Emahs 3 - ᐅᒋᐺ ᑭᒋᒪᓯᓇᐃᑲᓐ1 ᑕᑲ ᓅᑕᒧᐙᒃ ᐋᓃᓐ ᑳᑎᐯᒋᑫᒡ ᐁᓂᓀᒃ! ᑮᓇᐙ ᐅᔕ ᐃᔅᕒᐃᔭᓬᐊᒃ Israel ᑳᐃᑰᔦᒃ, ᑲᑭᓇ ᑳᐯᔑᑴᐙᓇᑭᓯᔦᒃ ᐄᒋᐸᑮᕽ ᑳᑮ ᐅᒋ ᓵᑭᒋᐎᓂᑰᔦᒃ᙮ 2 ᒦᔥ ᐅᐅ ᑳᑎᐯᒋᑫᒡ ᐁᑭᑐᒡ, ᑮᓇᐙ ᓴ ᐁᑕ ᑳᑮ ᐅᓈᐸᒥᓇᑰᒃ ᒣᑴᔭᐄ ᑳᔑ ᐹᑏᓉᐙᓇᑭᓯᐙᒡ ᑲᑭᓇ ᐯᒫᑎᓯᐙᒡ ᐅᐅᒫ ᐊᑮᕽ᙮ ᒦ ᓴ ᐃ ᑭᒪᒋᑑᑕᒧᐎᓂᐙᓐ ᑳᐅᒋ ᑲᒀᓂᓴᑭᓈᑾᑭᓐ, ᒦᑕᔥ ᐁᔑᓈᑾᒃ ᒋᓇᓇᐊᓯᓇᑰᒃ ᑭᒪᒋᑑᑕᒧᐎᓂᐙᓐ ᐅᒋ᙮ ᐅᑲᓅᑕᒫᑫ ᐅᑕᓄᑮᐎᓐ ᐁᐐᑌᓂᒃ 3 ᑳᐐᓐ ᐄᑐᒃ ᓃᔑᓐ ᐊᐎᔭᒃ ᑕᓃᔓᐅᓭᓰᐗᒃ ᑮᔥᐱᓐ ᐯᔑᑾᓐ ᐃᓀᑕᓯᒀ᙮ 4 ᑕᓅᑖᑯᓯ ᓇ ᒥᔑᐱᔑᐤ ᓅᐱᒦᕽ ᒥᑲᐙᓯᒃ ᐊᐎᔭᓐ ᑫᓂᓵᒡ? ᐅᔥᑭ ᒥᔑᐱᔑᐤ ᐃᓇ ᑕᓅᑖᑯᓯ ᐅᐙᔑᕽ ᑮᑳᒋᑎᓇᓯᒃ ᑫᒦᒋᒡ᙮ 5 ᑕᑕᓲᓈ ᓇ ᐱᓀᔒᓐᔥ ᐗᓃᐃᑲᓂᕽ ᑮᔥᐱᓐ ᐅᑯᑫᔭᐎᑲᑌᓯᓂᓂᒃ ᐃᐃ ᐗᓃᐃᑲᓐ? ᑕᓇᓵᐱᑭᓭ ᓇ ᐗᓃᐃᑲᓐ ᑮᔥᐱᓐ ᐊᐎᔭ ᑕᑯᑳᑕᓯᕽ? 6 ᑮᔥᐱᓐ ᓅᑖᑾᒃ ᐴᑖᒋᑲᓐ ᐃᐃᒫ ᐆᑌᓈᕽ, ᐯᒫᑎᓯᐙᒡ ᐄᑐᒃ ᑕᓭᑭᓯᐗᒃ᙮ ᑮᔥᐱᓐ ᓴ ᑭᒋ ᐆᑌᓇ ᑭᒋ ᐗᓯᑖᐎᓭᒃ, ᑳᑎᐯᒋᑫᒡ ᐄᑐᒃ ᐃᐃ ᐅᑎᔑᒋᑫᐎᓐ᙮ 7 ᑳᑎᐯᒋᑫᒡ ᑭᔐᒪᓂᑑ ᓴ ᑳᐐᓐ ᐐᑳ ᑫᑰᓂᓂ ᐃᔑᒋᑫᓰ ᑮᔥᐱᓐ ᑯᑕ ᑮᑭᑫᑕᒨᓈᓯᒃ ᐋᓃᓐ ᐗᐃᔑᒋᑫᒡ ᐃᐃ ᐅᑕᓄᑮᐋᑲᓇᐞ ᑳᑲᓅᑕᒫᑯᒡ᙮ 8 ᒥᔑᐱᔑᐤ ᓴ ᑮᓅᑖᑯᓯᒡ, ᐊᐌᓀᓐ ᓴ ᑫᑯᑖᒋᓯᑭᐸᓐ? ᐊᐲ ᓴ ᑳᑎᐯᒋᑫᓂᒡ ᑭᔐᒪᓂᑑᓐ ᑮᑮᑭᑐᓂᒡ, ᐊᐌᓀᓐ ᓴ ᑫᑲᔥᑭᑑᐸᓐ ᒋᒪᓈ ᐐᑕᒫᑫᐸᓐ ᐃᐃ ᐅᑎᐹᒋᒧᐎᓂᓂ᙮ ᒦ ᓴ ᐃ ᐁᒪᔅ Amos ᑳᐃᑭᑐᒡ᙮ ᑳᑎᐯᒋᑫᒡ ᑮᐃᑕᕽ ᓴᒣᕒᐃᔭ ᒋᓂᔑᐗᓈᒋᒋᑳᑌᓂᒃ 9 ᒫᒑᒃ ᐊᐎ ᐐᑕᒪᐎᑾᒃ ᐃᑭ ᑳᐃᔑᑖᐙᒡ ᐌᑎ ᐅᑭᒫᐎᑲᒥᑯᕽ ᐄᒋᐸᑮᕽ Egypt, ᐆᑌᓈᕽ ᑲᔦ ᐋᔥᑖᑦ Ashdod ᐁᒋᑳᑌᒃ, ᐌᑎ ᓴ ᓴᒣᕒᐃᔭ Samaria ᑳᔑ ᐸᐲᑾᑎᓈᒃ ᐃᔑ ᒫᐗᒋᐃᑎᒃ, ᒋᐙᐸᑕᒣᒃ ᐁᐗᐙᓀᑕᒪᑲᒥᑲᒃ, ᐁᑭᒋ ᐅᒻᐺᑲᒥᑭᓯᓈᓂᐗᕽ ᑲᔦ᙮ 10 ᒦᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐃᑭ ᓴ ᐯᒫᑎᓯᐙᒡ ᐅᒨᔥᑭᓇᑑᓈᐙᓐ ᑫᑰᓐ ᐅᐙᑳᐃᑲᓂᐙᕽ ᑳᑮ ᒪᑲᑗᐙᒡ ᓅᒋᑯ ᑮᐃᔑᒋᑫᐙᒡ, ᑮᐅᒻᐺᑲᒥᑭᓯᐙᒡ ᑲᔦ᙮ ᑳᐐᓐ ᓴ ᑲᓇᑫ ᐅᑭᑫᑕᓰᓈᐙ ᐌᐌᓂ ᒋᑮ ᐃᔑᒋᑫᐙᐸᓐ᙮ 11 ᒦᑕᔥ ᐅᐅ ᑫᐃᔑᓭᐙᒡ, ᑳᔒᑫᓂᒥᑯᐙᒡ ᓴ ᐅᑲ ᐙᑳᔥᑲᒥᓂ ᐅᑕᑮᒥᐙ, ᑫᓂᔑᐗᓈᒋᑑᓂᒡ ᑳᐅᒋ ᓈᑕᒫᓱᐙᒡ, ᑫᓂᔑᐗᓈᒋᑑᓂᒡ ᑲᔦ ᐅᑕᐸᐃᐌᐎᑲᒥᑯᐙᓐ, ᐃᑭᑐ ᑳᑎᐯᒋᑫᒡ᙮ 12 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᑖᐱᔥᑰ ᓴ ᐅᑲᓇᐎ ᒫᓇᒑᓂᔑᐌ ᑳᒪᑲᑗᒡ ᓃᔑᓐ ᐁᑕ ᐅᒫᓇᒑᓂᔑ ᐅᑳᑏᑲᓇᓐ ᑳᐃᔥᑾᒋᑳᑌᓂᑭᓐ, ᐸᑮ ᑲᔦ ᐅᑕᐗᑭᒫ ᒣᒀ ᐁᐊᒧᑯᓂᒡ ᒥᔑᐱᔑᐗᓐ, ᒦ ᓴ ᐯᔑᑾᓐ ᐋᓂᑕ ᐁᑕ ᐃᔅᕒᐃᔭᓬᐊᒃ ᑫᔑ ᐱᒫᒋᐃᑣ ᓴᒣᕒᐃᔭ Samaria ᐁᔮᐙᒡ ᑳᐃᔑ ᒪᒥᓋᐱᐙᒡ ᐅᒥᓄ ᑌᓴᐱᐎᓂᐙᕽ᙮ 13 ᒦᔥ ᐅᐅ ᐁᑭᑐᒡ ᑳᑎᐯᒋᑫᒡ ᑭᔐᒪᓂᑑ ᑳᒫᐗᒋ ᒪᔥᑲᐎᓰᒡ, ᐱᓯᑕᒧᒃ ᑕᔥ, ᐊᔮᒀᒥᒥᑾᒃ ᓴ ᐃᑭ ᒉᑲᐴᕽ Jacob ᑳᐅᑕᑳᓀᓯᐙᒡ, ᐃᑭᑐ ᑳᑎᐯᒋᑫᒡ᙮ 14 ᐊᐲ ᓴ ᑮᔑᑲᓂᓂᒃ ᓇᓇᐊᓴᒀ ᐃᔅᕒᐃᔭᓬᐊᒃ ᐅᒪᒋᑑᑕᒧᐎᓂᐙᓐ ᐅᒋ, ᒦ ᓴ ᐃ ᒋᓂᔑᐗᓈᒋᑑᔮᓐ ᑳᔑ ᐸᑭᑎᓈᓱᓈᓂᐗᕽ ᑳᐊᔮᑭᓐ ᐌᑎ ᐆᑌᓈᕽ ᐯᑕᓬ Bethel ᑳᐃᒋᑳᑌᒃ᙮ ᑳᔑ ᑲᑮᑫᔮᑭᓐ ᓴ ᐃᓂ ᑳᔑ ᐸᑭᑎᓈᓱᕽ ᑕᐲᑯᓭᐗᓐ, ᒥᑕᑲᒥᒃ ᑕᔑ ᐸᑭᓯᓅᓐ᙮ 15 ᓂᑲ ᓂᔑᐗᓈᒋᑑᓇᓐ ᓴ ᐱᐴᓂ ᐙᑳᐃᑲᓇᓐ, ᓃᐱᓂ ᐙᑳᐃᑲᓇᓐ ᑲᔦ; ᐃᓂ ᑲᔦ ᐙᑳᐃᑲᓇᓐ ᑳᒪᒪᓯᓂᒋᑳᑌᑭᓐ ᑳᐋᐸᑕᒃ ᑲᑭᓅᔥᑭᔒᐙᐱᑕᓐ, ᐃᓂ ᑲᔦ ᐙᑳᐃᑲᓇᓐ ᑳᐋᑾᑭᑌᑭᓐ ᑕᓂᔑᐗᓈᒋᒋᑳᑌᐗᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society