Ehstar 6 - ᐅᒋᐺ ᑭᒋᒪᓯᓇᐃᑲᓐᑭᒋᐅᑭᒫ ᑮᑭᑌᓂᒫᒡ ᒸᕒᑎᑳᐃᔭᓐ 1 ᐃᐃ ᑕᔥ ᐁᑎᐱᑲᓂᓂᒃ ᑭᒋᐅᑭᒫ ᑳᐐᓐ ᐅᑮ ᑲᔥᑭᑑᓰᓐ ᒋᓂᐹᒡ᙮ ᒦᔥ ᑳᑮ ᐊᓅᑮᒡ ᒋᐲᒋᑳᑌᓂᒃ, ᑲᔦ ᒋᐊᓇᒥᒋᑳᑌᓂᒃ ᐁᔑ ᐅᔑᐲᐃᑳᑌᓂᒃ ᑲᑭᓇ ᑫᑰᓐ ᑳᐱ ᐃᓇᑲᒥᑲᓂᓂᒃ ᐊᐸᓀ ᑳᐱᐅᒋ ᑭᒋᐅᑭᒫᐎᒡ᙮ 2 ᒦᑕᔥ ᑳᑮ ᒥᑭᑳᑌᒃ ᐁᐃᔑᐲᐃᑳᑌᓂᒃ ᐋᓃᓐ ᒸᕒᑎᑳᐃᔭᓐ Mordecai ᑳᑮ ᐃᔑ ᑎᐹᒋᒫᓂᒡ ᐱᒃᑌᓇᐗᓐ Bigthana, ᐃᓂ ᑲᔦ ᑏᕒᐁᔕᓐ Teresh ᑳᑮ ᓃᔑᓂᒡ ᑭᒋᐅᑭᒫ ᐁᓄᑮᑖᑯᒡ ᑳᑮ ᑲᓇᐌᑕᒥᓂᒡ ᑭᒋᐅᑭᒫ ᐅᑎᔥᒀᑌᒻ᙮ ᒦᐗᒃ ᐄᑐᒃ ᐅᑯ ᑳᑮ ᐐ ᓂᓵᐙᐸᓐ ᑭᒋᐅᑭᒫᓐ ᓭᕒᐊᒃᓰᔅ Xerxes ᐁᔑᓂᑳᓱᓂᒡ᙮ 3 ᑭᒋᐅᑭᒫ ᑕᔥ ᑮᐃᔑ ᑲᑴᑗ, ᐋᓃᓐ ᐃᑕᔥ ᑳᐃᔑ ᑭᑌᑖᑯᒋᑲᓂᐎᒡ ᒸᕒᑎᑳᐃ, ᐋᓃᓐ ᑲᔦ ᑳᐃᔑ ᑎᐸᐊᒪᐎᓐᒡ ᐅᐅᐌᓂ? ᑳᐐᓐ ᑫᑰᓐ ᑮᐃᔑ ᑎᐸᐊᒪᐙᓰ, ᐅᑮᐃᑰᓐ ᑳᑮ ᐸᒥᐃᑯᒡ᙮ 4 ᑭᒋᐅᑭᒫ ᑕᔥ ᑮᐃᑭᑐ, ᐊᐌᓀᓐ ᐁᔮᒡ ᐅᐅᒫ ᐅᑭᒫᐎᑲᒥᑯᕽ? ᐁᒪᓐ Haman ᐃᑕᔥ ᓅᑯᒻ ᑮᐱ ᐲᑎᑫ ᑭᒋᐅᑭᒫᐎᑲᒥᑯᕽ᙮ ᐁᐐ ᐱ ᑲᑴᒋᒫᒡ ᑭᒋᐅᑭᒫᓐ ᒋᐊᑰᓈᓂᒡ ᒸᕒᑎᑳᐃᔭᓐ ᐃᐃᒫ ᐊᑰᒋᑲᓈᑯᕽ ᑳᑮ ᐅᔑᑑᒡ᙮ 5 ᑭᒋᐅᑭᒫ ᑕᔥ ᐅᑮᐃᑰᐞ ᐯᒦᑖᑯᒡ, ᐁᒪᓐ ᐊᑾᒌᕽ ᓃᐸᐎ ᐁᐐ ᐙᐸᒥᒃ᙮ ᒦᔥ ᑳᐃᑭᑐᒡ, ᐱᓵᓐ ᑕᐲᑎᑫ᙮ 6 ᐊᐲ ᑕᔥ ᑳᐲᑎᑫᓂᒡ ᐅᐅ ᐅᑮᐃᓈᓐ, ᐊᔮ ᓴ ᐯᔑᒃ ᐃᓂᓂ ᐁᒥᓴᐌᑕᒫᓐ ᐁᐐ ᓈᑯᑑᔮᓐ ᐁᐐ ᑭᒋ ᐃᓀᓂᒪᒃ᙮ ᐋᓃᓐ ᐃᑕᔥ ᐃᓇᑫ ᑫᑑᑕᐎᑎᐸᓐ? ᐁᒪᓐ ᐃᓴ ᑮᐃᓀᑕᒻ, ᐊᐌᓀᓐ ᐃᑕᔥ ᐃᓈ ᐸᑳᓐ ᑭᒋᐅᑭᒫ ᐙᑭᒋ ᐃᓀᓂᒫᒡ᙮ ᓃᓐ ᑫᒋᓈᒡ ᑳᐃᔑᒡ᙮ 7 ᒦᑕᔥ ᐁᒪᓐ ᑳᐃᓈᒡ ᑭᒋᐅᑭᒫᓐ, ᐊᐊ ᓴ ᑳᐐ ᑭᒋ ᐃᓀᓂᒪᒡ ᒦ ᓴ ᐅᐌ ᑫᑑᑕᐗᒡ᙮ 8 ᑭᑲ ᐱᓯᑲᒨᓈ ᐃᓴ ᑭᒋᐅᑭᒫ ᐅᑲᔥᑮᑮᐎᓐ, ᑕᐸᑭᑎᓈ ᑲᔦ ᒋᐱᒥᐗᓈᓂᑯᒡ ᑭᒋᐅᑭᒫᓐ ᐅᒥᑕᑎᒨᒥᓂ, ᐐᑫ ᑕᔥ ᑲᔦ ᒋᐗᐌᔑᒋᑲᓂᐎᓂᒡ ᐃᓂ ᒥᑕᑎᒨᓐ᙮ 9 ᐯᔑᒃ ᐃᑕᔥ ᑭᑎᓂᓃᒻ ᒫᐗᒡ ᐁᔥᐯᑖᑯᓯᒡ ᐅᑲ ᐱᒋᑯᓇᔦᐋᓐ, ᒋᓇᒪᑕᐱᓂᒡ ᑲᔦ ᐗᑭᒋ ᒥᑕᑎᒧᕽ ᐃᓂ ᐃᓂᓂᐗᓐ ᑭᒋᐅᑭᒫ ᑳᐐ ᑭᒋ ᐃᓀᓂᒫᒡ᙮ ᒦᔥ ᑫᔑ ᐸᐹ ᓴᑳᐲᑭᓈᒡ ᐃᓂ ᒥᑕᑎᒨᓐ ᔖᑄᔭᐄ ᒦᑲᓈᕽ ᑭᒋ ᐆᑌᓈᕽ᙮ ᒦᑕᔥ ᐅᐅ ᑫᐃᑭᑐᒡ, ᒦ ᓴ ᐅᐌ ᐁᑑᑕᐎᓐᒡ ᐊᐊ ᐃᓂᓂ ᑭᒋᐅᑭᒫᓐ ᑳᐐ ᑭᒋ ᐃᓀᓂᒥᑯᒡ! 