Ehstar 7 - ᐅᒋᐺ ᑭᒋᒪᓯᓇᐃᑲᓐ1 ᒦᔥ ᑭᒋᐅᑭᒫ ᐊᐊ ᑲᔦ ᐁᒪᓐ Haman ᑳᑮ ᐃᔖᐙᒡ ᐁᔑ ᐐᑾᑫᓂᒡ ᐁᔅᑕᕒᐊᓐ᙮ 2 ᓃᔓᑮᔑᒃ ᐃᑕᔥ ᐁᐊᓂ ᐃᔑᓭᒃ ᒣᒀ ᐁᒥᓂᑴᐙᒡ ᔔᒥᓈᐴᓂ, ᒦ ᐃ ᒦᓇᐙ ᑭᒋᐅᑭᒫ ᐁᑮ ᑲᑴᒋᒫᒡ ᐁᔅᑕᕒᐊᓐ Esther ᐁᑮᐃᓈᒡ, ᑭᒋᐅᑭᒫᑴ ᐁᔅᑕᕒ, ᐌᑯᓀᓐ ᐁᑕᐌᑕᒪᓐ᙮ ᐐᑕᒪᐎᔑᓐ, ᒦᔥ ᒋᒦᓂᓈᓐ, ᒥᓴᐙ ᑯ ᐋᐱᑕ ᓂᑑᑭᒫᐎᐎᓐ᙮ 3 ᒦᔥ ᐅᐅ ᐁᔅᑕᕒ ᑭᒋᐅᑭᒫᑴ ᑳᐃᔑ ᓇᑴᑕᕽ, ᑮᔥᐱᓐ ᐃᑕᔥ ᒥᓍᐸᒥᔭᓐ, ᑫᒋᐅᑭᒫᐎᔭᓐ, ᑕᑲ ᒦᑕᔥ ᐁᔑ ᑲᑴᒋᒥᓈᓐ ᒋᐸᑭᑎᓂᔭᓐ ᒋᐱᒫᑎᓯᔮᓐ᙮ ᒦᔥ ᑲᔦ ᐁᔑ ᑲᑴᒋᒥᓈᓐ ᐱᓵᓐ ᒋᐱᒫᑎᓯᐙᒡ ᓃᒋᐱᒫᑎᓴᒃ᙮ 4 ᐃᑭ ᓴ ᓃᒋᐱᒫᑎᓴᒃ, ᑫᓃᓐ ᐃᑕᔥ ᓂᑮ ᐊᑖᐙᑳᓱᒥᓐ ᒋᓂᓯᑰᔮᕽ, ᐐᑫ ᐱᑯ ᒋᒑᑭᐃᑰᔮᕽ᙮ ᑮᔥᐱᓐ ᐃᑕᔥ ᐐᓐ ᐁᑕ ᐐᒥᒋ ᐊᑖᐙᑳᓱᔮᑭᐸᓐ ᒋᒥᑕᓄᑮᐃᑰᔮᕽ, ᑳᐐᓐ ᑭᑖᑮ ᐸᐹᒥᒥᓯᓅᓐ᙮ 5 ᒦᑕᔥ ᑭᒋᐅᑭᒫ ᑳᐃᔑ ᑲᑴᒋᒫᒡ ᑭᒋᐅᑭᒫᑴᓐ, ᐊᐌᓀᓐ ᐃᑕᔥ ᐊᐊ ᑫᑮ ᐃᔑᒋᑫᐸᓐ ᐅᐅ? ᐋᑎ ᐁᔮᒡ? 6 ᒦᔥ ᐅᐅ ᐁᔅᑕᕒ ᑳᐃᑭᑐᒡ, ᐊᐊ ᓴ ᑳᐐ ᒦᑳᔑᔭᒥᓐᒡ, ᑳᔒᑫᓂᒥᔭᒥᓐᒡ ᑲᔦ, ᒦ ᐄᑐᒃ ᐊᐊ ᒪᒋ ᐁᒪᓐ᙮ ᐐᑫ ᓴ ᑕᔥ ᐁᒪᓐ ᑮᑭᒋ ᓭᑭᓯ ᐁᓈᓴᒦᓂᒡ ᑭᒋᐅᑭᒫᓐ, ᑭᒋᐅᑭᒫᑴᓐ ᑲᔦ᙮ 7 ᑭᒋᐅᑭᒫ ᑕᔥ ᑮᐸᓯᑸ ᐁᑮ ᓇᑲᑕᕽ ᐅᒥᓂᑴᐎᓐ ᐁᑮ ᓂᔥᑳᑎᓯᒡ ᐁᑮ ᐊᓂ ᓵᑲᐊᕽ ᐁᐃᔖᒡ ᑭᒋᐅᑭᒫᐎ ᑭᑎᑳᓂᕽ᙮ ᐁᒪᓐ ᐃᑕᔥ ᐐᓐ ᑳᐐᓐ ᑮᓵᑲᐊᓰ ᐁᑮ ᑭᑫᑕᕽ ᐋᔕ ᐁᑮ ᐅᓀᑕᒥᓂᒡ ᑭᒋᐅᑭᒫᓐ ᐋᓃᓐ ᐙᑑᑖᑯᒡ᙮ ᐲᑎᒃ ᑮᐊᔮ ᐁᑮ ᑲᑴᒋᒫᒡ ᐁᔅᑕᕒᐊᓐ ᑭᒋᐅᑭᒫᑴᓐ ᒋᑰᐹᑌᓂᒥᑯᒡ᙮ 8 ᑭᒋᐅᑭᒫ ᑕᔥ ᐁᐱᑮᐌ ᐲᑎᑫᒡ ᑭᒋᐅᑭᒫᐎ ᑭᑎᑳᓂᕽ ᐁᑮ ᐃᔖᐸᓐ, ᐅᑮ ᐙᐸᒫᓐ ᐁᒪᓇᓐ ᐁᐃᔑ ᑲᐎᑖᓂᒡ ᑭᒋ ᑌᓴᐱᐎᓂᕽ ᐁᔑ ᐊᐱᓂᒡ ᐁᔅᑕᕒᐊᓐ᙮ ᒦᔥ ᑭᒋᐅᑭᒫ ᑳᐃᑭᑐᒡ, ᒦ ᓇ ᐃᐃᒫ ᐙᑕᔒᑲᐙᒡ ᑭᒋᐅᑭᒫᑴᓐ ᐁᓈᓴᒦᐗᒃ, ᓂᑑᑭᒋᐅᑭᒫᐎᑲᒥᑯᕽ? ᐁᐲᒋ ᐃᔥᒀ ᑳᑮᑭᑐᒡ ᐃᑕᔥ ᑭᒋᐅᑭᒫ, ᒦ ᐃ ᐋᔕ ᑮᐋᑲᐐᑴᐃᑲᓂᐎᒡ ᐁᒪᓐ᙮ 9 ᐯᔑᒃ ᐃᑕᔥ ᐃᓂ ᐯᒦᑖᑯᒡ ᐋᕒᐴᓇ Harbona ᐁᔑᓂᑳᓱᓂᒡ ᐅᑮᐃᑰᓐ, ᐁᒪᓐ ᐄᑐᒃ ᐅᑮ ᐅᔑᑑᓐ ᐁᔑᑖᒡ ᐊᐎᔭ ᑳᔑ ᐊᑰᒋᑲᓂᐎᒡ ᐙᐃᔑ ᐊᑰᓈᐸᓐ ᒸᕒᑎᑳᐃᔭᓐ Mordecai ᑳᑮ ᐱᒫᒋᑑᓂᒡ ᑭᐱᒫᑎᓯᐎᓐ᙮ ᓃᔣᓯᒥᑕᓇᔑᓈᓇᓐ ᑕᓱᒥᓯᑦ ᐊᐲᑕᑭᑌᓂ᙮ ᒦᔥ ᑭᒋᐅᑭᒫ ᑳᐃᑭᑐᒡ, ᒦ ᐃᒫ ᐃᔑ ᐊᑰᓂᒃ ᐁᒪᓐ᙮ 10 ᒦᑕᔥ ᐃᐃᒫ ᐁᒪᓐ ᑳᐃᔑ ᐊᑰᓂᓐᒡ ᐊᐎᔭ ᑳᔑ ᐊᑰᒋᑲᓂᐎᒡ ᑳᐐ ᐃᔑ ᐊᑰᓈᐸᓐ ᒸᕒᑎᑳᐃᔭᓐ᙮ ᒦᔥ ᑭᒋᐅᑭᒫ ᑳᐊᓂ ᐋᑌᑭᑖᓱᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society