓰ ᐁᐐ ᓇᓇᐊᓴᒀ᙮ 3 ᐃᐃ ᓴ ᐊᐲ ᑮᔑᑲᓂᓂᒃ, ᐃᓂ ᓴ ᓂᑲᒧᓇᓐ ᑳᓂᑖ ᐃᓇᐊᒧᐙᒡ ᐃᐃᒫ ᑭᒋ ᐊᓇᒥᐁᐎᑲᒥᑯᕽ, ᒣᔥᑾᒡ ᓴ ᑕᒪᐎᑖᑾᓂᓂᐗᓐ᙮ ᒥᓯᐌ ᓴ ᑕᐲᐎᔑᓅᒃ ᑫᓂᐳᐙᒡ᙮ ᑳᐐᓐ ᓴ ᐊᐎᔭ ᑕᓅᑕᐙᓰ᙮ ᐃᔅᕒᐃᔭᓬᐊᒃ ᑫᔑᓂᔑᐗᓈᑎᓯᐙᒡ 4 ᓅᑕᒧᒃ ᐅᐅ ᑮᓇᐙ ᑳᐌᓵᓂᐁᒀ ᑳᓅᑌᓭᐙᒡ, ᑫᑴ ᓂᔑᐗᓈᒋᐁᒀ ᑲᔦ ᑫᑎᒫᑭᓯᐙᒡ ᐅᐅᒫ ᐊᑮᕽ, 5 ᐅᐅ ᐁᐃᑭᑐᔦᒃ, ᐊᐯᔥ ᐃᓈ ᐌᔩᑉ ᐴᓂᓭᒃ ᑳᓂᑖ ᐐᑾᑏᐗᑲᒥᑭᓯᕽ ᑮᐅᔥᑲᑰᒋᕽ ᑎᐱᑭᑮᓯᔅ, ᒦᓇᐙ ᒋᐊᑖᐙᑫᔭᕽ ᐸᑴᔑᑲᓐ᙮ ᐴᓂ ᐊᓉᐲᐎ ᑮᔑᑲᒃ ᑲᔦ ᒦᓇᐙ ᒋᐹᑭᓯᑑᔭᕽ ᑭᑕᑖᓲᐎᑲᒥᑯᓈᓂᓐ᙮ ᒦᔥ ᑫᔑ ᑳᑕᑭᒋᑫᔭᕽ, ᒋᑲᑲᔦᔑ ᑎᐹᐲᔥᑰᒋᑫᔭᕽ ᒋᐋᐸᒋᑑᔭᕽ ᑳᐗᔦᔑᒥᐌᒪᑲᑭᓐ ᑎᐹᐲᔥᑰᒋᑲᓇᓐ᙮ 6 ᑭᑲ ᐊᑕᐙᑫᒥᓐ ᑲᔦ ᑫᑰᓐ ᐁᐲᑌᑖᑾᓯᓄᑭᓐ ᐸᑴᔑᑲᓂᒥᓇᓐ ᒋᐋᑾᑭᑕᒪᕽ᙮ ᑫᑎᒫᑭᓯᐙᒡ ᓴ ᑭᑲ ᐊᑖᐌᒥᓐ ᒋᒥᑕᓄᑮᑕᐎᓇᒀ ᑳᑌᑎᐸᐊᓯᒀ ᐅᒪᓯᓇᐃᑫᐎᓂᐙᓐ, ᐋᓇ ᑯᑕ ᒥᓂᒃ ᐁᑕ ᐁᒪᓯᓇᐃᑫᐙᒡ ᑳᐃᓇᑭᑌᓂᑭᓐ ᐯᔑᑴᐙᓐ ᒪᑭᓯᓇᓐ᙮ 7 ᑳᑎᐯᒋᑫᒡ ᐃᑕᔥ ᐃᔅᕒᐃᔭᓬᐊᒃ ᐌᑭᔐᒪᓂᑑᒥᐙᒡ ᐅᐅ ᐃᔑ ᐋᔩᒋ ᐊᔓᑕᒻ, ᑳᐐᓐ ᓴ ᐐᑳ ᓂᑲ ᐗᓃᑫᓄᑕᒧᐙᓰᓇᓐ ᐅᒪᒋᑑᑕᒧᐎᓂᐙᓐ᙮ 8 ᒦᑕᔥ ᐊᑭ ᒋᑯᔥᑯᓭᒃ, ᑲᑭᓇ ᐊᐎᔭ ᐁᔮᒡ ᐅᐅᒫ ᐊᑮᕽ ᑕᓭᑫᑕᒻ᙮ ᒥᓯᐌ ᓴ ᑯ ᐅᐅ ᐊᑭ ᑕᑯᔥᑯᓭ ᒋᐃᓀᑖᑾᒃ ᑖᐱᔥᑰ ᓈᔭᓬ Nile ᓰᐱ ᐁᔮᒃ ᐄᒋᐸᑮᕽ ᑮᐗᑲᐙᑲᒥᓭᒃ ᑮᒫᒨᔥᑲᐊᕽ, ᑮᐊᔨᔅᑲᑌᒃ ᑲᔦ᙮ 9 ᒦᔥ ᐅᐅ ᐁᑭᑐᔮᓐ ᓃᓐ ᑳᒫᐗᒋ ᑎᐯᒋᑫᔮᓐ, ᒦ ᐅᔕ ᐃ ᐋᔕ ᐁᐅᒋᒋᓭᒃ ᒋᐃᔑᒋᑫᔮᓐ ᒋᐸᑭᔑᒧᒡ ᑮᓯᔅ ᓈᐗᑴᓂᒃ, ᒋᑲᔥᑮᑎᐱᑲᒃ ᑲᔦ ᒣᒀ ᑮᔑᑲᒃ᙮ 10 ᓂᑲ ᑴᑭᓈᓇᓐ ᓴ ᑳᔑ ᐐᑾᑏᐗᑲᒥᑭᓯᔦᒃ ᒋᐊᓂ ᒫᓀᑕᒧᓈᓂᐗᕽ, ᑲᑭᓇ ᑲᔦ ᑭᓂᑲᒧᓂᐙᓐ ᑳᒌᑭᑖᑾᑭᓐ ᒋᐊᓂ ᒪᐎᐎᑖᑾᑭᓐ᙮ ᑭᑲ ᑑᑕᐎᓂᓂᒻ ᑲᔦ ᒋᑳᔥᑭᐹᑑᔦᒃ ᑭᑎᒀᓂᐙᓐ, ᒋᐱᓯᑲᒣᒃ ᑲᔦ ᐊᓴᐸᑕᐲᐌᑭᓅᓐ᙮ ᒦᔥ ᑫᐃᓀᑖᑯᓯᔦᒃ ᑖᐱᔥᑰ ᐅᓃᑭᐃᑯᒫᒃ ᑳᒪᐎᒫᐙᒡ ᒣᒋᐯᔑᑯᓂᒡ ᐅᑯᓯᓯᐙᓐ᙮ ᐃᐃᔥ ᐊᐲ ᐃᔑ ᑮᔑᑲᒃ, ᒦ ᐃ ᑲᑭᓇ ᑫᑰᓐ ᒋᐃᔥᒀᓭᒃ᙮ 11 ᐱᒌᓇᒃ ᓴ ᑕᐅᒋᒋᓭ ᒋᐃᔑᒋᑫᔮᓐ ᐅᐅᒫ ᐊᑮᕽ ᒋᐊᔮᓯᓄᒃ ᒦᒋᒻ᙮ ᐯᒫᑎᓯᐙᒡ ᓴ ᑕᓅᑌᔅᑲᑌᐗᒃ, ᑳᐐᓐ ᐃᑕᔥ ᐐᓐ ᐸᑴᔑᑲᓇᓐ ᐅᑲ ᓅᑌᔅᑲᑌᓄᑕᐙᓯᐙᐙᓐ, ᓅᑕᔮᐹᑴᐙᒡ ᑲᔦ ᑳᐐᓐ ᐐᓐ ᓂᐲᓂ ᑫᐊᑕᐌᑕᒧᐙᒡ᙮ ᐊᔭᐄᓂ ᐅᔕ ᑫᓅᑌᔅᑲᑌᓄᑕᒧᐙᒡ, ᑫᓅᑌᔮᐹᑴᓄᑕᒧᐙᒡ ᑲᔦ ᐁᐐ ᓅᑕᒧᐙᒡ ᐁᑭᑐᓂᒡ ᑳᑎᐯᒋᑫᓂᒡ᙮ 12 ᐯᒫᑎᓯᐙᒡ ᓴ ᑕᐱᒥ ᐊᔪᒌᐗᒃ ᑭᒋᑲᒦᑳᕽ ᑮᐌᑎᓄᕽ ᐃᓇᑫ, ᐙᐸᓄᕽ ᑲᔦ ᐃᓇᑫ; ᒥᓯᐌ ᓴ ᑕᐸᐹ ᐃᔖᐗᒃ ᒋᑲᑴ ᒥᑲᒧᐙᒡ ᐋᓃᓐ ᐁᑭᑐᓂᒡ ᑳᑎᐯᒋᑫᓂᒡ, ᑳᐐᓐ ᐃᑕᔥ ᐅᑲ ᒥᑲᓰᓈᐙ᙮ 13 ᐃᐃ ᓴ ᐊᐲ ᑮᔑᑲᓂᓂᒃ ᐌᓂᔑᔑᐙᒡ ᐃᑴᐗᒃ, ᑳᒪᔥᑲᐙᑎᓯᐙᒡ ᑲᔦ ᐅᔥᑭᓃᑭᐗᒃ ᑕᐗᓃᑫᐗᒃ ᑫᐊᐲᒋ ᓅᑕᔮᐹᑴᐙᒡ᙮ 14 ᐃᑭ ᑕᔥ ᑳᐊᐱᒧᐙᒡ ᒪᓂᑑᑳᓇᐞ ᐁᔮᓂᒡ ᓴᒣᕒᐃᔭ Samaria ᐅᐅ ᑳᐃᑭᑐᐙᒡ, ᑌᐺ ᓴ ᑳᔑ ᐱᒫᑎᓯᒡ ᑭᒪᓂᑑᒥᐙ, ᑌᓐ Dan ᐁᔮᔦᒃ, ᑯᒫ ᑲᔦ ᐅ, ᑌᐺ ᓴ ᑳᔑ ᐱᒫᑎᓯᒡ ᒪᓂᑑᑳᓐ ᐁᔮᒡ ᐲᐊᕒᔒᐸ Beersheba, ᐅᑯ ᓴ ᐅᐅ ᑳᐃᑭᑐᐙᒡ, ᒦᐗᒃ ᓴ ᐃᑭ ᑫᓂᓯᑣ, ᑳᐐᓐ ᑕᑮᐌ ᐱᒫᑎᓯᓰᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society