Emahs 2 - ᐅᒋᐺ ᑭᒋᒪᓯᓇᐃᑲᓐ1 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐃᑭ ᓴ ᐯᒫᑎᓯᐙᒡ ᒨᐗᑉ Moab ᐊᑮᕽ ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ᙮ ᒦᑕᔥ ᐃᐃ ᑳᐐ ᐅᒋ ᓇᓇᐊᓴᒀ᙮ ᐅᓵᒻ ᐋᓃᔥ ᑳᐐᓐ ᐅᑮ ᑭᑌᓂᒫᓯᐙᐙᓐ ᐄᑕᒻ ᑭᒋᐅᑭᒫᓐ ᐁᑮ ᐊᒀᑭᓴᒪᐙᐙᒡ ᐅᑲᓂᓂ ᐐᑫ ᓴ ᑯ ᐲᓂᔥ ᐁᑮ ᐱᑸᐗᓂᓂᑭᓐ᙮ 2 ᓂᑲ ᐃᔑᒋᑫ ᓴ ᒋᐊᒀᑭᑌᒃ ᐃᐃ ᒨᐗᑉ ᐊᑭ, ᒋᐊᒀᑭᑌᑭᓐ ᑲᔦ ᐃᓂ ᐊᐸᐃᐌᐎᑲᒥᑰᓐ ᑳᐊᔮᑭᓐ ᐌᑎ ᐆᑌᓈᕽ ᑮᕒᐃᐋᑦ Kerioth ᐁᒋᑳᑌᒃ᙮ ᐃᑭ ᓴ ᐯᒫᑎᓯᐙᒡ ᒨᐗᑉ ᐊᑮᕽ ᐁᔮᐙᒡ ᑕᓂᐳᐗᒃ ᐃᐃᒫ ᑳᑕᔑ ᒦᑳᑎᓈᓂᐗᓂᓂᒃ ᒣᒀ ᔑᒫᑲᓂᔕᐞ ᐁᔖᔖᑯᐌᓂᒡ, ᐴᑖᒋᑲᓇᓐ ᑲᔦ ᓅᑖᑾᓂᓂᑭᓐ᙮ 3 ᓂᑲ ᓂᓵ ᑕᔥ ᑲᔦ ᐊᐊ ᑳᑭᒋᐅᑭᒫᐎᒡ ᐃᐃᒫ ᒨᐗᑉ ᐊᑮᕽ, ᐃᑭ ᑲᔦ ᑲᑭᓇ ᑳᓃᑳᓂᓯᐙᒡ ᐃᐃᒫ ᐊᑮᕽ, ᐃᑭᑐ ᑳᑎᐯᒋᑫᒡ᙮ 4 ᒦᔥ ᐅᐅ ᑳᑎᐯᒋᑫᒡ ᐁᓂ ᐃᑭᑐᒡ, ᐃᑭ ᓴ ᐯᒫᑎᓯᐙᒡ ᐃᐃᒫ ᒎᑕ Judah ᐊᑮᕽ ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ᙮ ᒦᑕᔥ ᐃᐃ ᑫᒋᓈᒡ ᑳᐐ ᐅᒋ ᓇᓇᐊᓴᒀ᙮ ᐅᑮ ᐋᓇᐌᑖᓈᐙᓐ ᐄᑐᒃ ᐅᓵᒻ ᓂᑎᓈᑯᓂᑫᐎᓇᓐ, ᑳᐐᓐ ᑲᔦ ᐅᑮ ᑲᓇᐌᑕᓰᓈᐙᓐ ᓂᑎᑭᑐᐎᓇᓐ᙮ ᒦ ᓴ ᑫᐐᓇᐙ ᐁᔑ ᐗᓂᒥᑯᐙᒡ ᐃᐃ ᐯᔑᑾᓐ ᒪᓂᑑᑳᓇᐞ ᐅᑫᑌᔭᐋᒥᐙᐸᓃᐞ ᑳᑮ ᐊᓄᑮᑕᐙᓂᒡ᙮ 