Ehstar 8 - ᐅᒋᐺ ᑭᒋᒪᓯᓇᐃᑲᓐᒎᐗᒃ ᑮᑲᓅᓂᑣ ᒋᓇᓈᑯᓇᒫᓱᐙᒡ 1 ᐃᐃ ᑕᔥ ᐯᔑᑾᓐ ᐁᑮᔑᑲᓂᓂᒃ, ᑭᒋᐅᑭᒫ ᓭᕒᐊᒃᓰᔅ Xerxes ᐅᑮ ᒦᓈᓐ ᑭᒋᐅᑭᒫᑴᓐ ᑲᑭᓇ ᑫᑰᓐ ᑳᑎᐯᑕᒥᓂᒡ ᐁᒪᓇᓐ Haman ᑳᑮ ᔒᑫᓂᒫᓂᒡ ᒎᐗᐞ᙮ ᐁᔅᑕᕒ Esther ᐃᑕᔥ ᐅᑮ ᐐᑕᒪᐙᓐ ᑭᒋᐅᑭᒫᓐ ᐁᐃᓇᐌᒫᒡ ᒸᕒᑎᑳᐃᔭᓐ Mordecai᙮ ᒦᔥ ᐃᐃ ᐃᔑ ᐊᐲ ᑳᐸᑭᑎᓂᓐᒡ ᒸᕒᑎᑳᐃ ᐱᓵᓐ ᒋᐲᑎᑫᒡ ᐁᔑᐊᔮᓂᒡ ᑭᒋᐅᑭᒫᓐ᙮ 2 ᑭᒋᐅᑭᒫ ᓴ ᑕᔥ ᐅᑮ ᑮᒋᑯᔥᑲᐙᓐ ᐅᑭᒋᐅᑭᒫᐎ ᓈᐱᓂᒌᐱᓱᓇᓐ ᑳᑮ ᑮᐌ ᐅᑖᐱᓈᒡ ᐁᑮ ᒦᓈᐸᓐ ᐁᒪᓇᓐ, ᐅᑮ ᒦᓈᓐ ᐃᑕᔥ ᒸᕒᑎᑳᐃᔭᓐ᙮ ᒦᔥ ᐁᔅᑕᕒ ᑳᑮ ᐃᔑ ᐃᓇᑭᒫᒡ ᒋᓈᓈᑲᒋᑑᓂᒡ ᐁᒪᓇᓐ ᐅᑕᔭᐄᒥᓂ᙮ 3 ᒦᑕᔥ ᒦᓇᐙ ᐁᔅᑕᕒ ᑳᐃᔑ ᑲᑴᒋᒫᒡ ᑭᒋᐅᑭᒫᓐ ᐁᑮ ᐊᓂᒥᑯᑖᒡ ᐁᔑᓯᑌᐱᓂᒡ ᐁᑮ ᒪᐎᒡ᙮ ᐁᑮ ᑲᑴᒋᒫᒡ ᒋᑭᐱᑎᓇᒥᓂᒡ ᐙᐃᔑ ᒪᒋᑑᑕᒥᓂᐸᓐ ᐁᒪᓇᓐ ᐁᑳᑯᕽ Agag ᐌᑕᑳᓀᓯᓂᒡ, ᐃᐃ ᑲᔦ ᐙᐃᔑ ᒪᒋᑑᑕᐙᓂᐸᓐ ᒎᐗᐞ᙮ 4 ᒦᔥ ᑭᒋᐅᑭᒫ ᑳᐃᔑ ᓃᒫᑯᓇᕽ ᐅᑭᒋᐅᑭᒫ ᓴᑲᐅᓈᒃ ᐃᓇᑫ ᐁᔑᐊᔮᓂᒡ ᐁᔅᑕᕒᐊᓐ, ᒦᔥ ᑳᐃᔑ ᐸᓯᑸᓂᒡ᙮ 5 ᒦᔥ ᐁᔅᑕᕒ ᑳᐃᑭᑐᒡ, ᑮᔥᐱᓐ ᑭᒋᐅᑭᒫ ᐃᔑ ᒥᓉᑕᕽ, ᒥᓍᐸᒥᒡ ᑲᔦ, ᐃᓀᑕᕽ ᐁᑾᔭᑯᓈᑾᓂᓂᒃ ᐅᐅ ᒋᐃᔑᒋᑫᕽ, ᑮᔥᐱᓐ ᑲᔦ ᒥᓍᐸᒥᒡ, ᑕᑲ ᐅᓇᑑᓐ ᑫᐅᒋ ᑭᐱᑎᓂᑳᑌᓂᒃ ᑳᐐ ᐃᔑᒋᑫᒡ ᐁᒪᓐ ᐌᑌᑌᒡ ᐊᒥᑌᑕᐗᓐ Hammedatha ᐌᑕᑳᓀᓯᒡ ᐁᑳᑯᕽ᙮ ᒦ ᐄᑐᒃ ᐊᐊ ᑳᐐ ᒑᑭᐋᐸᓐ ᑲᑭᓇ ᒎᐗᐞ ᐁᔮᓂᒡ ᒥᓯᐌ ᑭᒋᐅᑭᒫ ᐁᔑ ᑎᐯᑕᒥᓂᒡ ᐊᑮᓐ᙮ 6 ᐋᓃᓐ ᐃᑕᔥ ᐃᓈ ᑫᔑ ᑲᔥᑭᑑᔮᐹᓐ ᒋᐱᒫᑎᓯᔮᓐ ᑮᔥᐱᓐ ᒫᔑᓭᐎᓐ ᐅᑎᓯᑯᐙᒡ ᓂᐐᒋᐱᒫᑎᓰᒪᒃ, ᐃᑭ ᑲᔦ ᓂᑎᓇᐌᒫᑲᓇᒃ ᓂᓯᑣ᙮ 7 ᒦᑕᔥ ᑭᒋᐅᑭᒫ ᓭᕒᐊᒃᓰᔅ ᑳᐃᔑ ᓇᑴᑕᐙᒡ ᑭᒋᐅᑭᒫᑴᓐ ᐁᔅᑕᕒ, ᐃᓂ ᑲᔦ ᒸᕒᑎᑳᐃᔭᓐ ᒎᐗᓐ, ᒦᔥ ᑳᑮ ᐅᒋ ᐊᑰᓇᒃ ᐁᒪᓐ ᐋᓃᔥ ᐅᓵᒻ ᐅᑮ ᒦᑳᓈᐞ ᒎᐗᐞ, ᒦᔥ ᑲᔦ ᑳᑮ ᐅᒋ ᒦᓇᒃ ᐁᔅᑕᕒ ᐅᑕᔭᐄᒥᓂ ᐁᒪᓇᓐ᙮ 8 ᐃᓇᔥᑫ ᐃᑕᔥ ᑭᒋᐅᑭᒫ ᑮᐅᓇᔓᐌᒡ ᐁᑕ ᑕᑯ ᐋᐸᑕᓂᓂᒃ ᐅᐐᓱᐎᓐ, ᐅᓈᐱᓂᒌᐱᓱᓇᓐ ᑲᔦ ᑮᒪᓯᓂᔑᒥᒥᓐᒡ, ᑳᐐᓐ ᐄᑐᒃ ᑕᑲᔥᑭᒋᑳᑌᓯᓅᓐ ᐅᓇᔓᐌᐎᓐ ᒋᐋᒋᒋᑳᑌᒃ᙮ ᔖᑰᒡ ᐃᑕᔥ ᐅᔑᐲᐊᓐ ᑯᑕᒃ ᐅᓇᔓᐌᐎᓐ ᑭᒋᐅᑭᒫ ᐅᐐᓱᐎᓂᕽ, ᐅᒋ ᒎᐗᒃ ᐋᓃᓐ ᐃᑯ ᐁᔑ ᐊᑕᐌᑕᒪᓐ ᒋᐃᓇᑌᒃ, ᑮᐃᔑ ᓇᑴᑕᒻ᙮ 9 ᓃᔥᑕᓇᔑᓂᓯᓐ 23 ᐁᐃᓇᑭᓱᓂᒡ ᓂᓱᑮᓯᓲᓐ ᓯᐸᓐ Sivan ᐁᐱᒪᑭᓱᓂᒡ ᒦ ᐃ ᐊᐲ ᐅᑭᒫᐎ ᐅᔑᐲᐃᑫᐎᓂᓂᐗᒃ ᑳᑮ ᑲᓅᓂᑣ ᒋᐅᑾᐱᐙᒡ᙮ ᒦᐗᒃ ᐃᑕᔥ ᐃᑭ ᑳᐅᔑᐲᐊᒧᐙᒡ ᐁᑭᑐᓂᒡ ᒸᕒᑎᑳᐃᔭᓐ ᐁᑮ ᐅᔑᐲᐊᒪᐎᑣ ᒎᐗᒃ, ᐌᑭᒫᐌᑖᑯᓯᐙᒡ ᑌᐯᑕᒧᐙᒡ ᐊᑮᓐ, ᑲᔦ ᐃᑭ ᑳᓃᑳᓂᓰᑲᑕᒧᐙᒡ ᐃᓂ ᓂᑯᑣᒃ ᓃᔥᑕᓇᔑᓃᔣᓱ 127 ᐊᑮᓐ ᐄᑎᔭ India ᐊᑮᕽ ᐁᑮ ᐅᒋ ᒫᒋᓭᓂᒃ, ᐲᓂᔥ ᐌᑎ ᓱᑌᓐ Sudan ᐊᑮᕽ᙮ ᐅᓄ ᑕᔥ ᐅᔑᐲᐃᑲᓇᓐ ᑮᐃᔑᓂᔕᐃᑳᑌᐗᓐ ᐁᑕᓯᑭᓐ ᐊᑮᓐ᙮ ᐁᐊᔨᔑᑮᔗᐙᒡ ᐯᐸᑳᓐ ᐊᑮᕽ ᐃᓴ ᑲᔦ ᐃᔑᐲᐃᑳᑌ, ᓀᑖ ᐃᔑᐲᐃᑫᐙᒡ ᐃᓇᑫ ᑮᐃᔑᐲᐃᑳᑌᓂ ᐃᑭᐌᓂᐗᒃ ᑲᔦ ᒎᐗᒃ ᑳᐃᔑᑮᔗᐙᒡ ᑲᔦ ᑳᐃᔑᐲᐃᑫᐙᒡ᙮ 10 ᒸᕒᑎᑳᐃ ᐃᑕᔥ ᑮᐊᓅᑮ ᒋᐅᔑᐲᐃᑳᑌᓂᒃ ᑭᒋᐅᑭᒫᓐ ᓭᕒᐊᒃᓰᓴᓐ ᐅᐐᓱᐎᓂᓂ ᐃᐃᒫ ᐅᔑᐲᐃᑲᓂᕽ᙮ ᒦᔥ ᑲᔦ ᑳᐃᔑ ᒪᓯᓂᔑᒫᒡ ᑭᒋᐅᑭᒫᐎ ᓈᐱᓂᒌᐱᓱᓇᓐ ᒋᐅᑭᒫᐎᓈᑾᓂᓂᒃ ᐃᐃ ᐅᔑᐲᐃᑲᓐ᙮ ᒦᔥ ᑳᐃᔑ ᐊᓅᓂᑣ ᐃᑭ ᐯᒥᐎᑑᐙᒡ ᐅᔑᐲᐃᑲᓇᓐ ᐁᑮ ᐋᐸᒋᐋᐙᒡ ᑫᔒᐸᑑᓂᒡ ᒥᑕᑎᒨᐞ᙮ ᐃᐃ ᓴ ᒥᑕᑎᒨᐞ ᑮᐅᑎᓂᑲᓂᐎᐗᐞ ᑭᒋᐅᑭᒫᕽ᙮ 11 ᒦᑕᔥ ᑳᑮ ᐃᔑᐲᐃᑳᑌᒃ ᐃᐃ ᐅᔑᐲᐃᑲᓐ ᐱᓵᓐ ᐃᑯ ᒎᐗᒃ ᒋᓈᑕᒫᓱᐙᒡ ᐁᔑ ᐊᔭᔮᐙᒡ ᑳᑕᓱ ᐆᑌᓇᐗᕽ᙮ ᐱᓵᓐ ᐃᑯ ᒋᓇᓈᑸᐙᒡ ᒎᐗᒃ ᒦᑳᓂᑯᐙᒡ ᐋᓃᓐ ᐃᑯ ᐁᑎᓄᐎᓂᒡ ᔑᒫᑲᓂᔕᐞ ᐋᑎ ᐱᑯ ᐁᔑ ᐊᔭᔮᐙᒡ ᒎᐗᒃ ᐯᐸᑳᓐ ᐊᑮᕽ᙮ ᐱᓵᓐ ᐃᑯ ᒋᓈᑕᒪᐙᐙᒡ ᐅᑎᑴᒥᐗᐞ, ᐅᓃᒑᓂᓯᐙᐞ ᑲᔦ᙮ ᐱᓵᓐ ᐃᑯ ᒋᒑᑭᐋᐙᒡ ᐃᐃ ᑳᒦᑳᓂᑯᐙᒡ, ᑲᔦ ᑕᔥ ᒋᐅᑖᐱᓇᒧᐙᒡ ᐅᑕᔭᐄᒥᓂ᙮ 12 ᐅᐅ ᑕᔥ ᐅᔑᐲᐃᑲᓐ ᑮᐃᓇᑌ ᒋᒫᒋᓭᒃ ᑮᔑᑲᒃ ᒥᓯᐌ ᐯᕒᔕ Persia ᐅᑭᒫᐎᐎᓂᕽ ᐊᐲ ᑳᑮ ᐃᓇᒋᑳᑌᑭᐸᓐ ᒎᐗᒃ ᒋᓂᓯᑣᐸᓐ᙮ ᒥᑖᔑᓂᓯᓐ ᐁᐃᓇᑭᓱᒡ ᐊᐊ ᐁᑕᕒ Adar ᒥᑖᔑᓃᔓᑮᓯᔅ᙮ 13 ᐃᐃ ᑕᔥ ᐅᔑᐲᐃᑲᓐ ᑮᐃᓇᒋᑳᑌ ᐅᓇᔓᐌᐎᓂᕽ ᒋᐃᓇᑭᑌᒃ, ᑲᔦ ᒥᓯᐌ ᒋᑭᑫᑖᑯᒋᑳᑌᒃ ᑲᔦ ᐁᑕᓱ ᐃᔑᑮᔗᕽ᙮ ᐊᐲᐃ ᐃᔑ ᑮᔑᑲᓂᓂᒃ ᒎᐗᒃ ᑳᐐ ᓂᓯᑣ ᒋᐁᐯᒦᐙᒡ ᐱᓵᓐ ᐃᑯ ᒋᓈᑕᒫᓱᐙᒡ᙮ 14 ᑭᒋᐅᑭᒫ ᑕᔥ ᐅᑮ ᐊᓅᓇᐞ ᐯᒥᐎᑑᓂᒡ ᐅᔑᐲᐃᑲᓇᓐ ᒋᒫᒑᓂᒡ ᒋᐋᐸᒋᐋᓂᒡ ᒫᐗᒡ ᑫᔒᐸᑑᓂᒡ ᑭᒋᐅᑭᒫᐎ ᒥᑕᑎᒨᐞ᙮ ᐃᐃ ᑕᔥ ᐅᓇᔓᐌᐎᓐ ᑮᐐᒋᑳᑌ ᑲᔦ ᐃᐃᒫ ᒫᐗᒋ ᑭᒋ ᐆᑌᓈᕽ ᓲᓴ Susa᙮ 15 ᒦᔥ ᒸᕒᑎᑳᐃ ᑳᑮ ᐊᓂ ᓵᑲᐊᕽ ᑭᒋᐅᑭᒫᐎᑲᒥᑯᕽ ᐁᑮ ᑭᑭᔥᑲᕽ ᑭᒋᐅᑭᒫᐎ ᑭᑭᔥᑭᑲᓇᓐ ᐅᓵᐗᔥᑴᑭᓐ, ᐙᐱᔥᑴᑭᓐ ᑲᔦ, ᐁᑮ ᑲᔥᑮᑮᒡ ᑲᔦ ᒪᑲᑌ ᒥᔅᑴᑭᓂᐎ ᑲᔥᑮᑮᐎᓐ, ᐅᑮ ᑭᑭᔥᑳᓐ ᑲᔦ ᒫᐗᒡ ᐃᑯ ᐁᐅᓂᔑᔑᓂᓂᒃ ᑭᒋᐅᑭᒫᐙᓄᒀᓐ᙮ ᒥᓯᐌ ᓴ ᐁᔑ ᒪᒦᑲᓇᐗᕽ ᑭᒋ ᐆᑌᓇ ᓲᓴ ᑮᑭᒋ ᔖᔖᑯᐙᓂᐗᓐ ᐁᑮ ᒌᑫᑕᒧᓈᓂᐗᕽ᙮ 16 ᐐᑫ ᑕᔥ ᒎᐗᒃ ᑮᒥᓉᑕᒨᒃ, ᐁᑮ ᓇᐁᑕᒧᐙᒡ, ᐁᑮ ᒌᑫᑕᒧᐙᒡ ᑲᔦ᙮ ᑲᔦ ᑕᔥ ᐁᑮ ᒨᔑᑑᐙᒡ ᑫᒋᓈᒡ ᒋᔖᑰᒋᑣᐙᒡ᙮ 17 ᒥᓯᐌ ᑕᔥ ᐊᑮᕽ, ᑭᒋ ᐆᑌᓈᑳᕽ ᑲᔦ ᑳᐃᔑ ᐊᓇᒥᒋᑳᑌᓂᒃ ᑭᒋᐅᑭᒫ ᐅᑑᔑᐲᐃᑲᓐ, ᐐᑫ ᓴ ᑮᒌᑫᑕᒧᓈᓂᐗᓐ ᐁᔑ ᐊᔭᔮᐙᒡ ᒎᐗᒃ᙮ ᑮᑭᐱᒌᓈᓂᐗᓐ ᑲᔦ, ᑮᐐᓯᓂᓈᓂᐗᓐ ᑲᔦ ᑳᐊᐲᒋ ᒥᓉᑕᒧᓈᓂᐗᕽ᙮ ᑯᑕᒃ ᐃᑕᔥ ᑲᔦ ᐊᐎᔭᒃ ᑳᒎᐎᐎᓯᒀ ᑮᐃᓀᑕᒨᒃ ᒋᒎᐎᐙᒡ ᐁᑮ ᐊᓂ ᑯᓵᐙᒡ ᐃᐃ ᒎᐗᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society