Ehstar 4 - ᐅᒋᐺ ᑭᒋᒪᓯᓇᐃᑲᓐᒸᕒᑎᑳᐃ ᑮᑲᑴᒋᒫᒡ ᐁᔅᑕᕒᐊᓐ ᒋᐐᒋᐃᑯᒡ 1 ᐊᐲ ᓴ ᑕᔥ ᒸᕒᑎᑳᐃ Mordecai ᑳᑭᑫᑕᕽ ᑲᑭᓇ ᑳᐃᓇᑲᒥᑲᓂᓂᒃ, ᒦ ᓴ ᐃ ᑳᔑ ᑖᔥᑮᑭᐱᑑᒡ ᐅᑭᑭᔥᑭᑲᓇᓐ ᐁᑮ ᒫᓀᑕᕽ᙮ ᒦᔥ ᑳᐃᔑ ᐱᓯᑲᕽ ᐊᓴᐸᑕᐲᐌᑭᓐ, ᐱᑸ ᑲᔦ ᐁᑮ ᐊᑑᒡ ᐅᑎᒀᓂᕽ ᐁᑮ ᐸᐹᒧᓭᒡ ᑭᒋ ᐆᑌᓈᕽ ᐁᓂᑯᒃ ᐁᑮ ᒪᐎᒡ, ᐁᑮ ᐐᓴᑲᒪᒋᐅᒡ ᑲᔦ᙮ 2 ᑳᐐᓐ ᐃᑕᔥ ᐐᓐ ᑮᐲᑎᑫᓰ ᑭᒋᐅᑭᒫᐎ ᐃᔥᒀᑌᕽ ᐋᓃᔥ ᑳᐐᓐ ᐊᐎᔭ ᑮᐸᑭᑎᓈᓰ ᒋᐲᑎᑫᒡ ᐃᐃᒫ ᐊᐎᔭ ᑭᑭᔥᑲᕽ ᐊᓴᐸᑕᐲᐌᑭᓐ᙮ 3 ᒥᓯᐌ ᓴ ᑯ ᐊᑮᕽ ᑳᑭᑫᑖᑾᓂᓂᒃ ᑭᒋᐅᑭᒫ ᐅᑑᓇᔓᐌᐎᓐ, ᒎᐗᒃ ᐃᓴ ᑮᑭᒋ ᒪᐎᐗᒃ᙮ ᑳᐐᓐ ᐅᒋᑕ ᑮᐐᓯᓂᓰᐗᒃ, ᐁᑮ ᓅᑖᑯᓯᐙᒡ ᐁᑮ ᒪᐎᐙᒡ᙮ ᓃᐱᐗᐞ ᐅᑮ ᑭᑭᔥᑳᓈᐙᓐ ᐊᓴᐸᑕᐲᐌᑭᓅᓐ ᐱᑸᕽ ᐁᑮ ᐃᔑ ᐱᒥᔑᓄᐙᒡ᙮ 4 ᐊᐲ ᑕᔥ ᐁᔅᑕᕒ Esther ᑳᐐᑕᒫᑯᒡ ᐯᒥᐃᑯᒡ ᐃᑴᐗᐞ, ᐃᐃ ᑲᔦ ᐯᒦᑖᑯᒡ ᐃᓂᓂᐗᐞ ᐋᓃᓐ ᐁᔑᒋᑫᓂᒡ ᒸᕒᑎᑳᐃᔭᓐ, ᐐᑫ ᓴ ᑮᒥᑯᔥᑳᑌᑕᒻ᙮ ᒦᔥ ᑳᑮ ᐃᔑᓂᔕᐊᕽ ᑭᑭᔥᑭᑲᓇᓐ ᑫᐱᓯᑲᒥᓂᒡ, ᒋᑭᑭᔥᑲᓯᓂᒃ ᐊᓴᐸᑕᐲᐌᑭᓐ᙮ ᑳᐐᓐ ᐃᑕᔥ ᑮᐃᓀᑕᓰᐗᓐ᙮ 5 ᑭᒋᐅᑭᒫ ᐄᑐᒃ ᐅᑮ ᐅᓇᑭᒫᓐ ᐁᑕᒃ Hathach ᐁᔑᓂᑳᓱᓂᒡ ᒋᐸᒥᐋᓂᒡ ᐁᔅᑕᕒᐊᓐ᙮ ᐁᔅᑕᕒ ᑕᔥ ᐅᑮ ᑲᓅᓈᓐ ᐁᑕᑰᓐ ᒋᐊᑕ ᐙᐸᒫᓂᒡ ᒸᕒᑎᑳᐃᔭᓐ ᒋᑲᑴ ᑭᑫᑕᒥᓂᒡ ᐌᑯᓀᓐ ᑳᒥᑯᔥᑳᑌᑕᒥᐃᑯᓂᒡ, ᐌᑯᓀᓐ ᑲᔦ ᐌᒋ ᒥᑯᔥᑳᑌᑕᒥᓂᒡ᙮ 6 ᒦᔥ ᐁᑕᒃ ᑳᑮ ᐊᑕ ᐙᐸᒫᒡ ᒸᕒᑎᑳᐃᔭᓐ ᐁᔑᐊᔮᓂᒡ ᐁᔑ ᓂᑖ ᒫᐗᒋᐃᑎᕽ ᑭᒋ ᐆᑌᓈᕽ ᐁᓂᔑ ᐲᑎᑫᓈᓂᐗᓂᓂᒃ ᑭᒋᐅᑭᒫᐎᑲᒥᑯᕽ᙮ 7 ᒸᕒᑎᑳᐃ ᐃᓴ ᑕᔥ ᐅᑮ ᐐᑕᒪᐙᓐ ᑲᑭᓇ ᑫᑰᓐ ᑳᐃᔑᓭᒡ᙮ ᑮᑎᐹᒋᒧ ᑲᔦ ᐋᓃᓐ ᒥᓂᒃ ᔔᓂᔮᓐ ᐁᒪᓇᓐ Haman ᑳᐸᑭᑎᓈᓂᒡ ᐃᐃᒫ ᐁᔑ ᐊᓯᒥᓐᒡ ᑭᒋᐅᑭᒫ ᐅᔔᓂᔮᒪᓐ ᒋᐋᐸᑎᓯᓂᒡ ᓂᓯᒥᓐᒡ ᒎᐗᐞ᙮ 8 ᒸᕒᑎᑳᐃ ᑕᔥ ᐅᑮ ᒦᓈᓐ ᐁᑕᑰᓐ ᐅᔑᐲᐃᑲᓐ ᐁᔑ ᐅᔑᐲᐃᑳᑌᓂᒃ ᑭᒋᐅᑭᒫᓐ ᐅᑎᓈᑯᓂᑫᐎᓂᓂ ᒋᒑᑭᐃᑣ ᒎᐗᒃ᙮ ᐃᐃ ᑕᔥ ᐅᔑᐲᐃᑲᓐ ᐌᑎ ᐆᑌᓈᕽ ᓲᓴ Susa ᑮᑕᔑ ᐅᔑᐲᐃᑳᑌᓂ᙮ ᒦᑕᔥ ᑳᑮ ᐅᒋ ᒦᓈᒡ ᒋᐊᐎ ᐙᐸᑕᐋᓂᒡ, ᒋᐐᑕᒪᐙᓂᒡ ᑲᔦ ᐁᔅᑕᕒᐆᓐ᙮ ᐅᑮ ᐊᑕᐌᓂᒫᓐ ᐁᔅᑕᕒᐆᓐ ᒋᐊᑕ ᐙᐸᒫᓂᒡ ᑭᒋᐅᑭᒫᓐ ᒋᑲᑴᒋᒫᓂᒡ ᒋᑰᐹᑌᓂᒥᑯᐙᒡ, ᒋᑲᑴᑗᑕᒪᐙᓂᒡ ᑲᔦ ᒎᐗᐞ Jews ᒋᓈᑕᒪᐎᒥᓐᒡ᙮ 9 ᒦᑕᔥ ᐁᑕᒃ ᑳᑮ ᐱᑮᐌᒡ ᐁᑮ ᐐᑕᒪᐙᒡ ᐁᔅᑕᕒᐆᓐ ᐋᓃᓐ ᑳᐃᑯᒡ ᒸᕒᑎᑳᐃᔭᓐ᙮ 10 ᐁᔅᑕᕒ ᑕᔥ ᐅᐅ ᑮᐃᔑ ᓇᑴᑕᒻ, ᐁᑮᐃᓈᒡ ᐁᑕᑰᓐ Hathach ᐅᐅ ᒋᐊᐎᐃᓈᓂᒡ ᒸᕒᑎᑳᐃᔭᓐ, 11 ᑲᑭᓇ ᐅᔕ ᑭᒋᐅᑭᒫ ᐅᑕᓄᑮᐋᑲᓇᐞ, ᑲᑭᓇ ᑲᔦ ᑳᑎᐯᓂᒫᒡ ᐯᒫᑎᓯᓂᒡ ᐁᔮᓂᒡ ᐅᑕᑮᒥᕽ, ᐅᑭᑫᑕᒥᓂ ᐁᔑᓯᓂᓂᒃ ᐃᓈᑯᓂᑫᐎᓐ᙮ ᑮᔥᐱᓐ ᐃᓂᓂ, ᑯᒫ ᑲᔦ ᐃᑴ ᐊᑕ ᐙᐸᒫᒡ ᑭᒋᐅᑭᒫᓐ ᐃᐃᒫ ᑳᔑ ᐊᔮᓂᒡ ᑭᒋᐅᑭᒫᐗᐱᐎᓂᕽ, ᐊᑐᒥᑯᓯᒃ ᑭᒋᐅᑭᒫᓐ, ᒦᔥ ᐁᑕᑯᐃ ᐁᔑᓈᑾᓂᓂᒃ ᒋᓂᓯᑎᐸᓐ᙮ ᒦ ᐁᑕ ᑯ ᑫᔑ ᓂᓵᓯᐎᑎᐸᓐ ᑮᔥᐱᓐ ᑭᒋᐅᑭᒫᓐ ᓃᒫᑯᓇᒫᑯᒡ ᑳᐅᓵᐙᐱᑯ ᔔᓂᔮ ᐙᐱᑯᐗᓂᓂᒃ ᓴᑲᐅᓈᑯᓂ᙮ ᒦ ᐅᔕ ᐃ ᐋᔕ ᓂᓯᒥᑕᓇ 30 ᑕᓱ ᑮᔑᒃ ᐁᐃᔑᓭᒃ ᐃᔥᒀᒡ ᑳᑮ ᐊᑐᒥᐸᓐ ᒋᐙᐸᒪᒃ ᑭᒋᐅᑭᒫ, ᑮᐃᑭᑐ᙮ 12 ᐊᐲ ᑕᔥ ᒸᕒᑎᑳᐃ ᑳᓅᑕᕽ ᐋᓃᓐ ᑳᐲᐃᑯᒡ ᐁᔅᑕᕒᐆᓐ, 13 ᒦᔥ ᒸᕒᑎᑳᐃ ᐅᐅ ᑳᐃᔑ ᓇᑴᑕᐙᒡ, ᑫᑯ ᐃᓀᑕᑫᓐ ᐁᐊᔮᔭᓐ ᑭᒋᐅᑭᒫᐎᑲᒥᑯᕽ ᑮᓐ ᐁᑕ ᒋᐅᒋ ᔖᐾᔭᓐ ᐃᐃ ᒎᐗᒃ ᑳᐐ ᑑᑕᐎᑣ᙮ 14 ᑮᔥᐱᓐ ᓴ ᑫᑰᓐ ᐃᑭᑐᓯᐗᓐ ᓅᑯᒻ ᐅᐅ ᑳᐃᔑᓭᒃ ᐸᑳᓐ ᒫᐐᓐ ᒥᓴᐙ ᑕᐅᒌᒪᑲᓐ ᑫᓈᑕᒫᑯᐙᒡ, ᑫᔖᐾᐃᑯᐙᒡ ᑲᔦ ᒎᐗᒃ᙮ ᑮᓐ ᐃᑕᔥ ᐐᓐ, ᐃᑭ ᑲᔦ ᑭᑌᑌᑳᕽ ᑳᐅᒌᐙᒡ ᑲᑭᓇ ᓴ ᑭᑲ ᓂᓯᑰᒻ᙮ ᒦ ᒪᐐᓐ ᐅᐅ ᑳᐅᒋ ᑭᒋᐅᑭᒫᑴᐎᔭᓐ ᐅᐅ ᐃᔑᐊᐲ᙮ 15 ᐁᔅᑕᕒ ᑕᔥ ᐅᐅ ᑮᐃᔑ ᐊᓅᑮ ᒋᐊᐎᐃᓂᒥᓐᒡ ᒸᕒᑎᑳᐃᔭᓐ: 16 ᐊᐤ, ᒫᒑᓐ ᐊᐎ ᐐᑕᒪᐤ ᒋᒫᐗᒋᐃᑎᐙᒡ ᑲᑭᓇ ᒎᐗᒃ ᐌᑎ ᓲᓴ ᐆᑌᓈᕽ ᐁᔮᐙᒡ, ᑫᑯ ᑕᔥ ᐊᐲ ᐐᓯᓂᑫᒃ ᒋᐊᓇᒥᐁᑕᒪᐎᔦᒃ᙮ ᑫᑯ ᐐᓯᓂᑫᒃ ᑫᑯ ᑲᔦ ᒥᓂᑴᑫᒃ ᓂᓱᑮᔑᒃ, ᑎᐱᑲᒃ, ᑮᔑᑲᒃ ᑲᔦ᙮ ᒦ ᓴ ᐃ ᑫᓃᓇᐎᓐᑦ ᑫᐃᔑᒋᑫᔮᕽ ᐃᑭ ᐃᑴᐗᒃ ᑳᐐᒋᐃᐙᒡ ᒋᐐᓯᓂᓯᐙᕽ ᒋᒥᓂᑴᓯᐙᕽ ᑲᔦ ᒋᐊᓇᒥᐋᔮᕽ᙮ ᒦᑕᔥ ᑫᔑ ᐊᑕ ᐙᐸᒪᒃ ᐊᐊ ᑭᒋᐅᑭᒫ ᒋᐃᔑᒋᑫᔮᓐ ᑳᐃᓇᑌᓯᓄᒃ ᐅᓇᔓᐌᐎᓐ᙮ ᑮᔥᐱᓐ ᓴ ᐅᐅ ᐅᒋ ᓂᐳᔮᓐ, ᒦ ᓴ ᐃ ᐱᓵᓐ ᒋᓂᐳᔮᓐ, ᑮᐃᑭᑐ᙮ 17 ᒦᔥ ᒸᕒᑎᑳᐃ ᑳᐊᓂᔑ ᒫᒑᒡ ᑲᑭᓇ ᐁᑮ ᐃᔑᒋᑫᒡ ᑳᑮ ᐃᔑ ᐊᓅᓂᑯᒡ ᐁᔅᑕᕒᐆᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society