Emahs 6 - ᐅᒋᐺ ᑭᒋᒪᓯᓇᐃᑲᓐᑮᓂᔑᐗᓈᒋᐃᑣ ᐃᔅᕒᐃᔭᓬᐊᒃ 1 ᐐᑫ ᓴ ᑭᑲ ᑭᒋ ᐃᔑᓭᒻ ᑮᓇᐙ ᑳᐌᑕᒃ ᑭᐱᒫᑎᓯᐎᓂᐙ ᓵᔭᓂᕽ Zion, ᑫᑮᓇᐙ ᑳᐃᓀᑕᒣᒃ ᑫᑰᓐ ᒋᐃᔑᓭᓯᐌᒃ ᐌᑎ ᐁᔮᔦᒃ ᐆᑌᓈᕽ ᓴᒣᕒᐃᔭ Samaria᙮ ᑮᓇᐙ ᒫᐗᒡ ᑳᓃᑳᓀᑖᑯᓯᔦᒃ ᐁᓃᑳᓂᔥᑲᐌᒀ ᑳᑭᒋ ᐃᓀᑖᑯᓯᐙᒡ ᐃᔅᕒᐃᔭᓬᐊᒃ, ᑮᓇᐙ ᐄᑐᒃ ᑳᓈᓯᑲᐎᓀᒀ ᐯᒫᑎᓯᐙᒡ ᐃᔅᕒᐃᔭᓬᐊᒃ ᒋᐐᒋᐁᒀ᙮ 2 ᐃᓇᔥᑫ ᐃᔖᒃ ᐌᑎ ᐆᑌᓈᕽ ᑳᓬᓀ Calneh ᒋᐊᐎ ᐙᐸᑕᒣᒃ᙮ ᐌᑎ ᓴ ᑲᔦ ᐊᓂ ᐃᔖᑫᒃ ᐁᒪᑦ Hamath ᑭᒋ ᐆᑌᓈᕽ᙮ ᐊᓂ ᐃᔖᑫᒃ ᐃᑕᔥ ᑲᔦ ᐌᑎ ᐆᑌᓈᕽ ᑳᑦ Gath ᐁᒋᑳᑌᒃ ᑳᐊᔮᒃ ᐱᓬᐃᔅᑎᔭᐗᑮᕽ Philistia᙮ ᑳᐐᓐ ᐄᑐᒃ ᐅᓄ ᐸᑳᓐ ᐊᑮᓐ ᐊᐲᒋ ᓲᑫᑖᑾᓯᓅᓇᓐ, ᑳᐐᓐ ᑲᔦ ᐊᐲᒋ ᒥᒑᓯᓅᓇᓐ ᑳᐃᓀᑖᑾᒃ ᑭᑑᑭᒫᐎᐎᓂᐙ ᒎᑕ Judah ᐊᑮᕽ ᐁᔮᔦᒃ, ᐃᔅᕒᐃᔭᓬ ᐊᑮᕽ ᑲᔦ ᐁᔮᔦᒃ᙮ 3 ᑳᐐᓐ ᐃᑕᔥ ᑭᑎᓀᑕᓰᒻ ᒋᐅᑎᓵᐸᑕᒣᒃ ᐃᐃ ᑳᐐ ᑭᒋ ᐃᔑᐌᐱᓯᔦᒃ᙮ ᑭᑎᔑᒋᑫᐎᓂᐙᕽ ᐄᑐᒃ ᑭᑐᒋ ᐯᔣᐸᑖᒻ ᐃᐃ ᑳᐐ ᐃᔑ ᑮᔑᑲᒃ᙮ 4 ᐁᑕᑕᐌ ᓴ ᑭᑲ ᑭᒋ ᐃᔑᐌᐱᓯᒻ ᑳᒪᒥᓄᔑᓀᒃ ᓂᐯᐎᓈᑯᕽ ᑳᒪᒪᓯᓂᒋᑳᑌᑭᓐ ᑲᑭᓅᔥᑭᔒᐙᐱᑕᓐ ᐁᐋᐸᑕᑭᓐ, ᐁᒦᒋᔦᒃ ᒫᐗᒡ ᐌᓂᔑᔑᒃ ᒫᓇᒑᓂᔐᓯᐎ ᐐᔮᔅ, ᑳᐋᒋᐴᓂᑣ ᑲᔦ ᐱᔑᑮᓴᒃ᙮ 5 ᒦᔥ ᐁᔑ ᓂᑲᒧᔦᒃ ᓂᑲᒧᓇᓐ ᐃᑯᑕᓄ ᑳᐃᓈᐸᑕᓯᓄᑭᓐ ᐁᒪᑗᔮᐲᑭᐱᒋᑫᔦᒃ, ᐁᐅᔑᑕᒫᓱᔦᒃ ᑭᑐᒋᑲᓇᓐ ᑫᑭᑐᒋᑳᑫᔦᒃ ᑖᐱᔥᑰ ᑌᐱᑦ David ᑳᑮ ᐃᔑᒋᑫᒡ᙮ 6 ᑭᒋ ᒥᓂᒀᑲᓇᓐ ᑲᔦ ᑭᑖᐸᒋᑑᒻ ᐁᒥᓂᑴᔦᒃ ᔔᒥᓈᐳ, ᒫᐗᒡ ᐌᓂᔑᔑᑭᓐ ᒥᓈᑯᐅᓇᓐ ᐁᐋᐸᒋᑑᔦᒃ, ᑳᐐᓐ ᐃᑕᔥ ᐐᓐ ᑲᓇᑫ ᒋᒪᐎᒥᒣᒃ ᒎᓴᑉ Joseph ᐅᐲᐌᓰᒪᐞ ᐁᔑ ᐲᑯᓈᑯᓯᓂᒡ᙮ 7 ᑮᓇᐙ ᑕᔥ ᓂᑕᒻ ᑭᑲ ᒫᒌᓂᑰᒻ ᐊᐲ ᒫᒌᓂᑎᓈᓂᐗᕽ; ᐃᐃ ᓴ ᑳᔑ ᓂᑖ ᐐᑾᑏᐗᑲᒥᑭᓯᔦᒃ, ᑳᔑ ᓂᑖ ᐐᓯᓂᔦᒃ ᑲᔦ ᑕᐴᓂᓭ᙮ 8 ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᑭᔐᒪᓂᑑ ᐅᐅ ᑮᐃᔑ ᐋᔩᒋ ᐊᔮᒀᒥᑖᑯᓯ ᐁᑮ ᐃᑭᑐᒡ, ᓂᔒᑫᑕᒧᐙᓐ ᓴ ᑳᔑ ᑭᒋ ᐃᓀᓂᑎᓱᐙᒡ ᐃᔅᕒᐃᔭᓬᐊᒃ ᐯᒫᑎᓯᐙᒡ, ᓂᔒᑫᑕᒧᐙᓇᓐ ᑲᔦ ᐅᑭᒋ ᐙᑳᐃᑲᓂᐙᓐ᙮ ᓂᑲ ᐸᑭᑎᓇᒧᐙᓐ ᒋᔖᑰᒋᒋᑳᑌᓂᒃ ᑳᓃᑳᓀᑖᑾᒃ ᑭᒋ ᐆᑌᓇ, ᑲᑭᓇ ᑲᔦ ᑫᑰᓐ ᐃᐃᒫ ᐁᔮᓂᒃ᙮ 9 ᑮᔥᐱᓐ ᓴ ᒥᑖᓱ ᐃᓂᓂᐗᒃ ᐃᔥᑸᐙᒡ ᐯᔑᒃ ᐙᑳᐃᑲᓂᕽ, ᑫᐐᓇᐙ ᓴ ᑕᓂᐳᐗᒃ᙮ 10 ᐊᐌ ᐃᓂᓂ ᑳᐱᒫᑎᓯᓯᒃ ᐅᑎᓇᐌᒫᑲᓇᓐ ᑳᑲᓇᐙᐸᑕᒥᓂᒡ ᓇᐃᓂᑫᐎᓐ ᐱᓵᑭᓯᑑᓂᒡ ᐃᓂ ᐎᔭᐎᒫᓐ, ᒦᔥ ᑫᐃᔑ ᔖᑯᐌᓂᒡ ᑫᔮᐱ ᐊᐎᔭᓐ ᐃᐃᒫ ᒋᐊᔮᓂᑴᓐ ᐲᑎᒃ ᐙᑲᐃᑲᓂᕽ, ᐊᐎᔭ ᓇ ᑭᐐᒌᐎᒃ? ᐅᑲ ᐃᔑ ᓇᑴᑖᑰᓐ, ᑳᐐᓐ᙮ ᒦᔥ ᑫᐃᓈᒡ, ᒪᓈ ᓇᐎᑖᑎᓐ, ᒋᐊᔮᒀᒥᓯᔭᕽ ᒋᒪᓈ ᐸᐹᒥᑕᒪᕽ ᑳᑎᐯᒋᑫᒡ ᐅᑎᔑᓂᑳᓱᐎᓐ᙮ 11 ᐃᓇᔥᑫ ᑳᑎᐯᒋᑫᒡ ᑮᐊᓅᑮᒡ, ᒦ ᐃ ᑭᒋ ᐙᑳᐃᑲᓇᓐ, ᐙᑳᐃᑲᓀᓴᓐ ᑲᔦ ᑫᔑ ᐱᑭᔥᑲᐃᑳᑌᓂᑭᓐ᙮ 12 ᒥᑕᑎᒨᒃ ᐃᓇ ᑕᐱᒥᐸᐃᑎᐗᒃ ᑳᔑ ᑲᑮᔥᑳᐱᑳᓂᒃ? ᐊᐎᔭ ᓇ ᑕᔑ ᐱᑭᔥᑲᑲᒥᑭᐱᒋᑫ ᑭᒋᑲᒦᕽ ᒋᐋᐸᒋᐋᐸᓐ ᐱᔑᑭᐗᐞ? ᒦᔥ ᑲᔦ ᐁᔑᒋᑫᔦᒃ ᐌᐌᓂ ᐃᓈᑯᓂᑫᐎᓐ ᐁᐱᒋᐳᐌᑖᑯᑑᔦᒃ, ᑳᑾᔭᑯᓈᑾᒃ ᑲᔦ ᐁᒪᒋᓈᑯᑑᔦᒃ᙮ 13 ᐋᐱᒋ ᑲᔦ ᑭᑭᒋ ᒫᒦᒀᓂᑎᓱᒻ ᐁᑮ ᑳᒋᒋᑑᔦᒃ ᓬᐆᑎᐹᕒ Lodebar ᐆᑌᓇ᙮ ᑭᒫᒦᒀᓂᑎᓱᒻ ᐁᐃᑭᑐᔦᒃ, ᓃᓇᐎᓐᑦ ᓴ ᑯ ᓂᑕᐲᒌᐎᓂᓈᓂᕽ ᓂᑮ ᐅᒋ ᔖᑰᒋᑑᒥᓐ ᑳᕒᓇᐃᒻ Karnaim! 14 ᒦᑕᔥ ᐅᐅ ᑳᑎᐯᒋᑫᒡ ᑳᒫᐙᒋ ᒪᔥᑲᐎᓰᒡ ᑭᔐᒪᓂᑑ ᐁᑭᑐᒡ, ᐯᒫᑎᓯᔦᒃ ᐃᔅᕒᐃᔭᓬᐊᒃ, ᓂᐐ ᐃᔑᓂᔕᐙᒃ ᓴ ᒪᔭᑭ ᔑᒫᑲᓂᔕᒃ ᒋᐱ ᒦᑳᓂᓀᒀ᙮ ᑫᔑ ᐌᓵᓂᐃᓀᒀ ᓴ ᐃᐃᒫ ᑕᐅᒋ ᒫᒋᓭᓂ ᐁᒪᑦ Hamath ᐌᒋ ᐲᑎᑫᔥᑳᓂᐗᕽ ᑮᐌᑎᓄᕽ ᐃᓇᑫ ᐲᓂᔥ ᐌᑎ ᑳᔑ ᓰᐲᐗᓂᓂᒃ ᐋᕒᐊᐸ Arabah᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society