Emahs 7 - ᐅᒋᐺ ᑭᒋᒪᓯᓇᐃᑲᓐᐁᒪᔅ ᑮᐸᐙᓈᒡ ᐸᐸᑭᓀᐞ 1 ᒦᑕᔥ ᐅᐅ ᑳᑎᐯᒋᑫᒡ ᑳᒫᐗᒋ ᑎᐯᒋᑫᒡ ᑳᐃᔑᓇᒧᐃᒡ᙮ ᓂᑮ ᐙᐸᒫ ᓴ ᐁᐅᔑᐋᒡ ᓃᐱᐗᐞ ᐸᐸᑭᓀᐞ ᐊᐲ ᑭᒋᐅᑭᒫᓐ ᑮᐃᔥᒀ ᑮᔥᑭᔕᒪᐎᒥᓐᒡ ᒪᔥᑯᓯᐗᓐ ᐅᒥᑕᑎᒨᒥᓂ ᑫᒦᒋᓂᒡ᙮ ᒦ ᓴ ᑲᔦ ᐃᐃ ᐊᐲ ᒦᓇᐙᔥ ᒪᔥᑯᓯᐗᓐ ᑮᐊᓂ ᒫᒌ ᓂᑖᐎᑭᓂᓂᑭᓐ᙮ 2 ᐊᐲ ᑕᔥ ᐃᑭ ᐸᐸᑭᓀᒃ ᑮᐃᔥᒀ ᑭᑖᐙᒡ ᒪᔥᑯᓰᓐ ᐃᐃᒫ ᐊᑮᕽ, ᒦᔥ ᑳᐃᓇᒃ ᑳᑎᐯᒋᑫᒡ, ᑮᓐ ᑌᐯᒋᑫᔭᓐ ᑭᔐᒪᓂᑑ, ᑕᑲ ᑭᑲᑴᒋᒥᓐ ᒋᐴᓀᑕᒪᐗᑣ ᐯᒫᑎᓯᐙᒡ, ᐋᓃᓐ ᑕᔥ ᐃᓈ ᒉᑲᐳᕽ Jacob ᑳᐅᑕᑳᓀᓯᐙᒡ ᑫᔑ ᐱᒫᑎᓯᐙᐸᓐ? ᐋᐱᒋ ᐄᑐᒃ ᐊᑳᓰᓄᐗᒃ᙮ 3 ᒦᔥ ᑳᑎᐯᒋᑫᒡ ᑳᑮ ᐋᑌᑕᕽ ᐃᐃ ᑳᐐ ᐃᔑᒋᑫᐸᓐ ᐅᐅ ᐁᑮ ᐃᑭᑐᒡ, ᑳᐐᓐ ᓴ ᐃ ᑕᐃᔑᐌᐸᓯᓅᓐ᙮ ᐁᒪᔅ ᑮᐸᐙᑕᕽ ᐃᔥᑯᑌ 4 ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᑳᐃᔑᓇᒧᐃᒡ᙮ ᓂᑮ ᐙᐸᒫ ᓴ ᑭᔐᒪᓂᑑ ᐁᑮ ᐋᐸᒋᑑᒡ ᐃᔥᑯᑌ ᐁᐐ ᓇᓇᐊᓵᒡ ᐯᒫᑎᓯᓂᒡ᙮ ᒦᑕᔥ ᐃᐃᒫ ᐃᔥᑯᑌᕽ ᑳᐃᔑ ᐊᑾᑭᑌᒃ ᐃᐃ ᑭᒋᑲᒻ, ᐃᐃ ᑲᔦ ᐊᑭ᙮ 5 ᒦᔥ ᐅᐅ ᑳᐃᑭᑐᔮᓐ, ᑮᓐ ᑌᐯᒋᑫᔭᓐ ᑭᔐᒪᓂᑑ, ᑕᑲ ᑭᑲᑴᒋᒥᓐ ᐃᐃ ᒋᐃᔑᒋᑫᓯᐗᓐ᙮ ᐋᓃᓐ ᑕᔥ ᐃᓈ ᒉᑲᐳᕽ Jacob ᑳᐅᑕᑳᓀᓯᐙᒡ ᐃᔅᕒᐃᔭᓬᐊᒃ ᑫᔑ ᐱᒫᑎᓯᐙᐸᓐ? 