5 ᓂᑲ ᐃᔑᑑᓐ ᓴ ᒎᑕ ᐊᑭ ᒋᓴᑭᑌᒃ, ᒋᐊᒀᑭᑌᑭᓐ ᑲᔦ ᐃᓂ ᐊᐸᐃᐌᐎᑲᒥᑰᓐ ᒉᕒᐆᓴᓬᐊᒥᕽ Jerusalem ᐁᔮᑭᓐ, ᐃᑭᑐ ᑳᑎᐯᒋᑫᒡ᙮ ᑭᔐᒪᓂᑑ ᑮᑎᐹᑯᓈᒡ ᐃᔅᕒᐃᔭᓬᐊᐞ 6 ᒦ ᓴ ᐅᐅᐌᓂ ᑳᑎᐯᒋᑫᒡ ᐁᑭᑐᒡ, ᐃᑭ ᓴ ᐯᒫᑎᓯᐙᒡ ᐃᔅᕒᐃᔭᓬᐊᒃ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ᙮ ᒦᑕᔥ ᐃᐃ ᑫᒋᓈᒡ ᐃᑯ ᑳᐐ ᐅᒋ ᓇᓇᐊᓴᒀ᙮ ᐁᐊᑖᐙᑫᐙᒡ ᐃᐃ ᑾᔭᒃ ᑳᐃᓂᓃᐎᓂᒡ ᑳᑌᑎᐸᐊᓯᓂᒃ ᐅᒪᓯᓇᐃᑫᐎᓂᓂ, ᑳᑭᑎᒫᑭᓯᓂᒡ ᑲᔦ ᑳᑌᑎᐸᐊᓯᓂᒃ ᐯᔑᑴᐙᓐ ᒪᑭᓯᓇᓐ᙮ 7 ᒥᑕᑲᒥᕽ ᓴ ᐅᑎᔑ ᑕᑕᑯᑳᓈᐙᐞ ᐃᐃ ᑳᑭᑎᒫᑭᓯᓂᒡ, ᑳᑲᔥᑭᑑᓯᓂᒃ ᒋᓈᑕᒫᓱᓂᒡ, ᑳᑰᐹᑎᓯᓂᒡ ᐅᑮ ᐸᑫ ᑳᑎᓈᐙᐞ᙮ ᒦᔥ ᑲᔦ ᐃᓂᓂ, ᐃᓂ ᑲᔦ ᐅᑌᑌᓐ ᓅᒋᑯ ᐁᔑ ᑑᑕᐙᐙᒡ ᐃᓂ ᐯᔑᑾᓐ ᐃᑴᓭᓴᓐ ᑳᐸᒦᑖᑫᓂᒡ᙮ ᒦᔥ ᐃᐃ ᓂᐐᓱᐎᓐ ᑳᐐᓐ ᑭᑌᒋᑳᑌᓯᓅᓐ᙮ 8 ᒦᔥ ᐁᔑ ᐱᒥᔑᓄᐙᒡ ᑳᔑ ᓂᑖ ᐊᓇᒥᐋᓂᐗᓂᓂᒃ ᐁᑭᑭᔥᑲᒧᐙᒡ ᑭᑭᔥᑭᑲᓇᓐ ᑳᑮ ᒪᑲᒫᐙᒡ ᑫᑎᒫᑭᓯᓂᒡ ᑳᐊᓺ ᑎᐸᐃᑳᑫᓂᒡ ᑳᒪᓯᓇᐊᒫᑯᐙᒡ᙮ ᒦᔥ ᑲᔦ ᐃᐃᒫ ᐅᑭᔐᒪᓂᑑᒥᐙᓐ ᐅᐙᑳᐃᑲᓂᓃᕽ ᐁᑕᔑ ᒥᓂᑴᐙᒡ ᔔᒥᓈᐳ, ᐁᒥᓂᒀᓈᐙᒡ ᔔᓂᔮᓐ ᑳᑮ ᒪᑲᒫᐙᒡ ᑳᒪᓯᓇᐊᒫᑯᐙᒡ᙮ 9 ᑮᓇᐙ ᐄᑐᒃ ᓂᐱᒫᑎᓰᒪᒃ, ᑳᑮ ᐅᒋ ᑌᑕᑯ ᒑᑭᐊᒀ ᐁᒧᕒᐄ Amorites ᑳᑎᓄᐎᐙᒡ᙮ ᒦᐗᐞ ᐄᑐᒃ ᐃᐃ ᐃᓂᓂᐗᐞ ᑳᑮ ᐃᓀᑖᑯᓯᓂᒡ ᑖᐱᔥᑰ ᐁᐊᑰᓯᐙᒡ ᑮᔥᑳᑎᑯᕽ, ᐁᐊᐲᒋ ᓲᑫᑖᑯᓯᐙᒡ ᑲᔦ ᐅᒃ oak ᑎᓄᐙᑎᑯᕽ᙮ ᓂᑮ ᓂᔑᐗᓈᒋᑖᐙᓇᓐ ᓴ ᑳᓂᑖᐎᑭᑑᐙᒡ, ᐅᒌᐱᑭᐙᓐ ᑲᔦ᙮ 10 ᑭᑮ ᓵᑭᒋᐎᓂᓂᒻ ᑲᔦ ᐌᑎ ᐄᒋᐸᑮᕽ, ᑭᑮ ᐸᐹ ᓃᑳᓃᑕᒪᐎᓂᓂᒻ ᑲᔦ ᐱᑾᑕᑲᒥᒃ ᓃᒥᑕᓇ 40 ᑕᓱᐱᐴᓐ᙮ ᑭᑮ ᒦᓂᓂᓂᒻ ᑲᔦ ᒋᑎᐯᑕᒧᐌᒃ ᐅᑕᑮᒥᐙ ᐃᑭ ᐁᒧᕒᐄ ᑳᑎᓄᐎᐙᒡ᙮ 11 ᓂᑮ ᐅᓀᓂᒫᒃ ᑲᔦ ᐋᓂᑕ ᑭᑯᓯᓯᐙᒃ ᒋᑲᓅᑕᒪᐙᐙᒡ ᑭᔐᒪᓂᑑᓐ, ᐋᓂᑕ ᑲᔦ ᑭᑑᔥᑭᓃᑮᒥᐙᒃ ᓈᓴᕒᐋᔨᑦ ᒋᑎᓄᐎᐙᒡ᙮ ᐃᔅᕒᐃᔭᓬᐊᒃ, ᑳᐐᓐ ᐃᓇ ᓂᑌᐺᓰ ᐅᐅ ᑳᐃᑭᑐᔮᓐ? 12 ᔖᑰᒡ ᐃᑕᔥ ᑭᑮ ᑲᔥᑭᐋᐙᒃ ᓈᓴᕒᐋᔨᑦ ᑎᓄ ᐃᓂᓂᐗᒃ ᒋᒥᓂᑴᐙᒡ ᔔᒥᓈᐳ, ᑭᑮᐃᓈᐙᒃ ᑲᔦ ᑳᑲᓅᑕᒪᐎᐙᒡ ᒋᐐᑕᒫᑫᓯᒀ ᓂᑎᐹᒋᒧᐎᓐ᙮ 13 ᒦᔥ ᑫᑑᑕᐎᓇᑰᒃ ᒋᔑᑯᔥᑲᐎᓇᑰᒃ ᑖᐱᔥᑰ ᐅᑖᐹᓈᒃ ᑳᔑ ᔑᑯᔥᑭᑫᒡ ᑮᒨᔥᑭᓇᒋᑳᑌᑭᓐ ᑭᑎᑳᓇᓐ ᐃᐃᒫ ᐅᑖᐹᓈᑯᕽ᙮ 14 ᐃᑭ ᓴ ᑳᑭᔒᐸᑑᐙᒡ ᑳᐐᓐ ᑕᔖᐾᓰᐗᒃ, ᐃᑭ ᑲᔦ ᑳᒪᔥᑲᐎᓰᐙᒡ ᑳᐐᓐ ᑕᓵᐲᓰᐗᒃ᙮ ᔑᒫᑲᓂᔕᒃ ᑲᔦ ᑳᐐᓐ ᐅᑲ ᑲᔥᑮᑑᓰᓈᐙ ᒋᓈᑕᒫᓱᐙᒡ᙮ 15 ᐃᑭ ᓴ ᑲᔦ ᐱᒧᒋᑫᐎᓂᓂᐗᒃ ᑕᔖᑰᑖᓂᒥᐋᐗᒃ, ᑳᑭᔒᐸᑑᐙᒡ ᓴ ᑲᔦ ᑳᐐᓐ ᑕᔖᐾᓰᐗᒃ᙮ ᐃᓂᓂᐗᒃ ᑲᔦ ᒥᑕᑎᒨᐞ ᑳᐋᐸᒋᐋᐙᒡ ᑳᐐᓐ ᑕᔖᐾᓰᐗᒃ᙮ 16 ᒦ ᓴ ᐃ ᐊᐲ ᑮᔑᑲᓂᓂᒃ ᒫᐗᒡ ᐃᑯ ᑳᓲᑭᑌᐁᐙᒡ ᔑᒫᑲᓂᔕᒃ ᒋᐸᑭᒋ ᐌᐱᓇᒧᐙᒡ ᐅᒦᑳᓱᐎ ᐋᐸᒋᒋᑲᓂᐙᓐ ᒋᒫᒌᐸᐃᐌᐙᒡ, ᐃᑭᑐ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society