10 ᒦᑕᔥ ᑭᒋᐅᑭᒫ ᑳᐃᓈᒡ ᐁᒪᓇᓐ, ᐊᐤ ᐃᑕᔥ, ᐅᑎᓇᓐ ᑭᒋᐅᑭᒫᐎ ᑲᔥᑮᑮᐎᓐ, ᐅᑎᓐ ᑲᔦ ᒥᑕᑎᒻ ᒋᑑᑕᐗᒡ ᐃᐃ ᑳᐃᑭᑐᔭᓐ ᐊᐊ ᒎ ᒸᕒᑎᑳᐃ ᑳᓇᒪᑕᐱᒡ ᑭᒋᐅᑭᒫᐎᔥᒀᑌᕽ᙮ ᒪᔮ ᐱᑯ ᐃᔑᒋᑫᓐ ᐃᐃ ᑳᐃᑭᑐᔭᓐ᙮ 11 ᒦᔥ ᐁᒪᓐ ᑳᑮ ᐅᑎᓇᕽ ᑭᒋᐅᑭᒫᐎ ᑲᔥᑮᑮᐎᓐ, ᐁᑮ ᐱᓯᑲᒨᓈᒡ ᒸᕒᑎᑳᐃᔭᓐ, ᐁᑮ ᐅᑎᓈᒡ ᑲᔦ ᒥᑕᑎᒨᓐ ᑫᔑ ᐱᒥᐗᓈᓱᓂᒡ᙮ ᒦᔥ ᑲᔦ ᑳᔑ ᐸᐹ ᓴᑳᐲᑭᓈᒡ ᒥᑕᑎᒨᓐ ᒥᓯᐌ ᐆᑌᓈᕽ ᒦᑲᓈᑳᕽ ᐁᑮ ᐃᑭᑐᒡ ᐁᐊᓂ ᐱᒧᓭᒡ, ᐃᓇᔥ ᑲᔦ ᐙᐸᑕᒧᐙᒃ ᐃᓇᑫ ᐁᔑ ᑎᐸᐊᒪᐙᒡ ᑭᒋᐅᑭᒫ ᐃᓂᓂᐗᓐ ᐙᑭᒋ ᐃᓀᓂᒫᒡ! 12 ᓈᓈᑫ ᑕᔥ ᒸᕒᑎᑳᐃ ᑮᐊᓂᔑ ᑮᐌ ᑭᒋᐅᑭᒫᐎ ᐃᔥᒀᑌᕽ᙮ ᒦᔥ ᑫᐐᓐ ᐁᒪᓐ ᐌᐐᑉ ᑳᐊᓂᔑ ᑮᐌᒡ ᐁᑮ ᐋᑲᐐᑴᓂᑎᓱᒡ ᑳᐊᐲᑕᑲᒋᒡ᙮ 13 ᐅᑮ ᐐᑕᒪᐙᓐ ᐐᐗᓐ, ᐃᐃ ᑲᔦ ᑲᑭᓇ ᐅᓵᑭ ᐐᒌᐙᑲᓇᐞ ᑲᑭᓇ ᑫᑰᓐ ᑳᑮ ᐃᔑᓭᒡ᙮ ᒦᔥ ᐅᐅ ᑳᐃᑯᒡ, ᒦᐃ ᐋᔕ ᐁᐊᓂ ᔖᑰᒋᐃᒃ ᐊᐊ ᒎ ᒸᕒᑎᑳᐃ᙮ ᑳᐐᓐ ᑫᒋᓈᒡ ᑭᑖ ᔖᑰᒋᐋᓰ᙮ ᐐᑫ ᒫᐐᓐ ᑭᑲ ᓂᔑᐙᓈᒋᐃᒃ! ᐁᒪᓐ ᑮᓂᓯᓐᒡ 14 ᒣᒀ ᑕᔥ ᐁᑲᑲᓅᓂᑎᐙᒡ, ᒦ ᓴ ᐃ ᑭᒋᐅᑭᒫ ᐯᒦᑖᑯᒡ ᑳᑮ ᐱᑕᑯᔑᓂᓂᒡ, ᐌᐐᑉ ᐁᑮ ᐃᔑᐎᓈᓂᒡ ᐁᔑ ᐐᑾᑫᓂᒡ ᐁᔅᑕᕒᐊᓐ ᐋᔕ ᑳᑮ ᑾᔮᒋᑑᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society