6 ᒦᔥ ᐅᐅ ᑳᑎᐯᒋᑫᒡ ᒦᓇᐙ ᑳᐃᔑ ᓇᑴᑕᕽ ᑳᐐ ᐃᔑᒋᑫᐸᓐ, ᑳᐐᓐ ᓴ ᑲᔦᐃ ᑕᐃᔑᐌᐸᓯᓅᓐ᙮ ᐁᒪᔅ ᑮᐸᐙᑕᕽ ᑯᓯᒀᐲᑭᔥᑰᒋᑲᓐ 7 ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᑳᐃᔑᓇᒧᐃᒡ᙮ ᐁᑮ ᐙᐸᒪᒃ ᐁᓃᐸᐎᒡ ᐋᓴᒪᔭᐄ ᐙᑳᔮᐱᑭᓂᑲᓂᕽ ᑳᑮ ᐋᐸᑕᓂᓂᑯᐸᓀᓐ ᑯᓯᒀᐲᑭᔥᑰᒋᑲᓐ ᐁᑾᔭᑯᒋᑳᑌᓂᒃ; ᐅᑮ ᑕᑯᓈᓐ ᓴ ᑯᓯᒀᐲᑭᔥᑰᒋᑲᓐ᙮ 8 ᒦᔥ ᐅᐅ ᑳᐃᔑᒡ, ᐁᒪᔅ Amos ᐌᑯᓀᓐ ᐌᔮᐸᑕᒪᓐ? ᐅᐅ ᑕᔥ ᓂᑮ ᐃᓈ, ᑯᓯᒀᐲᑭᔥᑰᒋᑲᓐ᙮ ᒦᔥ ᐅᐅ ᑳᐃᔑᒡ, ᒦ ᓴ ᐃᐌ ᐙᐋᐸᒋᑑᔭᓐ ᐁᐐ ᐊᑕ ᑭᑫᓂᒪᑾ ᐃᔅᕒᐃᔭᓬᐊᒃ ᐁᑾᔭᑯᓈᑯᓯᓯᒀ ᑖᐱᔥᑰ ᐅᐅ ᐙᑳᔮᐱᑭᓂᑲᓐ ᑳᐲᒫᒃ᙮ ᑳᐐᓐ ᐃᑕᔥ ᐊᐗᔑᒣ ᓂᐐ ᐋᑌᑕᓰ ᒋᑮ ᒪᓈᒋᐊᒀᐸᓐ᙮ 9 ᐃᐃᒫ ᓴ ᐋᐃᓯᒃ Isaac ᐅᐲᐌᓰᒪᐞ ᑳᑮ ᓂᑖ ᑕᔑ ᐊᓇᒥᐋᓂᒡ ᑳᔑ ᐸᐲᑾᑎᓈᓂᒃ ᑕᓂᔑᐗᓈᒋᒋᑳᑌᓂᐗᓐ᙮ ᐃᐃᒫ ᐊᑮᕽ ᐃᔅᕒᐃᔭᓬᐊᒃ ᑳᑭᑫᑕᒧᐙᒡ ᓀᑕ ᑕᔑ ᐊᓇᒥᐋᐙᒡ ᑕᓂᔑᐗᓈᒋᒋᑳᑌᓂᐗᓐ᙮ ᓂᑲ ᒦᑳᓈ ᑲᔦ ᐊᐊ ᑭᒋᐅᑭᒫ ᒉᕒᐆᐴᐊᒻ Jeroboam ᐲᓂᔥ ᒋᐃᔥᒀᐊᒃ᙮ ᐊᒪᓵᔭ ᑮᑭᔒᑲᓅᓈᒡ ᐁᒪᓲᓐ 10 ᐊᒪᓵᔭ Amaziah ᑳᑮ ᑭᒋ ᐊᓇᒥᐁᐎᑭᒫᐎᒡ ᐆᑌᓈᕽ ᐯᑕᓬ Bethel ᐁᒋᑳᑌᓂᒃ, ᐅᑮ ᐃᔑᓂᔕᐙᓐ ᐊᐎᔭᓐ ᐅᐅ ᒋᐊᐎᐃᓈᓂᒡ ᐃᔅᕒᐃᔭᓬᐃ ᑭᒋᐅᑭᒫᓐ ᒉᕒᐆᐴᐊᒻ ᑳᑮ ᐃᔑᓂᑳᓱᓂᒡ, ᐁᒪᔅ ᓴ ᑫᑰᓐ ᑭᑲᑴ ᑑᑖᒃ ᐃᐃᒫ ᑳᐊᔮᐗᒡ ᑳᔑ ᐊᔮᓂᒡ ᐯᒫᑎᓯᓂᒡ᙮ ᐯᒫᑎᓯᐙᒡ ᓴ ᐅᓵᒻ ᐅᓅᑕᐙᐙᓐ ᐋᓃᓐ ᐁᑭᑐᓂᒡ, ᒦᔥ ᑫᐅᒋ ᓂᔑᐗᓈᑕᒃ ᐅᐅ ᐊᑭ᙮ 11 ᒦ ᐄᓴᓐ ᐅᐅ ᐁᑭᑐᒡ, ᒉᕒᐆᐴᐊᒻ ᓴ ᐸᔑᐸᐃᑫᐎᑯᒫᓂᕽ ᑕᐅᒋ ᓂᐳ, ᐃᔅᕒᐃᔭᓬᐊᒃ ᓴ ᑫᒋᓈᒡ ᐅᑕᑮᒥᐙᕽ ᑕᒫᒌᒋᑲᓂᐎᐗᒃ ᒋᐊᐎ ᑕᑯᓂᑣ᙮ 12 ᒦᔥ ᐅᐅ ᐊᒪᓵᔭ ᑳᐃᓈᒡ ᐁᒪᓲᓐ, ᐁᒪᔅ ᑳᑲᓅᑕᒪᐗᒡ ᑭᔐᒪᓂᑑ, ᒦ ᐃ ᑌᒥᓂᒃ, ᒫᒑᓐ ᑭᑕᑮᕽ ᒎᑕ Judah ᐃᔑ ᑮᐌᓐ᙮ ᒦ ᐌᑎ ᐊᐎ ᑕᔑ ᑲᑮᑴᓐ᙮ ᒦ ᑲᔦ ᐌᑎ ᐊᐎ ᑕᔑ ᑲᔥᑭᒋᑫᓐ ᑫᐅᑖᑎᓯᔭᓐ᙮ 13 ᑫᑯ ᐐᓐ ᐅᐅᒫ ᐆᑌᓈᕽ ᐯᑕᓬ ᑕᔑ ᑲᑮᑴᑫᓐ᙮ ᑭᒋᐅᑭᒫ ᐄᑐᒃ ᐐᓐ ᐅᐅᒫ ᓂᑖ ᑕᔑ ᐊᓇᒥᐋ, ᑳᓂᑖ ᑕᔑ ᐊᓇᒥᐋᓈᓂᐗᕽ᙮ 14 ᒦᑕᔥ ᐅᐅ ᐁᒪᔅ ᑳᐃᔑ ᓇᑴᑕᐙᒡ ᐊᒪᓵᔭᐗᓐ, ᑳᐐᓐ ᐅᔕ ᓂᑑᑯᓯᓯᒥᑯᓰ ᑳᑲᓅᑕᒪᐙᒡ ᑭᔐᒪᓂᑑᓐ, ᑳᐐᓐ ᐊᐊ ᑎᓄ ᓂᑎᓄᐎᓰ᙮ ᒦ ᓴ ᐃ ᐁᓇᓄᑮᔮᓐ ᐁᓈᓈᑲᒋᐊᒀ ᐊᐗᑳᓇᒃ, ᒥᑎᑰᒃ ᑲᔦ ᐱᒃ fig ᑎᓄᐙᑎᑰᒃ ᐁᓈᓈᑲᒋᐊᒀ᙮ 15 ᒦᔥ ᐅᐅ ᑳᑎᐯᒋᑫᒡ ᑳᐃᔑᐸᓐ ᒣᒀ ᐁᓈᓈᑲᒋᐃᒪᒃ ᐊᐗᑳᓇᐞ, ᒫᒑᓐ ᐊᐎ ᐐᑕᒪᐤ ᐋᓃᓐ ᑫᓂ ᐃᔑᐌᐱᓯᐙᒡ ᐃᔅᕒᐃᔭᓬᐊᒃ ᑳᑎᐯᓂᒪᒀ᙮ 16 ᑕᑲ ᓴ ᑕᔥ ᐱᓯᑕᒧᐤ ᐋᓃᓐ ᐁᑭᑐᒡ ᑳᑎᐯᒋᑫᒡ, ᔖᑰᒡ ᐃᑕᔥ ᐅᐅ ᑭᑎᔥ, ᑫᑯ ᐃᓈᑫᓐ ᐃᔅᕒᐃᔭᓬᐊᒃ ᒋᒪᒋᓭᐙᒡ, ᒦ ᐃ ᐃᔑ ᐴᓂᒥᒻ ᒉᑲᑉ Jacob ᐅᐲᐌᓰᒪᐞ᙮ 17 ᒦᑕᔥ ᐐᓐ ᐅᐅ ᑮᓐ ᐁᓂᒃ ᑳᑎᐯᒋᑫᒡ, ᑭᐐᐤ ᓴ ᐲᓂᔥ ᑕᓂ ᐱᔑᒀᒋᑴᐎ ᐃᐃᒫ ᐆᑌᓈᕽ᙮ ᑭᑯᓯᓴᒃ, ᑭᑖᓂᓴᒃ ᑲᔦ ᐸᔑᐸᐃᑫᐎᑯᒫᓂᕽ ᑕᐅᒋ ᓂᓵᐗᒃ᙮ ᑭᑕᑮᒻ ᑲᔦ ᑳᑎᐱᓇᐌᐎᓯᔭᓐ ᑕᓀᓈᐎᓂᑳᑌ ᑯᑕᒃ ᐊᐎᔭᒃ ᒋᒦᓂᑣ; ᑮᓐ ᐃᑕᔥ ᐃᑯ ᒪᔭᑭ ᐊᑮᕽ ᑭᑲ ᑕᔑ ᓂᑉ᙮ ᐃᔅᕒᐃᔭᓬᐊᒃ ᓴ ᐸᑳᓐ ᐊᑮᕽ ᑫᑫᑦ ᑕᐃᔑᐎᒋᑲᓂᐎᐗᒃ, ᐅᑕᑮᐙᕽ ᒋᐅᒋ ᒫᒌᓂᑣ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society